१ तिमोथि 1:5 - याम्फु

⁵ कानिङे़ॽ पिबॽआ सिक्‍छेडे़ॽ नम्‍नम ले़ःॽखुसे़ॽचुमे खा इःये। इगो चाहिँ चोखो निवा, नुबानुङ मङे़ॽमा लेमे निवा चाइबानोक्‍मा बिस्‍वासबाङ लेङ्‌इये।

१ तिमोथि 1:5 Iomraidhean Croise

मत्‍ति 12:35

नुबा निवा खिघुबा याॽमिडे़ॽ नुबानोॽ खा याबुकबाङ यामुन्‍डुहा। तर मङे़हा निवा खिघुबा याॽमिडे़ॽ मङे़हानोॽ खा याबुकबाङ यामुन्‍डुहा।

मत्‍ति 5:8

चोखो निवा खिघुबाजि आसिसित ले़म्‍मे, इन्‍ढोङ्‌होङ खोजिडे़ॽ निवाहाङ खाङ्‌डोइन्‍डुजे।

एप्‍पा चोङ्‌सा 15:9

निवाहाङ्‌डे़ॽ अयहुदि जातिजिनुङ कानिङ यहुदिजिमि रुम्‍बेॽ इमाङ्‌सो हेलाहोचो मे़ले़टुजि। खोजिडे़ॽसो निवाहाङ्‌बेॽ बिस्‍वास ले़ःॽपॽआसे़ॽ खोजिमि निवा चोखो टोङ्‌बेॽटुजि।

एप्‍पा चोङ्‌सा 23:1

पावलडे़ॽ मोबेॽ सुम्‍बॽआ चोप खाङ्‌नुङ इडोॽ लुसु, “होउ वावानिसाजि, आयुरो के़ए़ हिङ्‌मवाबेॽ निवाहाङ्‌मि पोम्‍बेॽ चोखो निवा युङ्‌इटुङे।”

एप्‍पा चोङ्‌सा 24:16

मोडोगे़ॽ का निवाहाङ्‌नुङ याॽमिजिमि पोम्‍बेॽ के़ए़ निवा चोखो युङ्‌मा मिॽइनुङे।

रोमि 10:4

खिरिस्‍टबेॽ बिस्‍वास ले़ःॽखुबाजि बिस्‍वासबाङ्‌नोॽ धरमि लिम्‍मे लुबॽआसे़ॽ, मो धारमिक नियम खिरिस्‍टडे़ॽ पुरा ले़टु।

रोमि 12:9

हे़निङे़ॽ नम्‍नम ले़ःॽमाबेॽ याॽमिजि खाङ्‌मुमामि लागिरेॽनोॽ ने़ॽनि, तर निवा होङ्‌सिॽयुरा चाइबमा नम्‍नम ले़टानुमे। हाम्‍बे खा मङे़हा ले़ये मो लेॽपेनुङ नुबा खाबेॽ सानिङ निवा टिसानुमे।

रोमि 14:15

हे़ने़ॽ इमाङ चोन्‍डुए अथबा उङ्‌इन्‍डुए मोसे़ॽ हे़ने़ए़ वावानिसा, लङ्‌गाममि बिस्‍वासबेॽ बाधा ले़न्‍डुहोङ हे़ने़ॽ माहाजि नम्‍नम ले़टुजिने। इन्‍ढोङ्‌होङ खिरिस्‍ट सिनुङ मो निसा हिङ्‌मवा पिटुए, हे़ने़ॽ चाबॽआ खाडे़ॽ मोमि हिङ्‌मवा नास मे़लिरो।

रोमि 9:1

हागो के़ॽ खिरिस्‍टमि निङ्‌बेॽ चाइबमा खा इःमे़ॽनिङ्‌सिनुङे़, रेम्‍डेॽपॽआ ने़ॽनि। पबित्‍रा होङ्‌निवामि पोम्‍बेॽ टुये काङ्‌मि नुबानुङ मङे़ॽमा खा लेघुबा निवाडे़ॽ इगो खामि साक्‍छि पिये।

