He̍briyu 12:2 - Ya Baru nga Tulag

² Ket e̍ Je̍sus kuma ngas ya namnamaen tida, nga arig nga igina ya sisingen tida. Ta igina met ya nangariman iya pangnamnamaan niya panamati tida, se̍ igina met pe̍ ya mangtungpal. Ket e̍ Je̍sus, niturtured na met nga siaanus to pannakatey na ito krus, nga madi na linaglagip to nakaiyal-alyewwan na. Ta laglagipen na nga gennung ya pakaanggemman na nga naikari igina. Ket ita, uwed met nga tutu win nga agtugtugew iya kadayawan nga edyan, nga itu ya madiwanan niya trunu nga pagtugawan ne̍ Apu Diyus.

He̍briyu 12:2 Iomraidhean Croise

Matyu 16:21

Ket manipud itunin, nipalpalawag ne̍ Je̍sus kadito adalan na nga masapul nga mawe̍ ka He̍rusale̍m. Ket antuni, aglak-am nad kanu ka adu nga rigat gapu kadito panglakayen se̍ dito pangpangulu diya agsirsirbi iya Te̍mplu se̍ dito manursuru iya Linteg. Masapul nad met pe̍ nga mapatey, ket mapaungar nad mettas iya maikatlu nga algew.

Matyu 20:28

Ta agten met iyan ya Anac nga Naipatoley. Madi inumbe̍t tasun pasirbiyan kuma kadiya duduma, no di lugud tasun agsirbi, se̍ tasun ipaay na ya biyag na nga pangsubbut kadiya adu nga toltoley,” kunen na.

Markus 14:36

Ket kinunen na iya kararag na, “Ama! Amac! Mabalinam ya amin. Ipac mu kuma yani nga panagsagaba nga lak-amec, nga rigat nga arig nga inumec. Ngem bekken kuma ngarud nga ya tarigagay ku ya matungpal, no di lugud ya tarigagay mu,” kunen na.

Markus 15:28

[Ket iya agten iyan, natungpalin to naisurat iya Bibliya nga kunen na, “Naibilang nga kabulun diya managdacdake̍c.”]

Markus 16:19

Ket itun, kalpasan nito pannakitbar ne̍ Apu Je̍sus igida, ket naipangudu ka langitin. Ket enna langit, nagtugew iya kadayawan nga edyan, nga itu ya madiwanan ne̍ Apu Diyus.

Markus 9:12

Ket kinunen ne̍ Je̍sus igida, “Tutu met nga umbe̍t nga mon-ona nge̍ E̍lyas, tasun pasoliyen na diya amin nga banbanag kadito sigud nga urnus da. Ngem orey agten iyan, naisurat met iya Bibliya nga ya Anac nga Naipatoley, aglak-am ka adu nga rigat, se̍ mauyaw pe̍.

Markus 9:24

Ket to ama nito ebbing, dagus ngarud nga nagkagi yin, nga kinunen na ka nabileg, “Mamati yac met! Tulungan nac kay iya pagkurangan niya panamatic,” kunen na.

Lukas 17:5

Ket kinunen dito apustule̍s iya Apu, “Pabilgem kuma ngarud ya panamati mi,” kunen da.

Lukas 23:11

Ket de̍ He̍rude̍s se̍ dito suldadu na, linais da met nge̍ Je̍susin, se̍ nigalgalec da pe̍. Ket kalpasan na, pinakawwessan nito He̍rude̍s nge̍ Je̍sus ka napaw-is nga sutana ari, se̍ na pinaisoli ito Pilatu win.

Lukas 24:26

Di ngarud masapul nga mona nga agrigat ya Kristu ka agten kadiyan, se̍ kalpasan na, makadateng nad iya pakaidayawan na?” kunen na.

Juan 1:29

Iya kadamlag niyan, nasingen nito Juan nge̍ Je̍sus nga umbe̍t iya edyan na. Ket to Juan, kinunen na, “Singen nu yan! Igina yanin ya maawagan ka Urbun Karne̍ru ne̍ Apu Diyus nga mangipac kadiya basbasul diya uwed idi nga lubung!

