1 Juan 1:8 - Ya Baru nga Tulag

⁸ No kunen tida nga awan basul tida, allilawen tida ya beggi tida, ket madi tida met emmu ya pudnu nga pammati.

1 Juan 1:8 Iomraidhean Croise

Juan 8:44

Ta an-anac nakayu ngarud nge̍ ama nu, nga itu met ya diyablu. Ket ya tarigagay na, itu ya gabay nu nga tungpalen. Pumatpatey met nga sigud, manipud ito damu. Ket pulus nga di na kanunungan ya pudnu, ta awan pulus kinapudnu igina. Ket kadawyan na ya agbusbusid, ta sigud nga managbusid. Ket bekken nas nga iyan, ta igina met pe̍ ya pagtaudan diya amin nga kinabusid.

Ruma 3:10

Agten ngarud iya kunen na iya Bibliya nga agten idi: “Awan pulus toley nga nalinteg iya imatang ne̍ Apu Diyus, orey ngas no isa.

Ruma 3:23

Ta amin tida, nagbasul tida met, ket awan dactida ya makabael nga mairaman iya nadayaw nga kasasaad ne̍ Apu Diyus.

1 Kurintu 3:18

Awan kuma dakayu ya mangallilaw iya beggi na mettas. Ta orey nagan na nga mangipagarup nga igina ya isa nga nasirib sigun iya kinasirib niya toley, masapul nga paglikudan na kuma yan nga kinasirib na, ket agbalin kuma nga arig nga awan kinasirib na iya imatang toley, tasun agbalin nga tutu nga nasirib iya imatang ne̍ Apu Diyusin.

Galasiya 6:3

Agten iyan kuma ngarud, ta no uwed toley nga ipasindayaw na ya beggi na, ket allilawen na met ya beggi na mettas. Ta ya kinapudnu na, uwed met pe̍ pagkurangan na.

1 Timutyu 6:5

Sabali ya panpanunut niyan nga toley nga di makaawat iya kinapudnu. Itu nga pe̍yeng nga agdidinniskutir diya agten iyan. Ket pagarupen da met pe̍ nga pagteggeddan met ya pammati e̍ Apu Diyus!

2 Timutyu 3:13

Ket diya paiturayan ka dake̍c, ad-adda nad met nga dumake̍c da. Ket se̍ diya mangal-allilaw, ket kumarkaru nad met pe̍ ya panangallilaw da kadiya toley. Ngem igida ngas met ya maallilaw nga tutu.

Santiyagu 1:22

Dikad pe̍ tungpalen nu kuma ngarud ya kagi ne̍ Apu Diyus. Ta no pagarupen nu nga makaanay ya panagdengdengngeg ngasin, iyaw-awan nu ngarud ya bukud nu nga panpanunutin.

Santiyagu 1:26

Ya toley nga mangipagarup nga pudnu ya panagdaydayaw na e̍ Apu Diyus orey no bekken nga naannad ya panagbalikas na, ket nairradu mettin, ta awan sirbi na ya agten iyan nga panagdaydayaw na.

Santiyagu 3:2

Ta ya kinapudnu na, mame̍n-adu tida met nga makabasul nga amin. Ngem no uwed kuma toley nga awan pakairraduwan na kadiya balbalikasen na, awan ngarud pagkurangan niyan nga toley yin, ta matimbeng na ngarud ya amin nga beggi na.

2 Pe̍dru 2:13

Ta maparparigat da nad, nga itu ya gun-guna da gapu kadiya panangparparigat da ka toley. Ta tungtungpalen da ya orey nagan na nga tarigagay diya beggi da, orey no iya algew se̍ adu diya makasingen, ta itu yan kanu ya mangparagsac igida. Diyan nga toley, igida ya arig nga mansa nu se̍ pakaiyal-alyewwan nu iya imatang diya toltoley, ta makitiptipun da nga siraragsac dakayu nga makipangpangan.

1 Juan 1:10

No kunen tida nga madi tida nagbasul, ket arig met nga kunen tida nga agbusid nge̍ Apu Diyusin, ket madi tida pekkem patiyen ya kagi na.

1 Juan 1:6

Dikad pe̍ no sumurut tida pekkem kadiya nagicbet nga banbanag, agbusid tida met no kunen tida nga makibulun tida e̍ Apu Diyus, ket bekken nin nga ya pudnu nga pammati ya tungpalen tidan.

1 Juan 2:4

No uwed toley nga agkunen kuma nga, “Em-emmuc kun nge̍ Apu Diyus,” kunen na kuma, ngem madi na tungpalen diya bilbilin ne̍ Apu Diyus, ket agbusbusid met yan nga toley, ket madi na met emmu ya pudnu nga pammati.

1 Juan 4:20

Ngem no uwed agkunen nga ayaten na kanu nge̍ Apu Diyus, ngem kagura na met latta ya kapada na, agbusid met. Ta no madi na ayaten ya kapada na nga masingen na, madi met mabalin nga ayaten na nge̍ Apu Diyus nga madi na masingen.

2 Juan 1:2

Ay-ayaten dakayu nga tutu maikanatad iya kinapudnu maipanggep e̍ Apu Diyus, ket silalagip tida nga pe̍yeng idi nga kinapudnu ita, se̍ ka agnanayun pe̍.

3 Juan 1:3

Emmuc nga nabaru nga tutu ya nakem mu, ta uwed kakabsat tida nga inumbe̍t idi, ket naragsakan nac nga unay gapu ito nipadamag da iyaken. Ta nibaga da ya napudnu nga panagbiyag mu, nga sumursurut ka kanu iya pudnu nga pammati.