He̍briyu 12:1 - Ya Baru nga Tulag

¹ Ket no dactida ita, arig nga nale̍cbut tidan kadito adu nga toley, ta uwed pekkem dactida ita diya pammanecnec da maipanggep ito panamati da. Itu nga ipac tida kuma ngarudin diya amin nga manggapus dactida iya panamati tida, se̍ ya pakabasulan tida nga mangsipar iya panamati tida. Ket se̍ an-anusan tida ngarud nga itultuluy ya panagtungpal tida iya rebbeng niya panamati tida, nga maiyarig iya panagtarus niya isa nga makilumba nga sisingen nan ya pagpatinggaan niya pannakilumba na.

He̍briyu 12:1 Iomraidhean Croise

Matyu 10:22

Ket no dakayu, kagura dakayu nad diya amin nga toltoley gapu mettas iya pannakitipun nu iyaken. Ngem maisalakan met diya mangitured kadiya agten kadiyan agingga nga di da pekkem malabes.

Matyu 24:13

Ngem maisalakan nad met ya makaitured kadiyan agingga iya panagpatingga da.

Markus 10:50

Ket niwagleng ngarud ne̍ Bartimyu to ke̍bal nan, ket dagus nga ginumnukatin, nga nawe̍ ito edyan ne̍ Je̍sus.

Lukas 12:15

Ket nituluy ne̍ Je̍sus nga kinunen igida nga aminin, “Agannad kayu ngarud, nga madi kayu mairaman ka orey nagan na nga kita kinaagum. Ta kinapudnu na, ya kaipapennan niya biyag niya toley, bekken met nga maigapu iya kinaadu niya sanicwa na,” kunen na.

Lukas 16:28

ta uwed da pekkem lima nga kakabsat ku nga lalaki antuni. Ibon mu kay nge̍ Lasaru nga mawe̍ mangipakaemmu igida iya kinapudnu, tasun bekken kuma nga idi nga pagtuukan ya pagtungpalan da pe̍,’ kunen na.

Lukas 21:34

“Ket dakayu, agannad kayu ngarud, tasun madi kuma agkapsut ya panpanunut nu gapu iya nalabes nga pagragsakan idi nga lubung, winno gapu iya panage̍ng-e̍nglew, winno gapu iya pakasikuran maipanggep iya panagbiyag nu. Ta no agten iyan, bekken kayu nad nga nakasagana, ket pakakigtutan nu nad met ya panagparang niyan nga timpu win.

Juan 3:32

Ket igina, ipakaemmu na ya nasingen na se̍ nagicna na. Ngem awan met umawat iya ipakaemmu na.

Juan 4:39

Ket enna ili, adu dito iSamarya nga namati e̍ Je̍sus gapu ito kinunen nito babey igida nga, “Nipakaemmu na iyaken diya amin nga winangwangel ku,” kunen na itun.

Juan 4:44

Nawe̍ da ngarud antuni, ta e̍ Je̍sus mettas to nagkunen itun nga madi mapadayawan ya mangasaba iya mismu nga ili na.

Ruma 12:12

Anggem kuma ngas ya uwed iya lemlemmet nu gapu iya namnama nu e̍ Apu Diyus. Anusan nu ngas diya rigrigat nu, ket pe̍yeng kayu nga agkarkararag.

Ruma 2:7

Agten idi ya pananggun-guna na kadiya toley: Uwed da toley nga siaanus nga agwangwangel ka nabaru, gapu ta ipateg da ya panangpadayaw se̍ panangparaem ne̍ Apu Diyus igida, se̍ ya awan patingga na nga biyag nga ipaay na. Ket didi nga toley met diya pangipaayan nad ne̍ Apu Diyus iya biyag nga agnanayun.

2 Kurintu 7:1

Ket dakayu nga patpatgec, gapu kadiyan nga nikarkari ne̍ Apu Diyus dactida, ipac tida kuma ngarudin diya amin nga makapadake̍c iya beggi winno panpanunut tida. Ket an-anayen tida lugud ya panagbiyag tida nga sililinteg, gapu ta daydayawen tida nga situtuluc nge̍ Apu Diyus.

Galasiya 2:2

Nawe̍ yac ngarud enna He̍rusale̍m, ta e̍ Apu Diyus mettas ya nangbilin iyaken nga mawe̍. Ket nipalawag ku ngarud kadiya mamati e̍ Je̍sus ennan ya maipanggep iya Makaparagsac nga Damag nga ikaskasabac kadiya bekken nga Hudyu. Ngem diya naibilang nga pangpangulu da ngas to nangilawlawagac idi. Ta di yac gabay no kuntraen da ya isursuruc kadiya bekken nga Hudyu, tasun madi kuma nga agbalin nga awan pagmamaayan nito nagbannugac itun, se̍ orey ya pagbannugac ita.

Galasiya 5:7

Nabaru met to panamati nu itun, nga arig kayu met nga nalaing nga managtag nga makilumlumba. Ngem nagan kad ya nangtiped dakayu iya isusurut nu iya kinapudnu?

E̍pe̍su 4:25

Dikad pe̍ ipac nu ngarud ya panagbusbusidin. Ket ya tunggal isa dakayu, pudnu kuma ngasin ya ibaga nu kadiya kapada nu, ta kamkameng nactida nga amin ya is-isa nga bungguy.

