Lomɛŋ 9:23 - Eka Eswhī

²³ A le gē eghʉ épúp, ńzéŋ nnɔŋ ŋkɔ̄ŋɔ ŋ́gɛ, mɛ́ ezhɛ́ páʼ lewūʼ tsí é faáŋ épúp, ánɛ epuɔ pīi, é páʼ meŋgwʉ́ŋ mīi, a wɛɛ̄ atsāmezeŋɛ ánɛ pɔ́p lā. A le té njhʉ̄ ŋyɛ̄tte meŋgwʉ́ŋ mɛ́t, ŋ́gɛ pɔ́ eláʼ ŋkó á ntē lewūʼ tsí.

Lomɛŋ 9:23 Iomraidhean Croise

Lúkási 1:17

A a shʉʼ ewɛ mete páʼ ntswi‑ŋke Ndém Eli lā. Tɛ́ elɔk efaʼ á mbɔŋɔ́ mbɔŋɔ́ á mvhɔ Ndém, ńdeŋ ndeŋ páʼ Eli lā. A a shʉʼ eghʉ, ntē memɔʼɔ́ pɔ́ a ewɔŋkhʉ̄, e epīŋ nzem ncʉ́ʼ á taʼ. Wɔ te júʼ á Ndém, e epīŋ nzem njúʼ nchu Ndém páʼ, megaŋ anuúnē. Tɛ́ a elɔ̄k ncūŋte mentē epuɔ menɔŋ, pɔ́ elɔ̄k nnáŋ ńzwíʼte á leshʉʼ Atsyapuɔ. »

Mefaʼ Meziŋ-ntō 9:15

Atsyapuɔ á tsɔ́ʼ ŋ́gɛ: «Ké ŋgʉ̄ɔ gʉɔ. Meŋ á tsɔ́ʼ á ŋiŋ mɛ́t ŋ́gɛ, a eghʉ̄ afaʼ zá, ńzéŋ eshúŋ á ŋiŋ yīi meŋ á ewiɛ́, á mbū melāʼ ndɛʼɛ, mbɔɔ á mbū mefɔ pɔ́p, mbɔɔ á mbū epuɔ Islaɛl.

Lomɛŋ 2:4

O ghʉɛ épúp, á gɔ́ yīi, o lɔkɔ ŋgwáka á Ndém, tɛ́ á ké ŋgɔ́ á kwaʼ ŋiŋ mbɔŋ, ŋ́gɔ́ á ŋiŋ yīi a kwɛɛ́t ntē, a te gákne ntswá á ŋiŋ ŋgʉɔ athʉ́ lepé ɛ́. O ka zhɛ́ á légɛ, Ndém a á épúp páʼā, ńdɔkɔ ŋgyáa á wú meshhʉ̄ á legɔ nnɛ̄t ju, ŋ́gwáʼ á atswhī tepɔŋ jú lɛ̄?

Lomɛŋ 8:29

A le té njhʉ̄, ŋ́kāŋ á wɔ́p, ńzéŋ nté njhʉ̄, ńzápa ŋ́gɛ, pɔ́ e láʼ eswhí á Méŋ yi. Ŋ́ghʉ̄ɛ épúp páʼā ŋ́gɛ, Méŋ yi a egɔ́ mvhɔ mɔ́, ánɛ atʉtʉ epɔ̄ pí.

Lomɛŋ 8:30

Epuɔ pīi a le zapá ŋ́gɛ, pɔ́ e láʼ eswhí á Méŋ yi, a le zéŋ ntɔ́ŋ á wɔ́p ndɔk ŋghʉ̄ epuɔ pí. Epuɔ mɛ́t pīi a le tɔ́ŋ á wɔ́p, a le zéŋ ntɔ́ŋ á wɔ́p lɛ epuɔ ndeŋ ndeŋ. Epuɔ pīi a le tɔ́ŋ á wɔ́p lɛ epuɔ ndeŋ ndeŋ lā, a le zéŋ ŋgyá á wɔ́p lewūʼ tsí.

Efɛze 1:18

Ŋ́gɛ a elɛ ndɔ̄k ŋkaʼ yí ŋkɛ̄ʼɛ ntē wɛ́, pɛ ecuŋte nzhɛ́ ajū mīi, a lɛɛ́ ntɔ́ŋɔ á wɛ́ páʼā, ŋ́gɔ̄ eyá mé pɛ, ńcuŋte nzhɛ́ páʼ, mía mía lewūʼ yīi, a yáa á mbū epuɔ pīi é lɛtneē ánɛ yí, a á épúp.

