He̍briyu 2:17 - Ya Baru nga Tulag

¹⁷ Ket itu nga masapul nga linak-am ne̍ Je̍sus diya amin nga kasasaad diya naibilang nga kakabsat na, tasun igina kuma ya agbalin nga managkaasi se̍ mapagtalkan nga Kangatuwan nga Agsirsirbi, nga mangibegbeggi dactida e̍ Apu Diyus. Ket iya agten iyan, inariman nan ya pannakaudas nga pakapakawanan diya basbasul diya toley.

He̍briyu 2:17 Iomraidhean Croise

Ruma 15:17

Dikad pe̍ gapu iya pannakaibulun ku e̍ Kristu Je̍sus, uwed mettin maipasindayaw ku maipanggep iya wangel ku para e̍ Apu Diyus.

Ruma 5:10

Ta gapu ito pannakatey niya Anac ne̍ Apu Diyus, naitunus tida e̍ Apu Diyusin, orey naikuntra tida pekkem igina itun. Ket itan, gapu ta naitunus tida iginan, di ngarud nasigsiguradu ya panagnamnama tidan iya pannakaisalakan tida, gapu iya biyag ne̍ Je̍su Kristu ita?

E̍pe̍su 2:16

Ta dactida nga Hudyu se̍ bekken nga Hudyu, naibilang tidan nga is-isa nga toley nga naitunus e̍ Apu Diyusin, gapu ito pannakatey ne̍ Kristu ito krus. Ket iya agten iyan, awan to panaggiginnura tidan.

Kulusas 1:21

Ket dakayu, naisina kayu ngarud itun e̍ Apu Diyus, ket naikuntra pe̍ diya panpanunut nu igina itun, gapu ito dake̍c nga ugali nu.

He̍briyu 10:21

Se̍ bekken nas nga iyan, ta e̍ Je̍su Kristu win ya naturay nga mangibegbeggi nga agpaay dactida nga toley ne̍ Apu Diyus, nga naibilang nga pamilya na.

He̍briyu 2:11

Ket bekken nas nga iyan, ta is-isa met ya Ama niya mangdalus se̍ ya Ama diya nadalusanin. Itu nga madi malyew nge̍ Je̍sus nga mangawag nga kakabsat na diya toley.

He̍briyu 2:14

Ket gapu ta uwed kinatoley didi nga naibilang nga anac na, nagbalin met nge̍ Je̍sus nga agten pe̍ igida, ta naglak-am met pe̍ iya kasasaad niya kinatoley da. Agten iyan ya winangel na, tasun gapu iya pannakatey na, pirdiyen na ya pannakabalin niya diyablu, nga itu ya pakaigapuwan niya pannakatey.

He̍briyu 2:16

Naglak-am ngarud nge̍ Je̍sus iya kinatoley da, ta diyan nga tinulungan na, bekken met nga diya anghe̍le̍s, no di lugud diya toley nga kapututan nito Abraham.

He̍briyu 3:1

Itu nga dakayu nga kakabsat nga pinili ne̍ Apu Diyus nga toley na se̍ kabulun mi nga maipaayan ka nailangitan nga saad, ut-utuben nu kuma ya maipanggep e̍ Je̍sus. Ta igina met ya nibon ne̍ Apu Diyus nga arig nga apustul, se̍ igina pe̍ ya tutu nga Kangatuwan nga Agsirsirbi nga mangibegbeggi iya pammati tida.

He̍briyu 3:2

Nisaad ngarud ne̍ Apu Diyus nge̍ Je̍sus nga agpaay iyan nga wangel na. Ket e̍ Je̍sus, nagtungpal ngarud nga pe̍yeng e̍ Apu Diyus, nga agten mettas ito panagtungpal nito Muyse̍s e̍ Apu Diyus ito panagsirsirbi na kadito toley nga naiyarig nga pamilya ne̍ Apu Diyus.

He̍briyu 3:5

Ket to Muyse̍s, arig nga igina ya eb-ebbonen ne̍ Apu Diyus kadiya toley na itun. Ket nibilang met ne̍ Apu Diyus nga managtungpal to Muyse̍s ito panagsirbi na kadito amin nga toley nga naiyarig nga pamilya ne̍ Apu Diyus. Ket to Muyse̍s, igina ya nangipakaemmu ngas met itun maipanggep iya paibaga ne̍ Apu Diyus kadiya toley iya sumarunu nga timpu.

He̍briyu 4:14

Dikad pe̍ ipateg tida kuma ngarud nga sipapasnec ya panamati tida. Ta uwed met naturay nga Kangatuwan nga Agsirsirbi, nga mangibegbeggi dactida e̍ Apu Diyusin, nga itu nge̍ Je̍sus nga Anac na. Igina mettas ya nakapen ka langitin nga edyan ne̍ Apu Diyus.

