Lomɛŋ 8:15 - Eka Eswhī

¹⁵ Azwakne Ndém zīi á le kó á ntē pɛ, á lɛ te ŋgɔ̄ eghʉ, pɛ ecʉ́ʼ epuʼ, tɛ ŋgɔ́ yīi, pɛ gɔ ezéŋ ncɔ̄ʼ ɔ́, á si ŋgɔ́ Azwakne zīi, á ghʉʉ̄, pɛ cʉ́ʼ epɔ̄ Ndém. Azwakne mɛ́t mé tshóne á yímpɛ, ḿpɛ elāa ntɔ́ŋ á Ndém lɛ Abba, ńdɔkɔ ŋ́gɛ, Mɔ́ʼɔ.

Lomɛŋ 8:15 Iomraidhean Croise

Matío 25:25

Meŋ nde zhɛ́ épúp, ńnɔŋ ncɔ̄ʼɔ, ŋ́gʉɔ ntúŋ esī, éféŋ ŋkāp ju éwú. E ejʉɔ.”

Málkúsi 14:36

Éswíŋte ndé ŋ́gɛ: «Abba, Mɔʼɔ́ ga, amɔ̄ʼ azō á gɔ le á wú tsya, lɛ ŋghʉ̄ meŋ ńde ntūʼ ŋgʉɔ̄ʼ jʉɔ nú. A eké ŋgɔ́ áa páʼ o ó kɔŋ épúp, te ghʉ̄ʉ ajū mīi, meŋ mé kɔŋ. »

Lúkási 11:2

Yɛɛ́so á lɛ ndé á mbū nnɔ yí ŋ́gɛ: «Pɛ nɔŋɔ eswíŋtɛ á Ndém, pɛ elé ŋ́gɛ: “Mɔʼɔ́ wek, lɛ ŋghʉ̄, epuɔ menɔŋ metsem e ezhɛ́ á légɛ, wu mé ndaʼ Ndém. Lɛ eshʉ̄ʼ ŋgɔ́ á efɔ, ésáʼ epuɔ á ndo esī atsetsáʼ.

Lúkási 22:42

«Mɔ́ʼɔ, o elɛ mvéŋ, o epāʼne ejʉɔ ntūʼ ŋgʉɔ̄ʼ, tɛ meŋ ńde nú. Táʼ, meŋ te ndʉ́ɛ́ ŋ́gɛ, o eghʉ̄ ánɛ lekɔŋ ga á, ghʉ̄ɛ ánɛ páʼ o ó kɔŋ. » [

Lúkási 8:28

Ńdɛ ŋgē ejʉ́ɔ á Yɛɛ́so, ŋ́gwhʉ̄ á mekhu yí, ŋ́gɔ́ si nnɔŋɔ ŋgāʼtɛ mé nte ŋ́gɛ: «Yɛɛ́so, Méŋ Ndém‑tɛ‑athʉ́‑lephū, o tswíi akɔ̄ á mbū meŋ ŋ̄? Tsɔ́ʼɔtsɔ́ʼ, te néŋ á gá ánɛ ŋgʉɔ̄ʼ. »

Lúkási 8:37

Epuɔ alāʼ mɛ́t, é cʉ́ʼɛ ncɔ̄ʼ cɔʼe, éswíŋte á Yɛɛ́so ŋ́gɛ á efhó á alāʼ pɔ́p ŋgʉ̄ɔ. Yɛɛ́so á lɛ ŋgɔ̄ ŋkó á ntē akɛnūʼ, ŋ́gʉ̄ɔ.

Jáaŋ 16:8

A a shʉʼ eshʉʼe páʼā, étswi epuɔ ŋgɔŋ puɔ á légɛ, pɔ́ é megaŋ mefa, á légɛ pɔ́ té epuɔ ndeŋ ndeŋ ɛ́, étswi epuɔ ntií zīi, Ndém a lɔɔ̄k nzáʼ ntsaŋ.

