Lomɛŋ 4:11 - Eka Eswhī

¹¹ Ndém a le tɔ́ŋ á Ablaham lɛ ŋiŋ ndeŋ ndeŋ, tɛ́ mɛ́ shʉʼ ntém á yí, á gɔ́ ayiŋne. Ayiŋne jʉɔ mɛ́t á lɔkɔ ntswīi á légɛ, Ndém a á zápa ánɛ lefɛ̄ nnɛ̄t Ablaham, tɛ́ ntɔ́ŋ á yí lɛ, ŋiŋ ndeŋ ndeŋ, tɛ mɛ́ zɛ́t té tém á yí. Á fhó épúp, Ndém á lɔk á yí ŋghʉ̄ á mɔʼɔ́ epuɔ pīi, pɔ́ fɛɛ́ nnɛ̄t ŋgyá á mbū yí Ndém, té gɔ̄ yīi, mɛ́ é tém á wɔ́p, tɛ́ a etsīa épúp, a etɔ́ŋ á wɔ́p lɛ epuɔ ndeŋ ndeŋ.

Lomɛŋ 4:11 Iomraidhean Croise

Matío 16:16

Simɔŋ Piɛ á tswí ashuŋne, ńtsɔ́ʼ ŋ́gɛ: «O ó páʼā, ŋ́gɔ́ á Nzaʼ‑Ŋkhʉ á ntɔ̄ŋ apuʼ, á Méŋ Ndém yīi a naáŋ nte. »

Matío 8:11

Á épúp tɛ́ meŋ shúŋɔ á wɛ́ ŋ́gɛ, epuɔ tɛ nzáne, é shʉʼ efhó á meshhʉ̄ meshhʉ̄ á ndo esī atsetsáʼ, éshʉʼ ekó á ntē ŋgɔŋ eswhī, á athʉ́ lephū, pɔ́ a wɔ maŋgānjʉʼ pímpɛ, á Ablaham, mbɔɔ Izak, mbɔɔ Yakɔ́p, e ejhʉ́ á mía lekāk.

Lúkási 19:9

Yɛɛ́so á júʼ épúp, ńdé ŋ́gɛ: «Ndém a á ghʉ, megaŋ ŋgyā puɔ, é tswɛ́t azɔ́p ayáʼa. Anuúnē, ŋiŋ wuɔ mɛ́t, a á azí ndhu Ablaham.

Jáaŋ 3:33

Ŋiŋ yīi, a á ké mvéŋ anu zīi, a shúŋɔ, a á páʼā ndɔkɔ mvéŋɛ tɛ mvéŋɛ á légɛ, anu zīi Ndém a leéē, á si ŋgɔ́ áa anuúnē.

Jáaŋ 3:36

Ŋiŋ yīi, a fɛɛ́ nnɛ̄t ŋgyá á mbū Méŋ yi mɛ́t, a á ndáʼ nzī á leta á lezēŋ Ndém. Ŋiŋ yīi a te si njúʼɔ nchu Méŋ yi mɛ́t ɛ́, a te e fú ewɛ lenāŋ cʉɔ mɛ́t ɛ́. Ndém a naáŋ efʉʼ metsem, ńzáŋ á lɔ́ŋ á mbū yí. »

Jáaŋ 6:35

Yɛɛ́so á lé á mbū pɔ́p ŋ́gɛ: «Meŋ mé si ŋgɔ́ etsō lejhʉ̄ tsīi, é ghʉɛ mɛ́ gɔ́ɔ éwú. Ŋiŋ a shʉʼɛ á mbū meŋ, mbɔ nzi e te eláʼ ezéŋ á yí ezáŋ á. Ŋiŋ yīi a á fɛ́ nnɛ̄t ŋgyá á mbū meŋ, nzi ntshi, e é le láʼ nzéŋ á yí nzáŋ á.

Jáaŋ 6:40

Ajū mīi Mɔʼɔ́ ga a á si ŋkɔ̄ŋɔ, a ajʉɔ: ŋiŋ ntsem yīi, a á jʉ́ɔ á gá meŋ Méŋ yi, éfɛ́ nnɛ̄t ŋgyá mé meŋ, a a fú eta á lezēŋ Ndém. Meŋ ndáʼ ánɛ nzoknzem aleʼé, ŋ́ghʉ̄ a ezím ánɛ lewhʉ̄. »

Jáaŋ 6:47

Kwaʼ anuúnē anuúnē, meŋ shúŋɔ á wɛ́ ŋ́gɛ, ŋiŋ yīi a á fɛ́ nnɛ̄t ŋgyá mé meŋ, a á ndáʼ nzī á leta á lezēŋ Ndém.

