He̍briyu 2:10 - Ya Baru nga Tulag

¹⁰ Mayat met ya agten iyan, ta e̍ Apu Diyus, igina ngarud ya pagpaayan diya amin nga naparsuwa, se̍ igina pe̍ ya paggayatan diya amin. Itu nga tumutup met to inariman na iya makaigapu iya pannakaisalakan tida, nga itu nge̍ Je̍sus. Ta inanayan ne̍ Apu Diyus ya kasasaad ne̍ Je̍sus gapu ito panaglak-am na ito rigat na. Ket agten iyan met tasun adu diya maibilang nga an-anac ne̍ Apu Diyus, se̍ tasun iturung ne̍ Je̍sus da iya pakaidayawan da.

He̍briyu 2:10 Iomraidhean Croise

Lukas 13:32

Ket kinunen ne̍ Je̍sus igida, “Mawe̍ kayu lugud ibaga iyan nga nasikap nga arig nga musang, nga madi pekkem nalpas ya gagarac ki. Ibaga nu ngarud igina nga maemmuwan na kuma nga ita nga algew se̍ no damlag pekkem, pagtalawec met diya sairu kadiya linuganan da, se̍ mangagas sac pe̍ kadiya agsakit. Ket iya maikatlu nga algew, malpas kun ya wangel kun.

Lukas 2:14

“Madaydayaw nge̍ Apu Diyus nga uwed iya kangatuwan nga edyan. Ket idi nga lubung, uwed kuma talna kadiya toltoley nga pakaay-ayuwan na,” kunen da.

Lukas 24:26

Di ngarud masapul nga mona nga agrigat ya Kristu ka agten kadiyan, se̍ kalpasan na, makadateng nad iya pakaidayawan na?” kunen na.

Lukas 24:46

Ket kinunen na igida, “Agten idi met ya naisurat iya Bibliya: Ya Kristu, masapul nga agrigat se̍ mapatey. Ngem agungar iya maikatlu nga algew.

Juan 11:52

Ket bekken nas nga maipaay igida, no di pe̍ kadiya maibilang nga an-anac ne̍ Apu Diyus nga naiwaraswaras kadiya nadumaduma nga pagiliyan. Agten iyan ngarud tasun diya anac ne̍ Apu Diyus, maitipun da nga amin iya is-isa nga bungguy ne̍ Apu Diyus.

Juan 19:30

Ket ito nasepsep ne̍ Je̍sus to suka ngin, ket kinunen na, “Natungpal ngarudin!” kunen na. Ket kalpasan na, nagdumug, ket nipalubus na ya anges na nga simina ngin.

Aramid 3:15

Ket iya agten iyan, nipapatey nu met ya pagtaudan niya biyag. Ngem pinagungar mettas ne̍ Apu Diyus. Ket dakami, nasacsiyan mi met yan.

Aramid 5:31

Se̍ nipangatu pe̍ ne̍ Apu Diyus iya kadayawan nga saad. Ket iya agten iyan, uwed din nge̍ Je̍sus iya madiwanan na nga mangituray se̍ mangisalakan ka toley. Agten iyan ngarud ya winangel ne̍ Apu Diyus, tasun uwed dactida nga Israe̍lita ya gundaway nga agbabawi se̍ tasun uwed pakapakawanan tida pe̍.

Ruma 11:36

Awan ngarud makaisagut e̍ Apu Diyus, ta igina met ya namarsuwa kadiya amin. Igina met pe̍ ya mangituray kadiya amin nga naparsuwa, ket agpaay da pe̍ nga amin igina. Madaydayaw kuma nge̍ Apu Diyus ka agnanayun! Agten iyan kuma.

Ruma 9:23

Ket inanusan na ngarud nga siaasi dito toley, tasun maipakaemmu na ya nakaskasdaaw nga kinadayaw na. Ket diya kaasiyan na, itu pe̍ diya iraman na nad iya pannakapadayaw na, ta sigud nga panggep ne̍ Apu Diyus itun pekkem nga didi diya mapadayawan.

