२ तिमोथि 3:2 - याम्फु

² इन्‍ढोङ्‌होङ मोडोक्‍पेॽहा याॽमिजि टाङ्‌बारेॽनोॽ नम्‍नम ले़ःॽखुबा, याङ्‌मि बेॽलो लोभ ले़ःॽखुबा, काङायोङ्‌बा, लुबॽआ खा मे़ङ्‌खेम्‍खुबा, हाइखाजि बेजेत ले़ःॽखुबा, पाबा मामामि खा मे़ङ्‌खेम्‍खुबा, बैगुनि, असुद्‌ध,

२ तिमोथि 3:2 Iomraidhean Croise

मत्‍ति 15:6

खोसे़ॽ चाहिँ टाङ्‌बामि पाबा मामामि आदर ले़ःॽमा पाप्‍निबा। इडोॽ हे़निङे़ॽ टाङ्‌बामि रितिथिति ले़ःॽमाबेॽ निवाहाङ्‌मि बचन योम्‍बोक मे़ॽनिङ्‌मा टोङ्‌इटानुमे।

लुका 12:15

मोबा मोबेॽ सुम्‍बॽआ याॽमिजि लुसुजि, “होसियार ले़टानिङे! चोप खालहा खा के़ङ्‌गे़ङ ए़मिॽटानुमे इन्‍ढोङ्‌होङ याङ्‌सरावा बेॽलोनोॽ टुहोङ्‌सो मोसे़ॽ याॽमिजि चाइबमा हिङ्‌मवा पिहेसुनिबा।”

लुका 16:14

इघा चोप खा खेम्‍नुङ फरिसिजिडे़ॽ येसु सिःक्‍चोसुजि। इन्‍ढोङ्‌होङ माहाजिमि लागि याङ्‌नोॽ बेॽए ले़टे़।

लुका 6:35

“तर आक्‍टोक ने़ॽनि हे़निङ सिःक्‍चाघुजि नम्‍नम ले़टानुमे, चोपनोॽ नुरोॽ ले़टानुमे, सिङि ङाःक्‍खुबाजिनुङ फिरता ए़ङाःक्‍मे निवाडे़ॽ पिसानुमे। मोडोॽ ले़टानुमहोङ हे़निङे़ॽ बेॽए इनाम चुप्‍मिन्‍डानुमेनुङ निवाहाङ्‌मि पसाजि लिन्‍डानिङे। निवाहाङ्‌डे़ॽको बैगुनिनुङ दुस्‍टा याॽमिजिसो नम्‍नम ले़न्‍डुजे।

एप्‍पा चोङ्‌सा 5:36

याक्‍लोए इक्‍को खा थुदास निङ ले़ःॽखुबा याॽमि बेॽए काङायोङ्‌बा रे़क्‍से़। तर खो तिरिङ्‌गाजिडे़ॽ सेॽनेसुजि, मोबा खोमि चोप चोङ्‌साजिसो माङ्‌मिॽलिङ मे़खडामि।

रोमि 11:18

मो चेन्‍नुङ राप्‍पेबॽआ हक्‍काम्‍बाडोॽहा यहुदिजिमि पोम्‍बेॽ हे़निङ काम्‍डिबॽआ हक्‍काम्‍बाजिडे़ॽ बेॽहा खा ए़इःसानुमे। इगो खा लेसानुमे, हक्‍काम्‍बा समबाङ बेॽए ने़ॽनिबा, तर समगोरे बेॽए ले़ये।

२ कोरिन्‍थि 5:15

खो चोप याॽमिजिमि लागि सिसा, हागो खोबेॽ बिस्‍वास ले़ःॽखुबा चोप याॽमिजि खोजिमि लागि सिनुङ हिङ्‌बोक्‍खुबामि लागि हिङ्‌मा खे़ये।

फिलिप्‍पि 2:21

हाइखाजिडे़ॽको टाङ्‌बे़ॽ मिॽपॽआ खामिरेॽ ले़ख्‍खो ले़न्‍डुजे, येसु खिरिस्‍टडे़ॽ मिॽपॽआ खामि ले़ख्‍खोनोॽ ले़टुजिने।

कलस्‍सि 3:5

मोडोगे़ॽ हे़निङ्‌मि हिङ्‌मवाबेॽ टुहा इडोक्‍हा पापि योम्‍बोक बेभिचार, असुद्‌ध खा, छाडा निवा, मङे़हा निवानुङ खिक्‍तुबाङ निवा इघा चोप मुरति पुजा निवाबाङ राप्‍पेसानुमे।

२ थेस्‍लोनिकि 2:4

मोसे़ॽ आयुरो याॽमिजिडे़ॽ पुजा ले़ःॽपॽआनुङ निवाहाङ लुनुङ मिॽपॽआ चोप थोकमि बिरोध ले़न्‍डुए। मोसे़ॽको मन्‍दिरबेॽ पेन्‍नुङ कानोॽ निवाहाङ ले़ङे लुन्‍डुए।