Jáaŋ 20:17

Yɛɛ́so á lé á mbū yí ŋ́gɛ: «Ndɛ́ʼ o ekúʼte á gá. Meŋ zɛɛ́t te pe njʉ́ɔ á Mɔʼɔ́ ga. Ŋ́gɔ́ mé wu mbɔ, gʉɔ njʉ́ɔ epɔ̄ memía pá, ńdé á mbū pɔ́p ŋ́gɛ, meŋ a pe á njʉ́ɔ á Mɔʼɔ́ ga, páʼ a zeéŋ ŋgɔ́ á Mɔʼɔ́ wɛ lā, mé lezēŋ Ndém ga, páʼ a zeéŋ ŋgɔ́ á Ndém wɛ lā. »

Mefaʼ Meziŋ-ntō 16:29

Mbio‑ŋgyā atʉɛ́ á tswi ŋ́gɛ, mɛ́ elɔ̄k ŋkaʼ eshʉ̄ʼ. Mɛ́ lɔk eshʉ̄ʼ, á tswí ndɔ̄k ŋ́gákne ŋ́kó á ŋgyā. Ŋ́gwhʉ̄ á mekhu Pɔ́ɔl pɔ́ Silas, ńnɔŋ mvɛ̄tɛ.

Mefaʼ Meziŋ-ntō 2:37

Epuɔ mɛ́t é júʼ anu mɛ́t, ŋ́gɔ̄ nnɛ̄t zɔp. Ńzɛ́tte á Piɛ pɔ́ meziŋ‑ntō ŋ́gɛ: «Epɔ̄ memía, tɛ pek é páʼa, éghʉ á lā?»

Lomɛŋ 8:16

Azwakne Ndém mɛ́t yí méŋwɛ̄t mé si ŋghʉ̄ɛ, ḿpɛ ecuŋtɛ nzhɛ́ɛ á ntē pímpɛ á légɛ, ḿpɛ é si ŋgɔ́ epɔ̄ Ndém.

Lomɛŋ 8:23

Ŋgʉɔ̄ʼ mɛ́t, e te lɛ̄ ŋgɔ́ áa ezi ajūɔ tsem ɛ́, ḿpɛ pīi Ndém a le yá Azwakne zí á mbū pímpɛ, é gɔ́ mvhɔ ecū mīi, a le phʉ́ á yímpɛ, é si nzéŋɛ ntswīɛ̄ azímpɛ á ntē, ŋ́ké mbiŋ ŋgɔ́ tsetsɔŋɔ, ńzwíʼtɛ ŋ́gɛ, Ndém a elɔ̄k á yímpɛ ŋghʉ̄ epɔ̄ pí, ŋ́ghʉ̄, ḿpɛ epú ntswɛ́t ŋgʉɔ̄ʼ.

Lomɛŋ 8:26

Ndeŋ ndeŋ épúp, ḿpɛ nɔɔ̄ŋ ŋkáa páʼā, Azwakne Ndém mé tɔ́te á yímpɛ. Á gɔ́ páʼ, ḿpɛ te zhɛ́ á leswīŋte á Ndém páʼ, á zi nzɛ́tte épúp ɔ́. Azwakne Ndém méŋwɛ̄t, mé laā eswíŋte á Ndém á athū pímpɛ, mé meshuŋne mīi, ŋiŋnɔŋ a gɔ le zhɛ́ á leshūŋ ɔ́.

Lomɛŋ 9:4

Pɔ́ é si ŋgɔ́ epuɔ Islaɛl, mbɔ Ndém a le kāŋ á wɔ́p ndɔk ŋghʉ̄ epɔ̄ pí. Pɔ́ a pɔ́p é gɔ́ nnɔ, á nɔŋ ntswīi á wɔ́p á shʉ́shɔ́k yi. Pɔ́ a pɔ́p é kʉɔ́ʼ á ntií ntiī eka, á yá mbé á mbū pɔ́p, éshúŋ á wɔ́p páʼ, mɛ́ gɔ ewūʼte á yí épúp, ḿbhʉ́ á wɔ́p metsō tɛ záne.

1 Kɔlɛŋte 2:12

Ŋ́gɔ́ mé pek, mbɔ Azwakne Ndém zīi, a le yá me pek, á lɛ te fhó á mbū epuɔ ŋgɔŋ puɔ ɔ́. Á lɛ Azwakne Ndém méŋwɛ̄t. Ndém a lɛɛ́ ŋgyáa épúp ŋ́gɛ, pek elɔk nzhɛ́ menu mbɔŋ mīi, a yáa á mbū pímpɛ ndémndēm.