Jáaŋ 8:33

Pɔ́ tsɔ́ʼ á mbū yí ŋ́gɛ: «Pek é si ŋgɔ́ ndhu Ablaham. Ŋiŋ a laá nzi ndɔ̄k á wék, ŋ́ghʉ̄ epuʼ tsí í. O gɔ́ epīiŋ ŋgāa ndé ŋ́gɛ, pek é le zɛ́t epuʼ ɔ́ ɔ̄?»

Lomɛŋ 10:11

Aŋwaʼne Ndém á leé ŋ́gɛ: «Ŋiŋ a fíɛ́ nnɛ̄t ŋgyá á mbū Yɛɛ́so, mbɔ ŋgaŋ a te e láʼ etapne ɛ́. »

Lomɛŋ 10:4

Lepé Mɔɔ́sɛ é le gʉ̄ɔ tɛ ntsóʼne áa ánɛ Klísto, tɛ́ Ndém a etɔ́ŋ epuɔ metsem pīi, pɔ́ fɛɛ́ nnɛ̄t ŋgyá á mbū Klísto lɛ, epuɔ ndeŋ ndeŋ.

Lomɛŋ 10:6

Táʼ, aŋwaʼne Ndém á leé ánɛ lezāpa ánɛ lefɛ̄ nnɛ̄t, tɛ́ ŋgɔ́ á ŋiŋ ndeŋ ndeŋ ŋ́gɛ: «Ndɛ́ʼ o elé á ntē wú ŋ́gɛ, “awɔ́ a a láʼ epe á lephū ū?”» Ńdɔkɔ ŋ́gɛ, awɔ́ a a láʼ epe á lephū tɛ́ etswi, Klísto á esóʼo ó?

Lomɛŋ 3:22

Á épúp, Ndém a lɔɔ̄k páʼ ŋiŋ á fɛɛ́ nnɛ̄t ŋgyá á mbū Yɛɛ́so Klísto, tɛ́ ntɔ́ŋ á ŋgaŋ lɛ ŋiŋ ndeŋ ndeŋ. Ŋ́ghʉ̄ épúp á mbū wɔ fɛ́‑nnɛ̄t metsem, melaʼ mīi, a te á ŋiŋ tɛ̄ʼte.

Lomɛŋ 3:26

Éfhó ánɛ páʼ, a á ŋiŋ, a te gákne nzáŋ á lɔ́ŋ ɔ́. A piīŋ ŋgɔ́ tsetsɔŋɔ, ńnɔŋ ntswīi páʼ, yí gē etɔ́ŋ á ŋiŋ lɛ, ŋiŋ ndeŋ ndeŋ, á ziŋ épúp. A etsīa épúp, epuɔ menɔŋ e ezhɛ́ á légɛ, yí é ŋiŋ ndeŋ ndeŋ. Ŋiŋ yīi a á ge enáŋ, ńnɔŋ efíɛ́ nnɛ̄t ŋgyáa mé Yɛɛ́so, yí etɔ́ŋ á yí lɛ, ŋiŋ ndeŋ ndeŋ.

Lomɛŋ 3:30

Á épúp melaʼ mīi, taʼ Ndém mé éwú. Yí mé e láʼ ezápa ánɛ lefɛ̄ nnɛ̄t epuɔ pīi, mɛ́ lé tém á wɔ́p, mbɔɔ epi mɛ́ la á wɔ́p tém ɛ́, étɔ́ŋ á wɔ́p lɛ epuɔ ndeŋ ndeŋ.

Lomɛŋ 4:10

Ndém a le gē etɔ́ŋ á Ablaham lɛ ŋiŋ ndeŋ ndeŋ, á ziŋ lɛ akɔ̄? A le gē etɔ́ŋ á yí lɛ ŋiŋ ndeŋ ndeŋ, mbɔ mɛ́ é tém á yí, kɛ mɛ́ zɛ́t té tém á yí í? A le gē etɔ́ŋ á yí lɛ, ŋiŋ ndeŋ ndeŋ, mɛ́ zɛ́t té tém á yí. Á le gē egɔ́, mbɔ mɛ́ la á yí tém ɛ́.

