Lomɛŋ 1:1 - Eka Eswhī

¹ Meŋ Pɔ́ɔl, ŋ́gɔ́ á ŋgaŋ afaʼ Yɛɛ́so Klísto, mé tíi akɛtte jʉɔ, mbɔ Ndém a le tɔ́ŋ á gá, ŋ́gɛ meŋ egɔ́ á nziŋ‑ntō, ńtswhi ntsɔ́ʼ á gá ŋ́gɛ, meŋ etswī ŋke mbɔŋ yí.

Lomɛŋ 1:1 Iomraidhean Croise

Málkúsi 1:14

Mɛ́ le gɔ̄ á Jáaŋ nnéŋ á ŋgyā atʉɛ́. Afʉʼ mɛ́t, Yɛɛ́so á gʉɔ mé Ŋgaliléa. Ŋ́kó éwú, ńnɔŋ ntswīi ŋke mbɔŋ Ndém, ésáʼa eshúŋɔ ŋ́gɛ:

Jáaŋ 12:26

Ŋiŋ a nɔŋ ŋkɔ̄ŋɔ á yí á legɔ̄ ŋgaŋ afaʼ ga, á tsé á nzem meŋ. Ajʉʼ zīi meŋ á éwú la, á shʉʼ nzéŋ ŋ́gɔ́ azí éwú. Ŋiŋ a nɔŋ ŋghʉ̄ɛ afaʼ zá, mbɔ Mɔʼɔ́ ga a a shʉʼ ekɔŋte á yí.

Jáaŋ 15:15

meŋ ńde zéŋ ntɔ́ŋ á wɛ́ lɛ, wɔ zíʼne afaʼ á. Nziʼnɛ afaʼ a te zhɛ́ ajū mīi, mɔʼɔ́ afaʼ yi, a á si ŋkwāŋtɛ ɛ́. Meŋ cʉ́ʼɛ ntɔ́ŋɔ á wɛ́ áa lɛ, mesoó pá, éfhó ánɛ páʼ, ajūɔ tsem zīi, Mɔʼɔ́ ga a le ziʼné á gá, meŋ ke ghʉ̄ pɛ zhɛ́.

Jáaŋ 15:20

Pɛ ekímte anu zīi, meŋ nde lé mé pɛ ŋ́gɛ: “Nziʼnɛ afaʼ a te zhɛ́ afaʼ ntsyā á mɔʼɔ́ afaʼ yí í.” Púp, páʼ epuɔ é le lʉɔ́ʼ á gá lā, pɔ́ e láʼ ezéŋ elʉɔ́ʼ á wɛ́ azɛ́. Páʼ emɔ̄ʼ é le zīŋ páʼ ashuŋne zá, á si ndʉ́ɛ́ épúp lā, pɔ́ e láʼ ezéŋ eziŋ páʼ anu zīi, pɛ zíʼnɛ á wɔ́p, á si ndʉ́ɛ́ épúp.

Mefaʼ Meziŋ-ntō 13:9

Azwakne Ndém á kó tɛ ndó ntē Sɔ́ɔl yīi, mɛ́ lɛɛ́ nzéŋɛ ntɔ́ŋɔ á yí lɛ Pɔ́ɔl. Á pʉ́ʼɛ menēk mí ntshí ánɛ ŋgaŋ lekaŋ wɔ̄.

Mefaʼ Meziŋ-ntō 20:24

Á ké ŋgɔ́ áa légɛ, gá legɔ̄ éwú, a te á mbū meŋ, ŋ́gɔ́ azō ɔ́. Mvhɔ, a á gá á leghʉ mefaʼ mīi, Atsyapuɔ Yɛɛ́so a le tsekné á mbū meŋ, tɛ ndáʼ nzōko. Meŋ mbɔɔ́ŋ á letswi ŋke mbɔŋ, ŋ́kʉɔ́ʼ ŋkwɛ ŋ́gɛ, á anuúnē á légɛ, Ndém a puú ŋgwɛ apɔŋɔ́ ntē te ndhʉ ánɛ epuɔ.