१ कोरिन्‍थि 13:1

के़ॽ याॽमिजिमि खाल खालहा खाप्‍लानुङ थाङ्‌सिरि दुतजिमि खाप्‍लाबेॽनोॽ यामुङाहोङ्‌सो काबेॽ नम्‍नम माॽआहोङ, के़ॽ यामुबॽआ खागो मे़नोक्‍सो झाइ झाइ अथबा ठङ ठङ मुॽइये टेन्‍जिराडोॽमारेॽ लिये।

२ कोरिन्‍थि 1:12

मक्‍खाम्‍डेमबेॽहा याॽमिजिनुङ मोबाङ्‌सो बेॽलो हे़निङ्‌नुङ सोरि पेम्‍माबेॽ कानिङ्‌मि चाल चलन चोखो युङ्‌नुङ इमान्‍दार हिङ्‌बॽआ खा निवाबाङ इमाङ मे़मिॽलेॽ लुहेन्‍डुङ्‌मा। इघा खाबेॽ कानिङ ओहाक कान्‍डिङ्‌मे़। इगो चाइबमा निवा कानिङे़ॽ निवाहाङ्‌बाङ चुप्‍मिटुङ्‌मे। इगो निवाहाङ्‌मि अनुग्‍रहाबाङ चुप्‍पॽआ ले़ये, तर याॽमिमि निवा ने़ॽनिबा।

गलाति 5:22

पबित्‍रा होङ्‌निवामि चा लुबॽआ चाहिँ इघा ले़हा-नम्‍नम ले़ःॽमा, हाङ्‌हाङ लिमा, याॽमिजिनुङ टोङ्‌जामा, निवा अधिनबेॽ युङ्‌मा, नम्‍नावा ले़ःॽमा, भलाइमि योम्‍बोक ले़ःॽमा, भरोसानुङ्‌मा लिमा,

गलाति 5:6

खिरिस्‍ट येसुमि पोम्‍बेॽ खतना ले़ःॽपॽआ याॽमिनुङ खतना मे़ले़ःॽपॽआ इक्‍कोनोॽ लिन्‍जे। तर पाप्‍मिये खा चाहिँ नम्‍नमनुङ योम्‍बोक ले़ःॽखुबा बिस्‍वास ले़ये।

१ तिमोथि 1:18

खेप्‍से, हे़न के़ए़न्‍नोॽ पसाडोॽमा तिमोथि, बेॽलो याक्‍लो हे़ने़ए़ टुम्‍बेॽ निवाहाङ्‌बाङ्‌ए खाडे़ॽ लुबॽआडोॽ के़ॽ हे़न मिन्‍डुहा खा लुन्‍ने़। नुबा योम्‍बोक ले़ःॽमामि निवाहाङ्‌डे़ॽ लुबॽआ मो खाबाङ हौसला चुप्‍नुङ सुसमाचारमि लागि नुरोॽ ङे ले़टे।

१ तिमोथि 1:19

मोडोक्‍पेॽ हे़ने़ॽ आमटाङ्‌बामि बिस्‍वास, मोबा नुबानुङ मङे़ॽमा लेमे निवा नुरोॽ हुप्‌युङ्‌मे़। मो निवाडे़ॽ लुबॽआ खा मे़ङ्‌खे़म्‍खुबाजिडे़ॽ टाङ्‌बामि बिस्‍वासनोॽ मे़चोबेसुजि।

