He̍briyu 6:11 - Ya Baru nga Tulag

¹¹ Ket ya gabay mi, ket agpasnec kuma ya tunggal isa dakayu iya panangpabileg nu iya panamati nu, nga agten mettas iya panagipasnec nu iya panangtulung nu kadiya kapada nu. Agten iyan kuma ya wanglen nu, tasun agingga iya panungpalan, awan pagkurangan niya kinatalged nu gapu iya namnama nu e̍ Apu Diyus.

He̍briyu 6:11 Iomraidhean Croise

Matyu 24:13

Ngem maisalakan nad met ya makaitured kadiyan agingga iya panagpatingga da.

Lukas 1:1

Patgec nga Apu Tiyupilu, adu win diya nagisurat nga nangurnus ka istorya maipanggep kadito napasamac iya edyan mi.

Ruma 12:8

Ket no ya pannakabalin nga mangpabileg iya lemlemmet niya pada tida nga toley ya nae̍cde̍ dactida, itu kuma ngarud ya biyangan tidan. Ket no uwed dactida ya pannakabalin nga mange̍cde̍ kadiya uwed dactida, nasayud tida kuma ngarud nga mangiwaras kadiya kasapulan diya toley. No uwed dactida ya pannakabalin nga mangipangulu, nagaget tida kuma ngarud nga mangipangulu. Ket no ya panangaasi ya nae̍cde̍ nga pannakabalin tida, mangaasi tida kuma ngarud nga siraragsac.

Ruma 15:13

Sapay kuma ta e̍ Apu Diyus nga paggayatan niya namnama tida, paragsaken nakayu kuma ka napalaus nga anggem se̍ talna, gapu iya panamati nu igina. Agten iyan kuma ngarud tasun dumacdackel ya namnama nu igina, gapu iya pannakabalin niya Ispiritu Santu nga uwed dakayu.

1 Kurintu 13:13

Ket uwed ngarud tellu nga awan panagpatingga da, nga itu ya panamati, se̍ ya sinanama nga panpanunut, se̍ ya panagayat. Ngem kangrunaan kadidi ya panagayat.

1 Kurintu 15:58

Dikad pe̍ patpatgec nga kakabsat, nabileg kuma nga pe̍yeng ya panamati nu, se̍ madi kayu kuma maawis ka sabali. Ket napasnec kuma nga pe̍yeng ya panagsirbi nu iya Apu, ta emmu nu nga uwed paglaingan niya panagbannug nu iya panagsirbi nu iya Apu.

Galasiya 5:5

Ngem no dakami, namnamaen mi ya pannakaibilang mi nga nalinteg iya imatang ne̍ Apu Diyus gapu iya Ispiritu na. Itu nga sinanama kami gapu iya panamati mi.

Galasiya 6:9

Itu nga madi tida kuma nga makumsa iya panagwangel ka nabaru. Ta no madi tida kumapuy kadidi, uwed ngarud arig nga maapit tida nga nabaru, no madatngan nad ya kustu nga timpu na.

Pilipus 3:15

Ket agten kuma pe̍ iyan ya panpanunut tida nga amin nga nabaked ya panamati na. Ngem no sabsabali ya panpanunut nu maipanggep iya orey nagan na kadiyan nga banbanag, ket ipakaawat ngarud pe̍ ne̍ Apu Diyus dakayu ya kinasabali na.

Kulusas 1:23

Ngem basta masapul nga sipapati kayu nga kanayun iya Anac. Ta nabaked se̍ napaut kuma ya panamati nu, tasun madi kayu lugud maiyaw-awan nga maisina iya namnama nga e̍cde̍ niya Makaparagsac nga Damag nga naikasaba dakayu itun. Ta itu mettas yan ya Makaparagsac nga Damag nga naipakaemmu ka amin nga toley iya lubungin. Ket iyaken nga Pablu, nagbalin nac met nga isa nga natalec nga mangikaskasaba iyan nga damag.

Kulusas 1:5

Ket idi nga panamati nu se̍ panagayat nu, maitutup met iya namnamaen nu, nga itu ya namnama nga naisagana para dakayu ka langit. Nadamag nu ya maipanggep iyan nga namnama ito naipakaemmu dakayu ya kinapudnu itun, nga itu mettas ya Makaparagsac nga Damag.