Mefaʼ Meziŋ-ntō 21:40

Á lɛ mvéŋ. Pɔ́ɔl á tshí á ndo mesitɔ́ɔp, ńtsɛ̄tte apū zí, alāʼ á láŋte, á lɔk alāʼ epuɔ Yúda eshúŋne á mbū pɔ́p, ńdé ŋ́gɛ:

Mefaʼ Meziŋ-ntō 22:21

Atsyapuɔ á zéŋ ndé á mbū meŋ ŋ́gɛ: “Ké efhó á tésɔŋ ega ntó tó, meŋ méŋwɛ̄t e tó á wú tɛ ŋgia e esāk, á mbū epuɔ pīi, é té epuɔ Yúda á.”»

Mefaʼ Meziŋ-ntō 22:7

meŋ ndɛ ntsɔ́ʼɔ ŋŋém á esī, ńjúʼ, ŋghi ŋiŋ é lé á mbū meŋ ŋ́gɛ: “Sɔ́ɔl, Sɔ́ɔl, o lʉɔ́ʼɔ á gá ntswí akɔ̄?”

Mefaʼ Meziŋ-ntō 26:1

Efɔ Aglioa á lɛ ndé á mbū Pɔ́ɔl ŋ́gɛ: «Meŋ á yá ashuŋne á mbū wu, ŋ́gɛ o eshúŋne, ńdɔk ndhʉ̄ athū jú. » Pɔ́ɔl á lɛ ŋkɔ́ʼne apū zí ŋgyá athʉ́, tɛ́ nzī á lelhʉ athū zí, ńdé ŋ́gɛ:

Mefaʼ Meziŋ-ntō 26:14

Pek púu ntsɔ́ʼɔ ŋ́ŋémte á esī. Meŋ júʼ ŋghi ŋiŋ é lɔk ashuŋne epuɔ Yúda, ńdé á mbū meŋ ŋ́gɛ: “Sɔ́ɔl, Sɔ́ɔl, o lʉɔ́ʼɔ á gá ntswí akɔ̄? O ó si esēkɛ páʼ na yīi, mɛ́ é si ntswáa á yí, á nɔŋ efóko ntseŋne á mbū mɔʼɔ́ yi lā, ŋ́ké mmɛ̄ mɛɛ esēkɛ.”

Mefaʼ Meziŋ-ntō 27:23

Meŋ ndʉ́ɛ páʼa, melaʼ mīi á ŋgɔ́ ŋkɔʼɔ́‑atswɛt ayáʼa, Ndém yīi meŋ á ŋiŋ yi, ḿbiŋɛ ŋgūʼtɛ á yí, á tó á cɔʼ yi á mbū meŋ,

Mefaʼ Meziŋ-ntō 9:15

Atsyapuɔ á tsɔ́ʼ ŋ́gɛ: «Ké ŋgʉ̄ɔ gʉɔ. Meŋ á tsɔ́ʼ á ŋiŋ mɛ́t ŋ́gɛ, a eghʉ̄ afaʼ zá, ńzéŋ eshúŋ á ŋiŋ yīi meŋ á ewiɛ́, á mbū melāʼ ndɛʼɛ, mbɔɔ á mbū mefɔ pɔ́p, mbɔɔ á mbū epuɔ Islaɛl.

Lomɛŋ 1:16

Esē é té si ŋkúu á gá á letswi ŋke mbɔŋ ɔ́. É si ŋgɔ́ mete Ndém á lelɔk ŋghʉ̄, tɛ mbɔɔ awɔ́ lɛ́ yīi, a á fɛ́ nnɛ̄t ŋgyá á mbū Yɛɛ́so, á tswɛ́t. Epuɔ Yúda é zi mvhɔ, ńtswɛ́t, emɔ̄ʼ epuɔ é páte.

Lomɛŋ 1:5

Ndém a le zapá ánɛ yí, ŋ́gwɛ̄ apɔŋɔ́ ntē te ndhʉ ánɛ meŋ, ŋ́ghʉ̄ meŋ ecʉ́ʼ á nziŋ‑ntō. Éfāʼa ŋ́gɛ, meŋ eghʉ̄, elāʼ ntsem e efɛ́ nnɛ̄t ŋgyá á mbū Klísto, ńjúʼ nchu yí. Meŋ eghʉ̄ɛ épúp, ńdɔkɔ ŋgūʼtɛ á yí.

