Ŵafilipi 2:9 - Chiyawo Bible

⁹ Ligongo lya yeleyi Mlungu ŵamkwesisye mnope, ni kumpa lina lyakupunda mena gosope.

Lilangano lya Sambano

⁹ Kwa ligongo lyo Akunnungu ŵannyakwile mwinani nnope, ŵapele liina lyekulu kugapunda meena gose,

Ŵafilipi 2:9 Iomraidhean Croise

Genesesi 3:15

Timbice uŵengani sikati ja m'mwejo ni jwamkongweju. Tipaciŵa uŵengani sikati ja mwanace jwa jwamkongweju ni mwanace jwenu, taciŵa ŵakuŵengana ndaŵi syosope. Mwanace jwa jwamkongweju tacikasa mtwe wenu, nipo m'mwejo timciluma cindende cawo.”

Masalimo 110:1

AMBUJE* ŵasalile ambuje ŵangu kuti, “Tamani ku mkono wangu wamlyo, mpaka pitinasandusye amagongo ŵenu kuŵa mpela cakuliŵatila sajo syenu.”

Masalimo 110:5

AMBUJE ali pambali jenu, pitacitumbila, tacapunda ayimwene wosope.

Masalimo 89:27

Kusyene tinjimtenda kuŵa mwanangu jwandanda kupagwa, jwakwapunda ayimwene wosope ŵa pa cilambo capasi.

Masalimo 91:14

Pakuŵa mpundile kunonyela une tinjimkulupusya. Tinjimcenjela pakuŵa mkulimanyilila lina lyangu.

Yesaya 52:13

AMBUJE akuti, “Jwakutumicila jwangu tacitenda cenene m'masengo gakwe. Tacimpa udindo wawukulungwa ni kumcimbicisya, nipo tacipocela lumbili lwekulungwa mnope.

Yesaya 53:12

Myoyo Une tinjapa ucimbicimbi wakwenela acakulungwa. Tacigaŵana yitacisumula ku ngondo ni asilikali ŵamacili, pakuti jwapelece umi wakwe ku ciwa, nipo ŵamganicisyaga kuti ali jumo jwa ŵandu ŵakukasa Malamusi. Jwanyakwile yakulemwa ya ŵandu ŵajinji, nipo jwapopelele ŵakulemwa kuti akululucidwe.

Yesaya 9:7

Macili ga ulamusi wakwe tigaciŵa gangali mbesi, ucimwene wakwe tiwuciŵa wa mtendele ndaŵi syosope. Tacilamula mpela muŵatendele nangolo jwakwe Mwenye Daudi,* ulamusi wakwe taciwutamilisya ni kuwulimbanganya, pakulosya cilungamo soni kulungamika, kutandila ndaŵi jelejo mpaka ndaŵi syangamala. AMBUJE* Ŵamaciligosope akwete lung'wanu lwakuyitenda yosopeyi.

Daniele 7:14

Ŵapegwile ulamusi, lumbili ni ucimwene, kuti ŵandu ŵa mitundu josope, ngosyo syosope ni ŵa yiŵeceto yakulekanganalekangana amtumicileje jwalakwejo. Ulamusi wakwe uli wa mpaka kalakala, ucimwene wakwe ngisiwumala soni ngasiwujonasika.

Matayo 11:27

“Atati ŵangu ambele yindu yosope yene, ŵelewo ni ŵakum'manyilila Mwanace. Ŵane soni ŵakwamanyilila Atati ali Mwanace. Nambo mwanace akusaka kwasalila ŵandu ŵane kwambaga ya Atati, kuti nombe nawo jemanjajo ŵamanyilile ŵelewo.

Matayo 28:18

Yesu ŵaŵandicile ni ŵasalile kuti, “Mbegwile ulamusi wosope kwinani ni pasi pano.

Luka 10:22

Kaneko Yesu ŵapitilisye kuŵeceta kwa ŵandu ŵala kuti, “Atati ŵangu ambele yindu yosope yene, ŵelewo ni ŵakum'manyilila Mwanace. Ŵane soni ŵakwamanyilila Atati ali Mwanace. Nambo mwanace akusaka kwasalila ŵandu ŵane kwambaga ya Atati, kuti nombe nawo jemanjajo ŵamanyilile ŵelewo.”

Yohana 13:3

Yesu ŵamanyilile kuti Atati ŵakwe ŵampele macili gosope gene, jwalakwe ŵamanyilile kuti ŵatyocele kwa Mlungu nipo ŵaliji mkwawula kwa Mlungu.

Yohana 17:11

Nipo sambano ngwisa kwa wawojo, pangakaŵapa ngamba soni mcilambo capasi cino, nambo jemanjaji tacipitilisya kuŵape mcilambo muno. Atati ŵangu, ŵali Ŵaswela! Ŵasunje ni macili gawo, macili giŵambele une, kuti aŵe ŵamo mpela mutuŵelele wawojo ni une.

Yohana 17:12

Pinaliji nawo pamo, nasunjile ni macili ga lina lyawo, lina lyakwe liŵambele une. Nasunjile cenene, nipo pangali jumo jwa jemanjajo juŵajasice, nambo akaŵe mundu juŵaŵajilwe pejo kuti ajasice kuti Malemba gigalembedwe gatendece.

