Lomɛŋ 5:15 - Eka Eswhī

¹⁵ Mɛ́ piŋɛ ŋgɔ́, mɛ́ le lɔ̄k mefa Ádam, ńdéŋte á ajū mīi, Ndém a yáa á mbū epuɔ menɔŋ ndémndēm ɛ́. Á anuúnē á légɛ, atʉtʉ epuɔ á le kwhʉtéē, melaʼ páʼ, taʼ ŋiŋ a le fā á mbū Ndém. Táʼ, apɔŋɔ́ ntē te ndhʉ zīi, Ndém a wɛɛ̄ ánɛ epuɔ menɔŋ, á faáŋ ntsyā mefa Ádam mɛ́t. Ajū mīi, a zapaá ánɛ taʼ ŋiŋ, á Yɛɛ́so Klísto, ŋ́gyá ndémndēm á mbū atʉtʉ epuɔ, á te nzwiŋ.

Lomɛŋ 5:15 Iomraidhean Croise

Matío 20:28

Á páʼa mɛ́t, tɛ́ Méŋ‑Ŋiŋnɔŋ wuɔ a lɛɛ́ te eshʉ̄ʼɛ á ŋgɔŋ ega páʼā, ŋ́gɛ mɛ́ efāʼ á mbū yí í. A lɛɛ́ eshʉʼɛ, égɔ́ á ŋgaŋ afaʼ epuɔ menɔŋ, éfaʼ faʼe, tɛ eyá athū nnɛ̄t zí, élɔk ecuʼ atʉtʉ epuɔ.

Matío 26:28

Emuɔ é si ŋgɔ́ metshi má, métshi eka Ndém pɔ́ a epuɔ pí. Meŋ pfɛttɛ ánɛ athū atʉtʉ epuɔ, Ndém a elɔk ndēkne mefa mɔ́p.

Jáaŋ 3:16

Ndém a le pú ŋkɔŋ epuɔ menɔŋ kɔŋ, tɛ ŋgyá á Méŋ yi, á tséŋ Méŋ yi, ŋ́gɛ ŋiŋ ntsem yīi, a á fɛ́ nnɛ̄t ŋgyá á mbū yí, a te eláʼ epí í, a a láʼ eta á lezēŋ Ndém.

Jáaŋ 4:10

Yɛɛ́so á pwɛt á mbū yí ŋ́gɛ: «Á ŋgwíʼe ŋgɔ́ yīi, o gɔ ezhɛ́ afuʼ zīi, Ndém a gɔ́ eyá á ŋiŋ, ŋ́gɔ́ éyi o gɔ ezhɛ́ á ŋiŋ yīi, a lʉ́ɛ́ á mbū wu ŋ́gɛ, o eyá á yí ntshi yí enú, mbɔ a ke gɔ́ wu mé lɔ́ á yí, á piŋ ŋgyá á wú ntshi yīi, é ghʉʉ̄, mɛ́ gɔ́ éwú. »

Mefaʼ Meziŋ-ntō 15:11

Táʼ, ajū mīi ḿpɛ é si mvéŋɛ, á gɔ́ áa lɛ, Ndém a le zapá ánɛ apɔŋɔ́ ntē te ndhʉ zīi, Atsyapuɔ Yɛɛ́so a wɛɛ̄ ánɛ pímpɛ, ŋ́ghʉ̄ ḿpɛ tswɛ́t, ńzéŋ ŋghʉ̄ epuɔ mɛ́t é tswɛ́t azɔ́p ndeŋ ndeŋ épúp. »

Lomɛŋ 5:12

Mefa é le gē ekó á ŋgɔŋ, ńzápa ánɛ taʼ ŋiŋ, lezēŋ ŋgaŋ é gɔ́ lɛ Ádam. Mefa é le gē ekó á ŋgɔŋ épúp, ńdɔ̄k á lewhʉ̄ eshʉ̄ʼ. Á shʉʼ épúp, ḿbú ŋkó ánɛ ŋiŋ ntsem, melaʼ mīi mmɔʼ ŋiŋ té fa, a te éwú ú.

Lomɛŋ 6:23

Á épúp, ntsɔʼɔ́‑afaʼ mefa, é si ŋgɔ́ á lewhʉ̄. Ajū mīi Ndém a piŋɛ ŋgyáa á mbū epuɔ menɔŋ ndémndēm, á gɔ́ á lezāpa ánɛ Yɛɛ́so Klísto Atsyapuɔ yímpɛ, ńtā á lezēŋ yí.

2 Kɔlɛŋte 5:14

Ŋkɔŋ te ndhʉ zīi, Klísto a wɛɛ̄ ánɛ pek, mé tshoneé á wék á leghʉ ajūɔ tsem, melaʼ mīi pek é si ncuŋtɛ nzhɛ́ɛ á légɛ, yí ndaʼ mé le kwhʉ́ á athū epuɔ metsem. Epuɔ metsem é tsia épúp, ŋ́kwhʉ́ ánɛ mefa mɔ́p.

2 Kɔlɛŋte 9:15

Ḿpɛ esyákne á Ndém melaʼ ajūɔ mbɔŋ té ndhʉ zīi, a le yá mé pímpɛ.

Efɛze 2:8

Pɛ ezhɛ́ á légɛ, Ndém a le zapá ánɛ apɔŋɔ́ ntē te ndhʉ zí, tɛ́ ŋghʉ̄ pɛ tswɛ́t, éfhó ánɛ wɛ́ lefɛ̄ nnɛ̄t ŋgyá á mbū yí. Ewuɔ legɔ̄ mɛ́t, á ké te fhó á mbū pɛ ɛ́, a fhó áa ánɛ páʼ, Ndém mé kɔŋ ŋghʉ̄ épúp ndémndēm.

Eble 2:9

Ḿpɛ ké ŋgɔ́ si njʉ́ɔ á légɛ, ŋiŋ yīi Ndém a le soʼné á yí á méŋ afʉʼ lɛ, ánɛ páʼ mecɔʼ Ndém é lɛ épúp, a lɛ á Yɛɛ́so. Ndém a le lɔ̄k atsāmezeŋɛ té ndhʉ zīi, a wɛɛ̄ ánɛ epuɔ menɔŋ, ŋ́ghʉ̄ Yɛɛ́so á kwhʉ́ á athū epuɔ menɔŋ. Á ké ŋgɔ́ tsetsɔŋɔ, mbɔ Ndém a ke chʉ́ á yí, ŋ́ghʉ̄ ŋ́gɛ, mɛ́ ewūʼte á yí, ŋ́gyá mekuʼ mí. Ńchʉ́ á yí épúp, melaʼ mīi a le jʉ́ɔ ŋgʉɔ̄ʼ, ŋ́kwhʉ́ á athū epuɔ menɔŋ metsem.

1 Jáaŋ 2:2

A á si ŋgɔ́ á ŋiŋ yīi, a le yá athū nnɛ̄t zí, Ndém á lɔk esōk mefa mímpɛ. A lɛ te sōk mefa mímpɛ ndaʼá, a le sōk mefa epuɔ ŋgɔŋ ntsem.

1 Jáaŋ 5:11

Anu mɛ́t zīi Ndém a shúŋɔ, a ajʉɔ: Ndém a le yá á yímpɛ meshhʉ̄, á lelɔk ntā á lezēŋ yí. Ḿpɛ piŋ mbɔ́ŋte á lezāpa ánɛ Méŋ yi, tɛ́ ntā á lezēŋ yí mɛ́t.