Eble 1:2 - Eka Eswhī

² A piīŋ ŋgɔ́ tsetsɔŋɔ, ánɛ meleʼé muɔ mīi, ḿpɛ é éwú la, ńzápa ánɛ Méŋ yi, mbɔ a lē nchʉ́ á yí ŋ́gɛ, a esáʼ ajūɔ tsem, tɛ́ eshúŋnɛ á mbū pímpɛ. A le zī nzápa ánɛ yí tɛ́ ŋghʉ̄ ŋgɔŋ.

Eble 1:2 Iomraidhean Croise

Matío 13:39

Ŋgaŋ mbo yīi, a le phī á tepɔŋ mvēŋ, á gɔ́ á Sɛ́ta. Afʉʼ lefaʼ etsō á si ŋgɔ́ afʉʼ zīi, ŋgɔŋ e gɔ á mmiī. Wɔ faʼ‑etsō, é gɔ́ mecɔʼ Ndém.

Matío 17:5

Ńzɛ́t nzhɛ eshúŋnɛ, amɔ̄ʼ aŋwaŋné alɔ á liɛ esóʼo, ḿbúu ŋkáptɛ á wɔ́p. Ŋghi Ndém é fhó á ntē alɔ mɛ́t, ńdé ŋ́gɛ: «Ŋiŋ wuɔ a á Méŋ ga, meŋ kɔ̄ɔŋ á yí tɛʼ. Meŋ á tsɔ́ʼ á yí, a ghʉʉ̄, ntē gá é gáŋte. Pɛ ejúʼ á yí. »

Matío 21:38

Epuɔ pwɔ̄ é kó ndɛ̄ ŋgē ejʉ́ɔ á mɔ́ wɔ̄, ńdé á tsetsɛlɛ pɔ́p ŋ́gɛ: “Ŋiŋ yīi a a fú ejhʉ́ ŋgyā, a ayi a á ege eshʉ̄ʼɛ le, pɛ eshʉ̄ʼ, ḿpɛ ezwhí á yí, ńjhʉ́ ŋkāʼ.”

Matío 26:63

Yɛɛ́so á pú te tsɔ́p. Tɛŋgyā wɔ nɔŋ‑epɔʼ á zéŋ nzɛ́tte á yí ŋ́gɛ: «Lɔk lezēŋ Ndém yīi a naáŋ ntē, ŋ́kā, éshúŋ á wék, kɛɛ wu mé Nzaʼ‑Ŋkhʉ, á Méŋ Ndém lɛ́. »

Matío 28:18

Yɛɛ́so á tshóte nnɛ̄t mé lezēŋ tsɔ́p, ńdé á mbū pɔ́p ŋ́gɛ: «Mɛ́ lē mbú ŋgyá mete ntsem á mbū meŋ, á athʉ́ lephū mbɔɔ á esī atsetsáʼ.

Matío 3:17

Á zéŋ njúʼ mmɔʼ ŋghi é fhó éwú ndé ŋ́gɛ: «Ŋiŋ wuɔ a á Méŋ ga, meŋ kɔ̄ɔŋ á yí tɛʼ, a ghʉʉ̄ ntē gá é gáŋte. »

Málkúsi 1:1

Nzií ŋke mbɔŋ Yɛɛ́so Klísto, Méŋ Ndém, e ejʉɔ páʼa.

Málkúsi 12:6

Ŋiŋ yīi a le zɛ́t ndaʼ á mbū ŋgaŋ ŋkāʼ, a lɛ á méŋ yi, á kɔŋ á yí tɛʼ, á gē emakne, ńtó á yí á mbū pɔ́p, ńnɔŋ ndʉ́ɛ́ ŋ́gɛ: “Pɔ́ e kó egaá lɛ́, éghʉ mekuʼ méŋ ga.”

Málkúsi 12:7

Epuɔ mɛ́t é kó ndɛ̄ ŋgē ejʉ́ɔ á yí, ńdé á tsetsɛlɛ pɔ́p ŋ́gɛ: “Ŋiŋ yīi a a fú ejhʉ́ ŋgyā, a ayi a á ege eshʉ̄ʼɛ le, ḿpɛ egɔ́ á taʼ nchu, ńzwhí á yí, ŋkāʼ e ecʉ́ʼ eyímpɛ.”

