1 Juan 5:19 - Ya Baru nga Tulag

¹⁹ Emmu tida nga no dactida, kamkameng nactida nge̍ Apu Diyus. Ngem diya duduma nga toltoley iya lubung, kamkameng met niya diyablu nga managdacdake̍c.

1 Juan 5:19 Iomraidhean Croise

Lukas 4:6

Ket kinunen na e̍ Je̍sus, “E̍cde̍c ikew amin didi nga turay se̍ amin nga kinapaw-is nga uwed igida, ta naipaikut iyaken didi. Ket mabalin ku nga e̍cde̍ iya orey nagan na nga gabay ku nga pange̍cde̍yan.

Juan 12:31

Ta ita mettin ya panangrugi niya panangukum ne̍ Apu Diyus kadiya toley idi nga lubung. Ita met pe̍ yin ya timpu niya panangpatalew ne̍ Apu Diyus iya agituray idi nga lubung.

Juan 14:30

Ket ita, madic makapagbayag nga makitbar dakayun, ta nganngani umbe̍tin ya akin-turay idi nga lubung. Awan ngarud turay na iyaken,

Juan 16:11

Ket ipakaemmu na nad met pe̍ ya maipanggep iya panangukum, ta naukum met nga tutu win ya agituray idi nga lubung.

Juan 17:15

Ket ya adngec kun para igida, madic adngen nga ipanaw mu da iya lubung ngi, no di lugud iliclic mu da kuma ngas iya diyablu nga managdacdake̍c.

Ruma 8:16

Ket no agten iyan ya awag tida e̍ Apu Diyusin, itu ngarudin ya panangpanecnec niya Ispiritu ne̍ Apu Diyus iya lemlemmet tida nga mangipakaemmu nga anac nactida ngarud nge̍ Apu Diyusin.

2 Kurintu 1:12

Agtalged kami ngarud gapu kadiya panangikararag nu dakami. Ket natalna ngas ya nakem mi, ta emmu mi nga napaw-is ya ugali mi iya imatang diya toltoley, se̍ nangruna ya pannakibulun mi dakayu. Ta diyan nas gabay ne̍ Apu Diyus diya winangwangel mi, agten kadiya nalinteg se̍ napudnu. Ket ya panagtungpal mi kadiyan nga gabay ne̍ Apu Diyus, bekken nga sigun iya kinasirib niya kinatoley mi, no di lugud gapu mettas iya sirib nga ikaasi ne̍ Apu Diyus nga siaayat dakami.

2 Kurintu 4:4

Ket diyan nga madi mamati, sinikapan niya diyus da nga agturay idi nga timpu. Ta arig nga kinulap na da tasun madi da makasingen iya wada. Itu ya gapu na nga madi da maawatan ya kinapateg niya Makaparagsac nga Damag maipanggep iya kinadayaw ne̍ Kristu, nga igina ya pakasingnan e̍ Apu Diyus.

2 Kurintu 5:1

Ket madi kami ngarud makumsa kadiya pakarigrigatan mi. Ta emmu mi nga orey no matey tida, se̍ mapirdi didi nga beggi tida, nga arig ngas nga bawi diya biyag tida idi nga lubung, ket emmu mi ngarud nga sukatan nad ne̍ Apu Diyus ka madi matey nga beggi no uwed tida ka langitin. E̍ Apu Diyus mettas ya paggayatan niyan nga agnanayun nga beggi nga maiyarig ka baley nga bekken nga inariman toley.

Galasiya 1:4

Ta e̍ Apu Je̍sus, nipalubus na nga naidatun ya beggi na gapu kadiya basbasul tida, tasun isalakan nactida iya pannakabalin niya kinadake̍c nga uwed ita idi nga lubung. Agten iyan ngarud to inariman na, ta itu ya tinarigagayan ne̍ Apu Diyus nga Diyus se̍ Ama tida.

E̍pe̍su 2:2

Agten kayu ngarud iyan itun nga timpu, ta diya dake̍c nga gangey diya toley nga madi mamati e̍ Apu Diyus idi nga lubung, ket itu met diya winangwangel nu itun. Ta nagtungtungpal kayu itun iya agturay nga uwed pannakabalin na iya abac lawa. Itu met ya pannakabalin nga mangiturturay ita kadiya agsucsukir e̍ Apu Diyus.

