He̍briyu 4:16 - Ya Baru nga Tulag

¹⁶ Dikad pe̍ agtalged tida kuma nga umadenni ngarudin iya edyan ne̍ Apu Diyus nga pagtaudan niya siaayat nga panangaasi nga ipaay na dactida. Umadenni tida kuma ngarud, tasun kaasiyan nactida, se̍ tasun tulungan nactida kuma pe̍ gapu iya siaayat nga asi na dactida no uwed kasapulan tida.

He̍briyu 4:16 Iomraidhean Croise

E̍pe̍su 2:18

Ta gapu e̍ Kristu, mabalin tida nga amin ya umadenni yin e̍ Apu Diyus nga Ama, Hudyu man winno bekken nga Hudyu, gapu mettas iya is-isa nga Ispiritu.

E̍pe̍su 3:12

Ket itan, gapu iya pannakaitipun tida e̍ Kristu, agtalged tida nga umadenni nga siwayawaya e̍ Apu Diyusin gapu iya panamati tida e̍ Kristu.

He̍briyu 13:6

Itu nga natalged tida nga agkunen iya agten idi: “Ya Apu ya tumulung iyaken, itu nga awan pakadanagac kun. Ta madic met mansing kadiya maariman diya toley iyaken.”

He̍briyu 3:6

Ngem e̍ Kristu nga gennung, bekken nas met nga eb-ebbonen, no di lugud Anac ne̍ Apu Diyus, ket managtungpal iya panangituray na kadiya toley nga arig nga pamilya ne̍ Apu Diyus. Ket dactida, pamilya nactida met pe̍ no sipupudnu tida nga mangsalimetmet iya panagtalged se̍ panagnamnama tida igina nga pakaragsakan tida, agingga iya panungpalan.

He̍briyu 7:19

Ta awan met naibilang nga awan pagkurangan na iya imatang ne̍ Apu Diyus gapu ito Linteg. Ket ita, uwed met namaymayat nga pagnamnamaan nga naipakaemmu dactidan, ket itu ya pakaiyadenniyan tidan e̍ Apu Diyus.

He̍briyu 7:25

Itu nga awan pulus pagkurangan na ka agnanayun ya panangisalakan na kadiya umadenni e̍ Apu Diyus gapu igina. Ta igina, sibibiyag met nga mangibegbeggi ka agnanayun dactida e̍ Apu Diyus.

He̍briyu 9:5

Ket iya sap-ew nito lakasa, uwed duwa nga naariman nga balituc nga uwed payac da. Pakalaglagipan didi iya nadayaw nga kauwed ne̍ Apu Diyus antuni. Nagsinnangu da iya sap-ew nito lakasa, ket nagdennet dito payac da nga nanglidum ito tekkeb nito lakasa. Ket ya tekkeb nito lakasa, itu to naawagan ka Pakaudasan nga Pakapakawanan diya Basbasul. Ngem bekken kuma nga ya surat ku wi ya pangilawlawagac kadiyan nga banbanag.

1 Pe̍dru 2:10

Itun, bekken kayu nga naibilang nga toley ne̍ Apu Diyus. Ngem ita, toley nakayun. Se̍ itun, madi kayu pekkem nae̍cdan iya asi na. Ngem ita, kinaasiyan nakayu mettasin.