Lomɛŋ 1:9

Ndém a á si nzhɛ́ɛ á légɛ, anu zīi meŋ gɔ á eshúŋɔ la, á anuúnē, á yí yīi meŋ á si ndɔ̄kɔ á letswi ŋke mbɔŋ ánɛ Méŋ yi, ŋ́gūʼtɛ á yí mé taʼ ntē. A á si nzhɛ́ɛ á légɛ, meŋ kimteé á wɛ́ té ká.

Lomɛŋ 11:13

Tsetsɔŋɔ, meŋ shúŋnɛ á mbū pɛ, á wɛ́ pīi, pɛ te epuɔ Yúda á: meŋ á si ŋgɔ́ á nziŋ‑ntō Yɛɛ́so, á mbū epuɔ pīi, é té epuɔ Yúda á. Ntē gá é nɔŋ ŋgáŋtɛ, melaʼ afaʼ mɛ́t zīi, mɛ́ le tsekné á mbū meŋ.

Lomɛŋ 15:16

Á gɔ́ páʼ, a le lɔ̄k á gá ŋghʉ̄ á ŋgaŋ afaʼ Yɛɛ́so Klísto, á mbū epuɔ pīi é té epuɔ Yúda á. Ńchʉ́ á gá ŋ́gɛ, meŋ etswī ŋke mbɔŋ Ndém, tɛ́ Azwakne Ndém a eghʉ̄, epuɔ pīi é té epuɔ Yúda á, e ecʉ́ʼ páʼ epɔʼ yīi, mɛ́ é yá á mbū Ndém, tɛ é pɔŋ á yí lā.

Lomɛŋ 15:29

Meŋ á si ncuŋtɛ nzhɛ́ɛ á légɛ, meŋ a shʉʼ eshʉʼ tɛ ekó á alāʼ pɛ, mbwɛ́né zīi é fhɔ́ɔ á mbū Klísto, e efūʼte ánɛ pɛ.

Lomɛŋ 16:18

Ntií epuɔ jʉɔ mɛ́t, é páʼā, pɔ́ té ŋghʉ̄ɛ afaʼ á mbū Klísto Atsyapuɔ yímpɛ ɛ́, pɔ́ lɔkɔ áa levem tsɔ́p nzīŋɛ. Pɔ́ lɔɔ̄k meleté eshuŋne, pɔ́ meshuŋne á lelɔk ndʉ̄te epuɔ, ḿbɔ̄pte wɔ véŋ véŋ.

Lomɛŋ 16:25

Awuʼte a egɔ́ á mbū Ndém. Yí mé kuūʼ á leghʉ, lefɛ̄ nnɛ̄t wɛ á tswhí ŋgʉ̄ɔ mé mvhɔ, páʼ ŋke mbɔŋ yīi, meŋ tswii, é si ndʉ́ɛ́ épúp. Ŋ́ke yīi meŋ sáʼa eshúŋɔ epuɔ ánɛ Yɛɛ́so Klísto. Ńzéŋ ŋkūʼ á leghʉ, lefɛ̄ nnɛ̄t wɛ á tswhí ŋgʉ̄ɔ mé mvhɔ, páʼ ntsem zīi, Ndém a le sīā, ŋ́ghʉ̄ ḿpɛ zhɛ́, e leé épúp. Ntsem mɛ́t, Ndém a le lʉɔ̄ tɛ efhó tɛ meŋguʼ meŋguʼ.

1 Kɔlɛŋte 1:1

Meŋ Pɔ́ɔl, mbɔ Ndém a le tsɔ́ʼ á gá ánɛ lekɔŋ yi, ŋ́gɛ, meŋ ecʉ́ʼ á nziŋ‑ntō Yɛɛ́so Klísto, mbɔɔ méŋ mɔ́ yímpɛ Sostɛn, mé tíi akɛtte jʉɔ.

1 Kɔlɛŋte 9:1

Páʼ meŋ naáŋ á ŋga athū meŋ lā, páʼ meŋ á nziŋ‑ntō lā, páʼ meŋ nde jʉ́ɔ á Yɛɛ́so Atsyapuɔ yímpɛ mé menēk lā, páʼ pɛ mé si ŋgɔ́ ayiŋne mefaʼ Atsyapuɔ mīi, meŋ ke ghʉ̄ lā,

2 Kɔlɛŋte 1:1

Meŋ Pɔ́ɔl nziŋ‑ntō Yɛɛ́so Klísto, páʼ Ndém a le kɔ̄ŋ épúp mé tíi akɛtte jʉɔ páʼa. Pek méŋ mɔ́ yímpɛ Timotɛ mé tíi, ŋ́gyáa á mbū alúŋ epuɔ Ndém, á tésɔŋ Kɔlɛŋte, mbɔɔ á mbū epuɔ Ndém ntsem pīi, pɔ́ puú ŋgɔ́ á ntē apak alāʼ zīi, mɛ́ tɔ́ŋɔ lɛ Akayi.