2 Kɔlɛŋte 11:4

Meŋ ndʉ́ɛ́ páʼa, melaʼ mīi awɔ́ ŋiŋ lɛ́, a lɛɛ̄ eshʉʼ á mbū pɛ, éshúŋ á wɛ́ menu ndɛʼɛ ánɛ Yɛɛ́so, é gɔ́ te emi, pek le shúŋ á wɛ́ ɛ́, pɛ véŋ veéŋ. Ńnɔŋ ŋgyáa á wɛ́ azwakne ndɛʼɛ, á gɔ́ te Azwakne Ndém ɛ́. Ńnɔŋ ntswīi mmɔ̄ʼ ŋke á mbū pɛ, é té gɔ́ ŋke mbɔŋ yīi, pek le tswī á mbū pɛ ɛ́, pɛ véŋ veéŋ.

Galat 2:4

Tɛ mbɔɔ páʼ wɔ táŋ‑mela ŋ́gɛ pɔ́ é epuɔ Yɛɛ́so, é kɛ si ŋŋíŋɛ ŋ́gɛ mɛ́ etém á yí. Wɔ wɛtɛ‑ŋkó puɔ mɛ́t, é le ŋɛté ŋkó á nnɔ pek, ŋ́gɔ̄ á mbápnɛ, éjʉ́ɔ páʼ, pek naáŋ á ŋga athū pek melaʼ mīi, pek lɛtneē ánɛ Yɛɛ́so. Ézéŋ eghʉ, pek epiŋ ncʉ́ʼ epuʼ lepé epuɔ Yúda.

Galat 5:1

Klísto a le kɛʼɛ́ ŋkhʉ apuʼ á ntɔ̄ŋ pímpɛ, ńdɔkɔ ŋ́gɛ, ḿpɛ enáŋ á ŋga athū pímpɛ. Pɛ ekāk ete, ndɛ́ʼ pɛ evéŋ, mɛ́ zéŋ nnéŋ akʉɔʼté meŋkwa, á ntɔ̄ŋ pɛ.

Efɛze 1:5

A le té njhʉ̄ ŋkɔ̄ŋ ŋ́gɛ, ḿpɛ ezápa ánɛ Yɛɛ́so Klísto, ńcʉ́ʼ epɔ̄ pí. Á páʼa tɛ́, a le fhó ánɛ apɔŋɔ́ ntē zí, ŋ́kɔ̄ŋ épúp.

2 Timotɛ 1:7

Meŋ ndʉ́ɛ́ páʼa melaʼ mīi, Azwakne zīi Ndém á le néŋ á ntē pímpɛ, á té azi, á ghʉʉ̄, ḿpɛ egɔ́ epi, ecɔʼ é ntē pɔ́p ɔ́. A cʉ́ʼɛ épúp, mbɔ á si ŋgɔ́ Azwakne zīi á ghʉʉ̄, ḿpɛ ewɛ̄ mete, ŋ́ghʉ̄ ḿpɛ ewɛ̄ ŋkɔŋne, ŋ́ghʉ̄ ḿpɛ ekūʼ a lekūʼte nnɛ̄t zímpɛ.

Eble 2:15

A le ghʉ̄ épúp, tɛ́ ndɔk ŋkɛ́ʼɛ ŋkhʉ apuʼ, á ntɔ̄ŋ epuɔ pīi, pɔ́ le té á mbɔ́k lewhʉ̄, ńcʉ́ʼɛ nnáŋa á ŋgɔŋ áa páʼ, epuʼ lewhʉ̄ lā.

Jáak 2:19

O zhɛɛ́ á légɛ, taʼ Ndém mé éwú. Á gɔ́ épúp, ŋ́gɔ́ mbɔŋ. Mesī é zéŋ nnɔ̄ŋ nzhɛ́ɛ azɔ́p épúp, ńnɔŋ mvɛ̄tɛ. »

1 Jáaŋ 4:18

Ŋiŋ yīi a wɛɛ̄ ŋkɔŋne, a te amɔ̄ʼ azō pɔ́k, melaʼ mīi, kwaʼ ŋkɔŋne, e ghʉʉ̄, ecɔʼ é mi á ntē ŋiŋ. Ecɔʼ é á ntē ŋiŋ yīi, a á si mbɔ́kɔ á letswā á yí ŋgʉɔ athʉ́ lepé. Ŋiŋ a nɔɔ̄ŋ ncɔʼɔ páʼā, a te kɔ̄ŋ á Ndém tɛ ntséknɛ ɛ́.