He̍briyu 12:23 - Ya Baru nga Tulag

²³ Nadateng nu ngarudin ya bungguy diya naibilang nga kaonaan nga anac ne̍ Apu Diyus. Ket didi, nailista pe̍ yin diya nagnagan da enna langit. Nakadateng kayu ngarud mettin iya edyan mettas ne̍ Apu Diyus, nga igina met ya mangkeddeng kadiya amin-amin. Se̍ nadateng nu pe̍ yin dito nat-atey nga toley na nga naibilang nga awan pagkurangan dan iya imatang na.

He̍briyu 12:23 Iomraidhean Croise

Lukas 10:20

Ngem orey ikasu dakayu diya sacsairu, bekken kuma nga itu ya paganggemman nu, no di lugud aganggem kayu gapu ta nailista diya nagan nu ka langitin,” kunen na.

Juan 5:27

Ket se̍ ne̍cde̍ na pe̍ iya Anac ya turay nga mangukum, gapu ta igina ngarud met ya Anac nga Naipatoley.

Aramid 20:28

“Dikad pe̍ ita, dakayu nga panglakayen, agannad kayu nga tunggal isa, se̍ siputan nu pe̍ diya amin nga mamati nga nitalec niya Ispiritu Santu dakayu iya tunggal bungguy nu. Aywanan nu da nga nalaing, ta bukud ne̍ Apu Diyus da nga arig nga ngininaan na da iya daga niya Anac na.

1 Kurintu 13:12

Ket agten pe̍ iyan ya kasasaad tida ita, ta ita nga timpu, arig nga sumingsingen tida kadiya nasarmingan nas nga banbanag nga bekken pekkem nga nabatad. Ngem natarus nad mettas ya pannakaawat tida. Ngarud, ita nga timpu, kurang pekkem ya pannakaawat ku maipanggep e̍ Apu Diyus. Ngem maawatac nad met ya aminin, agten mettas iya pannakaawat ne̍ Apu Diyus iya amin maipanggep iyaken nin.

1 Kurintu 15:49

Ket ya gangey tida ita, agten mettas ito nona nga toley nga nagtaud iya ginet. Ngem masukatan nad mettas, tasun agten mettas ito toley nga nagtaud ka langit ya gangey tida.

1 Kurintu 15:54

Ket nad no nasukatan ya uwed pannakaropsa na ka awan pannakaropsa nan, se̍ no nasukatan ya uwed pannakatey na ka awan pannakatey nan, itu win ya pakatungpalan nito kunen na iya Bibliya nga, “Napirdi ya pannakatey, nga awan pulus pannakabalin nan, gapu iya sibaballaigi nga pannakaabac nan,” kunen na.

2 Kurintu 5:8

Natalged ngarud ya panpanunut mi, ket gabgabay mi ya pumanaw kuma kadidi nga beggi mi, tasun mawe̍ kami kuma makipagedyan iya Apu win.

E̍pe̍su 1:22

Ket nipaituray ne̍ Apu Diyus ya amin nga banbanag e̍ Kristu, tasun igina kuma ya apu diya aminin. Ket nisaad pe̍ ne̍ Apu Diyus nga pangulu nga makaemmu kadiya amin nga maipaay iya bungguy mamati nga kamkameng na.

Pilipus 4:3

Ket ikew nga pudnu nga kawanglac iyan, gabay ku ngarud no ikew kuma ya mangsingen kadiyan nga duwa nga babey, ta kabulun ku da itun iya panangipacpakaemmuc iya Makaparagsac nga Damag. Ngarud, kabulun ku da, agraman e̍ Kle̍me̍nte̍ se̍ dito duduma nga kinawanglac iya panagsirsirbic. Ket naisurat ngarud diya nagan diyanin iya libru nga pakaisuratan diya nagnagan diya mae̍cdan ka biyag nga agnanayun.

Kulusas 1:12

Ta ikarkararag mi nga siaanggem kayu kuma nga agyaman iya Ama, nga igina met ya namagbalin dactida nga maikari nga mairaman iya pannakagun-ud diya toley na nga uwed iya wada.

Kulusas 1:24

Ket no maipanggep iyaken, aganggem mac ngasin, orey maparparigat tac. Ta diya rigrigat ku wi, ket agbanag da met iya panagsirbic nga maipaay dakayu nga mamati. Ta diya rigrigat ku, bagic da ngas nga anusan, nga agten met kadito rigrigat nga nitured ne̍ Kristu itun. Ket masapul nga itured ku met pe̍ agingga ka matungpalin ya tarigagay na maipanggep iya beggi na, nga itu ya bungguy mamati.