Yohana 17:5

Atati! Sambano anjimbicisye une pameso pawo, ni lumbili lunakwete pinaliji ni wawojo mkanicipanganyidwe cilamboci.

Masengo 5:31

Mlungu ŵamkwesisye jwelejo ku mkono ŵakwe wamlyo kuti aŵe jwakulongolela soni Mkulupusyo. Ŵatesile yeleyi kwapa Aisalaeli upile wakupitikuka mtima kuti ulemwa* wawo akululucidwe.

Ŵaefeso 1:10

Cele Mlungu ciŵaŵecete kuti acitende pajicikwana ndaŵi jakwe, ni cakuti asonganye pampepe yindu yosope ya kwinani ni pasi pano, Klistu ni kuŵa jwamkungwa jwakwe.

Ŵakolosai 1:18

Jwalakwejo ali mtwe wa cilu cakwe, wele wawuli mpingo.* Jwele jwali jwakupeleka umi ku cilu, soni ali jwandanda kupagwa, jwele juŵajimwice ku ŵawe, kuti pa yosope Jwalakwe aŵe jwakupunda mnope.

2 Ates 1:12

Myoyo lina lya Ambuje ŵetu Yesu Klistu tilicicimbicikwa mwa jemanja nipo jemanja timcicimbicikwa mwa jwalakwejo. Yosopeyi tiyicitendekwa ligongo lya umbone mtima wa Mlungu ni Ambuje ŵetu Yesu Klistu.

Ŵaeblania 1:4

Mwanace jwa Mlungu akupunda malayika,* mpela mwele lina lyele Mlungu ŵampele likusapunda lina lya malayika.

Ŵaeblania 1:9

Mkusanonyela cilungamo ni kuŵengana ni yangalumbana. Ni ligongo lyakwe Une, Mlungu jwenu amsagwile m'mwejo ni kumpa lukondwa lwa ucimbicimbi kupunda acimjenu ŵane wosope.”

Ŵaeblania 12:2

Kwende meso getu gaŵe pa Yesu,* jwele jwali jwakutandisya cikulupi cetu, nipo soni jwakulongolela ni kuciyicisya cikulupi cetu pambesi. Ligongo lya cisangalalo cele cicaliji mkumlindilila, Jwalakwejo ŵapimilile yipwetesi ya pa msalaba. Nganasamala kose kutenda soni ni ciwa camti myoyo, nipo sambano akutama ku mkono wamlyo ku citengu ca Ucimwene wa Mlungu.*

Ŵaeblania 2:9

Nambotu tukulola kuti Yesu,* jwele pa kandaŵi panandi ŵatendekwe kuŵa jwamnondi kwa malayika, jwapocele mbote ja lumbili ni ucimbicimbi ligongo ŵasimene yipwetesi ya ciwa. Yatendekwe yeleyi ligongo lya umbone mtima wakwe Mlungu ŵasacile kuti awile ŵandu wosope.

1 Petulo 3:22

jwele juŵakwesile kwawula kwinani nipo akutama ku mkono wamlyo wa Mlungu. Kweleko malayika* ni maulamusi gakwinani ni ŵamacili akusampikanila jwalakwejo.

2 Petulo 1:17

Jwalakwejo ŵapocele ucimbicimbi wa Mlungu Atati, nipo gamyicilile maloŵe gakutyocela kwa Atati ŵa lumbiliwo kuti, “Aju ni mwanangu jwakunonyeledwa, jwele jungusasangalala najo.”

3 Yohana 1:7

Pakuti ŵawutandite ulendo ligongo lya lina lya Klistu,* soni nganapocela cine cilicose kutyocela kwa ŵandu ŵangakulupilila.

Chunukuko 1:5

Amsalalile mtima ni kumpa mtendele Yesu Klistu, mboni jakulupicika, jwele jwali jwandanda kwimusidwa kutyocela ku ŵawe, soni jwali mwenye jwakwalamulila ayimwene wosope ŵa pacilambo capasi. Jwalakwejo akusatunonyela, soni kupitila mu ciwa cakwe ŵatugopwele ku ulemwa wetu,

Chunukuko 11:15

Kaneko lilayika lya msano ni kaŵili lyagombile lipenga lyakwe. Pilyatesile myoyo kwinani kwapikanice maloŵe gamacili. Maloŵe gatite kuti, “Sambano macili gakulamulila cilambo capasi gali m'myala mwa Ambuje ŵetu ni mwa jwakusagulidwa jwakwe jula, nipo tacilamulila mpaka ndaŵi syosope.”

Chunukuko 19:16

Pa mkanjo wakwe nambo soni pa ciga cakwe palembedwe lina lyakuti: “Mcimwene jwa ayimwene wosope ni Ambuje ŵa acambuje wosope.”

Chunukuko 3:21

Jwele jutacipunda, tinjimkunda kuti aŵe pampepe ni une pa citengu cangu ca ucimwene, mpela munatendele Une namsyene: napundile nipo ngutama pampepe ni Atati ŵangu pa citengu cawo ca ucimwene.

Chunukuko 5:12

Napikene malayikago gali mkwimba mwakwesya gacitiji kuti, “Mwanace Jwangondolo juŵawulajidweju, akuŵajilwa kupocela macili, yipanje, lunda, ulamusi, ucimbicimbi, lumbili ni matogolelo.”