He̍briyu 13:7 - Ya Baru nga Tulag

⁷ Laglagipen nu kuma pe̍ dito non-ona nga nangipangulu nga nangipakaemmu iya kagi ne̍ Apu Diyus dakayu itun. Panunuten nu kuma no kumaan nito ugali da, se̍ to nabaru nga nagbanagan dito ugali da, ket tuladen nu to panamati da.

He̍briyu 13:7 Iomraidhean Croise

Matyu 24:45

“Kaspagarigan no ya maibilang nga mapagtalkan se̍ nasirib nga tagabu. Ket igina mettas ya pangitalkan niya amu na nga makaemmu kadiya pada na nga tagabu iya baley niya amu na, tasun igina ya mange̍cde̍ ka kanen niya tunggal isa igida kada kustu nga uras na.

Lukas 12:42

Ket kinunen niya Apu, “No nagan kuma ya maibilang nga mapagtalkan se̍ nasirib nga mangsingen iya baley niya amu na, ket igina mettas ya pangitalkan niya amu na nga makaemmu kadiya pada na nga agsirsirbi iya baley niya amu na, tasun igina ya mangbingay ka kanen niya tunggal isa igida kada kustu nga uras na.

Lukas 5:1

Ket ito name̍nsan, uwed nge̍ Je̍sus nga gasisikad iya pingit nito baybay ka Ge̍ne̍sare̍t. Ket umadenni mettin diya toltoley igina agingga nga inil-ilet dan, ta gabay da ya agdengngeg iya kagi ne̍ Apu Diyus.

Lukas 8:11

“Ket agten idi ya banag nito pangngarig: To eggic nga kunec, itu ya kagi ne̍ Apu Diyus.

Aramid 13:46

Ngem de̍ Pablu nge̍ Be̍rnabe̍, nagtured da latta nga agkagi, nga kunen da, “Masapul nga dakayu nga Hudyu ya mona nga pakaipalawagan niya kagi ne̍ Apu Diyus. Ngem gapu ta madi kayu gabay, se̍ madi kayu ibilang nga maikari kayu iya agnanayun nga biyag nga naipalawag dakayun, panpanawan dakayu nga Hudyu ngarudin, ta diya bekken nga Hudyu nga gennung ya mangipalpalawagan min.

Aramid 14:23

Ket kadiya amin nga bungguy diya mamati antuni, uwed da pinili de̍ Pablu nga panglakayen da. Ket inanusan da ya madi nangnangan itun, tasun ipasnec da ya panangikararag da kadito napili, se̍ da da nitalec iya Apu nga maningsingen igidan, ta igina ngarud ya patpatiyen dan.

Aramid 4:31

Ket kalpasan nito panagkararag da, nayegyeg met to baley nga edyan dan. Ket niturayan niya Ispiritu Santu da nga amin, ket natured da ngarud nga nangibaga iya kagi ne̍ Apu Diyusin.

Ruma 10:17

Dikad pe̍ maemmuwan tida nga mamati diya toley gapu iya maipadamag igida. Ket ya panangipadamag kadiya toley, itu ya pakaemmuwan da maipanggep e̍ Kristu.

1 Kurintu 10:13

Ket tunggal sulisug nga dumateng dakayu, kadawyan da ngas nga pakasulisugan niya toley. Ket e̍ Apu Diyus, laglagipen nactida nga pe̍yeng, nga madi na ipalubus nga masulisug kayu ka madi nu mabalin nga atipaen. Ta no masulisug kayu, e̍cdan nakayu nge̍ Apu Diyus ka gundaway nu nga makalasat, tasun mabalin nu nga ibturan yan nga panulisug.

1 Kurintu 11:1

Ket no dakayu, tuladen dac kuma nga agten pe̍ iya panangtulad ku e̍ Kristu.

1 Kurintu 4:16

Dikad pe̍ bilinen nakayu nga sipapasnec nga iyaken kuma ya pagtuladan nu.

Pilipus 3:17

Ket kakabsat, agpapada kayu kuma nga mangtulad iya ugali nga nipaspasingec dakayu. Ket diya mangtungtungpal idi nga ugali mi, ket pagtuladan nu da pe̍ yin.

1 Te̍salunika 1:6

Ket itun, tinulad dakami se̍ ya Apu. Ta orey napalaus to rigrigat nu itun, namati kayu latta iya kagi ne̍ Apu Diyus. Ket naganggem kayu met pe̍ itun gapu iya anggem nga ipaay niya Ispiritu Santu.