1 Kurintu 2:7

Ngem ya kagiyen mi nga gennung, itu ya kinasirib ne̍ Apu Diyus mettas nga madi pekkem naipacpakaemmu itun kadiya toley, ta nalimed igida itun. Ket ito madi pekkem naparsuwa ya lubung, nikeddeng ne̍ Apu Diyus nga maariman yani nga panggep na maipanggep iya kinasirib na. Ket maipaay met yani iya pakaidayawan tida.

1 Kurintu 8:6

Ngem no dactida nga mamati, is-isa ngas ya ibilang tida nga Diyus tida, nga itu nge̍ Apu Diyus nga Ama, nga igina ya pagtaudan niya amin, se̍ igina pe̍ ya pagpaayan tida. Ket is-isa pe̍ ya ibilang tida nga Apu tida, nga itu nge̍ Je̍su Kristu, nga igina ya paggayatan niya amin, se̍ igina met pe̍ ya gapu niya kinauwed niya biyag tida.

2 Kurintu 3:18

Dikad pe̍ dactida nga amin nga mamati e̍ Kristu, maiyarig tida ka sarming nga pakasingnan iya kinadayaw niya Apu, nga awan dactidan to arig nga manglinged. Ket kankanayun tida nga mapabaru gapu iya Apu, nga itu ya Ispiritu, tasun maitutup tida kuma iya kinadayaw na.

2 Kurintu 4:17

Ta amin didi nga pakaparparigatan mi, bekken da nga nadagsen winno agnanayun. Ket itured mi ngasin, gapu iya panagnamnama mi iya kinadayaw nga mae̍cde̍ nad dakami gapu iya panangitured mi kadidi nga pakaparparigatan mi ita. Ket iyan nga kinadayaw, madi ngarud agpatingga se̍ awan kapada na.

2 Kurintu 5:18

Ket amin didi nga panagbalbaliw tida, nagtaud da e̍ Apu Diyus. Igina pe̍ ya nangitunus dactida igina mettas gapu e̍ Kristu. Igina pe̍ ya nangitalec dakami idi nga panagsirbi mi nga mangipakaemmu iya panangitunus na kadiya toley igina.

2 Kurintu 6:18

Ket iyaken ya agbalin nga Ama nun, ket dakayu nga lalaki se̍ babey, dakayu diya an-anac kun, kunen niya Apu nga Mannakabalin ka amin.” kunen na.

Galasiya 3:26

Ta gapu iya panamati nu, nagbalin kayu nga amin nga an-anac ne̍ Apu Diyusin, gapu iya pannakaitipun nu e̍ Kristu Je̍sus.

E̍pe̍su 2:7

Ket inariman ne̍ Apu Diyus yan, tasun kadiya amin nga maadpangan nga timpu, ipasingen na ya napalaus nga asi na nga siaayat. Ipasingen na ngarud ya ayat na dactida, gapu iya pannakaitipun tida e̍ Kristu Je̍sus.

E̍pe̍su 3:10

Ket ita, gapu iya masingen iya bungguy mamati, ket diya uwed turay winno pannakabalin da ka langit, maemmuwan da ngarudin ya nakaskasdaaw nga kinasirib ne̍ Apu Diyus kadiya nadumaduma nga panggep na.

Kulusas 3:4

Ket nad no agparang manin nge̍ Kristu nga pagtaudan mettas nidi nga biyag nu, ket maiparangarang kayu nad pe̍ iginan, nga itu nad ya pannakairaman nu iya pakaidayawan nan.

2 Timutyu 2:10

Itu nga anusac ngas ya orey nagan na, para kadiya pinili ne̍ Apu Diyus nga toley na. Agten ngarud iyan ya wanglec, tasun maisalakan da pe̍ gapu e̍ Kristu Je̍sus nga mangiraman igida iya pannakapadayaw na nga madi agpatingga.

He̍briyu 12:2

Ket e̍ Je̍sus kuma ngas ya namnamaen tida, nga arig nga igina ya sisingen tida. Ta igina met ya nangariman iya pangnamnamaan niya panamati tida, se̍ igina met pe̍ ya mangtungpal. Ket e̍ Je̍sus, niturtured na met nga siaanus to pannakatey na ito krus, nga madi na linaglagip to nakaiyal-alyewwan na. Ta laglagipen na nga gennung ya pakaanggemman na nga naikari igina. Ket ita, uwed met nga tutu win nga agtugtugew iya kadayawan nga edyan, nga itu ya madiwanan niya trunu nga pagtugawan ne̍ Apu Diyus.