Efɛze 2:10

Ndém mé le pɔ́ á yímpɛ, a le zapá ánɛ Yɛɛ́so, té mbɔ́ á yímpɛ. Ŋ́ghʉ̄ɛ épúp, ńdɔkɔ ŋ́gɛ, ŋghʉʉ́‑menu mímpɛ é egɔ́ mbɔŋ, ńzīŋ ánɛ nzhɛ zīi, Ndém a le té njhʉ̄ ŋkīa á mbū pímpɛ, ḿpɛ pīiŋ mbɔ́ŋte á leziŋ éwú.

Efɛze 2:7

Ndém a le zapá ánɛ Yɛɛ́so Klísto, ńtswī apɔŋɔ́ ntē zí ánɛ pímpɛ, ńdɔkɔ ntwīi á mbū epuɔ, á meŋguʼ meŋguʼ ŋ́gɛ, yí é ŋiŋ té mmɔʼ, éyi a ghʉʉ̄ anu mbɔŋ té ndhʉ.

Efɛze 3:16

Ŋ́gɛ a elɛ efhó ánɛ te ndhʉ lewūʼ tsí, ńzápa ánɛ Azwakne zí, ŋ́gyá á wɛ́ mete, tɛ́ agega zɛ́ a elɔk nnáŋ efʉʼ metsem, ńtēte.

Efɛze 3:8

Meŋ yīi, meŋ gɔ́ áa kwaʼ nzoknzem, á nnɔ epuɔ Ndém metsem, Ndém a le ké nzápa ánɛ apɔŋɔ́ ntē te ndhʉ zīi, a wɛɛ̄ ánɛ meŋ, ŋ́ghʉ̄, meŋ egʉ̄ɔ eshúŋ epuɔ pīi, é té epuɔ Yúda á, léwūʼ tsīi, é ánɛ Klísto. Lewūʼ mɛ́t é te mi lewūʼ.

Kɔlɔs 1:12

ésyákne á Ndém Mɔʼɔ́. A le kūʼ á yí á leghʉ pɛ kó á ntē ŋkaʼ, á yá á wɛ́ etsō mbɔŋ tsīi, mɛ́ pɔŋteé á leyā á mbū epuɔ pīi, pɔ́ é epuɔ Ndém.

Kɔlɔs 1:27

Ndém a ke kɔ̄ŋ á leghʉ, pɔ́ zhɛ́ ntsem mɛ́t. Ńzhɛ́ páʼ, nzwiŋ ntsem mɛ́t, é teē épúp. Ńzhɛ́ lewūʼ tsīi é ánɛ ntsem mɛ́t. Ńzhɛ́ épúp, á tsetsɛlɛ epuɔ pīi, é té epuɔ Yúda á. Ntsem mɛ́t é gɔ́ lɛ: Klísto a á tsetsɛlɛ pɛ, yí mé zéŋ nnɔ̄ŋ ŋghʉ̄ɛ, pɛ ekúʼtɛ á légɛ, pɛ e fú ekó á ntē lewūʼ Ndém.

1 Tesalonik 5:9

Ndém a lɛɛ́ te ntɔ́ŋɔ á yímpɛ ndɔ̄kɔ ŋghʉ̄ɛ epuɔ pí páʼā, ŋ́gɔ̄ á nzáŋ á lɔ́ŋ ánɛ pímpɛ ɛ́. A lɛɛ́ ntɔ́ŋɔ á yímpɛ, ŋ́ghʉ̄ɛ áa lɛ, ḿpɛ efhó ánɛ ajū mīi, Atsyapuɔ yímpɛ Yɛɛ́so Klísto, á le ghʉ̄ ánɛ pímpɛ, yí eghʉ̄ ḿpɛ etswɛ́t.

2 Timotɛ 2:21

Púp, ŋiŋ yīi a á fhó ánɛ yí, ésōk menu tepɔŋ mīi, meŋ á té lā, a á páʼ pɛ́ɛn yīi mɛ́ é tshí á esī, ánɛ aleʼé lekāk lā. Ndém a á tswhi efāk á yí, a etswíte á yí Ndém ánɛ mefaʼ, ánɛ mefaʼ ntsem mīi é mbɔŋ.