He̍briyu 6:1 - Ya Baru nga Tulag

¹ Dikad pe̍ isardeng tida kuma lugudin ya panangdagdagollit tida kadito nona nga naadal tida nga panursuru win maipanggep e̍ Kristu. Ituluy tida kuma ngarud ya panagadal ka pangpabaked iya panamati tida, nga tarigagayan tidan ya panamati nga nabaked nga awan pagkurangan na. Itu nga awan sirbi na dactidan no pasoliyan tida manin nga adalen dito nona nga panursuru maipanggep iya panagbabawi tida kadito tungtungpalen nga awan mamaay da, se̍ maipanggep no kumaan kuma niya panamati tida e̍ Apu Diyus.

He̍briyu 6:1 Iomraidhean Croise

Matyu 21:29

“Ngem kinunen met nito anac na, ‘Ahuh! Madi yac!’ kunen na. Ngem iya di nabayag, nagbabawi yin, ket nawe̍ mettas nagwangel.

Matyu 21:32

Ta ito inumbe̍t to Juan nga Mammautisar nga nangisuru dakayu iya nalinteg nga ugali, ket madi kayu met pinati. Ngem dito agsingsingir ka buis se̍ dito huste̍s, pinati da met nga gennung to Juan. Ket orey nasingen nu itun nga namati didi, madi kayu met latta nagbabawi se̍ namati.”

Matyu 3:2

nga kinunen na, “Masapul nga agbabawi kayu kadiya basbasul nu, ta dandani yin ya panangituray niya Nailangitan,” kunen na.

Matyu 4:17

Ket nanipud itun, rinugiyan ne̍ Je̍sus ya mangaskasaba, nga kinunen na iya panangasaba na, “Agbabawi kayu ngarudin, ta dandani mettin ya panangituray niya Nailangitan,” kunen na.

Matyu 5:48

Ngarud, dakayu, masapul nga agbalin kayu nga awan pagkurangan iya panagbiyag nu, nga agten mettas iya gangey niya nailangitan nga Ama nu, nga awan pagkurangan na.”

Matyu 7:25

Ket itun, nagudan, naglayus se̍ nagbelluut, ket nadalapus yan nga baley. Ngem madi met narogpac, ta batu met ya nangisaadan na.

Markus 1:1

Agten idi to pangrugiyan niya Makaparagsac nga Damag maipanggep e̍ Je̍su Kristu nga Anac ne̍ Apu Diyus.

Markus 6:12

Ket nawe̍ ngarudin dito adalan. Nikasaba da nga agbabawi kuma diya toltoley kadiya basbasul da.

Lukas 6:48

Ya agten kadiyan nga toley, maiyarig met iya isa nga nagpasikad ka baley. Nagkorob nga nona ka nauneg, ket pinas met ya nangisaadan na. Dikad pe̍ ito naglayusin, dinalapus na met yan nga baley, ket madi pulus nga naan-anu, ta nabaked ya pannakaisimpa na.

Juan 12:44

Ket itun, kinunen ne̍ Je̍sus ka nabileg, “Ya mamati iyaken, bekken nas nga iiyaken ya patiyen na, no di lugud pe̍ ya nangibon iyaken.

Juan 14:1

Kinunen manin ne̍ Je̍sus kadito adalan na, “Madi kayu kuma madanagan winno masicsikuran maipanggep iya ipapanaw ku, no di lugud mamati kayu e̍ Apu Diyus se̍ mamati kayu met pe̍ iyaken.

Juan 5:24

“Tutu met yani nga kunec dakayu: Ya mangipangag kadiya kagic se̍ mamati iya nangibon iyaken, uwed iginan ya biyag nga agnanayun. Ket madi nad maukum, no di lugud nailisi yin iya pannakaukum na, ket naiyalisin iya turay niya biyag, manipud iya turay niya patey.

Aramid 11:18

Ket ito nagicna dito mamati nga Hudyu yan, awan met pangdellawan da e̍ Pe̍dru win, no di lugud nagdayaw da e̍ Apu Diyusin, nga kinunen da, “Agten iyan ngarudin, ta gabay ne̍ Apu Diyus ya mangipaay pe̍ ka pagbabawiyan diya bekken nga Hudyu, nga pakae̍cdan da ka biyag nga agnanayun,” kunen da.

Aramid 17:30

Ket itun nga timpu, nipampamoya ngas ne̍ Apu Diyus diya wangwanglen diya toley, ta madi da pekkem emmu itun ya kustu nga wanglen da. Ngem itan, bilinen na diya amin nga toley iya amin nga lubung nga agbabawi dan.

Aramid 2:38

Ket kinunen ne̍ Pe̍dru igida, “Agbabawi kayu ngarudin, se̍ pabautisaran ya tunggal isa dakayu gapu iya panamati nu e̍ Je̍su Kristu win, tasun mapakawan diya basbasul nu. Ket mae̍cdan kayu pe̍ iya Ispiritu Santu nga sagut ne̍ Apu Diyus.

