Lomɛŋ 12:7 - Eka Eswhī

⁷ Ŋ́gɔ́ éyi, eyi nthū mmɔʼ ŋiŋ é si ŋgɔ́ á leghʉ afaʼ á mbū emɔ̄ʼ epuɔ, á ghʉ. Ŋ́gɔ́ éyi, eyi mmɔʼ ŋiŋ é si ŋgɔ́ á lezīʼne epuɔ, á zíʼne.

Lomɛŋ 12:7 Iomraidhean Croise

Matío 28:19

Púp, pɛ egʉ̄ɔ á ŋgɔŋ ŋgɔŋ, ŋ́ghʉ̄ epuɔ menɔŋ e ecʉ́ʼ megaŋ nnɔ pá, ńnōʼ á wɔ́p á ntshi ánɛ lezēŋ Mɔʼɔ́, ánɛ lezēŋ Mɔ́, mbɔɔ ánɛ lezēŋ Azwakne Ndém,

Jáaŋ 3:2

Éshʉʼ eshʉ̄ʼ etsōʼ, ńjʉ́ɔ á Yɛɛ́so, ńdé á mbū yí ŋ́gɛ: «Ńziʼnɛ, pek é si nzhɛ́ɛ á légɛ, o ó si ŋgɔ́ á taʼ nziʼnɛ, mbɔ Ndém mé le tó á wú. Ŋiŋ a gɔ le kūʼ á leghʉ meŋkʉʼne anu mīi, o ghʉɛ, tɛ́ gɔ́ yīi, Ndém mé le tó á yí í. »

Mefaʼ Meziŋ-ntō 13:1

Emɔ̄ʼ epuɔ é lɛ ánɛ alúŋ epuɔ Yɛɛ́so zīi á Aŋtiɔsh, ŋ́gɔ́ metswi‑ŋke Ndém, emɔ̄ʼ é gɔ́ wɔ zíʼne epuɔ azō. Epuɔ puɔ mɛ́t, é lɛ wɔ Baanabas, ŋ́ghʉ̄ á Simeɔŋ yīi, mɛ́ lɛɛ́ nzéŋɛ ntɔ́ŋɔ á yí lɛ Sɛ́h‑Ŋiŋ, mbɔɔ Lusius ŋiŋ Silɛ̄ne, mbɔɔ Manaɛŋ yīi, pɔ́ Efɔ Elōde é le lū á esī, ŋ́ghʉ̄ á Sɔ́ɔl.

Mefaʼ Meziŋ-ntō 20:20

Meŋ kɛ te lʉ̄ɔ á wɛ́ amɔ̄ʼ ajū mīi, á mbɔŋ á mbū pɛ ɛ́. Meŋ ke shúŋ anu Ndém á mbū pɛ, ńzíʼne á wɛ́ á meŋgyā alúŋ epuɔ Yɛɛ́so, tɛ mbɔɔ ánɛ meŋgyā mɛ́.

Mefaʼ Meziŋ-ntō 20:28

Pɛ ecʉ́ʼ nchʉ́ nnɛ̄t ncʉ̄te athū nnɛ̄t zɛ́, ńzéŋ ńcʉ̄te memvhō Ndém mīi, Azwakne zí á ke tsekné ŋ́gɛ, pɛ epíp, álúŋ epuɔ Yɛɛ́so zīi, Ndém a le lɔ̄k á kwaʼ metshi mí ncūʼ.

Mefaʼ Meziŋ-ntō 6:1

Á lɛ afʉʼ mɛ́t, nnɔ Yɛɛ́so é nɔŋ efáŋa ŋgʉ̄ɔ mé mvhɔ. Epuɔ Yúda pīi é fhɔ́ɔ á apɛ́, ńnɔŋ eshúŋnɛ alāʼ epuɔ Glɛk, é shʉʼ nnáŋ tɛ nzwɛ́tte ánɛ epuɔ pīi, pɔ́ naáŋ á alāʼ ŋ́gɛ, mɛ́ é si ŋ́gē egapa etsō eleʼé tsem, ŋ́ŋɔ́ʼnɛ mepfók pīi, é fhɔ́ɔ ánɛ ewɔ́p eshhʉ̄.

