1 Juan 2:19 - Ya Baru nga Tulag

¹⁹ Didi nga kumunkuntra e̍ Kristu, ket bekken tida nga tutu nga kamkameng didi, itu nga simina da dactidan. Ta no tutu da kuma nga kamkameng tida, ituluy da kuma ya pannakitipun da dactida. Ngem simina da mettin, ket itu nga nabatadin nga bekken tida da nga tutu nga kamkameng.

1 Juan 2:19 Iomraidhean Croise

Matyu 24:24

Ta uwed da nad agparang nga sinan-Kristu se̍ sinan-mammadtu. Ket agariman da nad ka pagilasinan se̍ nakaskasdaaw, tasun, no mabalin, gabay da nga iyaw-awan kuma orey diya pinili ne̍ Apu Diyus nga toley na.

Markus 13:22

Ta uwed da nad agparang nga sinan-Kristu se̍ sinan-mammadtu, ket agariman da nad ka pagilasinan se̍ nakaskasdaaw, tasun, no mabalin, gabay da nga iyaw-awan kuma diya pinili ne̍ Apu Diyus nga toley na.

Lukas 8:13

Ket dito bukel nga nagdessag ito ginet nga uwed pinas iya uneg na, itu diya maiyarig kadiya toley nga makagicna iya kagi ne̍ Apu Diyus, ket awaten da nga siaanggem. Ngem gapu ta arig da nga mula nga awan nauneg nga gamut da, nalaka da nga mamati iya damu, ngem dagus da nga aglikud no uwed pakasulisugan da.

Juan 15:2

Ket iya agten iyan, diya amin nga sanga nga naisilpu iyaken nga madi mamisic, ipac na. Ket diya agbisbisic nga sanga, dalusan na, tasun ad-adu nad ya maibisic da.

Juan 4:14

Ngem diya amin nga uminum iya danum nga e̍cde̍c igida, madi da nad mewwew win. Ta ya danum nga e̍cde̍c, agbalin nga arig nga ubbug nga kumkumbuwar manipud iya uneg niya toley, ket mange̍cde̍ igina ka makabiyag nga danum, nga itu ya biyag nga agnanayun,” kunen na.

Aramid 15:24

“Isurat mi yani dakayu, ta nadamag mi nga mariribukan kayu kanun gapu kadiya taga-idi nga nawe̍ nangisuru ka sabali nga sursuru nga mangpagduwaduwa dakayu. Ngem awan met bilin mi igida kadiyan.

Aramid 20:30

Se̍ orey iya bungguy nu mettas, uwed da met pe̍ mangirugrugi nad nga mangisuru ka busid, ta gabay da nga awisen diya pasurut niya Apu tasun sumurut da met igidan.

Ruma 9:6

Ngem madic met kayat nga kagiyen nga nale̍panan ne̍ Apu Diyus to kagi na kadiya am-ama tida. Ta ya kinapudnu na, bekken nga amin diya kapututan nito ama tida nga Israe̍l ya ibilang ne̍ Apu Diyus nga tutu nga Israe̍lita nga toley na.

1 Kurintu 11:19

Ta masapul ngata nga napagsisina kayu, tasun mailasin kuma no nagan dakayu diya pudnu nga mangtungtungpal iya nalinteg.

2 Timutyu 2:10

Itu nga anusac ngas ya orey nagan na, para kadiya pinili ne̍ Apu Diyus nga toley na. Agten ngarud iyan ya wanglec, tasun maisalakan da pe̍ gapu e̍ Kristu Je̍sus nga mangiraman igida iya pannakapadayaw na nga madi agpatingga.

2 Timutyu 2:19

Ngem ya panursuru nga gayat e̍ Apu Diyus, madi met mariribuc ya pungut na, ta nabaked met. Ket maiyarig nga namarkaan kadidi nga kagi: “Emmu ne̍ Apu Diyus no nagan diya toltoley na.” Se̍ kunen na pe̍, “Amin diya umapu igina, ket masapul nga ipac da diya wangwanglen da nga dake̍c,” kunen na met.

2 Timutyu 3:9

Ngem awan pagbanagan da nga nalaing diyan nga toley. Ta nalawag nad met kadiya amin nga duduma nga toltoley nga dake̍c ya wangwanglen da, nga agten pe̍ ito napasamac kadito Hane̍s nge̍ Hambre̍s itun.

He̍briyu 10:39

Ngem no dactida, bekken nactida met nga kamkameng dito mangadeyyu nga siaalyew, nga itu diya mapukaw nga toley. Kamkameng nactida ngarud diya mamati, nga itu diya maisalakan.

2 Juan 1:7

Ipalagip ku dakayu diyan, ta adu diya mangallilaw nga agpaspasyar kadiya nadumaduma nga il-ili iya lubung. Madi da umannamung iya panursuru nga e̍ Je̍su Kristu ya naipatoley nga nibon ne̍ Apu Diyus. Diya agten iyan nga toley, igida diya mangallilaw kadiya toltoley, se̍ igida pe̍ diya kumuntra e̍ Kristu.

Hudas 1:1

Iyaken nge̍ Hudas nga agsirsirbi e̍ Je̍su Kristu, se̍ kabsat ne̍ Santiyagu. Isurat ku yani nga surat dakayu nga napateg iya imatang ne̍ Apu Diyus nga Ama, dakayu nga pinili na nga toley na, se̍ maaywanan gapu e̍ Je̍su Kristu.

Hudas 1:19

Itu didi diya toley nga mangpataud ka panagsusupyat nga mangpasina kadiya toley. Diya banbanag ngas idi nga lubung ya ipatpateg da, ket awan igida ya Ispiritu ne̍ Apu Diyus.