Lomɛŋ 3:5 - Eka Eswhī

⁵ A piŋɛ ŋgɔ́ yīi, yímpɛ á legɔ̄ le gɔ́ ndeŋ ndeŋ ɛ́, a ghʉʉ̄ mɛ́ zhɛ́ á légɛ, Ndém a á ŋiŋ ndeŋ ndeŋ, ḿpɛ ké nzéŋ ndé ŋ́gɛ akɔ̄? Á épúp páʼā, ŋ́gɔ́ yīi, ŋiŋ a gɔ elé ŋ́gɛ, Ndém a gē ezáŋ á lɔ́ŋ, étswá á yímpɛ ŋgʉɔ athʉ́ páʼā, ńdɔkɔ te ŋghʉ̄ɛ anu ndeŋ ndeŋ ɛ́. Meŋ shúŋnɛ páʼ epuɔ ŋgɔŋ puɔ lā.

Lomɛŋ 3:5 Iomraidhean Croise

Lomɛŋ 12:19

Mepɔŋ mesoó pá, ndɛ́ʼ ŋiŋ yí méŋwɛ̄t á pʉʼ anu zīi, ŋiŋ a á ghʉ á mbū yí. Pɛ ecʉ́ʼ Ndém mé epʉ̄ʼ, melaʼ mīi Atsyapuɔ Ndém a leé á ntē aŋwaʼne yí ŋ́gɛ: «Meŋ mé pɔɔ́ŋ á lepʉʼ anu, meŋ mé pɔ́ŋ á lezāpa azi awɔ́ ŋiŋ lɛ́, á alá apū yí. »

Lomɛŋ 2:5

O ké mbiŋ ŋgɔ́ si ntʉ̄ɛ̄ athū, ńnɔŋ te mvéŋɛ á lekūmne ntē wú ú. Ŋ́ghʉ̄ɛ épúp páʼā, ńdɔkɔ ntɔ́ŋɔ á mía mía azāŋalɔ́ŋ Ndém ánɛ wu, ánɛ aleʼé zīi, a lɔkɔ á kwaʼ ndeŋ ndeŋ, ńzáʼa ntsaŋ zɔp a epuɔ menɔŋ, ńtswīi azāŋalɔ́ŋ zí.

Lomɛŋ 3:19

Ḿpɛ ké nzhɛ́ á légɛ, akʉ̄ɛ akʉ̄ɛ zīi mɛ́ le tí á ntē aŋwaʼne lepé Ndém, á cʉteē áa epuɔ pīi, pɔ́ le pɔŋté é lekūʼte lepé mɛ́t. Ndém a lɛɛ́ ŋgyáa lepé, ńdɔkɔ efāʼa ŋ́gɛ, epuɔ menɔŋ metsem, e eláŋte nchu wɔ́p, ńzhɛ́ á légɛ, yí pɔŋteé á letswā á ŋiŋ ntsem, á ndo esī atsetsáʼ, ŋgʉɔ athʉ́ lepé.

Lomɛŋ 3:7

Emɔ̄ʼ ŋiŋ a gɔ ezéŋ ndé ŋ́gɛ, a piŋɛ ŋgɔ́ éyi, mela mīi meŋ ghíɛ, é tswiī á légɛ, Ndém a á ŋgaŋ anuúnē, ŋ́ghʉ̄ mɛ́ jʉ́ɔ á shʉ́shɔ́k yi, mbɔ a piŋɛ ntswáa á gá ŋgʉɔ athʉ́ lepé, ŋ́gɛ meŋ á ŋgaŋ mefa melaʼ akɔ̄?

Lomɛŋ 4:1

Tsetsɔŋɔ meŋ gɔ á eshúŋ anu ánɛ Ablaham maŋgānjʉʼ epuɔ Yúda. A le lɔ̄k mete mí méŋwɛ̄t ŋgwɛ̄ akɔ̄?

Lomɛŋ 5:8

Ḿpɛ eké njʉ́ɔ ntií zīi, Ndém a le lɔ̄k ntswi á légɛ, yí kɔɔ̄ŋ á yímpɛ: ḿpɛ le zɛ́t áa megaŋ mefa, Klísto á kwhʉ́ á athū pímpɛ.

Lomɛŋ 6:1

Tɛ á páʼa, ḿpɛ lɔkɔ ndʉ́ɛ́ ŋ́gɛ akɔ̄? Ŋ́gɛ ḿpɛ etswiʼne nnáŋ á ntē mefa, ńdɔkɔ efāʼa ŋ́gɛ, Ndém a etswiʼne ŋgwɛ̄ apɔŋɔ́ ntē te ndhʉ ánɛ pímpɛ lɛ́?

