He̍briyu 13:21 - Ya Baru nga Tulag

²¹ Ngarud, e̍ Apu Diyus met ya pagkararagac maipanggep dakayu, ket ikararag ku nga ipaay na kuma dakayu diya amin nga nabaru nga masapul nu, tasun makatungpal kayu kuma iya tarigagay na. Ket sapay kuma ta e̍ Apu Diyus, ipawangel na dactida diya makaay-ayu mettas igina, gapu iya tulung ne̍ Je̍su Kristu dactida. Ket madaydayaw kuma ngarud nge̍ Je̍su Kristu ka agnanayun nga awan patingga na. Agten iyan kuma ngarudin.

He̍briyu 13:21 Iomraidhean Croise

Matyu 12:50

Ta orey nagan na nga agtungpal iya tarigagay niya Amac nga uwed ka langit, itu ya maibilang nga kabsat ku nga lalaki winno babey, winno ya inac,” kunen na.

Matyu 21:31

“Ket nagan ya makunen nu? Nagan kadito duwa nga anac ya nagtungpal ito gabay nito ama da?” kunen na. Ket nisungbat dito pangulu se̍ panglakayen nga kinunen da, “To inauna, a,” kunen da. Ket iya agten iyan, kinunen ne̍ Je̍sus igida, “Kinapudnu na, no maipanggep iya pannakitipun niya toley kadiya iturayan ne̍ Apu Diyus, ket konaan dakayu lugud diya managbasul nga agsingsingir ka buis se̍ diya huste̍s!

Matyu 28:20

Ket isuru nu da nga tungpalen da diya amin nga nibilin ku dakayu. Ket laglagipen nu kuma nga kabulun dac nga pe̍yeng agingga iya panagpatingga nidi nga timpu,” kunen na.

Matyu 6:13

Se̍ di nakami kuma iturung ka pakasulisugan, no di lugud ilisi nakami iya Managdacdake̍c.’

Matyu 7:21

“Ket bekken nga amin nga mangawag iyaken ya makalak-am nad iya panangituray niya Nailangitan, orey diya agkunen iyaken nga, ‘Apuc, Apuc’. Ta diyan nas tutu nga agtungpal iya tarigagay niya Amac nga uwed ka langit diya makalak-am nad iya panangituray na.

Juan 17:23

Naitipun nac igida. Ket ikew, naitipun ka met pe̍ iyaken tasun iya agten iyan, awan met pagkurangan niya panagkaykaysa da. Ket no agten iyan, maemmuwan ngarud diya toltoley iya lubung nga tutu nga nibon nac idi, se̍ maemmuwan da met pe̍ nga uwed panagayat mu kadiya mamati iyaken, nga agten met iya panagayat mu iyaken.

Juan 7:17

Ket ya toley nga mayat nga agwangel iya tarigagay ne̍ Apu Diyus, mailasin na met no tutu nga agtaud e̍ Apu Diyus diya isursuruc, winno agkagkagi yac ngas ka kabucbukudac nga turay.

Ruma 11:36

Awan ngarud makaisagut e̍ Apu Diyus, ta igina met ya namarsuwa kadiya amin. Igina met pe̍ ya mangituray kadiya amin nga naparsuwa, ket agpaay da pe̍ nga amin igina. Madaydayaw kuma nge̍ Apu Diyus ka agnanayun! Agten iyan kuma.

Ruma 16:27

Itu nga kunec nga madaydayaw kuma ka agnanayun nge̍ Apu Diyus. Igina ngas met ya Diyus nga makaemmu iya amin, ket madaydayaw kuma ngarud gapu iya pannakapadayaw ne̍ Je̍su Kristu. Agten iyan kuma ngarud.

2 Kurintu 9:8

Ket e̍ Apu Diyus, mabalinan na ya mange̍cde̍ ka siaayat nga asi nga nasursuruc ngem iya kasapulan nu. Agten iyan ya arimanen na, tasun madi kayu nga agkurang iya orey nagan na, se̍ tasun uwed pe̍ dakayu ya adu nga maitulung nu iya orey nagan na nga rantaen nu nga kaasiyan.

