Jeremiah 23:6 - Bible Ni Thothup

⁶ Nap’an nra pilung, ma aram e dabki buch ban’en rok piyu Judah, ma aram e girdi’ nu Israel e bay ra pired u fithik’ e gapas. Ma cha’nem e bay nog fithingan ni ‘Ir SOMOL Nma Mat’aw Nagdad.”

Jeremiah 23:6 Iomraidhean Croise

1 Kings 4:25

Ma n’umngin nap’an ni i par nib fos, ma girdi’ u ga’ngin yang u lan yu Judah ngu Israel e ra pired nde buch ban’en rorad, ra reb e tabnaw ma bay e grape nge gek’iy ni fig ni fi’in.

Psalms 45:5

Pi gan e gat’ing rom e bm’uth, ka ra kurufed gumircha’en e pi to’ogor rom; pi nam e ka ra parawgad nga charen rifrifen’em.

Exodus 9:26

Nug nu Goshen, ni aram e gin ma par piyu Israel riy, e kemus e gin’en nde mul e ayis riy nga but’.

Isaiah 2:4

Bayi gapaseg thilin e pi nam ni gang’. Bay ra ama niged e pi saydon rorad ngar ngongliyed talin e maruwel riy nma gi’ e but’ nge pi sarey rorad nge mang yar ni yima th’ab papa’ngin e woldug ngay. Pi nam e dab ku ra maelgad bayay, ma dab ku ra fal’eged rogorad bayay ni fan ko mael.

Isaiah 32:1

Bay reb e rran ni bay yib ba pilung nib mat’aw, nge pi’in ni bay u rogned e thin ko nam nib ba yal’uw e gagiyeg ni bay ur ted.

Isaiah 32:18

Pi naun rok e girdi’ rok Got e bay un par riy u fithik’ e gapas ma dabi buch ban’en rorad, ma kem’ay e magafan’ rorad.

Isaiah 33:22

Urngin e rigin ni bay u daken e pi barkow nem e ra par nib m’ay fan; ma lay riy e dabiyag ni ngan pithig! Bay da feked gubin fel’ rogon rok e pi to’ogor rodad, ni kaygi pire’ ni mus ko girdi’ ni mugutgut ma yira pi’ e f’oth rorad riy. I SOMOL e ra mang pilung rodad; Ir e bay i gagiyeg nagdad mi i yoror rodad.

Isaiah 33:5

Ke sorok SOMOL! Ya ir e be gagiyegnag urngin ban’en. Bayi sugnag yu Jerusalem ko tin nib mat’aw nge yal’uw,

Isaiah 35:9

Ma dariy e gamanman ni layon riy; ma dariy e gamanman riy nma cham. Pi’in ke lagrad SOMOL u fithik’ e gafgow e yad ra yan nga taferad u daken e re kanawo’ nem.

Isaiah 42:6

“I Gag SOMOL e kug piningem ku gu pi’ gelngim ni ngam guy rogon ngam rin’ e tin nib yal’uw u fayleng. Ngug ngongliy bm’ag u thilmad urngin e girdi’ ni nggu rin’ u dakenam; bay gu pi’ e tamilang ngak e pi nam u dakenam.

Isaiah 45:17

Machane SOMOL e ke chuweg yu Israel u pa’ e to’ogor rok, ma felfelan’ rok yu Israel nike gel e bayi par ni dariy n’umngin nap’an; ma girdi’ rok e dab kun darifan nagrad.’”

Isaiah 54:17

Machane dariy ba talin e cham nrayag ni nge maad’ad ngom; bay u fulweg rom ngak urngin e pi’in yad ra yog ni gab kireb. Bay gu ayuweg e pi tapigpig rog, mu gu gagiyeg nagrad ngar gelgad.” I SOMOL e keyog e pi thin ney.

Isaiah 7:14

I SOMOL e bayi pi’ ba pow ngomed. Be’ ni bpin ni ka ba rugod nike diyen. Bayi gargel ni bochi pagel ma bayi tunguy fithingan ni Immanuel.

Isaiah 9:6

Ka ni gargeleg bochi tir ngodad! Ka ni pi’ bochi pagel ngodad! Me ir e bayi mang pilung rodad. Ma bay nog fithingan ni “Tafonow nrib Manigil,” nge “Got ni Gubin ma Rayag Rok,” nge “Chitamangiy ni Manemus,” nge “Pilung ko Gapas.”