1 Kɔlɛŋte 12:28

Ndém a le tshí awíɛ awíɛ ánɛ alúŋ epuɔ Yɛɛ́so lɛ́, ánɛ etsí letshiɛ́. A le gē ezi, ńtshí meziŋ‑ntō ánɛ etsɔ́p letshiɛ́. Ḿbáte, ńtshí metswi‑ŋke Yɛɛ́so ánɛ etsɔ́p letshiɛ́. Ḿbáte, ńtshí epuɔ pīi azɔ́p afaʼ á lezīʼne epuɔ anu zí Ndém, ánɛ etsɔ́p letshiɛ́. Ŋ́gɔ́ á mbū emɔ̄ʼ epuɔ, ŋ́gyá ewɔ́p nthū, é gɔ́ á leghʉ meŋkʉʼne menu. Eyi emɔ̄ʼ epuɔ, é gɔ́ á letɛ megɔ. Eyi emɔ̄ʼ epuɔ é gɔ́ á letswīte emɔ̄ʼ. Eyi emɔ̄ʼ epuɔ, é gɔ́ á letsaŋ emɔ̄ʼ. Eyi emɔ̄ʼ epuɔ, é gɔ́ á leshūŋne elāʼ tsīi, pɔ́ la zíʼnɛ ɛ́.

1 Kɔlɛŋte 12:5

Mefaʼ Atsyapuɔ páʼ a tsekneé á mbū epuɔ, é gɔ́ ntií ntiī. Atsyapuɔ á ké ŋgɔ́ áa taʼ.

1 Kɔlɛŋte 14:26

Epɔ̄ memía, anu zīi meŋ a ge emakne, élé mé pɛ, a ajʉɔ páʼa. Pɛ cúʼtɛ nnɔ̄ŋ ŋgɔ̄ á eswíŋte Ndém, ŋ́gɔ́ éyi, ŋiŋ a gɔ ezɔ̄ɔp ntshi, á zɔp. Ŋ́gɔ́ éyi, ŋiŋ a gɔ eshúŋne, ńdɔk nték epuɔ, á shúŋne. Ŋ́gɔ́ éyi ŋiŋ a tswi ŋke yīi, é fhɔ́ɔ á mbū Ndém, á tswi. Ŋ́gɔ éyi ŋiŋ a gɔ elé anu mé alāʼ zīi, a laá nzíʼne ɛ́, ŋgaŋ á lé. Ŋ́gɔ́ éyi ŋiŋ a gɔ ekɛ́ʼte alāʼ mɛ́t eshúŋ epuɔ, ŋgaŋ á kɛ́ʼte eshúŋ. Ajūɔ tsem a eké ŋgɔ́ áa lelɔk ntswíte á leghʉ, alúŋ epuɔ Yɛɛ́so, á tswiʼne efɛ́ nnɛ̄t, ńdɔk ŋgʉ̄ɔ mé mvhɔ.

Galat 6:6

Ŋiŋ yīi, mɛ́ é si nzíʼnɛ á yí menu Ndém, a pɔŋteé á legap ajū mīi a wɛ̄ɛ, ŋ́gyá azi ŋiŋ yīi a zíʼnɛ á yí.

Efɛze 4:11

Ajū mīi a le yá á mbū epuɔ menɔŋ, á si ŋgɔ́ páʼ, a le lɔ̄k emɔ̄ʼ, ŋ́ghʉ̄ meziŋ‑ntō, ńdɔ̄k emɔ̄ʼ, ŋ́ghʉ̄ metswi‑ŋke, ńdɔ̄k emɔ̄ʼ, ŋ́ghʉ̄ metswi‑ŋke mbɔŋ ánɛ Yɛɛ́so, ńdɔ̄k emɔ̄ʼ, ŋ́ghʉ̄ mepfɛnne‑memvhō Ndém, pɔ́ zeéŋ ŋgɔ́ wɔ zíʼne‑epuɔ anu Ndém.

Kɔlɔs 4:17

Pɛ etswī á mbū Aashʉp ŋ́gɛ, ndɛ́ʼ á lɔk afaʼ zīi Atsyapuɔ a le tsekné á mbū yí lā, ŋ́ghʉ̄ mega. Ŋ́gɛ a eghʉ̄ afaʼ mɛ́t, mé taʼ ntē.