Galasiya 1:5

Ngarud, madaydayaw kuma nge̍ Apu Diyus ka agnanayun nga awan patingga na. Agten iyan kuma.

E̍pe̍su 2:10

Ta ya kinapudnu na, uwed din dactida nga mamati yan nga kasasaad tida, gapu ngas ito inariman ne̍ Apu Diyus. Ta niraman nactida iya kasasaad mettas ne̍ Kristu Je̍sus, tasun agpaay tida pe̍ iya panagwangel kadiya makaay-ayu igina. Itu met to panggep ne̍ Apu Diyus itun pekkem nga wangwanglen tida kuma ita.

E̍pe̍su 2:18

Ta gapu e̍ Kristu, mabalin tida nga amin ya umadenni yin e̍ Apu Diyus nga Ama, Hudyu man winno bekken nga Hudyu, gapu mettas iya is-isa nga Ispiritu.

Pilipus 1:11

Ket iya agten iyan, adu win diya nalinteg nga banbanag nga masingen dakayu gapu iya tulung ne̍ Je̍su Kristu, ket agbanag didi ka pakasingnan iya kinaDiyus se̍ kinadayaw ne̍ Apu Diyus.

Pilipus 2:11

Ket se̍ tasun pulus nga awan madi agibalikas nga e̍ Je̍su Kristu, ket igina ya Apu. Ket iya agten iyan, maidaydayaw ngarudin nge̍ Apu Diyus nga Ama.

Pilipus 2:13

Agten iyan kuma ngarud, ta uwed tumulung dakayu, nga itu nge̍ Apu Diyus mettas, tasun maemmuwan nu ya tarigagay na, se̍ tasun mawangel nu diya makaay-ayu igina.

Pilipus 4:13

Ta awan dumateng iyaken nga madic maitured gapu iya tulung niya mangpabileg iyaken.

Pilipus 4:18

Ket kustu mettin to nae̍cde̍ iyaken, ket nagsursuruc pe̍ lugudin. Ta awan pulus masapul kun, gapu ito nipakagtu nu e̍ E̍papruditu nga para iyaken. Ket naibilang ngarud nga nabangug nga pagdatun nu ditun nga ne̍cde̍ nu, nga isa nga datun nga annamungan ne̍ Apu Diyus, nga pakaragsakan na.

Kulusas 3:17

Ngarud, sipapati kayu kuma ngas e̍ Apu Je̍sus iya orey nagan na nga ar-arimanen nu, orey kadiya kagkagiyen winno wangwanglen nu. Ket sigun iya kinaturay ne̍ Apu Je̍sus, agyaman kayu kuma ngarud e̍ Apu Diyus nga Ama.

Kulusas 3:20

Ket dakayu nga an-anac, managtungpal kayu kadiya naganac dakayu iya orey nagan na, ta itu ya makaay-ayu e̍ Apu Diyus.

Kulusas 4:12

Ket e̍ E̍papras met pe̍, nga isa mettas dakayu, nga isa nga agsirsirbi e̍ Kristu Je̍sus, ket makikumusta kanu pe̍ dakayu. Ket pe̍yeng nga sipapasnec nga mangikarkararag dakayu e̍ Apu Diyus. Ta gabay na met no nabaked kuma ya panamati nu, se̍ awan nga pulus duwaduwa nu maipanggep iya orey nagan na nga tarigagayan ne̍ Apu Diyus dakayu.

1 Te̍salunika 3:13

Ket no agten iyan, pabilgen nad niya Apu diya panpanunut nu, tasun ig-igina ngas ya pangipaayan nu iya panagbiyag nu, nga awan nad pakapilawan nu iya imatang ne̍ Apu Diyus nga Diyus se̍ Ama tida, no umbe̍t nad manin ya Apu tida nga Je̍sus agraman kadiya amin nga toley na.

1 Te̍salunika 4:3

Ket agten idi ya tarigagayan ne̍ Apu Diyus dakayu: Adeyyuwan nu ya pannakikamalala, ta tarigagayan ne̍ Apu Diyus nga maiyadeyyu kayu kuma ka dake̍c.

