Lomɛŋ 15:16 - Eka Eswhī

¹⁶ Á gɔ́ páʼ, a le lɔ̄k á gá ŋghʉ̄ á ŋgaŋ afaʼ Yɛɛ́so Klísto, á mbū epuɔ pīi é té epuɔ Yúda á. Ńchʉ́ á gá ŋ́gɛ, meŋ etswī ŋke mbɔŋ Ndém, tɛ́ Azwakne Ndém a eghʉ̄, epuɔ pīi é té epuɔ Yúda á, e ecʉ́ʼ páʼ epɔʼ yīi, mɛ́ é yá á mbū Ndém, tɛ é pɔŋ á yí lā.

Lomɛŋ 15:16 Iomraidhean Croise

Mefaʼ Meziŋ-ntō 13:2

Á shʉʼ ŋgɔ́ amɔ̄ʼ afʉʼ, pɔ́ nɔŋ ŋkɔ̄ŋɔ nnáŋa nzi melaʼ Ndém, ńnɔŋ eswíŋtɛ á Ndém. Azwakne Ndém á shʉʼ amɔ̄ʼ aleʼé, ńdé á mbū pɔ́p ŋ́gɛ: «Pɛ etswhi efāk á Baanabas pɔ́ Sɔ́ɔl, pɔ́ eghʉ̄ mefaʼ mīi, meŋ a tsékne á mbū pɔ́p. »

Mefaʼ Meziŋ-ntō 20:24

Á ké ŋgɔ́ áa légɛ, gá legɔ̄ éwú, a te á mbū meŋ, ŋ́gɔ́ azō ɔ́. Mvhɔ, a á gá á leghʉ mefaʼ mīi, Atsyapuɔ Yɛɛ́so a le tsekné á mbū meŋ, tɛ ndáʼ nzōko. Meŋ mbɔɔ́ŋ á letswi ŋke mbɔŋ, ŋ́kʉɔ́ʼ ŋkwɛ ŋ́gɛ, á anuúnē á légɛ, Ndém a puú ŋgwɛ apɔŋɔ́ ntē te ndhʉ ánɛ epuɔ.

Mefaʼ Meziŋ-ntō 20:32

Tsetsɔŋɔ wuɔ, meŋ á tsékne á wɛ́ á mbū Ndém, ńnɔŋ ndʉ́ɛ́ ŋ́gɛ, pɛ́ etshí á ashuŋne zí á mvhɔ, aziɛ́ mé si ntswīi páʼ a wɛɛ̄ ŋkɔŋ te ndhʉ ánɛ pímpɛ épúp. Aziɛ́ mé zéŋ ŋkūʼ á leghʉ, pɛ tēte ánɛ lefɛ̄ nnɛ̄t ŋgyá mé yí, éfú ŋkó ánɛ lepɔŋ te mi tsīi, a le féŋ á mbū epuɔ pīi, é epí, tɛ ntsékne.

Mefaʼ Meziŋ-ntō 22:21

Atsyapuɔ á zéŋ ndé á mbū meŋ ŋ́gɛ: “Ké efhó á tésɔŋ ega ntó tó, meŋ méŋwɛ̄t e tó á wú tɛ ŋgia e esāk, á mbū epuɔ pīi, é té epuɔ Yúda á.”»

Mefaʼ Meziŋ-ntō 9:15

Atsyapuɔ á tsɔ́ʼ ŋ́gɛ: «Ké ŋgʉ̄ɔ gʉɔ. Meŋ á tsɔ́ʼ á ŋiŋ mɛ́t ŋ́gɛ, a eghʉ̄ afaʼ zá, ńzéŋ eshúŋ á ŋiŋ yīi meŋ á ewiɛ́, á mbū melāʼ ndɛʼɛ, mbɔɔ á mbū mefɔ pɔ́p, mbɔɔ á mbū epuɔ Islaɛl.

Lomɛŋ 1:1

Meŋ Pɔ́ɔl, ŋ́gɔ́ á ŋgaŋ afaʼ Yɛɛ́so Klísto, mé tíi akɛtte jʉɔ, mbɔ Ndém a le tɔ́ŋ á gá, ŋ́gɛ meŋ egɔ́ á nziŋ‑ntō, ńtswhi ntsɔ́ʼ á gá ŋ́gɛ, meŋ etswī ŋke mbɔŋ yí.

Lomɛŋ 11:13

Tsetsɔŋɔ, meŋ shúŋnɛ á mbū pɛ, á wɛ́ pīi, pɛ te epuɔ Yúda á: meŋ á si ŋgɔ́ á nziŋ‑ntō Yɛɛ́so, á mbū epuɔ pīi, é té epuɔ Yúda á. Ntē gá é nɔŋ ŋgáŋtɛ, melaʼ afaʼ mɛ́t zīi, mɛ́ le tsekné á mbū meŋ.

