He̍briyu 13:18 - Ya Baru nga Tulag

¹⁸ Ket ya ibagac dakayu, gabay ku nga ikarkararagan dakami kuma. Madi kayu kuma umikeb iya panangikararag nu dakami, ta maemmuwan nu kuma nga natalna ya nakem mi, gapu ta emmu mi nga maiparbeng amin nga winangel mi. Diya nalinteg ngas met ya pe̍yeng mi nga pangpanggeppen nga wanglen.

He̍briyu 13:18 Iomraidhean Croise

Aramid 23:1

Ket e̍ Pablu, pespeskan na dito kunse̍hale̍s, se̍ kinunen na igida, “Wawagic, natalna ngas ya nakem ku, ta awan met winangel ku nga iyalyew ku e̍ Apu Diyus, orey agingga ita,” kunen na.

Aramid 24:16

Itu nga wanglec nga pe̍yeng ya kabaellac nga agwangel iya kustu, ta gabay ku no nadalus nga pe̍yeng ya nakem ku, nga awan basbasul ku e̍ Apu Diyus se̍ kadiya toltoley.

Ruma 12:17

Ket no uwed agariman ka dake̍c dakayu, madi kayu kuma balsen ka dake̍c. Ta ipasnec nu kuma lugud ya agariman kadiya emmu nu nga naibilang nga nabaru iya imatang diya amin nga toltoley.

Ruma 13:13

Ket ya gangey tida ita, natacneng ngas kuma, nga maitutup iya gangey diya maipaay iya algew. Itu nga bay-an tida ngarud ya panaglucluku se̍ panage̍ng-e̍nglew. Awan kuma ngarud dactida ya pannakikamalala winno duduma pe̍ nga naalas nga wangwangel. Awan kuma ngarud pe̍ yin diya panagsusupyat winno panagiman.

Ruma 15:30

Ket kakabsat, ipacpakaasic dakayu nga makipagkararag kayu kay iyaken e̍ Apu Diyus. Ta gapu iya panamati tida iya Apu tida nga Je̍su Kristu, se̍ gapu iya panagiinnayat tida nga gayat iya Ispiritu ne̍ Apu Diyus, ipasnec nu kuma ya makipagkararag iyaken e̍ Apu Diyus maipanggep iya kasasaad ku.

2 Kurintu 1:12

Agtalged kami ngarud gapu kadiya panangikararag nu dakami. Ket natalna ngas ya nakem mi, ta emmu mi nga napaw-is ya ugali mi iya imatang diya toltoley, se̍ nangruna ya pannakibulun mi dakayu. Ta diyan nas gabay ne̍ Apu Diyus diya winangwangel mi, agten kadiya nalinteg se̍ napudnu. Ket ya panagtungpal mi kadiyan nga gabay ne̍ Apu Diyus, bekken nga sigun iya kinasirib niya kinatoley mi, no di lugud gapu mettas iya sirib nga ikaasi ne̍ Apu Diyus nga siaayat dakami.

Pilipus 4:8

Ket idi ya modi nga ibagbagac dakayu nga kakabsat: Diya panpanunuten nu kuma nga pe̍yeng, ket itu ngas diya banbanag nga mange̍cde̍ ka napudnu nga kagi, nadayaw se̍ nalinteg nga ugali, nadalus nga pamaay, se̍ diya agpaay ka panagayat se̍ panagkagi ka nabaru. Ngarud, diya ug-ugali nga mange̍cde̍ ka kinatacneng se̍ diya annamungan ne̍ Apu Diyus, itu kuma ngarud diya ipatpateg nu.

Kulusas 4:3

Ket ikarkararagan dakami kay pe̍, tasun e̍cdan nakami nge̍ Apu Diyus ka gundaway iya panangipakaemmu mi iya kagi na. Ta maikasaba mi kuma ya panggep na maipanggep e̍ Kristu, nga madi pekkem naipakaemmu itun. Ket itu pe̍ yan ya gapu na nga uwed dac nga sibabaludin.

1 Te̍salunika 4:12

Agten iyan ya wanglen nu kuma ngarud, tasun raemmen nakayu diya di pekkem mamati, se̍ tasun bekken kayu nga siaadeng kadiya duduma iya kasapulan niya panagbiyag nu.

1 Te̍salunika 5:25

Kakabsat, ikarkararagan dakami kuma pe̍.

2 Te̍salunika 3:1

Ket ya modi nga kunen mi dakayun, kakabsat, ket ikararagan dakami kuma tasun dagus kuma ya pannakaiwaragawag niya kagi niya Apu. Ket maipangag kuma pe̍ nga sidadayaw ya kagi na, nga agten mettas ito pannakaipangag na dakayu.

1 Timutyu 1:5

Ket ya panggep nidi nga bilin nga ibagbagac, ket tasun maipalagip kuma kadiya toley ennan ya maipanggep iya panagayat nga tumaud iya lemlemmet nga awan dake̍c nga panggep na, se̍ maipanggep iya natalna nga nakem, se̍ maipanggep iya napudnu nga panamati.

1 Pe̍dru 2:12

Pe̍yeng nu kuma nga ipasingen diya nabaru nga ug-ugali nu kadiya toley nga di mamati e̍ Apu Diyus. Tasun iyan, orey kunen da ita nga dake̍c kayu kanu nga toley, malasin da met nga nabaru nga tutu diya wangwanglen nu. Ket iya agten iyan, dayawen da nad met nge̍ Apu Diyusin, no madatngan ya timpu niya pananglinteg na.

1 Pe̍dru 3:16

Ket agannad kayu pe̍ iya panagbiyag nu. Ta yan nas nadalus nga nakem ya uwed kuma dakayu, tasun diya manguyaw iya nabaru nga ugali nu gapu iya pannakitipun nu e̍ Kristu, nakal-alyew da ngas met no agkagi da ka mangpasakit iya nakem nu.

1 Pe̍dru 3:21

Ket ya pannakabautisar nu ita, maiyarig ito danum itun, ta itu pe̍ ya pakaisalakanan nu ita. Ngem bekken nga pakadalusan diya beggi nu ka rugit, no di itu ya panangipasingen nu e̍ Apu Diyus nga natalna ya nakem nun, gapu ito panagungar ne̍ Je̍su Kristu.