1 Te̍salunika 5:23

Sapay kuma ta palinteggen nakayu nge̍ Apu Diyus nga mange̍cde̍ ka talna na, tasun awan nga pulus maipabasul dakayu. Ket aywanan na kuma pe̍ diya nakem nu, diya biyag nu, se̍ diya beggi nu, tasun mailisi kuma didi iya amin nga pagbasulan. Agten iyan kuma agingga mettas iya umbe̍t niya Apu tida nga Je̍su Kristu.

2 Te̍salunika 2:17

Ket ya adngen mi, itu ya pabilgen se̍ paturedden nakayu kuma tasun naan-anay kayu kadiya amin nga nabaru nga wanglen se̍ kagiyen nu.

1 Timutyu 1:17

Sapay kuma ta daydayawen tida nge̍ Apu Diyus nga agnanayun nga Ari tida nga madi matey. Itu ya is-isa nga Diyus ket madi pe̍ masingen toley. Madaydayaw kuma ka agnanayun nga awan patingga na! Agten iyan kuma.

1 Timutyu 5:10

Ket masapul pe̍ nga uwed maemmuwan diya toltoley nga wangwanglen da nga nabaru, agten iya panangpadackel kadiya anac da ka nabaru nga sursuru, se̍ ya managsangaili, se̍ ya managistimar kadiya pada da nga mamati, se̍ ya managkaasi kadiya kackaasi. Ngarud, diya balu nga ilista nu, yan nas agisnup kadiya amin nga nabaru nga kabaellan da nga wanglen.

1 Timutyu 6:16

Igina ngas ya awan pannakatey na. Ket igina, aged-edyan met ka wada nga madi maadenniyan niya toley. Pulus nga awan pekkem toley nga nakasingen igina, ket awan pe̍ makasingen igina ita, ta awan makabael. Igina kuma ya madaydayaw nga mannakabalin ka agnanayun. Agten iyan kuma.

2 Timutyu 3:17

Ket naipasurat ngarud ya Bibliya tasun awan kuma pagkurangan niya toley nga agsirbi e̍ Apu Diyus, se̍ tasun sisasagana kuma nga mangariman iya orey nagan na nga nabaru.

2 Timutyu 4:18

Ket iya orey nagan na nga kinadake̍c nga dumateng iyaken, isalakan nac nad met ya Apu. Ket igina met ya mangalac nad iyaken, nga ipen nac nad iya pagturayan na ka langit. Madaydayaw kuma ka agnanayun nga awan patingga na. Agten iyan kuma.

He̍briyu 10:36

Masapul nu ngarud ya agten iyan nga panaganus, tasun nad no naariman nun ya tartarigagayan ne̍ Apu Diyus, ket maalac nu ngarudin to nikari na.

He̍briyu 12:23

Nadateng nu ngarudin ya bungguy diya naibilang nga kaonaan nga anac ne̍ Apu Diyus. Ket didi, nailista pe̍ yin diya nagnagan da enna langit. Nakadateng kayu ngarud mettin iya edyan mettas ne̍ Apu Diyus, nga igina met ya mangkeddeng kadiya amin-amin. Se̍ nadateng nu pe̍ yin dito nat-atey nga toley na nga naibilang nga awan pagkurangan dan iya imatang na.

He̍briyu 12:28

Dikad pe̍ agyaman tida kuma ngarud e̍ Apu Diyusin, ta nibilang nactida nga makipagtagikuwa iya nabaked nga pagturayan na nga pulus nga madi mayegyeg winno mapukaw. Itu nga agyaman tida kuma ngarud nga siaayat e̍ Apu Diyusin, se̍ agdaydayaw tida pe̍ igina ka panagdayaw nga makaay-ayu igina, nga situtuluc se̍ sitatanang tida kuma.

He̍briyu 13:16

Ket di nu kuma pe̍ liwayan ya panagariman ka nabaru, se̍ ya panagtitinnulung nga siaasi. Ta diya agten kadiyan, arig da nga datun nu nga makaay-ayu e̍ Apu Diyus.