Lomɛŋ 15:18

Meŋ ŋaʼaá nchu gá, ńdɔk eshúŋ áa ajū mīi, Klísto a le zapá ánɛ meŋ ŋghʉ̄, tɛ́ epuɔ pīi é té epuɔ Yúda á, é júʼ nchu Ndém. A le zapá ánɛ meshuŋne má, mbɔɔ ánɛ ega leghʉ, tɛ́ ŋghʉ̄ épúp.

Lomɛŋ 15:19

Ńzápa ánɛ páʼ Azwakne Ndém á le yá á gá mete, á lelɔk ŋghʉ̄ mendajʉ́ɔ menu, mbɔɔ meyiŋne menu mīi, é tswii mete Ndém, tɛ́ ŋghʉ̄ épúp. Púp, meŋ zīi, á Yelósalɛm, ńtɔ́kte nchʉ́ nnɛ̄t ntswī ŋke mbɔŋ ánɛ Klísto, tɛ ŋkó á apak ŋgɔŋ Ilili.

Lomɛŋ 15:20

Táʼ, meŋ nde ké ŋkɔ̄ŋ á letswi ŋke mbɔŋ áa ánɛ ejʉʼ tsīi, mɛ́ laá nzi ŋkím lezēŋ Klísto éwú ú, ḿbɔ́k á gá lekwɛ̄t ŋgyā, ánɛ atseŋ zīi, mmɔʼ ŋiŋ mé le nɔ̄ŋŋ̄.

Lomɛŋ 15:29

Meŋ á si ncuŋtɛ nzhɛ́ɛ á légɛ, meŋ a shʉʼ eshʉʼ tɛ ekó á alāʼ pɛ, mbwɛ́né zīi é fhɔ́ɔ á mbū Klísto, e efūʼte ánɛ pɛ.

Lomɛŋ 5:5

Ŋiŋ a piīk tɛ nnéŋ á ntē yí épúp páʼā, á té shʉʼ nnéŋ té tó áa épúp ɔ́, melaʼ mīi Ndém a le zapá ánɛ Azwakne zí zīi, a le néŋ á ntē pímpɛ, ńnéŋ ŋkɔŋne zi á ntē pímpɛ.

1 Kɔlɛŋte 3:5

Apolos a á awɔ́, tɛ́ meŋ Pɔ́ɔl meŋ gɔ́ á awɔ́? Pek yí é gɔ́ áa megaŋ afaʼ pīi, Ndém a le tóō, ŋ́gɛ pek eshʉʼ ntswī ŋke mbɔŋ á mbū pɛ, tɛ́ pɛ ezápa ánɛ ŋke mɛ́t, éfɛ́ nnɛ̄t ŋgyá á mbū Klísto. Awɔ́ ŋiŋ wek lɛ́, a le ké ŋgē eghʉ azí afaʼ mɛ́t, éfhó áa ánɛ meshhʉ̄ mīi, Atsyapuɔ a á yá á yí.

1 Kɔlɛŋte 4:1

Meŋ á si ŋkɔ̄ŋɔ ŋ́gɛ, epuɔ ezhɛ́ á légɛ, pek é megaŋ afaʼ Klísto, mbɔ Ndém a le tsekné anuúnē zīi, á le lʉ̄ɔ̄, ŋ́gɛ pek ezíʼne á wɛ́.

1 Kɔlɛŋte 6:19

Pɛ ka zhɛ́ á légɛ, mbe nnɛ̄t zɛ e é si ŋgɔ́ á Mía Ŋgyā Azwakne Ndém ɛ́ lɛ̄? Ndém a le yá Azwakne mɛ́t ŋ́gɛ, a egɔ́ á ntē pɛ. Púp, pɛ é le zéŋ mbɔ́ŋ mbe nnɛ̄t zɛ́ ɛ́, Ndém mé ecʉ́ʼɛ mbɔ́ŋɔ á wɛ́.

2 Kɔlɛŋte 11:23

Ŋ́gɔ́ megaŋ afaʼ Klísto, meŋ a shúŋne páʼ apia lā, meŋ gɔ́ azá ewiɛ́ tɛ ntɔ́k á wɔ́p. Meŋ nde ghʉ̄ afaʼ ntɔ́k á wɔ́p. Ŋgɔ́ me lekō á atʉɛ́, mbɔ meŋ ndé kó ntɔ́k á wɔ́p. Mɛ́ lé pú ntswá á gá, ńtɔ́k á wɔ́p. Meŋ ndé zápne á nchu lewhʉ̄, ánɛ meŋgʉɔ tɛ nzáne.