Jáaŋ 1:10

Ŋiŋ mɛ́t yīi a á Ashuŋne, a le shʉ̄ʼ á ŋgɔŋ. Epuɔ menɔŋ é piŋ te yí véŋ, mbɔ Ndém a le ké ndɔk á yí, tɛ́ ŋghʉ̄ ŋgɔŋ.

Jáaŋ 1:14

Ashuŋne jɔ̄, a le sɛ̄t ncʉ́ʼ á kwaʼ ŋiŋnɔŋ, tɛ nnáŋ á tsetsɛlɛ pek, ŋ́gɔ́ á ŋgaŋ apɔŋɔ́ ntē te ndhʉ, ŋ́gɔ́ á ŋgaŋ anuúnē tɛ nzōko. Pek jʉ́ɔ á shʉ́shɔ́k yi, shʉ́shɔ́k wuɔ mɛ́t, Mɔʼɔ́ yímpɛ Ndém mé le yá á mbū tséŋ Méŋ yi mɛ́t.

Jáaŋ 1:3

Ndém a le lɔ̄k á yí, tɛ́ ŋghʉ̄ etsō tsem. Ndém a lɛ te ghʉ̄ amɔ̄ʼ azō, té lɔk áa yí tɛ́ ŋghʉ̄ ɛ́.

Jáaŋ 13:3

Yɛɛ́so á nɔŋ nzhɛ́ɛ á légɛ, Mɔʼɔ́ yi a lē mbú ŋgyá mete á mbū yí á lelɔk ŋghʉ̄ etsō tsem, ńnɔŋ nzhɛ́ɛ á légɛ, yí le fhó á mbū Ndém, ḿbiŋɛ mbīŋɛ mé lezēŋ Ndém.

Jáaŋ 13:32

[Páʼ mɛ́ e zápa ánɛ Méŋ‑Ŋiŋnɔŋ ejʉ́ɔ á shʉ́shɔ́k Ndém lā], Ndém a a zéŋ eghʉ azí, mɛ́ ejʉ́ɔ á shʉ́shɔ́k Méŋ‑Ŋiŋnɔŋ. Tɛ ŋgia á yí á leghʉ mɛ́ jʉ́ɔ, é té zɛ́t esāk á.

Jáaŋ 15:15

meŋ ńde zéŋ ntɔ́ŋ á wɛ́ lɛ, wɔ zíʼne afaʼ á. Nziʼnɛ afaʼ a te zhɛ́ ajū mīi, mɔʼɔ́ afaʼ yi, a á si ŋkwāŋtɛ ɛ́. Meŋ cʉ́ʼɛ ntɔ́ŋɔ á wɛ́ áa lɛ, mesoó pá, éfhó ánɛ páʼ, ajūɔ tsem zīi, Mɔʼɔ́ ga a le ziʼné á gá, meŋ ke ghʉ̄ pɛ zhɛ́.

Jáaŋ 16:15

Ajūɔ tsem zīi, Mɔʼɔ́ ga a wɛ̄ɛ, á zéŋ mbú ŋgɔ́ áa azá. Melaʼ épúp tɛ́ meŋ á lé ŋ́gɛ, ajū mīi Azwakne Ndém a shʉʼɛ ŋgɔ̄ á nzíʼne pɛ, á fhó áa mbū meŋ.

Jáaŋ 17:2

O le yá mete á mbū yí, ánɛ epuɔ menɔŋ metsem. A a fhó ánɛ mete mɛ́t, éyá á lefū ntā á lezēŋ Ndém, á mbū epuɔ metsem pīi, o le tsekné á mbū yí.

Jáaŋ 3:16

Ndém a le pú ŋkɔŋ epuɔ menɔŋ kɔŋ, tɛ ŋgyá á Méŋ yi, á tséŋ Méŋ yi, ŋ́gɛ ŋiŋ ntsem yīi, a á fɛ́ nnɛ̄t ŋgyá á mbū yí, a te eláʼ epí í, a a láʼ eta á lezēŋ Ndém.

Jáaŋ 3:25

Á shʉʼ ŋgɔ́ á amɔ̄ʼ afʉʼ, amɔ̄ʼ aŋak á tó á tsetsɛlɛ taʼ ŋiŋ Yúda pɔ́ megaŋ nnɔ Jáaŋ. Pɔ́ nɔŋ ŋŋāka ánɛ anu lesok epe, tɛ́ ŋgūʼte á Ndém.