Lomɛŋ 9:30

Ḿpɛ gɔ efhó ánɛ ajʉɔ anu, ńdé ŋ́gɛ akɔ̄? Ḿpɛ gɔ elé ŋ́gɛ, epuɔ pīi é té epuɔ Yúda á, épuɔ pīi é lɛ te nɔ̄ŋ efāʼa á wɔ́p á legɔ̄ epuɔ ndeŋ ndeŋ, á mvhɔ Ndém ɛ́, Ndém a le fhó ánɛ wɔ́p á lefɛ̄ nnɛ̄t ŋgyá mé Yɛɛ́so, ńtɔ́ŋ á wɔ́p lɛ, epuɔ ndeŋ ndeŋ.

Lomɛŋ 9:33

Á gɔ́ páʼ mɛ́ le tí á ntē aŋwaʼne Ndém ŋ́gɛ: «Awuɔ yīi meŋ á si nnɔ̄ŋɔ á tɔ́ yīi, a ghʉʉ̄ mɛ́ kwate, á tésɔŋ Siɔŋ la. Á mía mía tɔ́ yīi, a ghʉʉ̄, ŋiŋ á whʉ á esī. Táʼ, ŋiŋ a ké efɛ́ nnɛ̄t ŋgyá á mbū tɔ́ wuɔ mɛ́t, mbɔ a te e láʼ etapne ɛ́. »

Lomɛŋ 9:6

Á té páʼā ndɔkɔ ndʉ́ɛ́ ŋ́gɛ, alaʼne zīi Ndém a le ghʉ̄ʉ̄, á le tó ndémndēm ɛ́, á gɔ́ áa légɛ, epuɔ pīi é ndhu Islaɛl, mé té si ŋgɔ́ á kwaʼ epɔ̄ Islaɛl metsem ɛ́.

2 Kɔlɛŋte 1:22

Yí yīi a le tshí ayiŋne zí ánɛ pímpɛ, a le néŋ Azwakne zí á ntē pímpɛ, ńdɔkɔ ntswī á légɛ, ŋkwa mecū mīi, a le laʼnē á leyā mé pímpɛ, a a láʼ eyá.

Galat 3:22

Ndém a leé á ntē aŋwaʼne yí ŋ́gɛ, epuɔ metsem á ndo esī atsetsáʼ, é si ŋgɔ́ apuʼ mefa, tɛ́ Ndém a etsīa épúp, ŋ́gyá ajū mīi, a le laʼnēē, á mbū epuɔ pīi, é fɛɛ́ nnɛ̄t ŋgyā á mbū Yɛɛ́so Klísto.

Galat 3:29

Páʼ pɛ é ndáʼ ŋgɔ́ epuɔ Klísto lā, pɛ é páʼa, ńdɔkɔ ncʉ́ʼɛ ndhu Ablaham. Ńcʉ́ʼ wɔ wɛ‑ajūɔ tsem zīi, Ndém a le laʼnē á leyā mé pɔ́p.

Galat 3:7

Pɛ echʉ́ nnɛ̄t njúʼ á mbɔŋɔ́. Epuɔ pīi é fɛɛ́ nnɛ̄t ŋgyá á mbū Ndém, pɔ́ mé si ŋgɔ́ epɔ̄ Ablaham.

Galat 5:5

Ŋ́gɔ́ mé pek, mbɔ pek é si nzwíʼtɛ ŋ́gɛ, Ndém a eshʉʼ ntɔ́ŋ á wék lɛ epuɔ ndeŋ ndeŋ á mvhɔ yí, melaʼ mīi pek lē efɛ́ nnɛ̄t zek ŋgyá á mbū Klísto. Azwakne Ndém mé si ntswítɛ á wék á lezwīʼte épúp.

Galat 6:16

Ŋ́gɔ́ á mbū epuɔ pīi, pɔ́ é si nzīŋɛ páʼa mɛ́t, ŋ́gɛ Ndém a elɛ ŋgyá á wɔ́p apwɛne, ńtswíte á wɔ́p á leghʉ anu mbɔŋ, ńtswíte epuɔ Islaɛl azɔ́p, á kwaʼ alāʼ Ndém.