Lomɛŋ 6:19

Tsetsɔŋɔ, meŋ a shúŋne á mbū pɛ, ánɛ ntií leshūŋne epuɔ ŋgɔŋ puɔ, melaʼ mīi pɛ é epuɔ, ŋ́ká á lejūʼ anu. Á lɛ amɔ̄ʼ afʉʼ, pɛ pú ndɔ̄k mbe nnɛ̄t zɛ ntsem, ńcʉ́ʼ meŋkwa, á leghʉ menu epe, mbɔɔ menu tepɔŋ ntií ntiī, é tshóne á wɛ́ á lete athū á mbū Ndém. Tsetsɔŋɔ, pɛ eké ndɔ̄k mbe nnɛ̄t mɛ́t ntsem, ńcʉ́ʼ meŋkwa, á leghʉ afaʼ ndeŋ ndeŋ. Afaʼ ndeŋ ndeŋ á tshoneé á ŋiŋ á legɔ̄ ŋiŋ Ndém.

Lomɛŋ 7:7

Á páʼā, ńdɔkɔ ndʉ́ɛ́ ŋ́gɛ akɔ̄? Ńdɔkɔ ndʉ́ɛ́ ŋ́gɛ, lepé pɔ́ mefa é taʼ azō lɛ́? Ŋgáŋ, á té épúp ɔ́. Lepé mé le ghʉ̄ʉ̄, meŋ ezhɛ́ ajū mīi, mefa é si ŋgɔ́ aziɛ́. Púp, meŋ nde gɔ́ meŋ ńde zhɛ́ á légɛ, kegʉɔʼ a te pɔ̄ɔŋ, té gɔ́ yīi, lepé é lé ŋ́gɛ: «Te wɛ á kegʉɔʼ ɔ́. »

Lomɛŋ 8:31

Páʼ á ké mbiŋ ŋgɔ́ páʼa lā, meŋ gɔ eké nzéŋ ńdé ŋ́gɛ akɔ̄? Páʼ Ndém a á nzem pímpɛ lā, awɔ́ a gɔ epīŋ nzéŋ ŋ́kūʼ ánɛ pímpɛ ɛ̄?

Lomɛŋ 9:30

Ḿpɛ gɔ efhó ánɛ ajʉɔ anu, ńdé ŋ́gɛ akɔ̄? Ḿpɛ gɔ elé ŋ́gɛ, epuɔ pīi é té epuɔ Yúda á, épuɔ pīi é lɛ te nɔ̄ŋ efāʼa á wɔ́p á legɔ̄ epuɔ ndeŋ ndeŋ, á mvhɔ Ndém ɛ́, Ndém a le fhó ánɛ wɔ́p á lefɛ̄ nnɛ̄t ŋgyá mé Yɛɛ́so, ńtɔ́ŋ á wɔ́p lɛ, epuɔ ndeŋ ndeŋ.

1 Kɔlɛŋte 15:32

Pek a epuɔ menɔŋ pīi, é páʼ mena mbaʼ lā, é ke lʉɔ́ʼ á tésɔŋ Efɛze ega páʼa. Á ŋgwíʼe ŋgɔ́ éyi, meŋ nde gē elʉɔ́ʼ épúp, leghi tsá é tshí áa ánɛ menu ŋgɔŋ muɔ, mbɔ lelʉɔ̄ʼ mɛ́t, a a tswíte á gá ánɛ akɔ̄? A ŋgwíʼe ŋgɔ́ éyi, mepfhō é té fú ezím ánɛ lewhʉ̄ ɛ́, mbɔ meŋ gɔ elé azá páʼ emɔ̄ʼ epuɔ ŋ́gɛ: «Ḿpɛ epfɛ́t, ńnú, melaʼ mīi ḿpɛ e shʉʼ ezɔ́ mmɔʼ, ékwhʉ́. »

1 Kɔlɛŋte 9:8

Menu mīi meŋ shúŋɔ lāa, é té lɛ ŋgɔ́ áa menu mīi epuɔ menɔŋ mé kwaŋtɛ ɛ́, é si ŋgɔ́ menu, mbɔ mɛ́ le zéŋ ntí á ntē aŋwaʼne mbé Ndém épúp.