2 Timutyu 1:12

Ket itu ya gapu na nga laklak-amec didi nga rigrigat ku. Ngem orey agten iyan, awan iyalyew ku kadidi, gapu ta em-emmuc met yan nga talkec. Ket siguradu wac met nga igina ya makaaywan iyan nga nitalec na iyaken agingga nad iyan nga Timpu na.

Titu 3:3

Ta orey dactida itun, madi tida pekkem nga makaawat, ket nasukir tida, se̍ naallilaw tida itun. Arig tida nga natagabu itun, ta nagpaituray tida kadiya nadumaduma nga kita apal diya beggi tida se̍ ragragsac iya biyag idi nga lubung. Yan nas kinadake̍c se̍ panagagum ya uwed iya panagbiyag tida itun. Ginura tida diya duduma, se̍ ginura nactida met pe̍.

Santiyagu 4:4

Bekken kayu met nga maikari nga matalec kin, ta pinanawan nu ya isusurut nu e̍ Apu Diyusin! Madi kayu kad emmu nga maikuntra kayu e̍ Apu Diyus no patgen nu ya ugali diya di mamati igina? Dikad pe̍ no patgen nu ya kinadake̍c diya di mamati idi nga lubung, agbalin nga kagura nu nge̍ Apu Diyus.

1 Juan 3:14

Dactida nga mamati, naiyalis tidan iya turay niya biyag, manipud iya turay niya patey. Ket ya panagayat tida kadiya kakabsat tida ka pammati, itu ya pakaemmuwan tida nga tutu yan. Ngem ya madi agayat kadiya kapada na, ket paiturayan met iya turay niya patey.

1 Juan 3:24

Ket diya agtungpal kadiya bilin ne̍ Apu Diyus, silalagip da igina, ket silalagip met pe̍ nge̍ Apu Diyus igida. Ket emmu tida nga tutu nga silalagip nge̍ Apu Diyus dactida, ta uwed met dactida ya Ispiritu na nga nipaay na dactidan.

1 Juan 5:10

Dikad pe̍ ya toley nga mamati iya Anac ne̍ Apu Diyus, uwed mettas iya lemlemmet na ya pammanecnec maipanggep kadidi nin. Ngem ya madi mamati iya nipanecnec ne̍ Apu Diyus, arig nga kunen na nga agbusid nge̍ Apu Diyus, ta madi na patiyen ya nipanecnec ne̍ Apu Diyus maipanggep iya Anac na.

1 Juan 5:13

Isurat ku didi nga banag dakayu nga mamati iya kinaturay niya Anac ne̍ Apu Diyus, tasun maemmuwan nu nga uwed dakayun ya biyag nga agnanayun.

1 Juan 5:15

Ket gapu ta emmu tida nga ipangag nactida nge̍ Apu Diyus iya orey nagan na nga adngen tida igina, emmu tida met pe̍ nga mae̍cdan tida ngarud kadiya adngen tida.

1 Juan 5:18

Emmu tida nga diya nagbalin nga anac ne̍ Apu Diyus, madi da agbasbasulin, ta aywanan met niya Anac ne̍ Apu Diyus da, tasun awan mabalin niya diyablu nga managdacdake̍c igida.

1 Juan 5:20

Ket emmu tida pe̍ nga inumbe̍tin ya Anac ne̍ Apu Diyus, ket ne̍cdan nactida ka pannakaawat tasun maemmuwan tida ya pudnu nga Diyus. Ket naitipun tidan iya pudnu nga Diyus, ta naitipun tida mettin iya Anac na nga Je̍su Kristu. Igina met ya pudnu nga Diyus se̍ paggayatan niya agnanayun nga biyag.

Paltiing 12:9

Ket to dackel nga dragun, naidegsut ngarud manipud ka langitin. Ngarud, igina yan to sinan-malaga itun pekkem, se̍ ya maawagan ka diyablu nga itu nge̍ Satanas. Igina met ya mangal-allilaw kadiya toltoley iya amin nga lubung. Naidegsut ngarud iya ginet tin, ket naidegsut pe̍ yin dito anghe̍le̍s na.

Paltiing 20:3

Ket nidegsut nito anghe̍l ito nakaun-uneg nga ebbut, se̍ na tinulbekkan ya giset na. Ket minarkaan na ka nikapet na iyan nga giset, tasun madi makaruwar to dragun nga mangallilaw manin kadiya toltoley kadiya nasnasyun, agingga ka madi aggibus ya sangaribu nga dagun. Ngem kalpasan niya sangaribu nga dagun, masapul nga mawayawayaan manin to dragun ka di mabayag nga timpu.