He̍briyu 8:3 - Ya Baru nga Tulag

³ Ket diya amin nga kangatuwan nga agsirsirbi iya pagdaydayawan, rebbeng da nga amin ya mangidatun ka sagsagut se̍ naidaga nga datun e̍ Apu Diyus. Dikad pe̍ idi nga Kangatuwan nga Agsirsirbi nga mangibegbeggi dactida e̍ Apu Diyus itan, masapul met pe̍ nga uwed idatun na.

He̍briyu 8:3 Iomraidhean Croise

Juan 6:51

Iyaken mettas ya pagbiyag nga maiyarig ka pakabiyagan nga naggayat ka langit. Ket ya orey nagan na nga toley nga mangan idi nga pagbiyag nga ipaay ku, agbiyag met ka agnanayun. Ket idi nga pagbiyag, itu mettas ya beggic nga iyawat ku nad tasun uwed pakabiyagan diya toltoley idi nga lubung,” kunen ne̍ Je̍sus.

Ruma 4:25

Ket e̍ Je̍sus, igina met ya naiyawat nga napatey gapu kadiya basbasul tida. Ket napagungar tasun mapalinteg tida iya imatang ne̍ Apu Diyus.

Ruma 5:6

Ket itun, awan pekkem mas kabaellan tida nga mangay-ayu e̍ Apu Diyus, ket itu mettin to kustu nga timpu niya pannakaibon ne̍ Kristu, tasun matey para dactida nga toley nga madi nagdayaw e̍ Apu Diyus.

Ruma 5:8

Ngem no e̍ Apu Diyus nga gennung, nipasingen na nga nalaing ya ayat na dactida. Ta ito sibabasul tida pekkem, natey met nge̍ Kristu para dactida itun.

Galasiya 2:20

Ngarud, naibilang ngac nga natey yin gapu ta nairaman nac ito pannakailansa ne̍ Kristu ito krus na. Ngem orey naibilang ngac nga nairaman ito pannakatey ne̍ Kristu, sibibiyag gac pekkem. Ngem bekken nga ya gangey niya kinatoley ku ya mangituray iyaken nin, no di lugud ya gangey ne̍ Kristu win, ta uwed met iyaken nge̍ Kristu win. Ket idi nga panagbiyag ku ita, ipaay ku was iya Anac ne̍ Apu Diyus, gapu ta igina met ya patpatiyec, nga igina ya nangipateg iyaken, se̍ ya nangipalubus iya pannakaidatun niya beggi na para iyaken.

E̍pe̍su 5:2

Ta to panangipateg ne̍ Kristu dactida itun, itu kuma ya ugali nga tultuladen nu ita iya panagbiyag nu. Ta e̍ Kristu, nipalubus na met ya pannakaidatun niya beggi na mettas para dactida. Ket inannamungan ne̍ Apu Diyus yan nga winangel na, nga arig nga nabangug nga sagut se̍ datun nga makaay-ayu mettas e̍ Apu Diyus.

Titu 2:14

Igina met ya nangipalubus nga naidatun ya biyag na para dactida, tasun subbuten nactida iya turay diya amin nga kita niya kinadake̍c, se̍ tasun pagbalinen nactida nga kuwa na nga toley nga awanan basul, se̍ napasnec iya panagwangel ka nabaru.

He̍briyu 2:17

Ket itu nga masapul nga linak-am ne̍ Je̍sus diya amin nga kasasaad diya naibilang nga kakabsat na, tasun igina kuma ya agbalin nga managkaasi se̍ mapagtalkan nga Kangatuwan nga Agsirsirbi, nga mangibegbeggi dactida e̍ Apu Diyus. Ket iya agten iyan, inariman nan ya pannakaudas nga pakapakawanan diya basbasul diya toley.

He̍briyu 3:1

Itu nga dakayu nga kakabsat nga pinili ne̍ Apu Diyus nga toley na se̍ kabulun mi nga maipaayan ka nailangitan nga saad, ut-utuben nu kuma ya maipanggep e̍ Je̍sus. Ta igina met ya nibon ne̍ Apu Diyus nga arig nga apustul, se̍ igina pe̍ ya tutu nga Kangatuwan nga Agsirsirbi nga mangibegbeggi iya pammati tida.

He̍briyu 5:1

Tutu met yan, ket laglagipen tida kuma pe̍ yani: Diya amin nga kangatuwan nga agsirsirbi iya pagdaydayawan idi nga lubung, toley da ngas nga nadutukan. Ket igida diya naisaad nga mangibegbeggi kadiya toley e̍ Apu Diyus. Igida pe̍ diya mangidatun kadiya sagsagut se̍ naidaga nga datun e̍ Apu Diyus, gapu kadiya basbasul diya toley.

He̍briyu 7:27

Igina, bekken pe̍ nga agten kadito nona nga naisaad nga kangatuwan nga agsirsirbi ito pagdaydayawan, ta no igida, nasapul da nga inalgew nga agdatdatun gapu kadiya basul da mettas se̍ gapu kadiya basbasul diya duduma nga toley. Ngem igina nga gennung, bekken nga masapul nga agten iyan. Ta nam-ame̍nsan ngas met nga nidatun na ya mismu nga beggi na nga naipaay kadiya basbasul diya toltoley, ket kustu win para iya amin nga timpu.

He̍briyu 8:4

Ket no idi nga lubung kuma pekkem ya edyan na, madi met maibilang nga kustu nga agsirsirbi. Ta no idi nga lubung, uwed mettin diya sigud nga agsirsirbi nga mangidatdatun kadiya sagsagut nga maikanatad mettas kadiya al-alagaden ito Linteg ne̍ Muyse̍s.

He̍briyu 9:14

Ket no agten iyan to pakadalusan da itun nga timpu, di ngarud nabilbileg pekkem ya pannakabalin niya daga ne̍ Kristu? Ta gapu iya panangiturung niya agnanayun nga Ispiritu, niyawat ne̍ Kristu e̍ Apu Diyus ya beggi na nga datun nga awan pagkurangan na. Ket gapu iya daga na, nadalusan diya lemlemmet tidan iya pakarigatan tida gapu ito panagtungpal tida kadito tungtungpalen nga awan mamaay da. Ket ita, siwayawaya tidan nga agsirbi iya sibibiyag nga Diyus.