2 Kɔlɛŋte 11:5

Pɛ kwaāŋ ŋ́gɛ, epuɔ puɔ mɛ́t é memía meziŋ‑ntō, táʼ, meŋ ké nzhɛ́ á ntē meŋ á légɛ, pɔ́ té gá tsya.

2 Kɔlɛŋte 11:7

Meŋ nde tswī ŋke mbɔŋ Ndém á mbū pɛ ndémndēm, meŋ méŋwɛ̄t é sóʼne nnɛ̄t za mé esī, ńdɔk ŋkɔ́ʼne á wɛ́. Meŋ nde ghʉ̄ épúp páʼā, ńdɔkɔ efāa lɛ́?

2 Kɔlɛŋte 12:11

A awuɔ yīi, meŋ á shúŋne páʼ apia lā, mbɔ pɛ mé ké ntshóne á gá. Pɛ mé ké gɔ́, pɛ eshúŋ á ŋiŋ yīi, meŋ á ewiɛ́. Azi ŋgɔ́ éyi á mbū pɛ, meŋ te azō ɔ́, mbɔ meŋ ké nzhɛ́ á ntē meŋ á légɛ, epuɔ pīi pɛ tɔ́ŋɔ á wɔ́p lɛ memía meziŋ‑ntō, é té á gá tsya.

2 Kɔlɛŋte 2:12

Meŋ nde gʉ̄ɔ á tésɔŋ Tloas, á ntswiī ŋke mbɔŋ Klísto, ŋ́kó éwú, Atsyapuɔ á ghʉ, mmɔʼ mbɔŋ mɛnzhɛ á tsɔ́ʼɔ á mbū meŋ, á lelɔk ŋghʉ̄ á afaʼ mɛ́t.

2 Kɔlɛŋte 4:5

Pek é si ŋgē etswii ŋke mbɔŋ á mbū pɛ páʼā, pek te efāʼa áa leshūŋ á wɛ́ epuɔ pīi, pek é epiɛ́ ɛ́, pek é si ŋghʉ̄ɛ áa lɛ, pɛ ezhɛ́ á légɛ, Yɛɛ́so Klísto a á si ŋgɔ́ á Atsyapuɔ. Ŋ́gɔ́ mé pek, mbɔ pek é si ndʉ́ɛ́ ŋ́gɛ, pek é megaŋ afaʼ pɛ́, melaʼ Yɛɛ́so.

Galat 1:1

Meŋ Pɔ́ɔl, nziŋ‑ntō Yɛɛ́so Klísto mé tíi akɛtte jʉɔ páʼa, mbɔ epuɔ menɔŋ mé lɛ te lɔ̄k á gá ŋghʉ̄ á nziŋ‑ntō ɔ́, meŋ te zába á nzem ŋiŋ, tɛ́ ncʉ́ʼ á nziŋ‑ntō ɔ́. Klísto, mbɔɔ Ndém Mɔʼɔ́, mé le ghʉ̄ʉ̄, meŋ ecʉ́ʼ á nziŋ‑ntō wɔp. Yɛɛ́so Klísto mɛ́t, Ndém a le ghʉ̄ á zím ánɛ lewhʉ̄.

Efɛze 1:1

Meŋ Pɔ́ɔl, nziŋ‑ntō Yɛɛ́so Klísto, páʼ Ndém a le kɔ̄ŋ épúp, mé tíi akɛtte jʉɔ á mbū epuɔ Ndém, á tésɔŋ Efɛze, épuɔ pīi pɔ́ kuʼteé áa Yɛɛ́so tɛ́ ndɔk nnáŋ.