Jáaŋ 5:26

Páʼ Mɔʼɔ́ ga méŋwɛ̄t mé wɛɛ̄ á leghʉ, mɛ́ gɔ́ éwú lā, ndeŋ ndeŋ épúp, a lē ŋgyá mete á lelɔk ŋghʉ̄ mɛ́ gɔ́ éwú, á mbū meŋ Méŋ yi.

Jáaŋ 5:27

A le yá mete á lelɔk nzáʼ ntsaŋ á mbū Méŋ yi. Ŋ́gyáa épúp melaʼ mīi, Méŋ yí mɛ́t, a á Méŋ‑Ŋiŋnɔŋ.

Jáaŋ 9:29

Pek é si nzhɛ́ɛ á légɛ, Ndém a le shuŋné á mbū Mɔɔ́sɛ. Ŋ́ké ŋgɔ́ mé ewuɔ ŋiŋ mɛ́t, mbɔ pek zi té si nzhɛ́ɛ ajʉʼ zīi, a fhɔ́ɔ éwú ú. »

Mefaʼ Meziŋ-ntō 10:36

Pɛ ke júʼ ŋke mbɔŋ yīi, Ndém a ke tó á mbū epuɔ Islaɛl ŋ́gɛ, Yɛɛ́so Klísto a ke shʉʼē, á letswaŋ epuɔ menɔŋ, pɔ́ a Ndém é cʉ́ʼ á taʼ nchu. Yɛɛ́so mɛ́t, a á Atsyapuɔ ŋgɔŋ epuɔ metsem.

Mefaʼ Meziŋ-ntō 2:17

Ndém á si ndʉ́ɛ́ ŋ́gɛ: A láʼ ekuʼe ánɛ mezoknzem eleʼé alāʼ, meŋ enéŋ Azwakne zá té ndhʉ, ánɛ epuɔ metsem. Epɔ̄ pɛ́, epi mbaŋa pɔ́ a epi wɔnzwí, e ecʉ́ʼ metswi‑ŋke pá. Epɔ̄ ŋgwɛso pɛ́, e ejʉ́ɔ njʉɔ te lí. Mezwiŋ epuɔ, e ejʉ́ɔ njʉ́ɔ lelɔ̄k.

Lomɛŋ 1:4

Táʼ, Ndém á le ké nzápa ánɛ Azwakne zí méŋwɛ̄t, ŋ́ghʉ̄ á zím ánɛ lewhʉ̄, á yá á yí mete, ńtswī á légɛ a zi ŋgɔ́ á Méŋ yi, á yí Yɛɛ́so Klísto Atsyapuɔ yímpɛ.

Lomɛŋ 8:17

Páʼ ḿpɛ é si ŋgɔ́ epɔ̄ Ndém lā, ḿpɛ e shʉʼ ewɛ etsō mbɔŋ tsīi, a le féŋ á mbū pímpɛ. Étsō tsīi é fhɔ́ɔ á mbū Ndém. Ḿpɛ a Klísto mé shʉʼ ewɛ. Páʼ ḿpɛ é si njʉ́ɔ ŋgʉɔ̄ʼ páʼ, a le jʉ́ɔ épúp, tɛ́ ŋkó á ntē lewūʼ Ndém lā, ḿpɛ e láʼ ezéŋ ekó azímpɛ éwú.

1 Kɔlɛŋte 2:7

Azhɛ̄‑anu zīi pek zíʼnɛ á wɛ́, á si ŋgɔ́ azhɛ̄‑anu, éfhɔ́ɔ á mbū Ndém. Ŋ́gɔ́ ntsem, mbɔ Ndém a le lʉ̄ɔ̄, tɛ nzɛ́t áa te nɔŋ ŋgɔŋ. Ńté njhʉ̄ ndʉ̄ɔ épúp, élɔk eshʉʼ eghʉ, ḿpɛ ekó á nte shʉ́shɔ́k yí.