Aramid 20:21

Se̍ napasnekkac pe̍ nga mangbagbaga kadiya kapadac nga Hudyu, se̍ orey pe̍ kadiya bekken nga Hudyu, ta nibagac nga sumurut da kuma nga sibababawi e̍ Apu Diyus se̍ mamati da iya Apu tida nga Je̍sus.

Aramid 26:20

Ta nipakaemmuc met kadiya amin nga toley, nga masapul da nga agbabawi kadiya basbasul da, se̍ umapu da e̍ Apu Diyus. Se̍ kunec pe̍ nga masapul nga ipasingen da kadiya wangwanglen da ya panagbabawi dan. Agten iyan ngarud to nikaskasabac, nga nangasaba ngac nga nona kadito iDamasku, se̍ kadito iHe̍rusale̍m pe̍, se̍ kadito amin nga il-ili enna prubinsiya nga Hudya, se̍ kadiya bekken nga Hudyu pe̍.

Aramid 3:19

Dikad pe̍ ita, agbabawi kayu kuma ngarudin, nga sumoli kayu iya Apu tasun mapunas diya basbasul nu.

1 Kurintu 13:10

Ngem no madatngan nad yan nga awan pagkurangan nan, malabes ngasin ya sirbi niya uwed pagkurangan na.

1 Kurintu 2:6

Ngem no kadiya nataengnganin ka panamati, agkagi kami ngarud ka nauneg nga panursuru igida. Ngem ya agten iyan nga kinasirib, bekken nga agten iya sirib diya toley winno diya agtuturay idi nga lubung. Ket didi nga agtuturay, mapukapukaw da ngas met.

2 Kurintu 7:1

Ket dakayu nga patpatgec, gapu kadiyan nga nikarkari ne̍ Apu Diyus dactida, ipac tida kuma ngarudin diya amin nga makapadake̍c iya beggi winno panpanunut tida. Ket an-anayen tida lugud ya panagbiyag tida nga sililinteg, gapu ta daydayawen tida nga situtuluc nge̍ Apu Diyus.

2 Kurintu 7:10

Ta ya panagladingit diya toley sigun iya tarigagay ne̍ Apu Diyus, nabaru ya pagbanagan na, ta itu ya pagbabawiyan da, nga pakaisalakanan da. Ket kalpasan na, awan ladingit dan. Ngem sabali met nga gennung ya pagbanagan niya panagladingit diya bekken nga mamati idi nga lubung. Ta diya panagladingit da, itu ya mangiturung igida iya agnanayun nga patey.

E̍pe̍su 2:1

Ket dakayu, naibilang kayu itun nga natey yin iya imatang ne̍ Apu Diyus gapu iya kinadake̍c nu se̍ diya basbasul nu.

E̍pe̍su 2:5

Ta ito sibabasul tida pekkem nga naibilang nga natey yin iya imatang na, niraman nactida ito nangbiyag na e̍ Kristu ito pinagungar na. Ngarud, ya siaayat nga asi ne̍ Apu Diyus ngas met ya nakaisalakanan tida.

E̍pe̍su 4:12

Ket binangun ne̍ Kristu amin diyan nga saad, tasun isaganaan nactida nga amin nga toley ne̍ Apu Diyus iya panangtungpal tida kadiya ipawangel ne̍ Apu Diyus dactida. Itu didi diya ipawangel na dactida tasun mapabileg ya bungguy ne̍ Kristu nga maiyarig iya beggi na.

Kulusas 1:28

Ket e̍ Kristu met ya ikaskasaba mi. Ibagbaga mi ngarud nga sipapasnec kadiya amin nga toley nga sumurut da kuma, ket se̍ suruwan mi met pe̍ diya amin nga toley sigun iya amin nga kinasirib mi nga mangipalawag. Ta gabay mi no awan kuma pagkurangan diya orey nagan na nga toley iya pannakitipun da e̍ Kristu.

Kulusas 3:14

Ket ya kangrunaan ka amin didi nga saad nu, itu ya panagiinnayat nu. Ta itu yani ya mangpatunus kadiya amin, tasun awan pulus pagkurangan niya panagbubulun nu.

Kulusas 4:12

Ket e̍ E̍papras met pe̍, nga isa mettas dakayu, nga isa nga agsirsirbi e̍ Kristu Je̍sus, ket makikumusta kanu pe̍ dakayu. Ket pe̍yeng nga sipapasnec nga mangikarkararag dakayu e̍ Apu Diyus. Ta gabay na met no nabaked kuma ya panamati nu, se̍ awan nga pulus duwaduwa nu maipanggep iya orey nagan na nga tarigagayan ne̍ Apu Diyus dakayu.