Efɛze 1:13

Pɛ ezɛ́, é ke zapá ánɛ Klísto, ńjúʼ ŋke yīi é si ŋgɔ́ anuúnē, ŋ́ke mbɔŋ yīi é ghʉɛ mɛ́ tswɛ́tɛ. Pɛ le júʼ ŋke mbɔŋ mɛ́t, éfɛ́ nnɛ̄t ŋgyá á mbū Klísto, Ndém á néŋ ayiŋne zí ánɛ pɛ, á gɔ́ Azwakne zí zīi a le phʉ́ʉ̄.

Efɛze 4:11

Ajū mīi a le yá á mbū epuɔ menɔŋ, á si ŋgɔ́ páʼ, a le lɔ̄k emɔ̄ʼ, ŋ́ghʉ̄ meziŋ‑ntō, ńdɔ̄k emɔ̄ʼ, ŋ́ghʉ̄ metswi‑ŋke, ńdɔ̄k emɔ̄ʼ, ŋ́ghʉ̄ metswi‑ŋke mbɔŋ ánɛ Yɛɛ́so, ńdɔ̄k emɔ̄ʼ, ŋ́ghʉ̄ mepfɛnne‑memvhō Ndém, pɔ́ zeéŋ ŋgɔ́ wɔ zíʼne‑epuɔ anu Ndém.

Fílíip 1:1

Meŋ Pɔ́ɔl mé tíi akɛtte jʉɔ páʼa. Pek Timotɛ, mégaŋ afaʼ Yɛɛ́so Klísto. Ńtíi á mbū pɛ metsem pīi, pɛ le zapá ánɛ Yɛɛ́so Klísto, ńcʉ́ʼ epuɔ Ndém, á wɛ́ pīi pɛ naáŋ á tésɔŋ Fílíio. Ńtíi mbɔɔ á mbū wɔ tshí‑mvhɔ pɔ́ wɔ tɛ́ne‑alúŋ epuɔ Yɛɛ́so.

Fílíip 2:11

Ŋ́gɛ, ŋiŋ ntsem a esáʼ ŋ́gɛ, Yɛɛ́so Klísto mé Atsyantsɔp. Awiɛ́ awiɛ́ a eghʉ̄ épúp, ńdɔk ŋgūʼte á Ndém Mɔʼɔ́.

Kɔlɔs 1:1

Meŋ Pɔ́ɔl, ŋ́gɔ́ á Nziŋ‑ntō Yɛɛ́so Klísto, páʼ Ndém a le kɔ̄ŋ épúp, mé tíi akɛtte jʉɔ páʼa, pek Timotɛ méŋ mɔ́ yímpɛ.

Kɔlɔs 1:25

Meŋ ndē ncʉ́ʼ á ŋgaŋ afaʼ Ndém, éfāʼa á gá á letswi ŋke mɛ́t, á mbū alúŋ epuɔ Yɛɛ́so. Ndém mé le tsekné ajʉɔ afaʼ mɛ́t, á mbū meŋ, melaʼ mɛ́. Afaʼ mɛ́t, á gɔ́ á gá á lekɛ̄ʼte ashuŋne zí ntsem, éshúŋ á wɛ́.

1 Tesalonik 2:2

Pɛ é si nzéŋɛ nzhɛ́ɛ á légɛ, pek le kó á tésɔŋ Fílíio, ńjʉ́ɔ ŋgʉɔ̄ʼ tɛʼ, mɛ́ zéŋ ndʉɔ́ʼ á wék éwú. Pek náŋ tɛ efhó éwú eshʉ̄ʼ, Ndém á ké ŋghʉ̄, pek kāak ete, ńtswī ŋke mbɔŋ yí á mbū pɛ, tɛ mbɔɔ páʼ, mɛ́ lɛ si ndʉɔ́ʼɔ á wék.

1 Tesalonik 2:8

Ntē wék é le pú ntshí ánɛ pɛ tshíi, tɛ ŋgɔ́ yīi pek le gɔ́, pek é le lɛ̄ ntswī áa ŋke mbɔŋ Ndém, á mbū pɛ ndaʼ á. Pek le tshí á lezēŋ ŋgyá athū nnɛ̄t zék, melaʼ mɛ́, éfhó ánɛ páʼ, ŋkɔŋne zīi pek le wɛ̄ ánɛ pɛ, e le gɔ́ mbɔ e é fáŋ épúp.

