Malilo 2:11 - Chiyawo Bible

¹¹ Meso gangu gapesile ni kulila; umi wangu ulasile mnope. Mu mtima mwangu mugumbele ni canasa ligongo lyakonasika kwa ŵandu ŵangu. Ŵanace ni makandi gagamba komoka m'misewu ja mu msinda.

Malilo 2:11 Iomraidhean Croise

Yobu 16:13

Mipamba jakwe jikusoma une mbali syosope, asomile mbyo syangu mwangatenda canasa ni kujijasila pasi ndulu jangu.

Yobu 30:27

Mtima wangu ukupweteka soni ngusoŵa mtendele, masiku gosope ngusaŵa pa yipwetesi.

Masalimo 119:82

Meso gangu gacejele pakulindilila cilanga cawo, nguwusya kuti, “Ana tacingamucisya cakaci?”

Masalimo 22:14

Macili gangu gapite, mpela mesi gakwiticila pasi, mawupa gangu gosope gatyosile m'malumbiko; mtima wangu unyelenyendwice mpela lipula mkati mwangu.

Masalimo 31:9

Asalalile mtima, ŵalakwe AMBUJE, pakuŵa ndili muyakusawusya; meso gangu gayimbile ligongo lya canasa mu mtima mwangu ni mcilu mwakwe mugumbele yisawusyo.

Masalimo 38:8

Ndili jwam'male ligongo lya kulwalika. Nguwuwula ligongo lyakulaga mu mtima.

Masalimo 6:7

Meso gangu gayimbile ligongo lyakwikwitika, galembwice ligongo lya amagongo wangu.

Masalimo 69:3

Mbesile ni kulila kwangu, kungulo kwangu kujumwile. M'meso mwangu mutesile cipi pakulindilila cikamucisyo ca Mlungu jwangu.

Yesaya 22:4

Ni ligongo lyakwe Une natite kuti mtyoce apano, mundece ndile ni mtima wakupweteka, ligongo lya ŵandu ŵangu ŵajonasice, mkalinga kundulasya une.

Yesaya 38:14

Nalilaga mpela ciŵaleŵale, nagumilaga mpela ngunda. Meso gangu gapesile ni kulolecesya kwinani. Wawo AMBUJE, une ndili myisawusyo, ayice angamucisye.

Yesaya 51:20

Ŵanace ŵenu akomwece, agonile m'matala gosope mpela ndandala syetanjile m'malwawu. Lutumbilo lwa AMBUJE lyagwilile, ni kwamuka kwakwe.

Yelemiya 14:17

Mkasalile jemanjajo kuti, “M'meso mwangu cimugwe misosi cilo ni musi, soni kuti ngaleka kulila, pakuti ŵandu ŵangu akwete liŵanga lyekulungwa, mwakuti awulasidwe kwakogoya.

Yelemiya 4:19

Koto, koto, kupweteka mnope, kupweteka. Mtima wangu ukupweteka, ukugunda mnope. Nganipakombola kuti ndame jii. Ngupikana kulila kwa lipenga ni masegwe ga ngondo.

Yelemiya 44:7

“Sambano AMBUJE Ŵamaciligosope, Mlungu jwa Aisalaeli akuwusya kuti, ana ligongo cici mkusaka kulijonanga mwamti myiyi? Ana ligongo cici mkusaka kwawulaga Ayuda ŵacalume ni ŵacakongwe, ŵanace ni makandi, kuti akasigala ni jumo jose pa mtundu wenu?

Yelemiya 8:19

Mpikane kulila kwa ŵandu ŵangu kutyocela ku cilambo cakwakutalika. Akuti, “Ana AMBUJE nganaŵa ku Siyoni?* Ana mwenye jwakwe nganaŵa kweleko?” AMBUJE ŵajanjile kuti, “Ana ligongo cici akundanda ni tumilungu twawo, nambo soni ni milungu jawo ja cilendo?”

Malilo 1:11

Ŵandu ŵakwe ŵagumilaga katema kiŵasosaga yindu yakulya kuti alye. Ŵatindanyaga cipanje cawo ni yakulya kuti aŵe ni umi. Ŵanduwo ŵalisile acitiji, “Mundole une, AMBUJE, alole mwele mungulajila.”

Malilo 1:16

“Ni ligongo lyakwe m'meso mwangu mugamba kujilima misosi. Pangali mundu jwampaka ambembece une; pangali jwampaka alimbisye une mtima. Amagongo ambundile une, ni ŵandu ŵangu ŵangali cilicose casigele naco.

Malilo 1:20

“Alole ŵalakwe AMBUJE mwele mungulajila mu mtima mwangu! Mtima wangu ukudandawula ni canasa ligongo lya ulemwa wangu. M'misewu ŵandu agamba kuwulajidwa ni mawupanga; m'nyumba soni mwana ciwa.

Malilo 5:17

Mitima jetu jangali macili ni ligongo lya yeleyi ngatukombola kulola cenene.

Luka 23:29

Pakuti ndaŵi tijiciyika jele ŵandu tacitiji kuti, ‘Ŵana upile acakongwe ŵangaŵeleka, ŵele nganajonjesyeje mwanace!’

1 Sam 30:4

Daudi ni ŵandu ŵakwe ŵatandite kulila nipo nganaleka kose mpaka macili gakulilila gamasile.