Jeremiah 29:11

Yi go’ gag e gumnang e tin ku gu tanomnag ni fan ngomed, tanom ni nggu man’og nagmed ma gathi nggu gafgow nagmed, pi tanom nem e nge yag ngomed e tin u mu nameged.

Jeremiah 30:10

“Girdi’ rog dab murus gad; gimed e girdi’ nu Israel, dabi aw e marus nga yal romed. Ya bay gu laegmed ko fare binaw nib palog, fare binaw ni gimed ba kalbus riy. Bay mu sulod nga tabnaw ngam pired u fithik’ e gapas; bay um pired ni dariy ban’en ni ku ra buch romed, ma dariy be’ ni ku ra k’ar marus ngomed.

Jeremiah 31:23

I SOMOL ni Gubin ma Rayag Rok, ni Got rok piyu Israel e be ga’ar, “Nap’an ni bay gu fulweg piyu Israel ko nam rorad, ma aram e bay rogned bayay u daken e nam nu Judah ngu lan e yochi binaw u rom ni bayi lungurad, ‘I SOMOL e nge fal’eg wa’athan fare burey nu Jerusalem nib thothup, ni fa gin nib thothup nma par riy.’

Jeremiah 32:37

I gag e nggu kunuy e girdi’ u gubin e nam ni gu weregrad riy u fithik’ e damumuw rog nib almarin, ni aram e nggu fulwegrad ngaray ngar pired ndariy ban’en nra buch rorad.

Jeremiah 33:15

Ra ngiyal’ i n’em e bay gu mel’eg ba pilung ni reb i owchen David nib mat’aw. Re pilung nem e bay i rin’ e tin ni bfel’ ma bmat’aw u ga’ngin yang fare nam.

Jeremiah 33:16

Girdi’ nu Judah ngu Jerusalem e bay ur pired ni dabi buch ban’en rorad. Fare binaw e bay nog ni ‘Fare SOMOL ni Ir e Mat’wegdad.’

Ezekiel 21:27

Nge puth! Nge puth! Bay gu pag fare binaw nge mogothgoth. Machane dabi buch e ran’ey nge mada’ ko ngiyal’ nike yib e cha’ ni ku gu mel’eg ni nge gechignag fare binaw. Ni ir e bay gu pi’ nga pa’.

Ezekiel 28:26

Bay ra pired u rom ndabi buch ban’en rorad. Ma bay ur toyed e naun ma yad be ngongliy yung i milay’ ni grape. Bay ggechignag urngin e pi’in yad bbuguliyoror ni ur togopluwgad ngorad, me par yu Israel ni yad ba muduwgil. Ma aram e bay ra nanged ni Gag SOMOL ni Got rorad.”

Ezekiel 38:14

Ere SOMOL ni Th’abi Tolang e ke l’ogeg ni nggog ngak Gog e n’en nike yog nib sor ngak: “Chiney ni be par e girdi’ rog nu Israel ndariy ban’en ni be buch rorad, e bay mu fal’eg rogom

Ezekiel 48:35

N’umngin fa aningeg raba’ i rungrung u gubin e 10,080 e yard. Fithingan fare binaw e chiney i yan ngaram e ba’aray “I SOMOL E Bay U Roy!”

Daniel 9:24

“Medlip yay e medlip i ragag e duw n’umngin nap’an nike duwgiliy Got ni nge taw ngay me tal e girdi’ ko nam rom nge girdi’ ko fare binaw rom nib thothup ndab kur rin’ed e kireb ma dab kur ngongliyed e denen. Me n’ag Got fan e denen me pi’ e tin nib yal’uw ni bayi par ni dariy n’umngin nap’an, ya tin mu guy ko fa ngiyal’ nni piliyeg e changar rom nge fare yi’iy e nge yib i m’ug nib riyul’ min pi’ fare Tempel nib thothup nga pa’ SOMOL.

Daniel 9:7

I gur SOMOL, e gubin ngiyal’ ni ga be par ni gab mat’aw, ma gamad gubin ni kafaram i yib ni ug ngongliyed e ngongol ni ngan tamra’ ngay, ni girdi’ ni i par u lan yu Judea ngu Jerusalem, nge urngin piyu Israel ni kam weregrad u lan e pi nam nib chugur nge tin nib mal’af ni bochan e da ur yul’yul’gad ngom.