2 Kɔlɛŋte 5:20

Pek é páʼā ndɔk ŋgɔ́ wɔ mɛmekém Klísto, púp, Ndém méŋwɛ̄t mé nɔŋ nzápa ánɛ pek, ńtɔ́ŋɔ á wɛ́. Pek é swíŋte á wɛ́ ánɛ lezēŋ Klísto, pɛ elɛ ncʉ́ʼ, pɛ a Ndém e ecʉ́ʼ á taʼ nchu.

2 Kɔlɛŋte 8:5

Ajū mīi pɔ́ ke ghʉ̄ʉ̄, á ke tɔ́k azi pek ke nɔ̄ŋ nzwíʼtɛ. Pɔ́ ke pú mmaʼ ŋgua zɔp ŋgyá á mbū Atsyapuɔ, ńzéŋ mmaʼ ŋ́gyá á mbū pek, ánɛ páʼ Ndém a á kɔŋ épúp.

Galat 3:5

Ndém a le gē eyá Azwakne zí á mbū pɛ, ŋ́gē eghʉ meŋkʉʼne anu á nnɔ pɛ páʼā, a te efhó ánɛ wɛ́ á lekūʼte mbé mí í. A le fhó ánɛ páʼ pɛ le júʼ ŋke mbɔŋ, ḿvéŋ.

Efɛze 2:18

É melaʼ Klísto, tɛ́ ḿpɛ metsem, épuɔ Yúda mbɔɔ epuɔ pīi, é té epuɔ Yúda á, é zapaá ánɛ ndaʼ Azwakne Ndém, ŋ́kūʼ á letshī á lezēŋ Ndém Mɔʼɔ́.

Efɛze 2:22

Ndém a le fhó ánɛ páʼ, pɛ azɛ́, é lɛtneē ánɛ Klísto lā, tɛ́ ŋghʉ̄ pɛ egɔ́ mmɔʼ ŋkaŋa ánɛ ŋgyā mɛ́t, pɛ a emɔ̄ʼ epuɔ é pú ncʉ́ʼ ŋgyā zīi, a lɔɔ̄k Azwakne zí nnáŋ éwú.

Efɛze 5:2

Pɛ elɔ̄k ŋkɔŋne tɛ́ nnáŋ, ńdeŋ ndeŋ páʼ Klísto a le náŋ épúp. A le kɔ̄ŋ á yímpɛ, tɛ ŋgyá athū nnɛ̄t zí méŋwɛ̄t, melaʼ mímpɛ, ńdɔ̄k nnɔ̄ŋ epɔʼ yīi, é pɔɔ̄ŋ á Ndém.

Fílíip 2:17

Wɛ́ á lefɛ̄ nnɛ̄t ŋgyá á mbū Ndém, a á si ŋgɔ́ páʼ, epɔʼ yīi, pɛ nɔŋɔ á mbū yí lā. Mɛ́ zi eshʉ̄ʼ nzwhí á gá zwhíi, mbɔ metshi má e gɔ́ páʼ meluʼ mīi, meŋ tswiʼnɛ ánɛ epɔʼ mɛ́t lā. A shʉʼɛ ŋgɔ́ épúp, mbɔ ŋgɔŋ e pɔŋ á gá, ḿpɛ epúte ŋkák.

Fílíip 4:18

Meŋ á chʉ́ nnɛ̄t mvéŋ ŋ́gɛ, meŋ ke jʉ́ɔ ajūɔ tsem zīi, pɛ ke tó á mbū meŋ. Á ke pú nzá, ńtɔ́k azi á ŋgɔ́ á mbū meŋ ŋkíŋɛ. Tsetsɔŋɔ, páʼ Epaflodit a ke lɔ̄k etsō tɛ nzá eshʉʼ ŋgyá mé meŋ lā, amɔ̄ʼ azō á té zɛ́t á mbū meŋ ŋkíŋɛ ɛ́. Etsō mɛ́t é si ŋgɔ́ páʼ epɔʼ yīi, é lemteē azík mbɔŋ, épɔʼ yīi, mɛ́ é yá á mbū Ndém, tɛ á véŋ, é nɔŋ mbɔ̄ŋɔ á yí lā.

1 Tesalonik 2:2

Pɛ é si nzéŋɛ nzhɛ́ɛ á légɛ, pek le kó á tésɔŋ Fílíio, ńjʉ́ɔ ŋgʉɔ̄ʼ tɛʼ, mɛ́ zéŋ ndʉɔ́ʼ á wék éwú. Pek náŋ tɛ efhó éwú eshʉ̄ʼ, Ndém á ké ŋghʉ̄, pek kāak ete, ńtswī ŋke mbɔŋ yí á mbū pɛ, tɛ mbɔɔ páʼ, mɛ́ lɛ si ndʉɔ́ʼɔ á wék.