He̍briyu 6:20

Ket itu pe̍ ya napennan ne̍ Je̍sus nga non-ona ngem dactida. Igina met ya nagbalin nga Kangatuwan nga Agsirsirbi nga mangibegbeggi dactida e̍ Apu Diyus ka agnanayun, nga agten mettas ito panagsirsirbi nito Me̍lkise̍de̍c itun.

He̍briyu 7:26

Dikad pe̍ igina, maitutup met nga Kangatuwan nga Mangibegbeggi dactida e̍ Apu Diyus, ta awan basul na winno kinadake̍c na, se̍ awan pe̍ mansa igina. Ket idi nga mangibegbeggi, naiduma met kadiya sibabasul nga toltoley, ket naisaad met pe̍ ka nangatngatu ngem kadiya nailangitan.

He̍briyu 7:28

Ket to pannakaisaad nidi nga nagbalin nga mangibegbeggi dactida e̍ Apu Diyus, bekken met nga agten ito pannakaisaad dito nadutukan nga kangatuwan nga agsirsirbi itun sigun ito Linteg nito Muyse̍s. Ta igida, nadutukan da orey uwed met pagkurangan da. Ngem to pannakaisaad niya Anac ne̍ Apu Diyus nga gennung, bekken met nga sigun ito Linteg nito Muyse̍s, no di lugud sigun ito kari mettas ne̍ Apu Diyus nga nisapata na nga nod-odi ngem ito pannakabangun nito Linteg. Ket napanecnekkanin nga awan ngarud pagkurangan niya Anac ne̍ Apu Diyus ka agnanayun.

1 Pe̍dru 1:12

Ket nipakaemmu ne̍ Apu Diyus kadito mammadtu itun nga bekken nga maipanggep igida itun ya kaipapennan nito panagsirsirbi da, no di lugud maipanggep dakayu ita nga timpu. Ket ita, itu yani ya Makaparagsac nga Damag nga nipakaemmu diya mangaskasaba dakayu, gapu iya Ispiritu Santu nga naibon nga gayat ka langit. Ket orey pe̍ diya anghe̍le̍s ne̍ Apu Diyus, kinalikaguman da met pe̍ nga maemmuwan kuma ya banag nidi nga damag.

1 Pe̍dru 5:1

Dikad pe̍, gapu kadiyan nga banbanag, uwed ibagbagac dakayu nga panglakayen diya bungguy diya mamati. Ta iyaken ya isa nga pada nu nga panglakayen, se̍ isa ngac pe̍ nga nakasingen kadito pannakaparparigat ne̍ Kristu. Se̍ iyaken pe̍ ya isa nga maibulun nad igina iya pakaidayawan na nga dandani maipasingen nin.

1 Pe̍dru 5:10

Ket e̍ Apu Diyus mettas nga pagtaudan niya amin nga siaayat nga asi, se̍ ya nangpili dakayu nga mairaman iya agnanayun nga pannakaidayaw na gapu e̍ Kristu. Ket igina mettas ya mangan-anay nad dakayu, no malpas yan nga e̍teng nga panagrigat nu. Ket patalgedden nakayu se̍ pabilgen nakayu nad pe̍.

Paltiing 4:11

“Ikew nga Apu se̍ Diyus mi, maikari ka nga tutu iya kinaari, dayaw, se̍ turay mu. Ta ikew ya namarsuwa iya amin nga banbanag, ket napauwed da gapu mettas iya tarigagay mu. Ket iya agten iyan, naparsuwa da ngarudin.”

Paltiing 7:9

Ket kalpasan niyan, pinumsekkac manin, ket uwed nasingec nga nakad-adu nga toley nga naurnung. Ket gapu ta adu da nga unay, awan met toley nga makabael nga mangbilang igida. Naggayat dito toltoley kadiya amin nga nasyun, kapututan, pagiliyan se̍ pagkakagi. Ket agsisikad da iya sangu nito trunu se̍ to Urbun Karne̍ru. Nakakawwes da ka puraw nga sutana, se̍ agik-ikem da ka bain.