१ तिमोथि 3:9

खोजिमि बिस्‍वासमि गहिरो चाइबमा खा सानिङ्‌मु निवाबेॽ नुरोॽ युङ्‌मा खे़ये।

२ तिमोथि 1:3

के़ॽ काङ्‌मि नुबानुङ मङे़ॽमा लेघुबा निवाडे़ॽ सेवा ले़ःपॽआ निवाहाङ ओहाक पिनुङे़, याक्‍लो खो के़हा टुबालाबाजिडे़ॽ सेवा ले़टुजे। के़ॽ सानिङ्‌नोॽ के़ए़ पारथनाबेॽ हे़न मिॽइन्‍ने़।

२ तिमोथि 1:5

हे़ने़ए़ मो चाइबमा बिस्‍वास मिॽइनुङे। मोडोक्‍मानोॽ चाइबमा बिस्‍वास याक्‍लो हे़ने़ए़ टुमा लोइसबेॽ, मोबा हे़ने़ए़ मामा युनिसबेॽसो टुसे़। मोबा के़ॽ लेनुङे़ मोडोक्‍मानोॽ चाइबमा बिस्‍वास हे़न्‍नुङ्‌सो टुये।

२ तिमोथि 2:22

मोडोगे़ॽ वेन्‍जा टुमाबेॽ लेङ्‌इहा मङे़हा लालचाबाङ ओः पेने। मोबा चोखो निवाडे़ॽ परभुमि निङ लाघुबा धरमि याॽमिजिनुङ सोरि बिस्‍वास, नम्‍नमनुङ सान्‍तिबेॽ पेने।

तितस 1:15

चोखो निवा काप्‍खुबा याॽमिजिमि लागि चोप चोखो ले़हा। तर मङे़ॽमा निवा काप्‍खुबानुङ बिस्‍वास मे़ले़ःॽखुबा याॽमिजिमि लागि चोप थोकनोॽ मङे़ॽमानोॽ ले़हा। हाम्‍बे नुबा हाम्‍बे चाहिँ मङे़ॽमा लुनुङ लेमे निवानोॽ काप्‍टुजिने।

हिब्‍रु 10:22

कानिङ्‌मि निवाहोङ्‌सिॽयुहा मङे़हा खा चोखो लिटहा, मोबा खिरिस्‍टमि हरिडे़ॽ कानिङ्‌मि हिङा वासोक्‍इटुए, मोडोगे़ॽ चोखो निवा, चाइबमा बिस्‍वासडे़ॽ ढुक्‍का लिनुङ कानिङ निवाहाङ्‌मि पोम्‍बेॽ खे़ॽमा।

हिब्‍रु 13:18

कानिङ्‌मि लागि पारथना ले़टानुमे। कानिङे़ॽ बिस्‍वास ले़न्‍डुङ्‌मे, कानिङ्‌मि होङ्‌सिॽयुए निवा चोखो ले़ये, इन्‍ढोङ्‌होङ कानिङे़ॽ सानिङ नुबा योम्‍बोक ले़ःॽमारेॽ मिॽइन्‍डुङ्‌मे़।

हिब्‍रु 9:14

खिरिस्‍टमि हरिडे़ॽको छना इन्‍डोक बेॽलो हे़निङ्‌मि पापडे़ॽ सिबॽआ निवानुङ, असुद्‌ध योम्‍बोकबाङ चोखो टोङ्‌इन्‍डुहा। इडोॽ लिमाबेॽ हे़निङे़ॽ हिङ्‌रिक निवाहाङ्‌मि ओहाङ ले़ःॽहेसानुमे लुनुङ खिरिस्‍टडे़ॽ खोम्‍दाङ्‌बा चोखो बलि लिनुङ निवाहाङ्‌मि हुकपेॽ चेॽटिसु।

याकुब 4:8

हे़निङ निवाहाङ्‌मि के़क्‍पेॽ आबानिङे मोबा निवाहाङ्‌सो हे़निङ्‌मि के़क्‍पेॽ आप्‍मिये। पापिजि हे़निङ्‌मि निवा चोखो टोक्‍सानुमे। कप्‍टि याॽमिजि हे़निङ्‌मि निवा सुद्‌ध टोक्‍सानुमे।

