1 Peter 2:7 - Bible Ni Thothup

⁷ Re malang ney e ba ga’ fan ngomed e pi’in ke mich u wun’med; machane pi’in ndawori mich u wun’rad e ku errogon ni be yog e babyor nib thothup ni be ga’ar: “Fare malang ni dabun e pi’in yad ma toy e naun ya ra fineyed ndariyfan e yan i aw ni aram e re malang ni ir e ba th’abi ga’ fan.”

1 Peter 2:7 Iomraidhean Croise

Isaiah 28:5

Bay reb e rran ni be yib ni SOMOL ni Gubin ma Rayag Rok e ra yan i par ni bod ba kiy i floras ni te’eliyaw nrib fel’ ya’an ni fen e tin ni magey e girdi’ rok nde yim’.

Haggai 2:7

Bay gu rurug gubin e pi nam, ma gubin e pi machaf rorad ni bay ni fek ngaray, nge sug fare Tempel ko pi manigil.

Zekariah 4:7

Tin be magawon nigem nib ga’ ko pi burey e bayi ling u p’eowchem. Bay mu toy bayay fare Tempel, ma nap’an e ga ra ayliy e bin tomur e malang nga gil’, ma bay i tolul e girdi ni yad be ga’ar, ‘Rib fel’usun, rib fel’usun!’”

Matthew 21:42

Me ga’ar Jesus ngorad, “Dawor mpoyed e n’en nike yog e babyor nib thothup? Ya ke ga’ar, ‘Fare malang ni dabun e pi’in yad ma toy e naun ya ra fineyed ndariyfan e yan i aw ni aram e re malang ni ir e ba th’abi ga’ fan. Ren’ey e Somol e yodoromnag, rib manigil e n’en ke rin’ Somol!’

Luke 2:32

ni ir e tamilang ni nge dag e kanawo’ rom ngak e pi’in gathi yad piyu Israel, me gilnag buguwan e girdi’ rom ni piyu Israel.”

Luke 2:34

Me yibiliyrow Simeon ngak Got me ga’ar ngak Maria, ni chitiningin fachi tir, “Re tir ney e Got e ke duwgiliy ni ir e bo’or e girdi’ nu Israel ni nge mul ni bochan, ma bo’or e nge thap ngak Got; me ir e bayi mang ba pow ni yib rok Got ni bo’or e girdi’ ni bayi non nib togopluw ngay,

Luke 20:17

Me sap Jesus ngorad me fithrad ni ga’ar, “Mang e be yog e re bugithin ni ba’aray ni bay u lan e babyor nib thothup nike ga’ar: ‘Fare malang ni dabun e pi’in yad ma toy e naun, ya ra fineyed ndariyfan e yan i aw ni aram e re malang ni ir e ba th’abi ga’ fan.’

John 4:42

me lungurad ko fare pin, “Ke mich u wun’mad Jesus ni gathi bochan e tin ni kam weliy ngomad, machane bochan e kug rung’aged e tin nike yog, ma aram e kug nanged nri ir fa’anem ni nge thapeg e girdi’ nu fayleng ngak Got.”

Acts 26:19

“Agrippa ni Pilung, gathi da gu fol ko tin ni gguy ni yib u tharmiy.

Roma 10:21

Machane murung’agen yu Israel ni yog e ga’ar: “Kug fael pa’ag ni kakadbul nge mada’ ko neap’ ngak girdi’en ba nam ndarir folgad ma yad be togopluw.”

Roma 15:31

Mu yibilgad ni nge ayuwegneg Got rok e pi’in nde mich Jesus u wun’rad ni yad bay u Judea, me m’ag u wan’ e girdi’ rok Got nu rom e pigpig ni bay gu tay u lan yu Jerusalem.

2 Korinth 2:16

Ma rogon u wan’ e pi’in kar maloggad e bon ban’en nra nim’ ngay; ma rogon u wan’ e pi’in kar thapgad ngak Got e bon ban’en nra yagnag e yafos. Ere mini’ e rayag rok e mit ney e maruwel?

Kolose 2:10

ma ta’ab girdi’ ni kam ted Kristus e ke yagnag ngomed urngin e pin’en ni nge ayuwegmed ngu’um rin’ed e tin nib m’agan’ Got ngay. I ir e th’abi tolang u fithik’ urngin e kan nma gagiyeg nge tin nma tay murung’agen ban’en.

Titus 3:3

Ya ku errogon gadad ni ud moyed ba ngiyal’ ni ud balyanggad, ma da ud folgad, ma gadad ba oloboch. Ma ud moyed ni gadad e sib rok e ar’ar nge gubin mit e tin ni yi ba’adag nde mat’aw u mit Got. Ma ud pired ni gadad be leamnag e kireb ngak e girdi’ ma be awan’dad ngak boch e girdi’; ma be fanenikaydad boch e girdi’ ma gadad be fanenikayrad.

Hebrews 11:31

Rahab nma pi’ ir nchuway’, e michan’ rok ngak Got e tay Rahab nde un ngak e pi’in nli’rad ngarm’ad, ni pi’in nda ur folgad rok Got, ni fan e fek fa gali damit nga tafen nge ayuwegrow.

Hebrews 4:11

Ere ngad athamgiliyed ngad uned ngak Got ko toffan. Thingari dariy bagadad ni nge dabi fol ni bod ni rin’ fa piinem, nde yag nra uned ngak Got ko toffan.

1 Peter 1:8

Ba t’uf romed, ni yugu aray rogon ndamur guyed; ma mmich u wun’med, ni yugu aray rogon ndamur guyed e chiney; ma aram fan ni ba ga’ e felfelan’ ni gimed be tay, nib felfelan’ ndabiyag ni ngan weliy ko thin,

1 Peter 2:4

Mired ngak Somol, ni ir fare malang nib fos ni n’ag e girdi’ ni lungurad e dariyfan, machane Got e turguy nri ba ga’ fan.

1 Peter 2:8

Ma ku bayang e babyor nib thothup e be ga’ar, “Ireray fare malang ni bayi tun ay e girdi’ ngay, ni fare war ni bayi dol’ nagrad.” Kar dol’gad ni bochan e de michan’rad ko thin rok Got; aram e tin ke leamnag Got ngorad.