Malilo 2:7 - Chiyawo Bible

⁷ AMBUJE ŵagakanile malo gawo gakupelecela mbopesi mpaka soni malo gakwe gapajika; Ŵakundile amagongo ŵakwe kugumula mapupa gosope. Ŵagumilaga kulosya kupunda m'nyumba jitwapopelelaga uwe mwakusangalala.

Malilo 2:7 Iomraidhean Croise

2 Ayi 25:9

Ni ŵajocice Nyumba ja AMBUJE,* nyumba ja mwenye, ni nyumba syosope sya ŵandu ŵakumanyika ŵa mu Yelusalemu,

2 Mbi 36:19

Kaneko asilikali ŵa Nebukadinesa ŵajocile Nyumba ja AMBUJE, ŵagwisisye soni lipupa lyele lyasyungulile msinda wa Yelusalemu, ŵajocile soni nyumba syosope sya ucimwene nipo ŵajonasile yida yosope yiyaliji ya mtengo wapenani.

Masalimo 89:39

Ŵalakwe akasile cilanga ciŵaciŵisile kwa jwakutumicila jwawo, aciponyisye cisindi cakwe mluwundu.

Yesaya 64:9

Myoyo akatutumbilila mnope, nipo akakumbucila ulemwa ndaŵi syosope. Tukupesya atuganicisye, wosopeŵe tuli ŵanace ŵawo.

Yelemiya 21:4

mkasalile Sedekiya kuti, AMBUJE Mlungu jwa Aisalaeli akuti, “Tinjimsumula yida ya ngondo yayili myala mwenumo, yamkuputila ngondo ni mwenye jwa ku Babiloniya ni asilikali ŵakwe ŵa ngondo ŵele ŵamsyungulile jemanja pamo ni misinda jakwe. Tinjiyika nayo ni kuyiŵika mkati mwa msinda awuno.

Yelemiya 26:18

“Ndaŵi jele Hesekiya ŵaliji mwenye jwa ku Yuda, Mika jwa ku Moleseti ŵalocesyaga, ni ŵasalile ŵandu wosope ŵa ku Yuda kuti AMBUJE Ŵamaciligosope akuŵeceta kuti, ‘Msinda wa Siyoni* tiwucilimidwa mpela mgunda. Msinda wa Yelusalemu tiwuciŵa masame soni litumbi lya Nyumba ja AMBUJE tiliciŵa ukweti.’

Yelemiya 26:6

Naga mkupitilisya ungapikanila jemanjajo, tinjitenda ku Nyumba ajino yinatesile ku msinda wa Shilo, nipo msinda welewu tinjiwutendekasya kuŵa welwesece kwa mitundu josope ja pa cilambo capasi.”

Yelemiya 32:29

ni kuwucoma moto. Taciwujoca moto, pamo ni majumba kwele ŵandu ambisisye mtima pakututumicisyapo ubani* kwa Baala* ni pakupeleka cakupeleka ca cakumwa kwa milungu jine.

Yelemiya 39:8

Ababiloniya ŵajocile moto nyumba ja mwenye, Nyumba ja AMBUJE* pamo ni nyumba syosope syene sya ŵandu. Ni ŵagwisisye mapupa gosope ga Yelusalemu.

Yelemiya 4:26

Nalolite, cilambo cacajila caliji cili cisandwice kuŵa cipululu, soni misinda jakwe josope jaliji jili jisandwice kuŵa masame, ligongo lya lutumbilo lwa AMBUJE. (

Yelemiya 4:27

AMBUJE akuŵeceta kuti, Cilambo cosope ticiciŵa cipululu, nambo ngisinacijonanga kwakumalilatu).

Yelemiya 50:28

(Ngwapikana ŵandu ŵakutila ngondo ja ku Babiloniya ali mkusala ya mbusyo sya AMBUJE, Mlungu jwetu, kwapa mbusyo ligongo lyakonanga Nyumba jakwe).

Yelemiya 52:13

Piŵajocile Nyumba ja AMBUJE, nyumba ja mwenye ni nyumba sine syosope ku Yelusalemu, nyumba jajikulungwa jilijose ŵajijocile.

Malilo 1:4

Pangali jwalijose juŵayice ku Nyumba ja AMBUJE* kupopela masiku gakusangalala. Ŵali ŵiŵajimbaga kweleko ŵalesile, ni ŵakutaga mbopesi agamba kudandawula. Yipata ya msinda yosope yili mbee, Siyoni* ali mu yisawusyo.

Malilo 2:1

AMBUJE* ni lutumbilo lwakwe awunicile Siyoni* ni cipi. Kusalala kwakwe kwa kwinani akutesile kuŵa masame. Pa lisiku lya lutumbilo lwakwe nginajawula atamose ku Nyumba jakwe.

Malilo 2:5

AMBUJE ŵaŵele mpela m'magongo ni ŵajonasile Isalaeli; ŵagalesile mapupa ni nyumba sya ucimwene sili masame. Ŵayice naco canasa cangamala pa ŵandu ŵa ku Yuda.

Esek 24:21

mwasalile Aisalaeli utenga wangu kuti: Tinjijisakasya Nyumba jangu jele jimŵele mli mkujisangalalila mnope. Mkusajisangalalila mnope pakujiwona, ni mwajinonyelaga ni mtima wenu wosope. Ŵanace ŵenu ŵacalume ni ŵacakongwe ŵamwalesile munyuma taciwulajidwa ni upanga.

Esek 7:24

Tinjiyika najo mitundu ja ŵandu ŵakusakala mnope akuno kuti tasumule nyumba syenu. Ŵandu ŵenu ŵamacili ngisalikulupilila ndaŵi jele mitundu jine jiticisakasya malo gele jemanja gimkusapopelelago.

Lefitiko 26:31

Tinjijonanga misinda jenu kuti jiŵe masame. Tinjijonanga soni malo genu gakulambila kuti gaŵe gangali ŵandu, ni ngasingunda soni kulipikana liwungo lyambone lya yakupeleka yenu.

Lefitiko 26:44

Atamose yindu yosopeyi yili yitendekwe, ŵandu ŵa ku Isalaeli ali mcilambo ca amagongo ŵawo, une ngasinajasa kapena kuŵengana nawo kwa mpaka kwajonanga. Naga ngutenda myoyo ni kuti cilanga cinapangene nawo jemanjajo mpaka cikasice. Une ndili AMBUJE Mlungu jwawo.

Amosi 2:5

Ali ni ligongo lyakwe tinjitumisya moto ku Yuda kuti ujoce mapupa ga ku Yelusalemu.”

Mika 3:12

Myoyo, ligongo lya jemanja msinda wa Siyoni* tiwucitipulidwa mpela litimbe, Yelusalemu taciŵa masame, nipo litumbi lya Nyumba ja AMBUJE ni tiliciŵa ukweti.

Matayo 24:2

Nambo Yesu ŵasalile kuti, “Nambi ngati mkuyiwona yosope yeneyi? Nditu ngumsalicisya kuti ngasipasigala kose liganga atamose limo lyakusajika pacanya pa lijakwe; gosope tigacigumulidwa.”