1 Timutyu 3:16

Ket napateg ngarud nga unay ya banag niya pammati tida nga nipakaemmu win ne̍ Apu Diyus. Agten idi ya banag na: Igina, nagparang nga naipatoley. Ket gapu iya Ispiritu ne̍ Apu Diyus, napanecnekkan ya kinalinteg na, se̍ nasingen pe̍ diya anghe̍le̍s. Ket naipadpadamag ya maipanggep igina kadiya pagpagiliyan, ket adu da nga namati iginan idi nga lubung. Ket naiyune̍c kin nga madaydayaw enna langit.

1 Timutyu 6:19

Ket no agten iyan ya wangwanglen diya babacnang, ket arig nga uwed ka langitin ya pagpunduwan da ka kinabacnang da nga erwaten da nad iya maadpangan. Ta madi pulus nga mapukaw antuni. Ket bekken nas nga iyan, ta itu pe̍ ya napaw-is nga panagbiyag nga maitutup iya biyag nga awan pagkurangan na.

2 Timutyu 2:19

Ngem ya panursuru nga gayat e̍ Apu Diyus, madi met mariribuc ya pungut na, ta nabaked met. Ket maiyarig nga namarkaan kadidi nga kagi: “Emmu ne̍ Apu Diyus no nagan diya toltoley na.” Se̍ kunen na pe̍, “Amin diya umapu igina, ket masapul nga ipac da diya wangwanglen da nga dake̍c,” kunen na met.

He̍briyu 11:6

Ngarud, no awan panamati tida, madi met mabalin nga ay-ayuwen tida nge̍ Apu Diyus. Ta ya orey nagan na nga mayat nga umadenni kuma nga agdayaw e̍ Apu Diyus, masapul ngarud nga patiyen na nga uwed Diyus, se̍ patiyen na pe̍ nga e̍ Apu Diyus, igina ya manggun-guna nga tutu kadiya mangemmu igina.

He̍briyu 12:13

Suruten nu lugud ya kustu, nga arig nga dalanen nu ya natunung nga dalan, tasun madi kayu maisacdul, se̍ tasun madi marung-is ya piley nu, no di kuma lugud umunayin.

He̍briyu 7:11

Ket ito panagsirsirbi dito mangibegbeggi nga kapututan nito Le̍bi, itu to pannakaibilin nito Linteg ne̍ Muyse̍s kadiya toltoley itun. Ngem to panagsirsirbi dito kapututan nito Le̍bi, madi makakumplitu iya pannakaibilang diya toley nga awan pagkurangan da iya imatang ne̍ Apu Diyus. Itu nga uwed pekkem kasapulan tida nga sabali nga mangibegbeggi nga agsirsirbi. Ket ya masapul tida, isa mettas nga maikanatad ito panagsirsirbi nito Me̍lkise̍de̍c, nga bekken nga agten ito panagsirsirbi de̍ Arun itun nga kapututan de̍ Le̍bi.

He̍briyu 9:14

Ket no agten iyan to pakadalusan da itun nga timpu, di ngarud nabilbileg pekkem ya pannakabalin niya daga ne̍ Kristu? Ta gapu iya panangiturung niya agnanayun nga Ispiritu, niyawat ne̍ Kristu e̍ Apu Diyus ya beggi na nga datun nga awan pagkurangan na. Ket gapu iya daga na, nadalusan diya lemlemmet tidan iya pakarigatan tida gapu ito panagtungpal tida kadito tungtungpalen nga awan mamaay da. Ket ita, siwayawaya tidan nga agsirbi iya sibibiyag nga Diyus.

Santiyagu 1:4

Ket aganus kayu kuma nga pe̍yeng, tasun napaw-is ya panagbiyag nu, se̍ tasun naan-anay kayu kadiya amin nga panagibtur nu, nga awan pagkurangan nu kadidi nin.

1 Pe̍dru 1:21

Ket gapu igina, mamati kayu e̍ Apu Diyusin. Igina ya nangpaungar se̍ nangpadayaw e̍ Kristu, itu nga e̍ Apu Diyus ya patpatiyen se̍ namnamaen nun.

1 Pe̍dru 5:10

Ket e̍ Apu Diyus mettas nga pagtaudan niya amin nga siaayat nga asi, se̍ ya nangpili dakayu nga mairaman iya agnanayun nga pannakaidayaw na gapu e̍ Kristu. Ket igina mettas ya mangan-anay nad dakayu, no malpas yan nga e̍teng nga panagrigat nu. Ket patalgedden nakayu se̍ pabilgen nakayu nad pe̍.

1 Juan 4:12

Pudnu met nga awan pekkem nakasingen e̍ Apu Diyus. Ngem no agiinnayat tida, maemmuwan tida nga laglagipen nactida nge̍ Apu Diyus, se̍ maemmuwan tida pe̍ nga matungpalin ya panggep na maipanggep iya ayat na dactida.