Hosea 1:11

Piyu Judah nge piyu Israel e bay ku ra pethgad ngar ta’rebgad bayay. Ma bay ra duwgiliyed ta’abe’ nge par ni pilung rorad, ma bay ra yo’orgad bayay me fel’ rogorad. Aram rogon e re rran ni ba’aram ni rran rok Jezreel.

Hosea 1:7

Machane bay gu dag e t’ufeg ko girdi’ nu Judah. I Gag SOMOL, ni Got rorad e bay gu ayuwegrad u pa’ e to’ogor rorad, machane gathi bay gu rin’ u daken e mael, — ni kan fek e saydon ara gat’ing, ara os ara salthaw ni be yan u os.”

Hosea 2:18

Re ngiyal’ i n’em e bay gu ngongliy ba m’ag u thilmad urngin e gamanman ni malboch nge arche’, nge dab ra gafgow niged e girdi’ rog. Bay gu chuweg urngin talin e cham ni fan ko mael u daken e nam, ni urngin e saydon nge gat’ing, mu gu tay e girdi’ rog ngu’ur pired u fithik’ e gapas ndakuriy ban’en nra buch rorad.

Obadiah 1:17

“Machane daken e Burey nu Zion e ra mil bochiyad riy, ni aram e gin’en nra par nib thothup. Fapi girdi’ rok Jakob e bay ra tafnayed fare gi but’ nriyad e matawrad ni ngar tafnayed.

Obadiah 1:21

Pumo’on ni falu’ nu Jerusalem e bay ra cham gad nga Edom ngar gagiyeg niged. Ma SOMOL e ir e bayi pilung.”

Zefaniah 3:13

Girdi’ nu Israel nra magay nib fos e dariy ba kireb ni yad ra rin’ ngak be’, ma dab roged ban’en nib ban, ma ku dab ra guyed rogon ni ngar sasalpiyed ban’en. Bay i fel’ rograd miyad par ndariy ban’en nra buch rorad, ma dariy be’ ni yad ra tamdag ngak.”

Zekariah 10:6

“Bay gu pi’ gelngin e girdi’ nu Judah; ma bay gu ayweg e girdi’ nu Israel ni dabi buch ban’en rorad; ma bay i kireban’ug ngorad nggu fulwegrad nga taferad. Ni gowa dag fek owcheg rorad. I Gag SOMOL ni Got rorad; bay ug fulweg taban e meybil rorad.

Zekariah 3:10

Ra taw ko rofen nem, ma ra bigimed me pining e en yow bbuguliyoror ni nge un ngak ko felfelan’ u fithik’ e gapas nge muduwgil, u fithik’ yungi woldug romed ni grape nge gek’iy ni fig.”

Roma 3:22

Got e ma mat’awnag e girdi’ ngak u daken e michan’ rorad ngak Jesus Kristus. I Got e ma rin’ e ren’ey ngak urngin e girdi’ nike mich Kristus u wun’rad, ni ta’reb rogon piyu Israel nge pi’in gathi yad piyu Israel:

1 Korinth 1:30

Machane Got e ke fekmed ke ta’ab girdi’nagmed Kristus Jesus, ma ke tay Got Kristus ni ir e kemang e birodad e gonop; nu daken Kristus e ke mat’aw nagdad Got riy ngak, kad manged e tirok’ Got e girdi’ nib thothup, ma ke pithigdad u gelngin mo’onyan’.

2 Korinth 5:21

Kristus e dariy e denen ni ngongliy, machane me fek Got e denen rodad nge tay nga daken, ni fan e ngad ta’ab girdi’gad ngak nge yag nda mat’awgad ni bod rogon Got.

Filippi 3:9

mu gu pirew ni kug ta’ab girdi’gow. Ma gathi ka gag e gu be athamgiliy ni nggu mat’aw, ni fa mit nem e mat’aw nma yag u daken e Motochiyel rok Moses ni yibe fol riy; ya chiney e kug mat’aw ni Got e ke mat’aw nigeg ni bochan e ke mich Kristus u wun’ug, ni mat’aw nike yib rok Got ni yib u daken e michan’ rog ngak Kristus.