१ तिमोथि 1:20

मोजि हुमेनियसनुङ अलेक्‍जेन्‍डर ले़न्‍जे। निवाहाङ इजामा फे़न्‍नि लुमे खा लेसुजिरो लुनुङ के़ॽ माहाजि सैतानमि हुकपेॽ युङ्‌इटुङ्‌हाजि।

१ तिमोथि 1:9

इगो खा लेयाक्‍मा खे़ये, नियमगो नुबा याॽमिमि लागि टोङ्‌बॽआ ने़ॽनि। नियमगो नियम पालना मे़ले़ःॽखुबा, लुबॽआ मे़ङ्‌खे़म्‍खुबा, निवाहाङ्‌नुङ मे़ङ्‌किस्‍सिखुबा, असुदधा, अधरमि, पापि, मोबा टाङ्‌बामि पाबा, मामा सेॽखुबाजि, याॽमि सेक्‍खुबाजि,

१ तिमोथि 3:3

इ, टोप्‍टे़ॽवा मे़उङ्‌खुबा याॽमिजिनुङ खिमाचुमा मे़योक्‍खुबा लिमा खे़ये। खोगो सहनसिल लिमा खे़ये, याङ्‌सरावामि लोभ ले़ःॽमा फे़न्‍निबा।

१ तिमोथि 6:10

इन्‍ढोङ्‌होङ याङ्‌मि लोभ ले़ःॽमानोॽ चोप खालहा मङे़हा खामि टुम्‍बिरा ले़ये। इन्‍डोॽ याॽमिजि याङ लोभ ले़ःॽनुङ निवाहाङ्‌बेॽ बिस्‍वास ले़ःॽमानोॽ ले़ःॽपेटुजे मोबा बेॽलो खेःडे़ॽ खोजिमि चुवाबेॽ खाॽइटुए।

१ तिमोथि 6:4

माहाजि काङायोङ्‌बा लिनुङ इमाङ्‌सो लेसुजिने। खो माङ्‌माङ निहु योॽइये, इक्‍को इक्‍को खामि टुम्‍बेॽ खिमा योॽइये। इडोक्‍हा खाडे़ॽ, चेजेवा, खिमाचुमा, अपमाननुङ मङे़हा सङ्‌क पुःक्‍इहा

२ तिमोथि 3:4

माहाजिडे़ॽ हाइखा याॽमिजि फेल्‍लाम (धोका) पिन्‍डुजे, इमाङ्‌गो इमाङ ले़म्‍मेनुङ बेॽए रे़ङ्‌इम्‍मे, मोबा निवाहाङ्‌बाङ्‌सो बेॽलो सुख बिलास चाहिँ नेन्‍जोन्‍डुजे।

याकुब 2:8

“टाङ्‌बामि पेन्‍लागामजि टाङ्‌बा नम्‍नम ले़टिडोक्‍नोॽ नम्‍नम ले़टानुमे” लुनुङ पबित्‍रा धारमिक नेॽचिराबेॽ साप्‍पॽआ निवाहाङ्‌मि राज्‍यमि नियमडे़ॽ लुडिडोॽ ले़टानुमहोङ्‌गो नुबानोॽ लिये।

याकुब 4:16

तर हे़निङ्‌गो सेखि ले़न्‍डानिङे। इडोॽ सेखि ले़ःॽमा नुबा ने़ॽनि।

याकुब 4:6

तर निवाहाङ्‌डे़ॽ हागोसो बेॽलो अनुग्‍रहा ले़ये। मोडोगे़ॽ पबित्‍रा धरमिक नेॽचिराबेॽ इडोॽ साप्‍पॽआ ले़ये, “निवाहाङ्‌डे़ॽ काङायोङ्‌बाजिमि बिरोध ले़न्‍डुए, तर ए़डे़म्‍मा लिघुबाजि अनुग्‍रहा ले़न्‍डुजे।”

१ पत्‍रुस 5:5

मोडोक्‍नोॽ वेन्‍जाजि, मन्‍डलिबेॽहा एल्‍डरजिमि खा खेप्‍सानुमेनुङ खोजिमि अधिनबेॽ पेनानिङे। हे़निङ इक्‍कोसे़ॽ हाइकोमि अधिनबेॽ ए़डे़म्‍मा लिनुङ पेनानिङे। इन्‍ढोङ्‌होङ धारमिक नेॽचिराडे़ॽ इडोॽ लुये, “निवाहाङ्‌डे़ॽ काङायोङ्‌बाजिमि बिरोध ले़न्‍डुजे, तर ए़डे़म्‍मा लिघुबाजि अनुग्‍रहा ले़न्‍डुजे।”

