1 Juan 2:29 - Ya Baru nga Tulag

²⁹ Ket emmu nu met nga nalinteg nge̍ Kristu. Itu nga emmu nu met pe̍ nga anac ne̍ Apu Diyus ya amin nga agariman iya nalinteg.

1 Juan 2:29 Iomraidhean Croise

Juan 1:13

Ket dito nagbalin nga anac ne̍ Apu Diyus, bekken nga gapu iya kadawyan nga pannakaiyanac da ka toley, winno gapu iya tarigagay niya kinatoley winno ya tarigagay niya kinalalaki, no di lugud gapu was iya pannakabalin ne̍ Apu Diyus.

Juan 7:18

Ta ya agkagi ka kabucbukudan na ngas nga turay, ket ya pakaidayawan niya beggi na mettas ya sapsapulen na. Ngem no ya pannakaidayaw niya nangibon igina ya panggep na ya isa nga toley, napudnu se̍ awan kinabusid niyan nga toley.

Aramid 10:35

Ta awaten na met ya orey nagan na nga toley iya orey awac nga nasyun, no e̍ Apu Diyus ya ipatpateg na se̍ no wanglen na pe̍ diya nalinteg.

Aramid 22:14

Ket kinagi na iyaken, ‘E̍ Apu Diyus nga Diyus dito am-ama tida, pinili naka nga pangipakaemmuwan na iya panggep na. Ikew pe̍ ya isa nga pinili na nga makasingen se̍ makagicna iya nalinteg nga Anac na.

Aramid 3:14

Ngem madi nu nipalubus nga pinaruwar ne̍ Pilatu nge̍ Je̍sus, orey igina ya nalinteg nga awan pagkurangan na iya imatang ne̍ Apu Diyus. Ket ya isa nga pumapatey nga gennung ya inun-unay nu nga nipairuwar e̍ Pilatu.

2 Kurintu 5:21

Ta gapu dactida, pinagbalin ne̍ Apu Diyus nge̍ Kristu nga nadusa gapu ka basul, orey awan met pulus basul na. Agten iyan ya winangel na, tasun gapu iya pannakaitipun tida e̍ Kristu, agbalin tida nga napalinteg, nga agten mettas iya kinalinteg ne̍ Apu Diyus.

He̍briyu 7:2

Ket to Abraham, ne̍cde̍ na met ito Me̍lkise̍de̍c ya apagkapullu nito amin nga inalac na kadito nakigubgubatan na itun. Ket ya nagan nga Me̍lkise̍de̍c, kagi He̍briyu, nga kayat na nga kagiyen, “Ari nga Mangpalinteg.” Ket to Me̍lkise̍de̍c, mabalin pe̍ nga maawagan ka “Ari nga Mangpatalna”, ta ya ili nga Sale̍m met to pagariyan na, ket “talna” ya kaipapennan niya kagi nga Sale̍m.

He̍briyu 7:26

Dikad pe̍ igina, maitutup met nga Kangatuwan nga Mangibegbeggi dactida e̍ Apu Diyus, ta awan basul na winno kinadake̍c na, se̍ awan pe̍ mansa igina. Ket idi nga mangibegbeggi, naiduma met kadiya sibabasul nga toltoley, ket naisaad met pe̍ ka nangatngatu ngem kadiya nailangitan.

Santiyagu 1:18

Ket gapu mettas iya rimidyu ne̍ Apu Diyus, pinagbalin nactida nga anac na gapu iya kagi na nga naipakaemmu dactida, nga itu ya kinapudnu. Agten iyan ngarud ya nirimidyu ne̍ Apu Diyus, ta gabay na no dactida nga mamati, ket maiyarig tida iya kangrunaan kadiya amin nga pinarsuwa na.

1 Pe̍dru 1:23

Agten iyan kuma ngarud, ata naibilang kayu nga nabalbaliwan nga naiyanac kin. Ket idi nga nangputut dakayun, bekken nga isa nga uwed pannakatey na, no di lugud pulus nga awan panagpatingga na. Ket idi nga nabalbaliwan nga pannakaiyanac nu, gapu mettas iya kagi ne̍ Apu Diyus nga mange̍cde̍ ka biyag se̍ agpaut ka agnanayun.