Juan 12:24

Pudnu yani nga pangngarig nga ibagac dakayu: No ya isa nga bukel trigu, agingga nga maiterkag iya ginet, is-isa pekkem mas. Ngem no miterkag nga arig nga natey nga maitamen iya ginet, tumubu ngarud nga agbisic nad ka adu.

Juan 12:32

Ket no iyaken, awisec nad amin nga toley nga mamati iyaken, nad no naibayug gac kun,” kunen na.

Juan 13:3

Ngem e̍ Je̍sus, emmu na nga uwed igina mettas ya kadackellan nga pannakabalin nga nipaay niya Ama igina. Ket emmu na pe̍ nga e̍ Apu Diyus ya naggayatan se̍ ya kapennan na.

Juan 6:40

Ngarud, tarigagay niya Amac nga amin diya makaemmu se̍ mamati iya Anac, mae̍cdan da iya agnanayun nga biyag. Ket pagungarec da nad ngarud iya kaodiyan nga algew win,” kunen na.

Juan 8:56

Ket to Abraham nga ama nu, siraragsac itun nga ninamnama na ya inumbe̍t ku idi. Ket naragsakan ngarud to Abrahamin, ta nasingen nan ya panagparang ku,” kunen na.

Aramid 2:36

“Dikad pe̍ kapadpadac nga Israe̍lita, maemmuwan tida kuma nga nalaingin nga e̍ Je̍sus nga nipailansa nu ka krus, igina mettin ya dinutukan ne̍ Apu Diyus nga Apu se̍ Kristu.” Itu ya nipakaemmu ne̍ Pe̍dru.

Aramid 3:15

Ket iya agten iyan, nipapatey nu met ya pagtaudan niya biyag. Ngem pinagungar mettas ne̍ Apu Diyus. Ket dakami, nasacsiyan mi met yan.

Aramid 5:31

Se̍ nipangatu pe̍ ne̍ Apu Diyus iya kadayawan nga saad. Ket iya agten iyan, uwed din nge̍ Je̍sus iya madiwanan na nga mangituray se̍ mangisalakan ka toley. Agten iyan ngarud ya winangel ne̍ Apu Diyus, tasun uwed dactida nga Israe̍lita ya gundaway nga agbabawi se̍ tasun uwed pakapakawanan tida pe̍.

Aramid 5:41

Ket siraragsac nga pimanaw dito apustule̍s ito mimitingan diya kunse̍hale̍s, ta emmu da nga gapu mettas iya winangwangel da maipanggep iya kinaturay ne̍ Je̍sus, nibilang ne̍ Apu Diyus da nga maikari nga aglak-am iyan nga pakaiyal-alyewwan da.

1 Kurintu 1:18

Ket bekken nga agpapada ya pannakaawat diya toltoley iya panursuru maipanggep ito inariman ne̍ Je̍su Kristu ito krus. Ta diya toley nga agbanag ngas nga maukum, ibilang da nga awan kaipapennan na. Ngem no dactida nga maisalakan nga toley, pakaemmuwan tida ya kaipapennan na iya pannakabalin ne̍ Apu Diyus.

1 Kurintu 1:23

Ngem ya isuru mi nga gennung, itu ya maipanggep e̍ Kristu nga nailansa ka krus. Ket idi nga panursuru mi maipanggep iya nakatayan na, ket arig nga pakaisacdulan diya Hudyu win, nga pakalucsawan da. Ket no diya bekken nga Hudyu, kunen da met nga awan kanu kaipapennan niyan nga panursuru.

E̍pe̍su 2:16

Ta dactida nga Hudyu se̍ bekken nga Hudyu, naibilang tidan nga is-isa nga toley nga naitunus e̍ Apu Diyusin, gapu ito pannakatey ne̍ Kristu ito krus. Ket iya agten iyan, awan to panaggiginnura tidan.

E̍pe̍su 5:2

Ta to panangipateg ne̍ Kristu dactida itun, itu kuma ya ugali nga tultuladen nu ita iya panagbiyag nu. Ta e̍ Kristu, nipalubus na met ya pannakaidatun niya beggi na mettas para dactida. Ket inannamungan ne̍ Apu Diyus yan nga winangel na, nga arig nga nabangug nga sagut se̍ datun nga makaay-ayu mettas e̍ Apu Diyus.

