He̍briyu 4:14 - Ya Baru nga Tulag

¹⁴ Dikad pe̍ ipateg tida kuma ngarud nga sipapasnec ya panamati tida. Ta uwed met naturay nga Kangatuwan nga Agsirsirbi, nga mangibegbeggi dactida e̍ Apu Diyusin, nga itu nge̍ Je̍sus nga Anac na. Igina mettas ya nakapen ka langitin nga edyan ne̍ Apu Diyus.

He̍briyu 4:14 Iomraidhean Croise

Matyu 4:3

Ket imadenni to mangsulisug, ket kinunen na e̍ Je̍sus, “No tutu nga Anac naka nge̍ Apu Diyus, bilinem man didi nga batu nga agbalin da nga tinapay,” kunen na.

Markus 1:1

Agten idi to pangrugiyan niya Makaparagsac nga Damag maipanggep e̍ Je̍su Kristu nga Anac ne̍ Apu Diyus.

Markus 16:19

Ket itun, kalpasan nito pannakitbar ne̍ Apu Je̍sus igida, ket naipangudu ka langitin. Ket enna langit, nagtugew iya kadayawan nga edyan, nga itu ya madiwanan ne̍ Apu Diyus.

Lukas 24:51

Ket ito madama nga mangikarkararag nge̍ Je̍sus igida, nasingen da nga pimanaw igidan, nga naipangudu win nga nawe̍ ka langit.

Aramid 1:11

Ket idi ya kinagi dito duwa nga nagpasingen: “Dakayu nga iGalilya, ape̍ kad nga nakalalangad kayu pekkem? Naipanaw ngarud nge̍ Je̍sus dakayun, nga naipangudu ka langitin. Ngem sumoli nad mettas nga agten ito ipapanaw na nga nasingen nu ita,” kunen da.

Aramid 3:21

E̍ Je̍sus, aged-edyan pekkem ita ka langit patingga ka di pekkem pabaruwen ne̍ Apu Diyus diya amin nga banbanag, sigun ito nipaibaga ne̍ Apu Diyus kadito pinili na nga mammadtu itun.

Ruma 8:34

Awan pe̍ makaukum dactidan iya imatang ne̍ Apu Diyus. Ta e̍ Kristu Je̍sus, igina met to natey, ket bekken nas nga natey, no di lugud napagungar met pe̍. Ket naisaadin iya kadayawan nga edyan, nga itu ya madiwanan ne̍ Apu Diyus. Ket igina mettin ya mangibabaet dactidan e̍ Apu Diyus.

2 Kurintu 12:2

Ket agten idi to napasamac iyaken: Uwed emmuc nga toley nga isa nga makitiptipun e̍ Kristu. Ket yan nga toley, naipangatu met itun iya pagedyanan iya ngudu nga maawagan ka maikatlu nga langit. Napalabes ya sangapulu ket eppat nga dagunin nanipud ito napasamac yan. Madi yac emmu no sibebeggi nga naalac winno bekken yan nga toley itun. E̍ Apu Diyus ngas ya makaemmu.

2 Kurintu 9:13

Ket gapu iyan nga panagkaasi nu, maipasingen nga napudnu ya panamati nu. Itu nga agdaydayaw nad diya toley e̍ Apu Diyus, gapu ta maemmuwan da nad nga tungtungpalen nu ya pammati nu iya Makaparagsac nga Damag maipanggep e̍ Kristu, se̍ gapu ta maemmuwan da nga manage̍cde̍ kayu ka tulung nu igida se̍ kadiya amin nga duduma pe̍.

E̍pe̍su 4:10

Ngarud, ya nagpasegged, igina mettas pe̍ ya nagpangudu win iya kangatuwan nga edyan iya ngudu, tasun igina ya pakakumplituwan niya aminin.

He̍briyu 1:8

Ngem no maipanggep iya Anac na nga gennung, kunen ne̍ Apu Diyus nga agten idi: “Ikew nga Diyus, agnanayun nga awan patingga na ya panangituray mu, ket nalinteg met pe̍ ya panagturay mu.

He̍briyu 10:12

Ngem e̍ Kristu nga gennung, nam-ame̍nsan ngas nga nidatun na ya beggi na mettas, ket kustu win ka agnanayun. Ket agsirbi nga agnanayun yani nga datun na, nga itu mettin ya pakaipakan diya basbasul. Ket kalpasan nito panangidatun na iya beggi na, nawe̍ nagtugew iya kadayawan nga edyan, nga itu ya madiwanan ne̍ Apu Diyus.

He̍briyu 10:23

Ipateg tida kuma ngarud pe̍ nga sipapasnec ya pammati tida maipanggep iya pagnamnamaan tidan. Ta emmu tida nga e̍ Apu Diyus, tungpalen na ngarud diya kari na.

He̍briyu 10:29

Ket no patey ya dusa dito nangsalungasing ito Linteg itun, di ngarud nakarkaru pekkem ya rumbeng nga dusa niya toley nga agsalungasing iya kinapudnu maipanggep iya pammati tida ita? Ta ya agten iyan nga toley, manglais met iya Anac ne̍ Apu Diyus, se̍ mangibilang nga awan pateg na ya naiyayus nga daga na, nga nangpatalged iya tulag nga pakadalusan diya basbasul tida. Ket se̍ manguy-uyaw iya siaayat nga Ispiritu ne̍ Apu Diyus nga managkaasi. Nakarkaru ngarud met ya rumbeng nga dusa niya agten iyan nga toley!