1 Pe̍dru 1:3

Madaydayaw kuma ngarud nge̍ Apu Diyus, nga Diyus se̍ Ama niya Apu tida nga Je̍su Kristu! Ta gapu iya dackel nga asi na dactida, ne̍cdan nactida ka nabalbaliwanin nga pannakaiyanac. Itu ya nakabiyagan tida nga pagnamnamaan tidan, nga nae̍cde̍ dactida gapu iya panagungar ne̍ Je̍su Kristu.

1 Pe̍dru 3:18

Ket agten pe̍ iyan nge̍ Kristu. Ta igina, natey met nga nam-ame̍nsan itun nga naipaay kadiya basbasul, ket kustu win para iya amin nga timpu. Orey awan basul na, natey met para dactida nga toley nga sibabasul, tasun iyadenni nactida e̍ Apu Diyus. Ket tutu met, ata gapu iya beggi na, ket natey. Ngem gapu iya Ispiritu, napabiyag.

2 Pe̍dru 1:4

Ket gapu iya kinadayaw se̍ kinalaing na, nikari na dactida diya napapateg se̍ nakaskasdaaw nga unay nga karkari na. Tasun iyan, gapu kadidi nga karkari na, maliclikan nu kuma diya makapadake̍c nga uwed idi nga lubung gapu kadiya dake̍c nga tarigagay niya toley, tasun makipaglak-am kayu kuma iya gangey ne̍ Apu Diyus.

1 Juan 2:1

Isurat ku didi nga banbanag dakayu nga patpatgec nga an-anac, tasun madi kayu kuma agbasul. Ngem no uwed makabasul, uwed met agpakaasi nga mangibegbeggi dactida iya Ama, nga itu nge̍ Je̍su Kristu nga nalinteg.

1 Juan 3:5

Ngem emmu nu nga awan basul ne̍ Je̍su Kristu. Ket to numbe̍tan na ito nagparang itun, ket tasun mangipac ka basul.

1 Juan 3:7

Patpatgec nga an-anac, madi kayu kuma nga maiyaw-awan iya kunen diya toley. Ta ya kinapudnu na, ya toley nga agar-ariman kadiya nalinteg, ket nalinteg met, nga agten mettas e̍ Kristu nga nalinteg.

1 Juan 4:7

Patpatgec nga kakabsat, agiinnayat tida kuma, ta gayat e̍ Apu Diyus ya ayat. Dikad pe̍ gapu ta gayat e̍ Apu Diyus ya ayat, emmu tida nga nagbalin nga anac ne̍ Apu Diyus diya amin nga agayat, se̍ emmu tida nga em-emmu da nge̍ Apu Diyus.

1 Juan 5:1

Amin diya mamati nga e̍ Je̍sus ya Kristu nga nibon ne̍ Apu Diyus, ket anac ne̍ Apu Diyus da. Ket emmu tida met nga amin diya agayat iya isa nga ama, ayaten da met pe̍ ya anac na.

1 Juan 5:18

Emmu tida nga diya nagbalin nga anac ne̍ Apu Diyus, madi da agbasbasulin, ta aywanan met niya Anac ne̍ Apu Diyus da, tasun awan mabalin niya diyablu nga managdacdake̍c igida.

1 Juan 5:4

Tutu met yan, ta orey nagan na nga nagbalin nga anac ne̍ Apu Diyus, abaken na ya kinadake̍c idi nga lubung. Ket ya panamati tida, itu met ya pangabac tida iya kinadake̍c iya lubung.

3 Juan 1:11

Patgec nga gayyem, madi ka kuma ngarud tuladen ya ugali nga dake̍c, no di kuma ya nabaru ya tuladen nu. Ya agariman ka nabaru, ket kameng ne̍ Apu Diyus. Ngem ya agariman ka dake̍c, madi pekkem makaawat maipanggep iya gangey ne̍ Apu Diyus.