Pilipus 1:6

Ket siguradu wac nga ilayun ne̍ Apu Diyus ya nabaru nga nirugi nan kadiya nakem nu, agingga ka matungpal nad iya Timpu ne̍ Kristu Je̍sus.

Pilipus 3:20

Ngem no dactida, langit met ya tutu nga ili tida. Ket padpadaanan tida pe̍ yin ya isosoli niya mangisalakan dactida nga gayat ka langit, nga itu nge̍ Apu Je̍su Kristu.

2 Timutyu 4:8

Ket itan, uwed naisagana para iyaken nga arig nga gun-gunac. Itu ya kinalinteg niya Apu nga ikutac nad mettas, nga arig nga isa nga kuruna nga igun-guna niya Apu iyaken nad no Timpu na nga manglinteg kadiya toltoley. Ket bekken nas nga iiyaken ya magun-gunaan nad ka agten iyan, no di pe̍ diya amin nga siaayat nga mangpadpadaan iya umbe̍t na manin.

He̍briyu 1:13

Ket no diya anghe̍le̍s, awan pulus igida ya nangagiyan ne̍ Apu Diyus ka agten idi: “Agtugew ka idi nga madiwanan ku, agingga nga mapasukuc diya gumurgura ikew, nga arig da nad nga pagipatayam iya saka mun,” kunen na.

He̍briyu 1:3

Ket ya Anac, igina mettas ya pakaemmuwan iya kinadayaw ne̍ Apu Diyus, se̍ igina ya pakasingnan iya gangey na. Ket gapu iya pannakabalin niya kagi niya Anac, igina ya makaemmu nga mangiturung kadiya amin nga naparsuwa. Ket ito nalpas ya panangdalus na dactida nga toley kadiya basbasul tida, nagtugew iya kadayawan nga edyan, nga itu ya madiwanan niya Nadayag nga Diyus nga nailangitan.

He̍briyu 10:14

Ket dactida, agnanayun nga awan pagkurangan tida iya imatang ne̍ Apu Diyusin. Ta dactida nga toley na, no maipanggep ka basul, ket nadalusan tidan, gapu ito is-isa nga datun ne̍ Je̍su Kristu.

He̍briyu 10:33

Pasaray nauyaw se̍ nairurumen kayu met itun iya imatang diya toltoley. Se̍ no duduma, nakipaglak-am kayu met pe̍ iya pakarigatan diya kapada nu.

He̍briyu 11:36

Ket uwed da pe̍ duduma nga lalaki nga nauy-uyaw se̍ nabacbaut, se̍ uwed da pe̍ diya sikakawar nga naibalud itun.

He̍briyu 12:3

Ngarud, utuben nu kuma ya maipanggep e̍ Je̍sus, tasun mapabileg ya panaganus nu, se̍ tasun bekken kayu nga nalaka nga makumsa. Ta e̍ Je̍sus, niturtured na met itun to nakaru nga pananggura igina dito toley nga managbasul.

He̍briyu 13:13

Dikad pe̍ dactida, panawan tida kuma ngarud pe̍ yin diya kaaduwan, ta umadenni tida ngarud e̍ Je̍susin. Arig kuma ngarud nga makibulun tida igina iya nagsagabaan na nga laskig niya kampu, ta anusan tida kuma pe̍ yin ya mauy-uyaw gapu igina.

He̍briyu 5:9

Ket ito nakasagana nge̍ Je̍susin para iya awan pagkurangan na nga saad na, igina ya nagbalin nga pakaisalakanan ka agnanayun diya amin nga agtungpal igina.

He̍briyu 7:19

Ta awan met naibilang nga awan pagkurangan na iya imatang ne̍ Apu Diyus gapu ito Linteg. Ket ita, uwed met namaymayat nga pagnamnamaan nga naipakaemmu dactidan, ket itu ya pakaiyadenniyan tidan e̍ Apu Diyus.