2 Kɔlɛŋte 6:4

A cʉ́ʼɛ épúp, mbɔ pek méŋwɛ̄t é si ntswīi á légɛ, pek é si ŋgɔ́ megaŋ afaʼ Ndém, ánɛ ajūɔ tsem zīi, pek ghʉɛ. Ńdɔ̄k á wék á lekak ete, á afʉʼ zīi, pek é ntē ŋgʉɔ̄ʼ, á afʉʼ zīi, mɛ́ é si ndʉɔ́ʼɔ á wék, mbɔɔ afʉʼ zīi, pek é ntē atapne, tɛ́ ntswī.

2 Kɔlɛŋte 7:11

Pɛ eké mbīŋ njʉ́ɔ ajū mīi, lege meke, mbɔ Ndém mé kɔŋ, á ke ghʉ̄ ánɛ pɛ: á ke ghʉ̄ʉ̄, pɛ te zéŋ eféŋ alɔ́ʼ ŋiŋ ɛ́. Ŋ́ghʉ̄, pɛ egákne mvéŋ mefa mɛ́. Ŋ́ghʉ̄, esē é kú á wɛ́ ánɛ menu mīi, pɛ ke fʉʼtēē. Ŋ́ghʉ̄, pɛ ecɔʼ apiŋ ŋghʉʉ́‑menu mɛ́. Ŋ́ghʉ̄, pɛ etsá á lezēŋ njʉ́ɔ á gá. Ŋ́ghʉ̄, pɛ ekhʉ́ne á leghʉ afaʼ Ndém. Ŋ́ghʉ̄, pɛ ekɔ̄ɔŋ á letswā ŋiŋ ŋgʉɔ athʉ́ lepé. Pɛ ke tswī ánɛ meshhʉ̄ metsem á légɛ, pɛ lɛ á ntē anu mɛ́t páʼā, ŋ́gɔ́ áa ndendem.

Galat 2:18

Ŋiŋ a náŋa, tɛ a te zéŋ ŋkúʼte lepé ɛ́, melaʼ mīi é té si ntswítɛ á yí á legɔ̄ ŋiŋ ndeŋ ndeŋ ɛ́, ḿbīŋ nnáŋ tɛ nzéŋ efāʼ á yí á lezēŋ mbīŋ nzem ánɛ mbé mɛ́t, mbɔ ŋgaŋ a á páʼā, ńnēŋtɛ lepé mɛ́t.

Galat 3:15

Epɔ̄ memía, meŋ a pɛ́ efʉʼ ánɛ menu mīi, ḿpɛ é si njʉ́ɔ eleʼé tsem, élɔk ekɛ́ʼte, éshúŋ á wɛ́. Ŋiŋ pɔ́ ŋiŋ é cuŋteē anu á mbɔŋɔ́ tɛ nzyɛ̄t péʼe, ŋ́gɔ́ éyi ŋiŋ a gɔ eshʉ̄ʉʼ mbík anu mɛ́t e? Ŋ́gɔ́ éyi ŋiŋ a gɔ eshʉ̄ʉʼ ntswīʼne anu éwú u?

Menjʉɔ te lí 15:3

Pɔ́ nɔŋ nzɔ̄pɔ ntshi yīi, Mɔɔ́sɛ ŋgaŋ afaʼ Ndém a le zɔ̄pē. Ńzéŋ nɔŋ nzɔ̄pɔ ntshi yīi, Mɔ́ Njʉnjhʉ a le zɔ̄p azí. Pɔ́ nɔŋ nzɔ̄pɔ ndʉ́ɛ́ ŋ́gɛ: «Atsyapuɔ Ndém, Atsyantsɔp, mefaʼ mú é zánee, ḿbú mbɔ̄ŋ tɛʼ. Efɔ ŋgɔŋ ntsem, eju ntií leghʉ anu, e gɔ́ áa ndeŋ ndeŋ, ŋ́gɔ́ anuúne.

Menjʉɔ te lí 18:20

Ajūɔ tsem zīi, á lephū, a egɔ́ á ntē lekāk, páʼ tésɔŋ wuɔ a á lákne lā. Pɛ azɛ́, épuɔ Ndém, mbɔɔ meziŋ‑ntō, mbɔɔ metswi‑ŋke Ndém, e ekák azɛ́, páʼ Ndém a á tswá epuɔ tésɔŋ mɛ́t, ánɛ menu mīi pɔ́ gɛ nzóko efʉ̄ʼtɛ, ánɛ pɛ.