Pilipus 1:30

Itu pe̍ yin ya pannakairaman nu iyaken ka panagrigrigat, nga itu mettas ya kapada nito panagsagabac nga nasingen nu itun. Ket itu pe̍ yin ya panagsagaba nga nadamag nu nga uwed manin iyaken ita.

Pilipus 2:16

Ta dakayu met diya mangipateg iya panursuru nga pakabiyagan toley. Ket no tutu nga agten iyan ya wangwanglen nu, uwed ngarud pakaragsakac nad iya Timpu ne̍ Kristu, gapu ta bekken nga masayang nad diya panagitured ku se̍ diya banbannug ku gapu dakayu ita.

2 Timutyu 2:4

Ket emmu ta nga ya suldadu nga uwed iya nakaibonan na, madi ngarud makibiyang kadiya wangwanglen diya sibilyan, ta gabay na nga ay-ayuwen ya turayen na nga suldadu.

2 Timutyu 4:7

Winangel ku amin nga kabaellac iya panangtungpal ku ito naitalec iyaken. Arig gac nga isa nga nabaru nga suldadu winno nakilumba, ta di yac binabawi ya panamatic e̍ Apu Je̍sus.

He̍briyu 6:15

Ket iya agten iyan, nagun-ud ngarud nito Abraham itun to nikari ne̍ Apu Diyus igina, gapu ta sinanama nga nagan-anus.

Santiyagu 1:3

Ta emmu nu nga no anusan nu ya amin diyan nga pakapadasan iya panamati nu e̍ Apu Diyus, lumaing kayu met iya kabaellan nu nga aganus.

1 Pe̍dru 2:1

Dikad pe̍ gapu ta naibilang kayu nga nabalbaliwan nga naiyanac kin, masapul nga ipac nun diya amin nga dake̍c nga ganggangey nu, agten kadiya amin nga panagsikap se̍ panaginsisingpet, panagimun, se̍ amin nga panagumsi ka kapadpada nu.

1 Pe̍dru 4:2

Ket no agten iyan, bekken nin nga diya dake̍c nga tarigagay niya kinatoley na ya tungtungpalen nan iya panagbibiyag na pekkem idi nga lubung, no di diyan nas gabay ne̍ Apu Diyus ya pe̍yeng na nga tungtungpalen nin.

1 Pe̍dru 5:1

Dikad pe̍, gapu kadiyan nga banbanag, uwed ibagbagac dakayu nga panglakayen diya bungguy diya mamati. Ta iyaken ya isa nga pada nu nga panglakayen, se̍ isa ngac pe̍ nga nakasingen kadito pannakaparparigat ne̍ Kristu. Se̍ iyaken pe̍ ya isa nga maibulun nad igina iya pakaidayawan na nga dandani maipasingen nin.

1 Pe̍dru 5:12

E̍ Silbanu nga ibilang ku nga mapagtalkan nga kabsat, igina ya pinagsurat ku idi nga e̍teng nga surat ku dakayu. Ket nisurat ku yani dakayu tasun bagbagaan nakayu, se̍ tasun ipanecnec ku dakayu nga ya pudnu nga siaayat nga panangaasi ne̍ Apu Diyus, ket agten mettas idi nga nisurat ku. Dikad pe̍ pagnamnamaan nu kuma ngarud yani nga panangaasi na dakayu.

2 Pe̍dru 1:6

Ket iya pannakaemmu nu, iraman nu kuma pe̍ ya panagtimbeng iya beggi nu. Ket iya panagtimbeng nu, iraman nu kuma ya panaganus. Se̍ iya panaganus nu, iraman nu kuma ya panagtungpal kadiya makaay-ayu e̍ Apu Diyus.

Paltiing 1:9

Iyaken nga Juan nga kabsat nu ka pammati, ket gapu iya pannakaitipun tida e̍ Je̍sus, kabulun dac met iya panagsagaba gapu igina, se̍ iya pannakairaman kadiya iturayan na, se̍ iya panaganus nga sinanama gapu igina. Ket gapu iya panangikasabac iya kagi ne̍ Apu Diyus, se̍ gapu iya panangipakaemmu ne̍ Je̍sus, uwed dac itun iya puru nga maawagan ka Patmus.

Paltiing 13:10

Diya makadateng iya pannakaipanaw da gapu kadiya manggura igida, ket tutu met nga maipanaw da ngas met. Se̍ diya makadateng met iya pannakatey da gapu kadiya mangispada igida, ket tutu met nga matey da ngas ka ispada. Itu nga masapul nga bumileg diya toltoley ne̍ Apu Diyus iya panaganus se̍ panamati da.

Paltiing 22:16

“Iyaken nge̍ Je̍sus. Ket iyaken ya nangibon iya anghe̍l ku ikew, tasun ipakaemmu na diya kinapudnu maipanggep kadidi nga banbanag para kadiya bungbungguy diya mamati. Iyaken ya nagtaud iya kapututan nito Ari Dabid, se̍ iyaken pe̍ ya maawagan ka bituwen nga aggundaway iya parbangun,” kunen ne̍ Apu Je̍sus.

Paltiing 3:10

Ket no maipanggep ikew, gapu ta nipangag mu to nibagbagac ikew nga aganus ka kuma, ket isalakan naka nad met iya timpu niya panagrigrigat nga umbe̍t nad iya amin nga lubung tasun masigir diya toltoley iya lubung.