२ पत्‍रुस 2:10

चइबानोॽ लुमाबेॽ इघा याॽमिजि निवाहाङ्‌मि खा हेला ले़ःॽखुबाजि, मोबा खोजिदाङ्‌बा चिक्‍चिमिम्‍मारो छाडा लिनुङ राम्‍घुबाजि न्‍यायमि लागि मो याकठोक हाम्‌युङ्‌इम्‍मे। इघा मे़ॽनोक्‍हा सिक्‍छे पिघुबाजि लुबॽआ मे़ङ्‌खेम्‍खुबानुङ काङायोङ्‌बा ले़म्‍मेनुङ इघाजिडे़ॽ थाङ्‌सिरिॽटुहाजिमि बेजेत ले़न्‍डुजे।

२ पत्‍रुस 2:12

तर इघा याॽमिजि खोजिडे़ॽसो मे़लेबॽआ खामि टुम्‍बेॽ सिःक्‍चोन्‍डुजे। इघाजि नुबानुङ मङे़हा लेमे निवानोॽ मे़ॽनिङ्‌हा जन्‍तुजिडोॽ ले़म्‍मे। इघाजि राःप्‍नुङ सेॽनेमामि टोक्‍पॽआडोॽ ले़म्‍मेनुङ इघाजि जन्‍तुजिडोॽ नासि लिघे़म्‍मे।

२ पत्‍रुस 2:18

माहाजिडे़ॽ काङायोङ्‌बानुङ उम्‍बरिङ खा इन्‍डुजे, मोबा हिङाडे़ॽ ले़ःॽमा मिॽपॽआ मङे़ॽमा योम्‍बोक ले़ःॽमेॽनुङ भरखरि बिस्‍वासबेॽ लेम्‍बॽआ याॽमिजि रेम्‍इन्‍डुजे।

२ पत्‍रुस 2:3

इडोक्‍हा मे़ॽनोक्‍हा सिक्‍छे इःॽखुबाजि लोभि ले़म्‍मे, माहाजिडे़ॽ माङ्‌माङ्‌हा पारलेन इःनुङ हे़निङ रेम्‍इम्‍मे। याक्‍लोनोॽ माहाजिमि न्‍याय लिबेटे़नुङ, माहाजि चइबानोॽ नासि लिम्‍मे।

यहुदा 1:16

कुनु कुनुॽ काघुबाजि, बिसोन्‍तोकिजि, टाङ्‌बामि मङे़ॽमा निवाडे़ॽ लुबॽआ रामबेॽ राम्‍घुबाजि, काङायोङ्‌बा खा इःघुबाजिनुङ टाङ्‌बामि योम्‍बोकमि लागि नेदवा रे़ङ्‌घुबाजि इघाजिनोॽ ले़म्‍मे।

परकास 13:1

माहोङ्‌माबाङ इक्‍को जिवात पे़आप्‍पॽआ के़ॽ खाङ्‌डोक्‍टुङ, मोमि इक्‍पोङ गोटा सजाङ्‌नुङ एच्‍चि गोटा निन्‍डवाँ टुसा। मोमि चोप सजाङ्‌बेॽ इक्‍को इक्‍को मुकुट टुसा, मोमि चोप निन्‍डवाँबेॽ निवाहाङ सिःक्‍चामे इक्‍को निङ टुसा।

परकास 16:11

माहाजिमि हुवा टुक्‍पॽआसे़ॽ निवाहाङ चापहिसुजि। तर हागोसो खोजिडे़ॽ टाङ्‌बामि पापि योम्‍बोक ले़ःॽमा मे़लेडुजि।

परकास 16:21

मोबा नान्‍द्‌रुङ्‌माबाङ बेॽहा बेॽहा रिबोङ ङाबोङ किलोडोक्‍हा ओम याॽमिजिसोक्‍पेॽ हेडा। माहा याॽमिजिडे़ॽ मो खेः आङ्‌मा सिॽमाबेॽ निवाहाङ चापहिसुजि, इन्‍ढोङ्‌होङ चइबानोॽ इगो ओममि बिपत्‍ति चाहिँ सारोनोॽ किस्‍सिमारोमा ले़टा।

परकास 16:9

नम सारोनोॽ राःक्‍पॽआसे़ॽ मो कुहाङ्‌डे़ॽ याॽमिजि हिडुजि, मोडोक्‍पेॽ छना माहा याॽमिजिडे़ॽ इडोक्‍हा बिपत्‍ति लाजे़ॽहेघुबा निवाहाङ चापहिसुजि। मोबा खोजिडे़ॽ पाप ले़ःॽमासो मे़लेडुजि, निवाहाङ्‌मि आदरसो मे़ले़टुजि।