१ पत्‍रुस 1:22

हागो हे़निङे़ॽ चाइबमा खा पालना ले़ःॽनुङ टाङ्‌बामि निवा चोखो टोङ्‌इटानुमे, मोबा हे़निङ्‌मि बिस्‍वासि वावानिसानुङ नानुसाजि चइबानोॽ नम्‍नम ले़ःॽखुबा लिटानिङे। हे़निङ टाङ्‌बा इक्‍कोसे़ॽ हाइको निवाबाङ्‌नोॽ नम्‍नम ले़ःॽमे़।

१ पत्‍रुस 3:16

तर इगो खा इःमाबेॽ ए़डे़म्‍मा लिनुङ आदरनुङ यामुसानिङे। हे़निङ्‌मि नुबानुङ मङे़ॽमा लेमे निवा चोखो युक्‍सानुमे। मोडोॽ ले़ःॽमाबेॽ हे़निङे़ॽ खिरिस्‍टियानजिडे़ॽ ले़ःॽपॽआ चाल चलन खाङ्‌नुङ हे़निङ्‌मि बदनाम ले़ःॽखुबाजि ङेम्‍माबेॽ सिॽइम्‍मे।

१ पत्‍रुस 3:21

इगो योङानोॽ आइ याॽमिजिडे़ॽ लामे बप्‍तिस्‍मामि चिङ्‌गा ले़ये, मोसे़ॽ हे़निङ हिङ्‌माराप्‍मिये। इगो हिङामि मिक्‍नुवा वासोक्‍पॽआडोॽमा ने़ॽनिबा, तर इगो चोखो निवाडे़ॽ निवाहाङ्‌नुङ ले़ःॽपॽआ बेॽए हेन्‍ज्‍रुङ ले़ये। येसु खिरिस्‍ट सिबॽआबाङ हिङ्‌बोक्‍पॽआसे़ॽ बप्‍तिस्‍माडे़ॽ हे़निङ हिङ्‌मेन्‍डानिङे।

१ पत्‍रुस 4:8

चोप्‍पाङ बेॽलो चाहिँ इक्‍कोसे़ॽ हाइको सानिङ्‌नोॽ नम्‍नम ले़चामे। इन्‍ढोङ्‌होङ नम्‍नमडे़ॽनोॽ बेॽलो पाप टे़क्‍हेन्‍डुहा।

२ पत्‍रुस 1:7

भक्‍ति ले़ःॽसाङ चोप वावानिसाजिनुङ सानुङ्‌उमि नम्‍नम येॽखे़टानुमे। मोबा इडोॽ चोपजिनुङ नम्‍नम ले़ःॽखुसे़ॽचुसानिङे।

१ युहन्‍ना 3:10

निवाहाङ्‌मि पसानुङ सैतानमि पसा इडोक्‍नोॽ लेहेये। निवाहाङ्‌मि पोम्‍बेॽ चाइबमा योम्‍बोक मे़ले़ःॽखुबा, टाङ्‌बामि वावानिसाजि नम्‍नम मे़ले़ःॽखुबा चाहिँ निवाहाङ्‌मि पसा ने़ॽनिबा।

१ युहन्‍ना 3:23

निवाहाङ्‌मि आग्‍या चाहिँ इघानोॽ ले़हा- खोमि पसा येसु खिरिस्‍टबेॽ बिस्‍वास ले़ःॽमा खे़ये, मोबा खिरिस्‍टडे़ॽ लुडिडोॽ इक्‍कोसे़ॽ हाइको नम्‍नम ले़ःॽमा खे़ये।

१ युहन्‍ना 3:3

मोबा इन्‍डोक खो पबित्‍रा ले़ये, मोडोक्‍नोॽ खोसोक्‍पेॽ आसा ले़ःॽखुबा चोप याॽमिडे़ॽसो पबित्‍रा लिमा खे़ये।