23 हे़निङ निवानुङ होङ्निवाबेॽ चोङ लिसानिङे।
हे़निङ मक्खाम्डेमबेॽहा याॽमिजि खाङ्नुङ खोजिडोॽ ए़लिसानिङे, तर टाङ्बामि निवा होङ्सिॽयुरा चोङ लिनुङ याक्लोहा आनिबानि लेडानुमे। मोडोॽ ले़टानुमहोङ निवाहाङ्डे़ॽ हे़निङ्बेॽ ले़ःॽमा नेन्जाबॽआनुङ पक्का योम्बोक इमाङ ले़ये लुनुङ लेहेन्डानुमे।
मोडोगे़ॽ बप्तिस्मा लामाबेॽ कानिङ्सो खोनुङ्नोॽ सिनुङ हुम्सिघे़टिङ्मा, मोबा निवाहाङ पाबामि महिमामि सक्तिडे़ॽ खिरिस्ट सिबॽआबाङ हिङ्बोगु, मोडोक्नोॽ कानिङ्सो याक्लोमा पापि हिङ्मवा सिनुङ हागो चोङ हिङ्मवाबेॽ खिरिस्टडोक्नोॽ हिङ्इन्डिङ्मे।
इडोॽ पापि बानि बेहोराबेॽ निवा टिमाबेॽ चाहिँ सिमवाबेॽ रुॽइये, तर पबित्रा होङ्निवाबेॽ निवा टिमाबेॽ चाहिँ हिङ्मवानुङ सान्ति चुप्मिये।
कानिङ खोसे़ॽ टोङ्बॽआ खोमि सिरिस्टि ले़न्डिङ्मा। कानिङ्मि हिङ्मवाबाङ नुबा योम्बोक लिरो लुनुङ्नोॽ खिरिस्ट येसुबाङ निवाहाङ्डे़ॽ कानिङ टोक्सा। कानिङ्बाङ माहा नुबा योम्बोक ले़ःॽमामि लागि याक्लोनोॽ खोसे़ॽ पोरोइटे़।
हागोगो हे़निङ चोङ लिनुङ मोमिनोॽ नुबा आनिबानि ले़ःॽखुबा लिटानिङे। हे़निङ टाङ्बामि सिरिस्टिदाङ्बामि नरिङ्डोॽ खोमिन्नोॽ निवाबेॽ चोङ लिमे़ॽनिङ्सिन्डानिङ।
मोबा खोसे़ॽ कानिङ हिङ्माराप्टा। कानिङ टाङ्बे़ॽ नुबा योम्बोक ले़ःॽपॽआसे़ॽको इडोॽ लिबॽआ ने़ॽनि। तर खोमिन्नोॽ नम्नावाबाङ चुप्पॽआ चोङ हिङ्मवाबेॽ फेङ्घुबा पबित्रा होङ्निवामि सक्तिबाङ कानिङ हिङ्इटिङ्मे।
मोडोगे़ॽ योम्बोक ले़ःॽमामि हे़निङ्मि निवा पोरोगानुमे। होसियार ले़टानिङे मोबा परभु येसु लेम्माबेॽ चुप्मिये आसिसबेॽ पुरा भरोसा ले़टानुमे।