1 Tesalonik 2:9

Ázi ŋgē egɔ́ me epɔ̄ memía, pɛ nɔ̄ɔŋ ŋkímtɛ páʼ, pek lɛ á tsetsɛlɛ pɛ, afaʼ á nɔŋ eswɛ́tɛ á wék, pek nɔ̄ɔŋ njʉ́ɔ ŋgʉɔ̄ʼ épúp. Pek lɛ etsōʼ pɔ́ ezokó, ńnɔŋ ŋghʉ̄ɛ afaʼ, ńdɔkɔ te ŋkɔ̄ŋɔ á wék, á lege etswi ŋke mbɔŋ Ndém á mbū pɛ, ńcʉ́ʼ á apiʼ, á mbū ŋiŋ wɛ ɛ́.

1 Tesalonik 5:23

Ŋ́gɛ Ndém, á ŋwɛ́t apwɛne, a elɛ ŋghʉ̄ pɛ egɔ́ té alɔ́ʼ tɛ nzōko, éféŋ egega tsɛ́, mbɔɔ membe nnɛ̄t mɛ́, ŋ́ghʉ̄ mentē mɛ́, á alá apū yí, tɛ Atsyapuɔ yímpɛ Yɛɛ́so Klísto a eláʼ ŋgē epiŋ nzem, mɛ́ enɔ̄ŋ le ndāʼa á wɛ́ ɛ́.

1 Timotɛ 1:11

Anu jʉɔ zīi, meŋ zíʼnɛ á wɛ́ la, á fhɔ́ɔ á ntē ŋke mbɔŋ páʼ Ndém a le tsekné á mbū meŋ épúp. Ndém wuɔ mɛ́t, a á ŋiŋ, shʉ́shɔ́k yi á gɔ́ éwú. A naáŋ efʉʼ metsem, á ntē lepɔŋ.

1 Timotɛ 2:7

É melaʼ épúp tɛ́, Ndém a le tsɔ́ʼ á gá ŋ́gɛ, meŋ egɔ́ á ntswi‑ŋke yi, ŋ́gɔ́ á nziŋ‑ntō. A le tsɔ́ʼ á gá ŋ́gɛ, meŋ ezíʼne epuɔ pīi, é té epuɔ Yúda á, á lefɛ̄ nnɛ̄t ŋgyá á mbū yí, ńzéŋ nzíʼne á wɔ́p anuúnē ánɛ yí. Meŋ shúŋɔ anuúnē, meŋ te ŋghíɛ mela á.

2 Timotɛ 1:11

Ndém a le tsɔ́ʼ á gá ndɔk ŋghʉ̄ á nziŋ‑ntō yi, ŋ́gɛ meŋ etswī ŋke mbɔŋ wuɔ mɛ́t, ŋ́kɛ́ʼte eshúŋ epuɔ.

Eble 13:16

Ndɛ́ʼ pɛ elēkne á leghʉ anu mbɔŋ, á letswīte mennɛ̄t mɛ́ á nnɔ pɛ, ntií epɔʼ jʉɔ mɛ́t mé pɔɔ̄ŋ á Ndém.

1 Piɛ 1:12

Ndém a le kɛʼté eshúŋ á wɔ́p ŋ́gɛ, ŋke yīi mɛ́ le gɛ, pɔ́ egʉɔ ntswī, é té cʉ̄te á wɔ́p pɔ́p méŋwɛ̄t ɛ́, ŋ́ké mbiŋ ncʉ̄te á wɛ́. Ŋke mɛ́t, tɛ́ wɔ shúŋ‑anu Ndém, ŋ́ke mbɔŋ, pɔ́ é ayáʼa ntswīi, á mbū pɛ. Ŋké ndɔ̄kɔ áa mete Azwakne Ndém, páʼ Ndém a le fhó á lephū ŋgyá lā, tɛ́ ntswīi. Mecɔʼ Ndém, é zeéŋ nnɔŋ eshʉ́ɛ́ azɔ́p, á lezhɛ̄ ŋke wuɔ mɛ́t.

1 Piɛ 2:5

Pɛ azɛ́, pɛ ecʉ́ʼ páʼ metɔ́ nte lā. Ńcʉ́ʼ, Ndém a elɔ̄k á wɛ́ ŋkwɛ́t ŋgyā zi. Ŋgyā mɛ́t, Azwakne Ndém mé naáŋ éwú. Pɛ egɔ́ á ŋgyā mɛ́t, ŋ́gɔ́ nnɔ wɔ nɔŋ‑epɔʼ Ndém, Azwakne Ndém a etshóne á wɛ́, pɛ eyá etsō epɔʼ á mbū Ndém, étsō epɔʼ tsīi e pɔŋ á Ndém, a etswí melaʼ Yɛɛ́so Klísto.