1 Timotɛ 2:7

É melaʼ épúp tɛ́, Ndém a le tsɔ́ʼ á gá ŋ́gɛ, meŋ egɔ́ á ntswi‑ŋke yi, ŋ́gɔ́ á nziŋ‑ntō. A le tsɔ́ʼ á gá ŋ́gɛ, meŋ ezíʼne epuɔ pīi, é té epuɔ Yúda á, á lefɛ̄ nnɛ̄t ŋgyá á mbū yí, ńzéŋ nzíʼne á wɔ́p anuúnē ánɛ yí. Meŋ shúŋɔ anuúnē, meŋ te ŋghíɛ mela á.

1 Timotɛ 3:2

Melaʼ épúp tɛ́, á si nzɛ́ttɛ ŋ́gɛ, ntshi‑mvhɔ ánɛ ŋgyā alúŋ epuɔ Yɛɛ́so, a egɔ́ á ŋiŋ yīi, mɛ́ té si ndāʼa á yí í. Á ŋiŋ yīi, a wɛɛ̄ á taʼ menzwí ndaʼ. Á ŋiŋ yīi, a ghʉʉ̄ azi akɔ̄ lɛ́, ŋ́kuʼne kuʼne. Á ŋiŋ yīi, a zhɛɛ́ á yí á lekwaŋte anu tɛ́ ŋghʉ̄. Á ŋiŋ yīi, a wɛɛ̄ atswhī mbɔŋ. Á ŋiŋ yīi, a zhɛɛ́ á lekōkne epuɔ. Á ŋiŋ yīi, a zhɛɛ́ á yí á lezīʼne emɔ̄ʼ epuɔ.

1 Timotɛ 4:16

Lak á athū jú, ánɛ ewu lenāŋ. Ńdāk athū jú, ánɛ anu zīi o zíʼnɛ epuɔ. Gɔ́ efʉʼ metsem, ńnɔŋ ŋkāka áa ete. O gɔ eghʉ épúp, tɛ́ Ndém a eláʼ ŋghʉ̄ o etswɛ́t, epuɔ pīi pɔ́ júʼɔ á wú, e etswɛ́t azɔ́p.

1 Timotɛ 5:17

Éshʉ̄ʼ ánɛ epɔ̄ melʉɛ pīi, pɔ́ tshií á athū mvhɔ ánɛ meŋgyā alúŋ epuɔ Yɛɛ́so, á nɔŋ nzɛ́ttɛ ŋ́gɛ, mɛ́ etúŋne á wɔ́p á mbɔŋɔ́. Ńtswhi ntúŋne epuɔ pīi pɔ́ neéŋ ntē wɔ́p, á leshūŋ anu Ndém, á lezīʼne epuɔ á mɛnzhɛ Ndém.

2 Timotɛ 2:2

Anu zīi o ke júʼ á gá á lezīʼne á mvhɔ epuɔ tɛ nzáne, zéŋɛ́ nzíʼne ajú epuɔ pīi, mɛ́ gɔ etém nzem ŋgyá á mbū pɔ́p, á anu mɛ́t, tɛ pɔ́ ekūʼ á lezīʼne azɔ́p emɔ̄ʼ epuɔ.

2 Timotɛ 2:24

Ŋgaŋ afaʼ Atsyapuɔ, á piŋ te pɔŋté á yí á lewɛ mekɔŋ asɔpne ɛ́. A pɔŋteé á yí á lezwite, á mbū epuɔ metsem, ŋ́kūʼ á yí á lezīʼne emɔ̄ʼ epuɔ, ŋ́kūʼ á yí á legɔ̄ á te ŋak.

2 Timotɛ 4:2

sáʼ ŋke mbɔŋ, ésáʼ ŋŋiŋ ŋiíŋ, ésáʼ á afʉʼ zīi, epuɔ menɔŋ é si ŋkɔ̄ŋɔ á lejūʼ, mbɔɔ afʉʼ zīi, pɔ́ té si ŋkɔ̄ŋɔ. Ésáʼ ndɔk eshúŋ epuɔ ajū mīi, pɔ́ é si efāa, ésáʼ ndɔk nthú alɔ́ʼ epuɔ, ésáʼ ndɔk ŋgyá epuɔ ŋgate. Ŋ́ké ŋgē eghʉ épúp, ńnɔŋ ŋkwɛ́tɛ ntē, ńdɔkɔ nzíʼnɛ á wɔ́p.