Kulusas 2:2

Agten iyan ngarud ya panangipakat ku dakayu, tasun bumileg kuma ya panpanunut nu nga amin, nga agbalin kuma nga is-isa diya panpanunut nu gapu iya panagiinnayat nu, ket se̍ tasun pakaragsakan nu kuma pe̍ ya pannakaawat nu nga awan pagkurangan na maipanggep iya pudnu. Ket iya agten iyan, maemmuwan nu ngarudin ya panggep ne̍ Apu Diyus maipanggep e̍ Kristu, nga madi pekkem naipakaemmu itun.

1 Te̍salunika 1:5

Ta ito nikasaba mi ya Makaparagsac nga Damag dakayu itun, uwed ngarud to nikagkagi mi nga nilawlawag mi dakayu, ket nabileg met to panamati nu ito kagi mi. Ngem bekken nas nga gapu kadito kagkagi mi to panamati nu itun, no di pe̍ lugud gapu iya pannakabalin ne̍ Apu Diyus se̍ ya tulung niya Ispiritu Santu. Ket emmu nu pe̍ nga napaw-is to ugali mi nga nasingen nu dakami ito nakibulbulun kami dakayu. Ta to panggep mi dakayu itun, yan nas mangtulung dakayu.

1 Te̍salunika 4:10

Ket pudnu met nga ayaten nun diya amin nga kakabsat tida nga mamati enna prubinsiya nga Mase̍dunya. Ngem ya ibaga mi ngas ket iyad-adda nu kuma pekkem ya agten iyan nga panagayat.

2 Te̍salunika 3:13

Ngem dakayu nga bekken nga agten iyan, kakabsat, madi kayu kuma ngarud nga mauma nga agwangel ka nabaru.

He̍briyu 10:22

Dikad pe̍ umadenni tida kuma ngarud e̍ Apu Diyus, nga sipupudnu tida kuma se̍ awan kuma duwaduwa tida iya panagtalged tida nga sipapati yin. Ta awan kansing tidan nga pannakadusa gapu ka basul, ta arig nga nawarsiyan diya lemlemmet tidan. Ket se̍ diya beggi tida, naibilang da nga nadalusanin, nga arig nga naugasan ka nadalus nga danum.

He̍briyu 3:14

Ta siguradu nga nagbalin tidan nga kabulun ne̍ Kristu no ituluy tida nga sipupudnu ya sigud nga panagtalec tida igina nga sipapasnec, agingga iya panungpalan.

He̍briyu 3:6

Ngem e̍ Kristu nga gennung, bekken nas met nga eb-ebbonen, no di lugud Anac ne̍ Apu Diyus, ket managtungpal iya panangituray na kadiya toley nga arig nga pamilya ne̍ Apu Diyus. Ket dactida, pamilya nactida met pe̍ no sipupudnu tida nga mangsalimetmet iya panagtalged se̍ panagnamnama tida igina nga pakaragsakan tida, agingga iya panungpalan.

1 Pe̍dru 1:21

Ket gapu igina, mamati kayu e̍ Apu Diyusin. Igina ya nangpaungar se̍ nangpadayaw e̍ Kristu, itu nga e̍ Apu Diyus ya patpatiyen se̍ namnamaen nun.

2 Pe̍dru 1:10

Itu nga kakabsat, sipapasnec kayu kuma ngarud nga mangpatalged iya pannakapili se̍ pannakaisaad nu. Ket no agten iyan ya wanglen nu, awan ngarud pakairraduwan nu iya imatang ne̍ Apu Diyusin.

2 Pe̍dru 3:14

Dikad pe̍ dakayu nga patpatgec, gapu ta namnamaen nu diyan, wanglen nu kuma ya patingga niya kabaellan nu nga mangtungpal kadiya gabay ne̍ Apu Diyus, tasun ibilang nakayu nga awan mansa winno pagkurangan na, nga katunus nakayun.

1 Juan 3:14

Dactida nga mamati, naiyalis tidan iya turay niya biyag, manipud iya turay niya patey. Ket ya panagayat tida kadiya kakabsat tida ka pammati, itu ya pakaemmuwan tida nga tutu yan. Ngem ya madi agayat kadiya kapada na, ket paiturayan met iya turay niya patey.

1 Juan 3:19

Ket ya napudnu nga panagayat tida iya kapada tida, itu ya pakaemmuwan tida nga kameng nactida ya pudnu nga pammati. Ket iya agten iyan, agtalged tida pe̍ iya imatang ne̍ Apu Diyus.

Paltiing 2:26

“Ket diya amin nga maibilang nga mangabac, nga mangituluy iya panangtungpal da iya tarigagay ku agingga iya panagpatingga niya biyag da, igida nad diya pange̍cde̍yac ka turay tasun iturayan da diya pagpagiliyan.