He̍briyu 7:6 - Ya Baru nga Tulag

⁶ Ngem to Me̍lkise̍de̍c nga gennung, bekken met nga kapututan nito Le̍bi. Ngem orey bekken, ket ne̍cdan latta nito Abraham iya apagkapullu nito naalac na. Ket to Abraham, igina met ya nangikariyan ne̍ Apu Diyus kadiya nagpaay para dactida nga amin. Ngem orey agten iyan, uwed met ito Me̍lkise̍de̍c itun ya turay nga mangpadayaw ito Abraham iya imatang ne̍ Apu Diyus.

He̍briyu 7:6 Iomraidhean Croise

Aramid 3:25

Ket dakayu itan, nairaman kayu pe̍ yin ito kinagi dito mammadtu kadiya am-ama tida itun, ta kapututan dactida nga nairaman pe̍ ito nipatulag ne̍ Apu Diyus igida. Ket to nikari ne̍ Apu Diyus ito am-ama tida nga Abraham, ket agten idi: Gapu iya putut na, matulungan nad diya amin nga toltoley kadiya il-ili iya lubung.

Ruma 4:13

Laglagipen tida kuma pe̍ to nikari ne̍ Apu Diyus itun e̍ Abraham se̍ kadiya kapututan na, nga tagikuwaen da nad ya amin nga uwed iya lubung, nga arig nga tawid da. Ta nikari ne̍ Apu Diyus yan, bekken nga gapu ta nagtungpal to Abraham ka linteg, no di lugud gapu ta naibilang nga nalinteg gapu iya panamati na.

Ruma 9:4

Ket Israe̍lita da met. Igida met dito pinili ne̍ Apu Diyus itun nga pinagbalin na nga anac na. Igida diya nagedyanan niya kinadayaw ne̍ Apu Diyus, se̍ igida pe̍ diya kinatulag na. Ket igida diya nangitalkan na ito Linteg, se̍ to pudnu nga panagdayaw nga nibilin na igida, se̍ igida diya nagkariyan na pe̍ itun.

Galasiya 3:16

Ket agten met pe̍ iyan dito nikari ne̍ Apu Diyus ito Abraham se̍ iya kapututan na. Ngem bekken nga adu to nagkariyan ne̍ Apu Diyus, ta madi na met kinunen nga, “se̍ kadiya kapututam,” no di lugud kunen na, “se̍ iya kapututam.” Ket kayat na nga kagiyen nga is-isa yan nga kabulun nito Abraham nga nagkariyan na, ket e̍ Kristu mettas yan.

He̍briyu 11:13

Ket amin ditun nga toley, natey da nga sipapati, orey madi da pekkem naawat itun to nikari ne̍ Apu Diyus igida. Ngem arig nga nasingen da mettin, gapu ta namati da. Ket iya agten iyan, binigbig da ngarud nga arig da nga gan-gannaet idi nga lubung, nga awan pekkem kustu nga ili da itun.

He̍briyu 11:17

Ket to Abraham manin, gapu ta uwed panamati na, idatun na kuma nga tutu ya anac na nga Isaac kin, ito nibilin ne̍ Apu Diyus to pangsigir na ito Abraham. Ket to Abraham, idatun na kuma nga tutu win to kackaisu nga anac na itun, orey to Abraham mettas to nakaibagaan nito kari ne̍ Apu Diyus.

He̍briyu 7:1

Kaiyarigan ngarud ne̍ Je̍sus to Me̍lkise̍de̍c, ta to Me̍lkise̍de̍c, ket ari itun ka ili nga Sale̍m, se̍ mangibegbeggi pe̍ itun kadiya toltoley e̍ Apu Diyus nga Kangatuwan. Ket ito naggayat to Abraham nga nakigubat kadito duduma nga ar-ari nga inabac na, nawe̍ sinabet nito Me̍lkise̍de̍c. Ket nikararagan na ka pangpadayaw na ito Abraham iya imatang ne̍ Apu Diyus.

He̍briyu 7:7

Ket emmu tida met nga ya uwed turay na nga mangpadayaw, nangatngatu ngarud ya saad na ngem iya saad niya mapadayawan.