1 Timutyu 3:5

Ta no madi na emmu ya mangituray iya kakobung na, madi na ngarud met emmu ya mangaywan kadiya toley ne̍ Apu Diyus.

He̍briyu 11:4

Ket to Abe̍l, gapu ta uwed panamati na, napatpateg iya imatang ne̍ Apu Diyus to nidatun nito Abe̍l igina ngem ito nidatun nito Kain. Itu nga inannamungan ne̍ Apu Diyus to Abe̍l, nga nibilang na nga nalinteg. Ket nipakaemmu ne̍ Apu Diyus yani ito nipateg na to nidatun nito Abe̍l. Ket orey natey yin to Abe̍l, arig nga agkagkagi pekkem dactida gapu ka panamati, ta maadal tida pekkem ita gapu igina.

He̍briyu 11:40

Ta uwed namaymayat nga panggep ne̍ Apu Diyus para igida nga maigapu met dactida. Itu ya panangiraman na igida iya kasasaad tida nga awan pagkurangan iya imatang ne̍ Apu Diyus.

He̍briyu 2:12

Ta kinunen na ngarud e̍ Apu Diyus itun nga, “Ipakaemmuc nad ya maipanggep ikew kadiya kakabsat ku. Ikantac nad pe̍ ya panagdayaw ku ikew, iya imatang diya maurnung nga toley.”

He̍briyu 9:27

Ket no dactida nga toley, sigud nga naikeddeng nga matey tida ka mame̍nsan, ket kalpasan na, uwed pe̍ yin ya panangukum ne̍ Apu Diyus.

Santiyagu 1:18

Ket gapu mettas iya rimidyu ne̍ Apu Diyus, pinagbalin nactida nga anac na gapu iya kagi na nga naipakaemmu dactida, nga itu ya kinapudnu. Agten iyan ngarud ya nirimidyu ne̍ Apu Diyus, ta gabay na no dactida nga mamati, ket maiyarig tida iya kangrunaan kadiya amin nga pinarsuwa na.

1 Pe̍dru 2:23

Ket ito linais da, madi bimalbales nga limais. Ket ito nangparigat da igina, madi met namanpansing igida ka dusa da, no di lugud nitalec na ngas ya kasasaad na iya napudnu ya pananglinteg na, nga itu nge̍ Apu Diyus.

Paltiing 13:8

Ket agdaydayaw met igina diya kaaduwan nga toley iya lubung, nga itu diya amin nga bekken nga naisurat ya nagan da iya libru niya Urbun Karne̍ru nga napatey. Ket idi nga libru, itu ya nakaisuratan diya nagnagan nga naisurat ito di pekkem naparsuwa ya lubung, nga igida diya nae̍cdan ka biyag nga agnanayun.

Paltiing 14:4

Ket igida didi diya madi namansaan ka dake̍c maipanggep ka babey, ta pulus nga di da nakitipun ka babey. Igida diya sumursurut ito Urbun Karne̍ru iya orey awac nga pennan na. Se̍ igida met diya toley nga nasubbut, tasun igida ya arig nga mon-ona nga pagdayaw nga maisangu e̍ Apu Diyus se̍ iya Urbun Karne̍ru.

Paltiing 20:15

Ngarud, to dackel nga pagapuyan, itu ya nakaipisukanin dito orey nagan na nga awan nagan da nga naisurat ito libru nga nakaisuratan diya nagnagan diya mae̍cdan ka biyag nga agnanayun.

Paltiing 6:11

Ket itun, ya tumunggal isa igida, nae̍cdan da ka puraw nga sutana. Ket naibaga igida nga agton da kanu pekkem mas ka e̍teng, nga sitatalna da kuma, agingga ka madatngan to naikeddeng nga bilang diya pada da nga agsirsirbi nga kakabsat nga mapatey nga agten mettas ito pannakapatey da itun.

Paltiing 6:9

Ket itun, nipac nito Urbun Karne̍ru to maikalima nga naikapet ito nalukut nga pagbasaan, ket uwed met nasingec iya sidung niya pagdatunan antuni, nga itu diya kararuwa diya napatey gapu iya panangipateg da iya kagi ne̍ Apu Diyus, se̍ gapu iya panangipakaemmu da iya pudnu nga patpatiyen da.