Efɛze 1:13

Pɛ ezɛ́, é ke zapá ánɛ Klísto, ńjúʼ ŋke yīi é si ŋgɔ́ anuúnē, ŋ́ke mbɔŋ yīi é ghʉɛ mɛ́ tswɛ́tɛ. Pɛ le júʼ ŋke mbɔŋ mɛ́t, éfɛ́ nnɛ̄t ŋgyá á mbū Klísto, Ndém á néŋ ayiŋne zí ánɛ pɛ, á gɔ́ Azwakne zí zīi a le phʉ́ʉ̄.

Efɛze 4:30

Ndɛ́ʼ pɛ eghʉ̄ʉ, Azwakne Ndém zīi, a le néŋ á ntē pɛ, á záŋ á lɔ́ŋ. Azwakne mɛ́t á si ŋgɔ́ ayiŋne zīi, á tswii á wɛ́ á légɛ, Ndém a a fú ekú á wɛ́ ánɛ ŋgʉɔ̄ʼ.

Fílíip 3:9

Élɛtne ánɛ yí épúp, meŋ ńde zéŋ esé ŋ́gɛ, lekūʼte lepé epuɔ Yúda mé ghʉʉ̄, tɛ́ meŋ gɔ́ á ŋiŋ ndeŋ ndeŋ, á mvhɔ Ndém ɛ́. Táʼ, ajū mīi á gɔ eghʉ̄ʉ, tɛ́ meŋ gɔ́ á ŋiŋ ndeŋ ndeŋ á mvhɔ Ndém, á gɔ́ áa gá á lefɛ̄ nnɛ̄t ŋgyá á mbū Klísto. Ndém mé le ghʉ̄ʉ̄, meŋ egɔ́ á ŋiŋ ndeŋ ndeŋ á mvhɔ yí, melaʼ mīi meŋ ndē efɛ́ nnɛ̄t ŋgyá á mbū Klísto.

Eble 11:7

Á le fhó ánɛ páʼ, Noe a le fɛ́ nnɛ̄t épúp, ŋ́gyá á mbū Ndém, Ndém á shúŋne á mbū yí, ńdɔk ntswɛ̄te á yí, ánɛ menu mīi, é le nɔ̄ŋ ŋgɔ̄ á eshʉʼɛ̄, tɛ mɛ́ piŋ nzī nzɛ́t áa te jʉ́ɔ. Á júʼ anu zīi, Ndém a á lé, ḿvéŋ té miʼte, ŋ́ŋyɛ̄tte á mía mía mɛtúa ntshi, ńdɔk ŋghʉ̄, pɔ́ a epuɔ atseŋ ŋgyā pí metsem, é kó éwú, ńtswɛ́t. Á lɔk épúp, ńtswī á légɛ, avoʼ epuɔ á si ŋgɔ́ epuɔ tepɔŋ. A le fɛ́ nnɛ̄t épúp, Ndém á tɔ́ŋ á yí lɛ ŋiŋ ndeŋ ndeŋ.

2 Piɛ 1:1

Meŋ Simɔŋ Piɛ, ŋ́gɔ́ á ŋgaŋ afaʼ Yɛɛ́so Klísto, ńzéŋ ŋgɔ́ á nziŋ‑ntō yi, mé tíi akɛtte jʉɔ páʼa. Ńtíi á mbū epuɔ pīi, é lē efɛ́ nnɛ̄t ŋgyá á mbū Yɛɛ́so, páʼ pek lā. Lefɛ̄ nnɛ̄t ŋgyá mé Yɛɛ́so, á azō ntē nzwiŋ tɛʼ, á mbū pɛ, mbɔɔ á mbū pek. Yɛɛ́so Klísto mé le ghʉ̄ épúp ánɛ pímpɛ, melaʼ mīi, a lɔɔ̄k á ndeŋ ndeŋ, tɛ́ ŋghʉ̄ azō ánɛ awíɛ awíɛ. A á Ndém yímpɛ, ńzéŋ ŋgɔ́ á Ŋghʉɛ‑mɛ́‑tswɛ́t.

Menjʉɔ te lí 9:4

Mɛ́ tswi á mbū pɔ́p ŋ́gɛ, ndɛ́ʼ pɔ́ ghʉ anu tepɔŋ ánɛ mvēŋ á ndo esī atsetsáʼ, tɛ mbɔɔ ánɛ methʉ́, tɛ ŋkó azō tsem zīi á eswī. Ŋ́gɛ pɔ́ enéŋ ŋgʉɔ̄ʼ áa ánɛ epuɔ menɔŋ pīi, ayiŋne Ndém á té á mvhɔ eshhʉ̄ pɔ́p ɔ́.