1 Tesalonik 2:9

Ázi ŋgē egɔ́ me epɔ̄ memía, pɛ nɔ̄ɔŋ ŋkímtɛ páʼ, pek lɛ á tsetsɛlɛ pɛ, afaʼ á nɔŋ eswɛ́tɛ á wék, pek nɔ̄ɔŋ njʉ́ɔ ŋgʉɔ̄ʼ épúp. Pek lɛ etsōʼ pɔ́ ezokó, ńnɔŋ ŋghʉ̄ɛ afaʼ, ńdɔkɔ te ŋkɔ̄ŋɔ á wék, á lege etswi ŋke mbɔŋ Ndém á mbū pɛ, ńcʉ́ʼ á apiʼ, á mbū ŋiŋ wɛ ɛ́.

1 Timotɛ 1:1

Akɛtte jʉɔ á fhɔ́ɔ á mbū meŋ Pɔ́ɔl, meŋ gɔ́ á nziŋ‑ntō Yɛɛ́so Klísto, páʼ Ndém mbɔɔ Klísto é le tswī épúp. Ndém a á si ŋgɔ́ á Ŋghʉɛ‑mɛ́‑tswɛ́t, Klísto á gɔ́ á ŋiŋ yīi, a ghʉɛ, akɔ̄ akɔ̄ lɛ́ zīi, ḿpɛ é si nzwíʼtɛ á mbū Ndém á puɔ.

1 Timotɛ 2:7

É melaʼ épúp tɛ́, Ndém a le tsɔ́ʼ á gá ŋ́gɛ, meŋ egɔ́ á ntswi‑ŋke yi, ŋ́gɔ́ á nziŋ‑ntō. A le tsɔ́ʼ á gá ŋ́gɛ, meŋ ezíʼne epuɔ pīi, é té epuɔ Yúda á, á lefɛ̄ nnɛ̄t ŋgyá á mbū yí, ńzéŋ nzíʼne á wɔ́p anuúnē ánɛ yí. Meŋ shúŋɔ anuúnē, meŋ te ŋghíɛ mela á.

2 Timotɛ 1:11

Ndém a le tsɔ́ʼ á gá ndɔk ŋghʉ̄ á nziŋ‑ntō yi, ŋ́gɛ meŋ etswī ŋke mbɔŋ wuɔ mɛ́t, ŋ́kɛ́ʼte eshúŋ epuɔ.

Tíit 1:1

Meŋ Pɔ́ɔl ŋgaŋ afaʼ Ndém, ŋ́gɔ́ á nziŋ‑ntō Yɛɛ́so Klísto, á leghʉ epuɔ pīi Ndém a le tsɔ́ʼ á wɔ́p, é fɛ́ nnɛ̄t ŋgyá á mbū yí, mbɔɔ á leghʉ pɔ́ zhɛ́ anuúnē ánɛ Yɛɛ́so, ńdɔk nnáŋ páʼ Ndém a á si ŋkɔ̄ŋɔ.

Eble 5:4

Ŋiŋ mé té kɔŋ nnáŋ ánɛ mía ajʉʼ nnɔŋ‑epɔʼ eyi ndʉɛ ɛ́, Ndém mé tɔɔ́ŋ á ŋiŋ, ŋ́gɛ a egɔ́ ewiɛ́, ńdeŋ ndeŋ páʼ a le tɔ́ŋ á Aalɔŋ lā.

Eble 7:26

Yí mé si ŋgɔ́ á nnɔŋ‑epɔʼ eyi ndʉɛ yīi, á le pɔ̄ŋ ŋ́gɛ, ḿpɛ ewɛ̄. Á ŋiŋ té alɔ́ʼ, té atswɛ́t, té mefa, mbɔ Ndém a lē efakne á wɔ́p a megaŋ mefa, ŋ́kɔ́ʼne á yí nnáŋ ánɛ mía ajʉʼ, á athʉ́ lephū.

Jáak 1:1

Meŋ Jáak, ŋ́gɔ́ á njuʼ‑nchu Ndém, mbɔɔ eyi Atsyapuɔ Yɛɛ́so Klísto, meŋ mé tíi ndɔkɔ ntsāʼtɛ epuɔ, ánɛ etseŋ ŋgyā Islaɛl ntsɔp pīa mé legēm, épi pɔ́ naŋteé á nzem apɛ́.