He̍briyu 4:15

Ket idi nga Kangatuwan nga Agsirsirbi nga mangibegbeggi dactida e̍ Apu Diyus, bekken met nga isa nga madi makaisakit iya kinakapsut tida. Maisakit nactida ngarud, ta napadas na met amin nga kita sulisug gapu iya kinatoley na nga agten dactida. Napadas na ngarud amin diyan, ngem madi pulus nagbasul.

He̍briyu 5:1

Tutu met yan, ket laglagipen tida kuma pe̍ yani: Diya amin nga kangatuwan nga agsirsirbi iya pagdaydayawan idi nga lubung, toley da ngas nga nadutukan. Ket igida diya naisaad nga mangibegbeggi kadiya toley e̍ Apu Diyus. Igida pe̍ diya mangidatun kadiya sagsagut se̍ naidaga nga datun e̍ Apu Diyus, gapu kadiya basbasul diya toley.

He̍briyu 5:10

Ket e̍ Apu Diyus mettas ya nangisaad igina ka Kangatuwan nga Agsirsirbi nga mangibegbeggi, nga agten mettas ito panagsirsirbi nito Me̍lkise̍de̍c.

He̍briyu 5:2

Ket ya agten iyan nga kangatuwan nga agsirsirbi, emmu na met ya aganus kadiya toley nga mairradu se̍ diya nalaka nga maiyaw-awan ka dake̍c. Ta ya kangatuwan nga agsirsirbi, ket toley met pe̍ nga uwed pagkurangan na, nga agten mettas kadiya pada na nga toley.

He̍briyu 5:5

Agten met pe̍ iyan nge̍ Kristu, ta bekken met nga igina ya nangtudu iya beggi na nga Kangatuwan nga Agsirsirbi, no di lugud e̍ Apu Diyus ya nangpili igina. Ket e̍ Apu Diyus, kinunen na met e̍ Kristu itun, “Ikew ya Anac ku. Ket ita nga algew, nagbalin nac nga Ama mun.”

He̍briyu 6:20

Ket itu pe̍ ya napennan ne̍ Je̍sus nga non-ona ngem dactida. Igina met ya nagbalin nga Kangatuwan nga Agsirsirbi nga mangibegbeggi dactida e̍ Apu Diyus ka agnanayun, nga agten mettas ito panagsirsirbi nito Me̍lkise̍de̍c itun.

He̍briyu 7:26

Dikad pe̍ igina, maitutup met nga Kangatuwan nga Mangibegbeggi dactida e̍ Apu Diyus, ta awan basul na winno kinadake̍c na, se̍ awan pe̍ mansa igina. Ket idi nga mangibegbeggi, naiduma met kadiya sibabasul nga toltoley, ket naisaad met pe̍ ka nangatngatu ngem kadiya nailangitan.

He̍briyu 7:28

Ket to pannakaisaad nidi nga nagbalin nga mangibegbeggi dactida e̍ Apu Diyus, bekken met nga agten ito pannakaisaad dito nadutukan nga kangatuwan nga agsirsirbi itun sigun ito Linteg nito Muyse̍s. Ta igida, nadutukan da orey uwed met pagkurangan da. Ngem to pannakaisaad niya Anac ne̍ Apu Diyus nga gennung, bekken met nga sigun ito Linteg nito Muyse̍s, no di lugud sigun ito kari mettas ne̍ Apu Diyus nga nisapata na nga nod-odi ngem ito pannakabangun nito Linteg. Ket napanecnekkanin nga awan ngarud pagkurangan niya Anac ne̍ Apu Diyus ka agnanayun.

He̍briyu 8:1

Ket agten idi ya kaipapennan niya ibagbagac: Uwed mettin Kangatuwan nga Agsirsirbi nga mangibegbeggi dactidan e̍ Apu Diyus, nga agten mettas ito nilawlawag ku. Ket igina, agtugtugew win iya kadayawan nga edyan, nga itu ya madiwanan niya trunu nga pagtugawan niya Nadayag nga Diyus ka langit.

He̍briyu 8:3

Ket diya amin nga kangatuwan nga agsirsirbi iya pagdaydayawan, rebbeng da nga amin ya mangidatun ka sagsagut se̍ naidaga nga datun e̍ Apu Diyus. Dikad pe̍ idi nga Kangatuwan nga Agsirsirbi nga mangibegbeggi dactida e̍ Apu Diyus itan, masapul met pe̍ nga uwed idatun na.

He̍briyu 9:11

Ket ita, inumbe̍t mettin nge̍ Kristu nga Kangatuwan nga Agsirsirbi nga mangibegbeggi dactida e̍ Apu Diyus. Igina ya agsirsirbi nga mangipaay kadiya nabaru nga banbanag nga nabangunin. Ket ya panagsirsirbi ne̍ Kristu, nabarbaru. Ta bekken nga ya uneg niya isa nga pagdaydayawan nga inariman toley ya pagdaydayawan na. Kayat na nga kagiyen, bekken nga idi nga nakaparsuwaan nga lubung ya pagdaydayawan na, no di lugud nangatngatu. Ket se̍ awan pagkurangan niyan nga imuneggan na nga pagdaydayawan na.