He̍briyu 8:1

Ket agten idi ya kaipapennan niya ibagbagac: Uwed mettin Kangatuwan nga Agsirsirbi nga mangibegbeggi dactidan e̍ Apu Diyus, nga agten mettas ito nilawlawag ku. Ket igina, agtugtugew win iya kadayawan nga edyan, nga itu ya madiwanan niya trunu nga pagtugawan niya Nadayag nga Diyus ka langit.

He̍briyu 9:28

Ket agten pe̍ iyan nge̍ Kristu, ta nam-ame̍nsan ngas nga naidatun, ket kustu para iya amin nga timpu to pannakaidatun na. Naidatun ngarud tasun inagtu na nga nipac diya basbasul diya adu nga toltoley. Ket agparang nad manin nge̍ Kristu ka maikadduwa, ngem bekken nin nga maigapu ka basul ya maikadduwa nga umbe̍tan na, no di lugud tasun mailayunin ya panangisalakan na dactida nga sinanama nga agpadpadaan igina.

Santiyagu 2:1

Kakabsat ku, e̍ Je̍su Kristu ya madaydayaw nga Apu tida. Ket gapu ta mamati kayu igina, madi kayu kuma mangidumduma ka toley.

1 Pe̍dru 1:11

Ginabay da ngarud nga emmuwen itun no nagan na se̍ no nungey nga mapasamac ya nipakaemmu niya Ispiritu ne̍ Kristu nga uwed igida, ito nipaipadtu na igida maipanggep iya pannakaparparigat ne̍ Kristu se̍ maipanggep iya pakaidayawan na kalpasan niya panagrigat na.

1 Pe̍dru 3:18

Ket agten pe̍ iyan nge̍ Kristu. Ta igina, natey met nga nam-ame̍nsan itun nga naipaay kadiya basbasul, ket kustu win para iya amin nga timpu. Orey awan basul na, natey met para dactida nga toley nga sibabasul, tasun iyadenni nactida e̍ Apu Diyus. Ket tutu met, ata gapu iya beggi na, ket natey. Ngem gapu iya Ispiritu, napabiyag.

1 Pe̍dru 3:22

Ket e̍ Je̍su Kristu, nawe̍ ka langitin, nga uwed itan iya kadayawan nga edyan, nga itu ya madiwanan ne̍ Apu Diyus. Ket naipaituray iginan diya anghe̍le̍s se̍ diya amin nga duduma nga nailangitan nga uwed turay winno pannakabalin da.

Hudas 1:21

Laglagipen nu kuma nga pe̍yeng ya panagayat ne̍ Apu Diyus dakayu. Se̍ namnamaen nu kuma nga pe̍yeng ya agnanayun nga biyag nga ipaay niya Apu tida nga Je̍su Kristu nad dactida gapu iya panangaasi na.

Paltiing 1:11

Ket kinunen na iyaken, “Isurat mu didi nga masingem, ket ipatulud mu ya nalukut nga nakaisuratan da kadiya pitu nga bungguy diya mamati kadiya ili nga E̍pe̍su, E̍smirna, Pe̍rgamu, Tiyatira, Sardis, Pilade̍lpiya se̍ ka Lawdisiya,” kunen na.

Paltiing 1:17

Ket ito nasingec to arig nga toley, nagdarongkeb bac mettin iya sangu na nga arig gac met nga natey yin. Ket ya napasamac itun, nipatey na met iyaken ya diwanan nga ima na, nga kunen na, “Madi ka mansing, a. Ta iyaken met ya kaonaan se̍ ya kaodiyan ka amin.

Paltiing 1:8

Ket e̍ Apu Diyus, nga Apu nga Mannakabalin ka amin, kinunen na, “Iyaken ya pangrugiyan se̍ ya panggibusan niya amin,” kunen na, ta igina met ya uwed ita, uwed itun, se̍ ya umbe̍t nad pekkem.

Paltiing 2:8

“Ket idi ya isurat mu iya anghe̍l nga agay-aywan iya bungguy mamati ka E̍smirna: “Itu yan ya kunen niya kaonaan se̍ kaodiyan ya kinauwed na, nga igina to natey se̍ nagungar mettas: