He̍briyu 10:12 - Ya Baru nga Tulag

¹² Ngem e̍ Kristu nga gennung, nam-ame̍nsan ngas nga nidatun na ya beggi na mettas, ket kustu win ka agnanayun. Ket agsirbi nga agnanayun yani nga datun na, nga itu mettin ya pakaipakan diya basbasul. Ket kalpasan nito panangidatun na iya beggi na, nawe̍ nagtugew iya kadayawan nga edyan, nga itu ya madiwanan ne̍ Apu Diyus.

He̍briyu 10:12 Iomraidhean Croise

Markus 16:19

Ket itun, kalpasan nito pannakitbar ne̍ Apu Je̍sus igida, ket naipangudu ka langitin. Ket enna langit, nagtugew iya kadayawan nga edyan, nga itu ya madiwanan ne̍ Apu Diyus.

Ruma 8:34

Awan pe̍ makaukum dactidan iya imatang ne̍ Apu Diyus. Ta e̍ Kristu Je̍sus, igina met to natey, ket bekken nas nga natey, no di lugud napagungar met pe̍. Ket naisaadin iya kadayawan nga edyan, nga itu ya madiwanan ne̍ Apu Diyus. Ket igina mettin ya mangibabaet dactidan e̍ Apu Diyus.

E̍pe̍su 5:2

Ta to panangipateg ne̍ Kristu dactida itun, itu kuma ya ugali nga tultuladen nu ita iya panagbiyag nu. Ta e̍ Kristu, nipalubus na met ya pannakaidatun niya beggi na mettas para dactida. Ket inannamungan ne̍ Apu Diyus yan nga winangel na, nga arig nga nabangug nga sagut se̍ datun nga makaay-ayu mettas e̍ Apu Diyus.

Kulusas 3:1

Ket dakayu, naibilang kayun nga kabulun ne̍ Kristu ito pannakapagungar na. Itu nga diya ipatpateg nu kuma ngin, ket diyan nas banbanag nga agtaud ka langit. Itu mettas ya edyan ne̍ Kristu nga naipatugew win iya kadayawan nga saad, nga itu ya madiwanan ne̍ Apu Diyus.

He̍briyu 1:3

Ket ya Anac, igina mettas ya pakaemmuwan iya kinadayaw ne̍ Apu Diyus, se̍ igina ya pakasingnan iya gangey na. Ket gapu iya pannakabalin niya kagi niya Anac, igina ya makaemmu nga mangiturung kadiya amin nga naparsuwa. Ket ito nalpas ya panangdalus na dactida nga toley kadiya basbasul tida, nagtugew iya kadayawan nga edyan, nga itu ya madiwanan niya Nadayag nga Diyus nga nailangitan.

He̍briyu 10:10

Ket itan, naibilang tidan nga nadalus iya imatang ne̍ Apu Diyus, gapu ta inariman ne̍ Je̍su Kristu ya tarigagay ne̍ Apu Diyus ito nidatun na ya beggi na nga nam-ame̍nsan, ket kustu win para iya amin nga timpu.

He̍briyu 10:14

Ket dactida, agnanayun nga awan pagkurangan tida iya imatang ne̍ Apu Diyusin. Ta dactida nga toley na, no maipanggep ka basul, ket nadalusan tidan, gapu ito is-isa nga datun ne̍ Je̍su Kristu.

He̍briyu 5:1

Tutu met yan, ket laglagipen tida kuma pe̍ yani: Diya amin nga kangatuwan nga agsirsirbi iya pagdaydayawan idi nga lubung, toley da ngas nga nadutukan. Ket igida diya naisaad nga mangibegbeggi kadiya toley e̍ Apu Diyus. Igida pe̍ diya mangidatun kadiya sagsagut se̍ naidaga nga datun e̍ Apu Diyus, gapu kadiya basbasul diya toley.

He̍briyu 5:3

Dikad pe̍ masapul met pe̍ ya panagdatun na gapu mettas kadiya mismu nga basul na, agten met pe̍ iya panagdatun na gapu kadiya basbasul diya duduma nga toltoley.

He̍briyu 7:27

Igina, bekken pe̍ nga agten kadito nona nga naisaad nga kangatuwan nga agsirsirbi ito pagdaydayawan, ta no igida, nasapul da nga inalgew nga agdatdatun gapu kadiya basul da mettas se̍ gapu kadiya basbasul diya duduma nga toley. Ngem igina nga gennung, bekken nga masapul nga agten iyan. Ta nam-ame̍nsan ngas met nga nidatun na ya mismu nga beggi na nga naipaay kadiya basbasul diya toltoley, ket kustu win para iya amin nga timpu.

He̍briyu 8:1

Ket agten idi ya kaipapennan niya ibagbagac: Uwed mettin Kangatuwan nga Agsirsirbi nga mangibegbeggi dactidan e̍ Apu Diyus, nga agten mettas ito nilawlawag ku. Ket igina, agtugtugew win iya kadayawan nga edyan, nga itu ya madiwanan niya trunu nga pagtugawan niya Nadayag nga Diyus ka langit.

He̍briyu 9:12

Ket ito imuneg nge̍ Kristu iya Kasantuwan nga Edyan iyan nga pagdaydayawan, nam-ame̍nsan ngas nga masapul nga imuneg iyan, ket kustu win para iya amin nga timpu. Se̍ bekken nga ya daga kalding winno ya daga niya urbun baka to nitarey na nga nidatun na, no di lugud ya daga mettas niya mismu nga beggi na. Ket iya agten iyanin, pinatalgeddan ne̍ Kristu ya pannakasubbut tida nga agnanayunin.

He̍briyu 9:14

Ket no agten iyan to pakadalusan da itun nga timpu, di ngarud nabilbileg pekkem ya pannakabalin niya daga ne̍ Kristu? Ta gapu iya panangiturung niya agnanayun nga Ispiritu, niyawat ne̍ Kristu e̍ Apu Diyus ya beggi na nga datun nga awan pagkurangan na. Ket gapu iya daga na, nadalusan diya lemlemmet tidan iya pakarigatan tida gapu ito panagtungpal tida kadito tungtungpalen nga awan mamaay da. Ket ita, siwayawaya tidan nga agsirbi iya sibibiyag nga Diyus.