Ekisodo 7:3 - Chiyawo Bible

³ Nambo Une tingawulimbisye mtima wa Mwenye jwa ku Iguputo, nambo atamose tingayitende yitagu ni yindu yakusimonjeka yejinji mcilambo ca Iguputo.

Ekisodo 7:3 Iomraidhean Croise

Nehemiya 9:10

Wawo ŵatesile yakumasya lunda ni yakusimonjesya pameso pa Mwenye jwa ku Iguputo, pameso pa ŵamasengo ŵakwe ni ŵandu ŵa mcilambomo, pakutipo wawo ŵayimanyi muŵalagacisye jemanjajo acinangolo ŵetu. Ali ni ligongo lyakwe mbili ja wawo jajenele posepose mpela mujiŵelele masiku agano.

Masalimo 135:9

ŵele ŵamlosisye Mwenye jwa ku Iguputo ni ŵakutumicila ŵakwe wosope, yimanyisyo yamacili ni yakusimonjeka mcilambo ca Iguputo.

Masalimo 78:12

Mlungu ŵatesile yakusimonjeka yakwe, acinangolo ŵawo acilolaga, mcilambo ca Iguputo ku lilambo lya Sowani.

Ekisodo 11:10

Myoyo Mose ni Aloni* ŵayitesile yitagu yakusimonjeka yosopeyi pameso pa Mwenye jwa ku Iguputo. Nambo AMBUJE ŵamjumwisye mtima Mwenye jwa ku Iguputojo, ni nganiŵakunda Aisalaeli kutyoka mcilambo mwakwe.

Ekisodo 11:9

Ni AMBUJE ŵamsalile Mose kuti, “Mwenye jwa ku Iguputo tapitilisye kukana kumpikanila m'mwejo, kuti pakutenda myoyo, une nayitende yitagu yangu yakusimonjeka yejinji mcilambo ca Iguputo.”

Ekisodo 14:4

Tinjimjumusya mtima Mwenye jwa ku Iguputo, tacakuya Aisalaeliwo. Mwenye jwa ku Iguputo ni likuga lyakwe lyosope tinjapunda pa ngondo. Tinjipocela une ucimbicimbi, pelepo Aiguputo wosope tacimanyilila kuti une ndili AMBUJE.” Aisalaeli ŵayitesile yosope mpela muŵasalile.

Ekisodo 3:20

Myoyo une, tingagakamulisye masengo macili gangu, tinjipeleka cilango kwa ŵandu ŵa ku Iguputo, pakutenda yindu yakusimonjeka une kweleko. Patiyicitendekwa yindu yeleyo, tacimkunda kutyoka.

Ekisodo 4:21

AMBUJE ŵamsalile soni Mose kuti, “Pamkuwujila ku Iguputo, mkalolecesye kuti mkatende yindu yosope yakusimonjeka, yinamsalile kuti mkayitende pameso pa Mwenye jwa ku Iguputo. Nambo Une tingawulimbisye mtima wakwe, ni ngaja kukunda kuti ŵandu ŵangu akatyoce.

Ekisodo 4:29

Myoyo Mose ni Aloni ŵajawile ku Iguputo ni ŵasongenye acakulungwa wosope ŵa Aisalaeli.

Ekisodo 4:7

Mlungu ŵatite, “Mlijinjisye soni m'malaja ligasa lyenulyo.” Jwalakwejo ŵalijinjisye soni ligasa lyakwe m'malaja mwakwe, ni piŵalikopwesye ligasa lyakwe, lyaliji lyangali matana, lyaposile, lyaliji lyakulandana ni mbali jine josope ja cilu cakwe.

Ekisodo 7:13

Nambo Mwenye jwa ku Iguputo ni pawapundile kumula mtima, soni mpela muŵaŵecetele AMBUJE mula, mwenye nganiŵapikanila Mose ni Aloni.

Ekisodo 9:16

Nambo namlesile m'mwejo ni umi kuti mgalole macili gangu, kuti lina lyangu limanyice pa cilambo cosope ca pasi.

Misyungu 21:1

Mtima wa mwenye uli mpela lusulo lwa mesi m'myala mwa AMBUJE,* akuwujongolela ku yakusaka jwalakwejo.

Yesaya 51:9

Mjimuce, AMBUJE, mjimuce mtukamucisye! Kamucisyani ni macili genu kuti gatukulupusya, mtende mumwatendelaga kala. Ana ngaŵa ŵawoji uŵamkatile Lahabu cilombo ca m'nyasa cila ni kucisoma cijoka ca m'nyasa cila?

Mika 7:15

AMBUJE akuti, “Tinjilosya yakumasya lunda, mpela pa ndaŵi jimwakopokaga kutyocela ku Iguputo.”

Yohana 4:48

Yesu ŵamsalile kuti, “Pangali atamose jumo jwa jemanja jutacikulupilila naga akayiwona yimanyisyo ni yakusimonjesya.”

Masengo 2:22

“Jemanja Aisalaeli, mpikanile maloŵe aga. Yesu* jwa ku Nasaleti ŵaliji mundu jwele juŵamtumile Mlungu kwa jemanja. Mlungu ŵamsimicisye yeleyi ya macili, yakusimonjesya ni yimanyisyo yiŵapanganyisye mwa Yesu pasikati penu, mpela yimkuti pakumanyilila.

Masengo 7:36

Ŵalongolele ŵandu kutyocela ku Iguputo. Ŵatendaga yindu yakusimonjesya ni yimanyisyo ku Iguputo, pa Nyasa Jecejewu,* kwisa soni mcipululu kwa yaka 40.

Ŵaloma 15:19

mwamacili ga yakumasya lunda ni yakusimonjesya yakutendecekwa kupitila mu macili ga Msimu Ŵaswela. Myoyo Ngani Syambone* syakwamba Klistu nisilalicile pane palipose, kutyocela ku Yelusalemu mpaka kuja kwika ku boma ja Ililikamu.

Ŵaloma 9:18

Myoyo tukusawona kuti Mlungu akusamtendela canasa mundu jwakusaka jwalakwejo kumtendela canasa, soni jwalakwejo akusajumusya mtima kwa mundu jwakwejo jwasacile kuti amjumusye mtima.

Detulonomo 4:34

Ana apali mlungu jwine jwalijose juŵajawile kuja kwajigala ŵandu, kwatyosya pasikati pa lukosyo lwine, ni kwasandusya ŵandu ŵakwe, mpela muŵamtyocesye jemanja, AMBUJE Mlungu jwenu ku Iguputo kula? Jwalakwe ŵayitesile yindu yakusimonjesya yakogoya ni macili gakwe gamakulungwa, soni ŵaputile ngondo, jemanja mli kulola ni meso genu.

Detulonomo 7:19

Mkumbucile yindu yakogoya yimwayiweni ni meso genu. Mwayiweni yindu yakusimonjeka ni yindu yayikulungwa ya macili. Yiŵayitesile AMBUJE Mlungu jwenu kuti amkulupusye jemanja. Jwalakwe tacajonanga ŵandu wosope ŵamkwajogopa sambano jinoŵa, tacajonanga mpela muŵajonasile Aiguputo ŵala.