1 Kɔlɛŋte 8:6

Táʼ, ŋ́ké ŋgɔ́ mé pímpɛ, mbɔ Ndém a gɔ́ áa taʼ ndaʼ. A á Mɔʼɔ́ yímpɛ. Yí mé le pú ŋghʉ̄ ajūɔ tsem, ńzéŋ mbɔ́ á yímpɛ ŋ́gɛ, ḿpɛ e egɔ́ epuɔ pí. Atsyapuɔ yímpɛ a zeéŋ ŋgɔ́ áa taʼ ndaʼ, ŋ́gɔ́ á Yɛɛ́so Klísto. Ndém a le zapá ánɛ yí, tɛ́ ŋghʉ̄ etsō tsem, yí mé si ŋghʉ̄ɛ, ḿpɛ é gɔ́ɔ éwú.

Galat 4:4

Táʼ, afʉʼ zīi Ndém a le ké mbiŋ ńzápa, á shʉʼ nnáŋ tɛ ŋkūʼ, á tó á Méŋ yi á ndo esī atsetsáʼ. Taʼ menzwí mé zhí á yí, mɔ́ mɛ́t á náŋ ánɛ páʼ lepé Mɔɔ́sɛ é si nzɛ́ttɛ.

Efɛze 1:10

Afʉʼ á fú nnáŋ tɛ ŋkūʼ, Ndém á ghʉ, anu mɛ́t zīi a le nɔ̄ŋ ŋkwaŋtɛ, á po, ŋ́gɔ́ á lepū ncúʼte ŋgɔŋ ntsem, ájū mīi á lephū mbɔɔ azi á esī atsetsáʼ, ńcúʼte ajūɔ tsem jʉɔ mɛ́t, ńnɔ̄ŋ á mekhu taʼ Efɔ, á Klísto.

Efɛze 3:9

A le zéŋ ŋgyá á gá meshhʉ̄ á lelɔk ŋghʉ̄, epuɔ é zhɛ́ páʼ, a á si ŋghʉ̄ɛ, anu zīi a le sáŋ á ntē ntsem, á puɔ. Anu mɛ́t, yí Ndém Nnɔŋ‑Ŋgɔŋ, a le lʉ̄ɔ̄, tɛ efhó á nzií‑ŋgɔŋ.

Eble 1:5

Ndém a laá nzi ŋgɔ́ aleʼé, ńdé á mbū mmɔʼ cɔʼ yi ŋ́gɛ: «O ó méŋ ga, tɛ efhó ayáʼa, meŋ gɔ́ á Mɔʼɔ́ wu ú. » A te lé á mbū mmɔʼ ŋ́gɛ: «Meŋ a shʉʼ egɔ́ á Mɔʼɔ́ wu, o epiŋ ŋgɔ́ á méŋ ga á. »

Eble 1:8

Ḿbiŋ ŋgɔ́ mé Méŋ yi, mbɔ a le lé ŋ́gɛ: «Wu Ndém, akɔʼ lefɔ jú a fú enáŋa egɔ́ áa éwú. » Ńzéŋ ndé ŋ́gɛ: «O o fú elɔkɔ á ndeŋ ndeŋ, tɛ́ esáʼa epuɔ menɔŋ.

Eble 11:3

Ḿpɛ fhoó ánɛ páʼ, ḿpɛ fɛɛ́ nnɛ̄t ŋgyá á mbū Ndém, tɛ́ njúʼ á légɛ, Ndém a le lɔ̄k ashuŋne, tɛ́ ŋghʉ̄ ŋgɔŋ. Púp, ajū mīi ḿpɛ é si ndɔ̄kɔ menēk njʉ́ɔ, á fhoó ánɛ azi, ḿpɛ te lɔ̄k menēk njʉ́ɔ ɔ́.

Eble 2:3

Ḿpɛ piŋɛ te lɔ̄k ŋke yīi, é ghʉɛ mɛ́ tswɛ́tɛ ntɔ́ŋ á azō ɔ́, mbɔ ḿpɛ gɔ eghʉ̄ʉ páʼ lā, ḿvūʼɔ ŋgʉɔ athʉ́ lepé é? Atsyapuɔ méŋwɛ̄t, a le zī á letswi ŋke mɛ́t. Epuɔ pīi é le júʼē, é véŋ. Pɔ́ mé le shúŋ á yímpɛ ŋ́gɛ, é anuúnē.

Eble 3:6

Klísto, páʼ a á si ŋgɔ́ á Méŋ Ndém lā, a juúʼ nchu Ndém, mbɔ Ndém a le tsekné alāʼ zí á mbū yí. Ḿpɛ gɔ́ ŋké ŋkúʼte menu muɔ mɛ́t á ntē pímpɛ, ńnɔ̄ŋ ncuŋtɛ nzwíʼtɛ mé lekāk, mbɔ ḿpɛ mé si ŋgɔ́ alāʼ zí mɛ́t.