1 Pe̍dru 2:5

Ket dakayu, arig kayu pe̍ nga batbatu nga sibibiyag. Ket maurnus kayu ka isa nga bungguy, nga itu ya te̍mplu nga maipaay iya Ispiritu ne̍ Apu Diyus. Ket agten iyan ngarud, tasun agbalin kayu nga isa nga bungguy nga agsirsirbi ngas e̍ Apu Diyus. Ket diya di masingen nga banbanag nga ipaay nu igina, itu ya maibilang nga pagdatun nu nga magustuwan ne̍ Apu Diyus gapu e̍ Je̍su Kristu.

1 Pe̍dru 4:2

Ket no agten iyan, bekken nin nga diya dake̍c nga tarigagay niya kinatoley na ya tungtungpalen nan iya panagbibiyag na pekkem idi nga lubung, no di diyan nas gabay ne̍ Apu Diyus ya pe̍yeng na nga tungtungpalen nin.

2 Pe̍dru 3:18

Ngem sapay kuma ta bumilbileg pekkem ya panamati nu iya Apu tida se̍ Mangisalakan dactida nga Je̍su Kristu, gapu iya siaayat nga panangaasi na dakayu, se̍ gapu iya pannakaemmu nu maipanggep igina. Igina kuma ya madaydayaw, orey ita nga timpu, se̍ iya maadpangan pe̍ nga agnanayun!

1 Juan 2:17

Ket diya agten kadiyan nga ugali nga makaawis dakayu, agpatingga da ngas met, ta mapucpukaw mettin ya amin nga uwed iya lubung ngi. Ngem ya toley nga agtungpal iya tarigagay ne̍ Apu Diyus nga gennung, ket agnanayun met.

1 Juan 3:22

Ket orey nagan na nga adngen tida igina, ipaay na dactida, ta tungpalen tida diya bilin na se̍ wanglen tida pe̍ diya makaay-ayu igina.

Hudas 1:25

Ngarud, laglagipen nu kuma nga pe̍yeng nge̍ Apu Diyus, nga ig-igina ngas met ya Diyus nga Mangisalakan dactida, gapu e̍ Je̍su Kristu nga Apu tida. Sapay kuma ta igina ya madaydayaw, nga kangatuwan ya dayag na, kinaari na, pannakabalin na, se̍ turay na. Uwed met didi igina ito awan pekkem naparsuwa. Ket uwed da pe̍ orey ita, ket uwed da mettas pe̍ ka agnanayun nga awan patingga na! Agten iyan kuma ngin.

Paltiing 4:6

Ket iya sangu nito trunu, uwed arig nga baybay nga sinan-sarming ya sap-ew na, ket arig met nga kristal nga masarang. Ket iya le̍cbut nito nagtengnga nga trunu, uwed eppat nga sibibiyag nga parsuwa, nga nasanap met diya beggi da ka adu nga mata, iya sangu se̍ iya likud da.

Paltiing 5:13

Ket itun, nagicnac diya kinagkagi diya amin nga naparsuwa nga uwed ka langit, se̍ diya uwed iya lubung, se̍ diya uwed iya uneg niya ginet, se̍ diya uwed ka baybay. Ngarud, nagicnac diya kinagkagi diya amin-amin nga naparsuwa, nga kinunen da, “Pagipaayan ngarud ya nakatugew iya trunu se̍ ya Urbun Karne̍ru ka amin nga pateg, dayaw, kinaari, se̍ pannakabalin ka agnanayun nga awan patingga na!” kunen da.

Paltiing 5:9

Ket dito naglakeb, kinanta da ya isa nga kabarbaru nga kanta. Agten idi to nikanta da: “Ikew ya maikari nga mamet iya nalukut nga pagbasaan se̍ mangipac kadito naikapet. Ta ikew ya napatey itun, ket gapu iya pannakaidaga niya beggim mettas, uwed da toley nga sinubbut mu nga nipaay mu e̍ Apu Diyus, nga gayat iya tunggal kapututan, pagkakagi, pagiliyan se̍ nasyun.