1 Te̍salunika 2:13

Ket agyaman kami nga pe̍yeng e̍ Apu Diyus gapu ta ito nipakaemmu mi dakayu ya kagi ne̍ Apu Diyus, pinati nu. Nibilang nu nga tutu nga kagi nga gayat e̍ Apu Diyus, bekken nas nga kagi toley. Ket tutu met nga kagi ne̍ Apu Diyus yan nga mangiturturung dakayu nga mamati.

2 Te̍salunika 3:7

Ket naemmuwan nu mettin to ugali mi ito uwed kami iya edyan nu itun. Ket emmu nu met nga masapul nga tuladen dakami, ta bekken kami nga nasadut.

2 Te̍salunika 3:9

Rumbeng met no nibilin mi dakayu kuma itun nga istimaren dakami. Ngem awan nibilin mi nga agten iyan, ta ginabay mi nga ipasingen dakayu ya pagtuladan nu kuma nga ugali.

1 Timutyu 3:5

Ta no madi na emmu ya mangituray iya kakobung na, madi na ngarud met emmu ya mangaywan kadiya toley ne̍ Apu Diyus.

He̍briyu 13:17

Nalagon kayu kuma kadiya mangipangulu dakayu nga mamati, ket agtungpal kayu ngarud kadiya kagkagiyen da dakayu. Igida met ya natalec nga mangay-aywan dakayu, ta uwed nad met sungbatan da e̍ Apu Diyus maipanggep dakayu. Agtungpal kayu ngarud igida tasun madi nu kuma parigaten da iya wangel da, no di lugud paanggemmen nu da. Ta awan mamaay na dakayu no mapasakitan da iya panagsirbi da.

He̍briyu 13:24

Ipakumusta nakami kuma kadiya pangpangulu nu nga mamati, se̍ kadiya amin nga toley ne̍ Apu Diyus iyan. Ket pakumustaan dakayu pe̍ diya kakabsat tida nga taga-Italya.

He̍briyu 6:12

Ta madi kayu kuma agsadsadut, no di lugud tuladen nu diya nagtawidin kadiya nikari ne̍ Apu Diyus. Nagtawid da ngarud gapu iya panamati se̍ panaganus da.

1 Pe̍dru 4:11

Kaspagarigan no ya pannakabalin nga mangaskasaba kuma ya naitalec ikew, mangasaba ka ngarud, ngem silalagip ka kuma nga ya kagi ne̍ Apu Diyus met ya ikaskasaba mun. Ket no ya pannakabalin nga tumulung ya naitalec ikew, ket tumulung ka ngarud, ngem sitatalec ka iya kabaellan nga e̍cde̍ ne̍ Apu Diyus. Agten iyan kuma ya wanglen nu, tasun e̍ Apu Diyus ya maidaydayaw iya amin nga wangwanglen nu, gapu e̍ Je̍su Kristu, ta igina met ya maikari nga madayaw se̍ agturay ka agnanayun. Agten iyan kuma.

Paltiing 1:9

Iyaken nga Juan nga kabsat nu ka pammati, ket gapu iya pannakaitipun tida e̍ Je̍sus, kabulun dac met iya panagsagaba gapu igina, se̍ iya pannakairaman kadiya iturayan na, se̍ iya panaganus nga sinanama gapu igina. Ket gapu iya panangikasabac iya kagi ne̍ Apu Diyus, se̍ gapu iya panangipakaemmu ne̍ Je̍sus, uwed dac itun iya puru nga maawagan ka Patmus.

Paltiing 20:4

Ket uwed da pe̍ nasingec itun nga truntrunu. Ket nagtugtugew kadito truntrunu diya nae̍cdan ka turay nga mangukum. Ket nasingec met pe̍ diya kararuwa dito napatpatey nga naputul diya ulu da, gapu iya panangipakaemmu da iya pudnu maipanggep e̍ Je̍sus se̍ iya kagi ne̍ Apu Diyus. Didi diya madi pe̍ nagdaydayaw itun ito nakan-ansing nga animal se̍ ito bultu na, se̍ madi da pe̍ pinamarkaan diya muging da winno ima da ito marka nito nakan-ansing nga animal. Ket didi nga toley, napagungar da mettin, se̍ da nakipagturay e̍ Kristu ka unus sangaribu nga dagun.

Paltiing 6:9

Ket itun, nipac nito Urbun Karne̍ru to maikalima nga naikapet ito nalukut nga pagbasaan, ket uwed met nasingec iya sidung niya pagdatunan antuni, nga itu diya kararuwa diya napatey gapu iya panangipateg da iya kagi ne̍ Apu Diyus, se̍ gapu iya panangipakaemmu da iya pudnu nga patpatiyen da.