Eble 4:14

Ḿpɛ wɛɛ̄ á kwaʼ mía mía nnɔŋ‑epɔʼ eyi ndʉɛ, á ŋiŋ yīi, a le gʉ̄ɔ nnáŋ á lezēŋ Ndém, á gɔ́ á Yɛɛ́so Méŋ Ndém. Púp, ḿpɛ ekúʼte á lefɛ̄ nnɛ̄t ŋgyá á mbū yí á mbɔŋɔ́, ńtswī á mbū emɔ̄ʼ epuɔ.

Eble 5:8

Tsya áa légɛ, a lɛ á Méŋ Ndém, a le ziʼné á lezāpa ánɛ ŋgʉɔ̄ʼ, ńjúʼ nchu Ndém.

Eble 7:28

Á lɛ ánɛ lepé Mɔɔ́sɛ, mɛ́ tsɔ́ʼ epuɔ menɔŋ, tɛ́ ndɔk ŋghʉ̄ wɔ nɔŋ‑epɔʼ epi melʉɛ, tɛ́ pɔ́ ké ŋgɔ́ azɔ́p áa megaŋ mefa. Lepé é le pīŋ eshʉʼ ńnáŋ tɛ ntɔ́k, Ndém á shúŋne tɛ ŋkā, ńchʉ́ á Méŋ yi, ńdɔk ŋghʉ̄ á nnɔŋ‑epɔʼ eyi ndʉɛ, ŋ́gɛ a eghʉ̄ afaʼ mɛ́t á lemiʼɛ. Mbɔ Méŋ yi mɛ́t, a á ghʉ ajū mīi, á pɔŋ á yí.

Eble 7:3

Mɛ́ lɛ te á mɔʼɔ́ yi zhɛ́, mɛ́ té á mɛ́ wɔp zhɛ́, ńzi te elhu yí zhɛ́. Ńzi te zhɛ́ aleʼé zīi, mɛ́ le zhí á yí í, mɛ́ té zhɛ́ azi a le kwhʉ́ ɛ̄. A á páʼ Méŋ Ndém lā, ńdɔkɔ ŋgɔ́ á nnɔŋ‑epɔʼ, á lemiʼɛ.

Eble 9:26

Á lɛ te gɔ́ péʼe, ŋ́gɔ́ épúp ɔ́, mbɔ a le gɔ́ á jʉ́ɔ ŋgʉɔ̄ʼ tɛ ŋgʉɔ é záne, tɛ efhó á anɔŋɔ́‑ŋgɔŋ. Táʼ, afʉʼ á le náŋ tɛ ŋkūʼ, á yá athū nnɛ̄t zí, á taʼ legʉɔ épúp, ńdɔk nnɔ̄ŋ epɔʼ á athū epuɔ metsem, melaʼ mefa mɔ́p.

1 Piɛ 1:20

Ndém a le pú nzɛ́t áa te nɔŋ ŋgɔŋ, ńté njhʉ̄ ŋkāŋ á yí. Á piŋ ŋkūʼ tsetseŋɔ yīi, ŋgɔŋ é si ŋgɔ̄ á mmiī la, á fók á yí á tentā, ŋ́gɛ a etswíte á wɛ́.

2 Piɛ 3:3

Pɛ eté njhʉ̄ nzhɛ́ á légɛ, a shʉʼ egɔ́ ánɛ mezoknzem eleʼé, emɔ̄ʼ epuɔ e eshʉ̄ʼ, ŋ́ghʉ̄ azɔ́p áa menu mīi, mbe zɔp e é si ntshónɛ á wɔ́p ŋ́gɛ pɔ́ eghʉ̄. Epuɔ puɔ mɛ́t e shʉʼ ezwi á wɛ́,

Zwide 1:18

Pɔ́ le lé á mbū pɛ ŋ́gɛ: «A láʼ egɔ́ ánɛ mezoknzem aleʼé alāʼ, emɔ̄ʼ epuɔ e ezwī á wɛ́, ńnɔŋ nnáŋa páʼ mbe nnɛ̄t zɔp e é si ntshónɛ á wɔ́p, ŋ́gɔ́ wɔ te júʼ‑nchu Ndém. »