He̍briyu 12:2

Ket e̍ Je̍sus kuma ngas ya namnamaen tida, nga arig nga igina ya sisingen tida. Ta igina met ya nangariman iya pangnamnamaan niya panamati tida, se̍ igina met pe̍ ya mangtungpal. Ket e̍ Je̍sus, niturtured na met nga siaanus to pannakatey na ito krus, nga madi na linaglagip to nakaiyal-alyewwan na. Ta laglagipen na nga gennung ya pakaanggemman na nga naikari igina. Ket ita, uwed met nga tutu win nga agtugtugew iya kadayawan nga edyan, nga itu ya madiwanan niya trunu nga pagtugawan ne̍ Apu Diyus.

He̍briyu 2:1

Ket gapu kadiyan nga banbanag, masapul ngarud nga lumallalu kuma ya panangipateg tida kadiya panursuru nga naadal tida, tasun bekken tida nga maiyaw-awan ka sabali.

He̍briyu 2:17

Ket itu nga masapul nga linak-am ne̍ Je̍sus diya amin nga kasasaad diya naibilang nga kakabsat na, tasun igina kuma ya agbalin nga managkaasi se̍ mapagtalkan nga Kangatuwan nga Agsirsirbi, nga mangibegbeggi dactida e̍ Apu Diyus. Ket iya agten iyan, inariman nan ya pannakaudas nga pakapakawanan diya basbasul diya toley.

He̍briyu 3:1

Itu nga dakayu nga kakabsat nga pinili ne̍ Apu Diyus nga toley na se̍ kabulun mi nga maipaayan ka nailangitan nga saad, ut-utuben nu kuma ya maipanggep e̍ Je̍sus. Ta igina met ya nibon ne̍ Apu Diyus nga arig nga apustul, se̍ igina pe̍ ya tutu nga Kangatuwan nga Agsirsirbi nga mangibegbeggi iya pammati tida.

He̍briyu 3:14

Ta siguradu nga nagbalin tidan nga kabulun ne̍ Kristu no ituluy tida nga sipupudnu ya sigud nga panagtalec tida igina nga sipapasnec, agingga iya panungpalan.

He̍briyu 6:20

Ket itu pe̍ ya napennan ne̍ Je̍sus nga non-ona ngem dactida. Igina met ya nagbalin nga Kangatuwan nga Agsirsirbi nga mangibegbeggi dactida e̍ Apu Diyus ka agnanayun, nga agten mettas ito panagsirsirbi nito Me̍lkise̍de̍c itun.

He̍briyu 6:6

se̍ da latta sumina iya panamati da, ket awan ngarud makapababawi igidan iya panamati da. Ta diya agten iyan nga toley, arig nga gabay da nga ilansa manin ya Anac ne̍ Apu Diyus iya krus na, nga iyal-alyew da iya imatang diya toltoley.

He̍briyu 7:3

Ket madi tida met emmu no nagan ya ama se̍ ya ina nito Me̍lkise̍de̍c, se̍ awan pe̍ makaemmu no nagan ya nagtactaudan na nga kapututan. Awan pe̍ makaemmu no nungey to pannakaiyanac na se̍ to pannakatey na. Ket agten mettas iya Anac ne̍ Apu Diyus, ta awan met panagpatingga niya panangibegbeggi na ka toley.

He̍briyu 8:1

Ket agten idi ya kaipapennan niya ibagbagac: Uwed mettin Kangatuwan nga Agsirsirbi nga mangibegbeggi dactidan e̍ Apu Diyus, nga agten mettas ito nilawlawag ku. Ket igina, agtugtugew win iya kadayawan nga edyan, nga itu ya madiwanan niya trunu nga pagtugawan niya Nadayag nga Diyus ka langit.

He̍briyu 9:12

Ket ito imuneg nge̍ Kristu iya Kasantuwan nga Edyan iyan nga pagdaydayawan, nam-ame̍nsan ngas nga masapul nga imuneg iyan, ket kustu win para iya amin nga timpu. Se̍ bekken nga ya daga kalding winno ya daga niya urbun baka to nitarey na nga nidatun na, no di lugud ya daga mettas niya mismu nga beggi na. Ket iya agten iyanin, pinatalgeddan ne̍ Kristu ya pannakasubbut tida nga agnanayunin.

He̍briyu 9:24

Diya namaymayat ngarud ya masapulin, ta e̍ Kristu, bekken nga ya nasantuwan nga pagdaydayawan nga inariman toley to imuneggan na. Ta to nona nga pagdaydayawan, ket ladawan ngas niya kustu nga pagdaydayawan nga uwed ka langit. Ngem e̍ Kristu, imuneg ngarud iya pagdaydayawan ka langit iya imatang mettas ne̍ Apu Diyus. Ket ita, uwed met antuni nin nga mangibegbeggi nga maipaay dactida.

1 Pe̍dru 3:22

Ket e̍ Je̍su Kristu, nawe̍ ka langitin, nga uwed itan iya kadayawan nga edyan, nga itu ya madiwanan ne̍ Apu Diyus. Ket naipaituray iginan diya anghe̍le̍s se̍ diya amin nga duduma nga nailangitan nga uwed turay winno pannakabalin da.