1 Piɛ 4:17

Njhʉ̄ e é kuʼ zīi, Ndém a gʉɔ me nzaáʼ ntsaŋ zɔp a epuɔ menɔŋ. A á ké ezi mvhɔ, ézáʼ ezi epuɔ alāʼ pí. A piŋɛ nzī á lezāʼ ezímpɛ épúp, mbɔ a a kó ánɛ epuɔ pīi, pɔ́ é si ndʉ̄ʼɛ á wɔ́p á levēŋ ŋke mbɔŋ yí, azɔ́p anu a egɔ́ é lɛ akɔ̄?

2 Piɛ 1:1

Meŋ Simɔŋ Piɛ, ŋ́gɔ́ á ŋgaŋ afaʼ Yɛɛ́so Klísto, ńzéŋ ŋgɔ́ á nziŋ‑ntō yi, mé tíi akɛtte jʉɔ páʼa. Ńtíi á mbū epuɔ pīi, é lē efɛ́ nnɛ̄t ŋgyá á mbū Yɛɛ́so, páʼ pek lā. Lefɛ̄ nnɛ̄t ŋgyá mé Yɛɛ́so, á azō ntē nzwiŋ tɛʼ, á mbū pɛ, mbɔɔ á mbū pek. Yɛɛ́so Klísto mé le ghʉ̄ épúp ánɛ pímpɛ, melaʼ mīi, a lɔɔ̄k á ndeŋ ndeŋ, tɛ́ ŋghʉ̄ azō ánɛ awíɛ awíɛ. A á Ndém yímpɛ, ńzéŋ ŋgɔ́ á Ŋghʉɛ‑mɛ́‑tswɛ́t.

Zwide 1:1

Meŋ Zwíde ntsiʼnzem Jáak, ŋ́gɔ́ á ŋgaŋ afaʼ Yɛɛ́so Klísto mé tíi akɛtte jʉɔ páʼa. Ńtíi á mbū epuɔ pīi, Ndém a le tɔ́ŋ á wɔ́p ŋ́gɛ, pɔ́ ecʉ́ʼ epuɔ pí, épuɔ pīi Ndém, á Mɔʼɔ́ yímpɛ a kɔɔ̄ŋ á wɔ́p, ŋ́kápte á wɔ́p, ńdɔkɔ nzwíʼtɛ á Yɛɛ́so Klísto.

Menjʉɔ te lí 1:1

Menu mīi é ntē aŋwaʼne jʉɔ, é si ŋgɔ́ menu mīi é lʉɔneē, mbɔ Yɛɛ́so Klísto a le tswī á mbū wɔ júʼ‑nchu Ndém. Ndém a le yá menu muɔ mɛ́t á mbū yí ŋ́gɛ, a elɔk ntswī á wɔ́p mecū mīi, é cʉ́ʼɛ eshʉʼ shʉʼe. Yɛɛ́so Klísto a le tó á cɔʼ yi, ŋ́gɛ a egʉɔ ntswī menu mɛ́t, á mbū ŋgaŋ afaʼ yi Jáaŋ.

Menjʉɔ te lí 22:6

Cɔʼ Ndém, á zéŋ ndé á mbū meŋ ŋ́gɛ: «Meshuŋne muɔ, é ajʉʼ éwú ŋgɔ́ épúp, ŋ́gɔ́ á anuúnē. Atsyapuɔ Ndém páʼ a le yá Azwakne zí á mbū metswi‑ŋke pí lā, a le tó á cɔʼ yi á mbū wɔ júʼ‑nchu yí ŋ́gɛ, a eshʉʼ ntswī á wɔ́p ajū mīi, a pɔŋteé á leshʉʼ, tɛ á cʉʼɛ́ eshʉʼ shʉʼe. »

Menjʉɔ te lí 22:9

Tɛ́ á lé mé meŋ ŋ́gɛ: «Ndɛ́ʼ o eghʉ̄ʉ épúp. Meŋ á azá ŋgaŋ afaʼ Ndém páʼ wu, mbɔɔ páʼ epɔ̄ memía pú, métswi‑ŋke Ndém, mbɔɔ páʼ epuɔ pīi pɔ́ ziīŋ páʼ menu mīi, é ntē aŋwaʼne ega, é si ndʉ́ɛ́ épúp. Ndém, tɛ́ o pɔŋteé á lewuʼte á yí. »