१ थेस्‍लोनिकि 4:1 - याम्फु

¹ हागो वावानिसानुङ नानुसाजि, हे़निङे़ॽ निवाहाङ्‌डे़ॽ नेन्‍जामारोमा हिङ्‌मवा इन्‍डोक्‍टे हिङ्‌मे लुमे खा कानिङ्‌बाङ चिङ्‌इटानुमे। चइबानोॽ कानिङ्‌बाङ चिम्‍बॽआ चाल चलन हे़निङे़ॽ ले़ःॽमे़ॽनिङ्‌सिन्‍डानुमे, मोबा अक्‍खा चाल चलन छना नुरोॽ ले़ःॽखे़ॽटानुमे लुनुङ बिन्‍ति ले़न्‍निम्‍ने़।

१ थेस्‍लोनिकि 4:1 Iomraidhean Croise

युहन्‍ना 15:2

काबेॽ टुघुबा चोप चा मे़ङ्‌किङ्‌घुबा हक्‍काम्‍बा खोसे़ॽ चेन्‍नुङ राप्‍पेन्‍डुए, तर चा किङ्‌घुबा हक्‍काम्‍बाबेॽ हागोसो बेॽलो चा किङ्‌रो लुनुङ सेबोक्‍इन्‍डुए।

एप्‍पा चोङ्‌सा 20:27

इन्‍ढोङ्‌होङ निवाहाङ्‌डे़ॽ कानिङ्‌मि लागि ले़ःॽपॽआनुङ ए़क्‍साङ लिहा खामि टुम्‍बेॽहा इमाङ खासो के़ए़ निवाबेॽ मे़युङ्‌लेॽ हे़निङ लुबेॽनिम्‍ना।

रोमि 8:8

पापि बानि बेहोरामि अधिनबेॽ राम्‍खुबा याॽमिजिडे़ॽ निवाहाङ साप्‍थाङ्‌मेॽहेसुनिजि।

१ कोरिन्‍थि 11:23

इन्‍ढोङ्‌होङ के़ॽ हे़निङ पिबॽआ इगो सिक्‍छे परभुबाङ्‌नोॽ चुप्‍मिटुङे। परभु येसु खोमि सतुरजिडे़ॽ राःप्‍मे याकमि सेन्‍डा खोसे़ॽ हुकपेॽ चरेपा लासु,

१ कोरिन्‍थि 15:1

हागो वावानिसानुङ नानुसाजि, के़ॽ हे़निङ खेम्‍मेॽपॽआ सुसमाचारमि टुम्‍बेॽ हागोसो मिडानुमे लुमा मिॽनिम्‍ने़। हे़निङे़ॽ खेम्‍बॽआ सुसमाचारबेॽ बिस्‍वास ले़टानुमनुङ मो खाबेॽनोॽ हे़निङ टुन्‍डानिङे।

१ कोरिन्‍थि 15:58

मोडोगे़ॽ के़हा वावानिसानुङ नानुसाजि, बिस्‍वासबेॽ पक्‍का लिसानिङे, खोबेॽ सानिङ हे़निङ्‌मि निवा टिसानुमे। सानिङ परभुमि योम्‍बोक ले़ःॽमा बोल ले़टानिङे, इन्‍ढोङ्‌होङ परभुमि योम्‍बोकपेॽ दुःख ले़ःॽपॽआ के़न्‍डिॽखे़ॽनिबा लुमे खा हे़निङे़ॽ लेन्‍डानुमे।

२ कोरिन्‍थि 10:1

का पावल, हे़निङ्‌मि पोम्‍बेॽ ए़डेम्‍मा लिङेरो, तर ओः टुमाबेॽ याटेवा ले़ङेरो लुमे खा मुॽइटे़ले़। खिरिस्‍टडोक्‍नोॽ ए़डेम्‍मा लिनुङ, नम्‍नावानुङ्‌मा लिनुङ हे़निङ बिन्‍ति ले़निम्‍ने़।

२ कोरिन्‍थि 13:11

के़हा वावानिसानुङ नानुसाजि हागो का बिदा लिङे, हाङ्‌हाङ्‌नुङ पेनानिङे। बिस्‍वासबेॽ पक्‍का लिमामि लागि सानिङ बोल लिसानिङे। हे़निङ बिन्‍ति ले़ःॽपॽआ खा खेप्‍सानुमे, इक्‍कोसे़ॽ लुबॽआ खा हाइकोसे़ॽ खेप्‍सानुमे, मे़ङ्‌खिरेॽ पेनानिङे। मोबा सान्‍तिनुङ नम्‍नम पिघुबा निवाहाङ हे़निङ्‌नुङ पेङ्‌इये।

२ कोरिन्‍थि 5:9

मोडोगे़ॽ कानिङ इगो हिङाबेॽ टुमाबेॽहोङ्‌सो, परभुनुङ सोरि टुमाबेॽहोङ्‌सो परभुडे़ॽ नेन्‍जामारोमा योम्‍बोक ले़ःॽमा मिॽइन्‍डुङ्‌मे़।

२ कोरिन्‍थि 6:1

कानिङ निवाहाङ्‌नुङ सोरि योम्‍बोक ले़ःॽखुबाजि लिबॽआसे़ॽ हे़निङ बिन्‍ति ले़निम्‍ने़, हे़निङे़ॽ निवाहाङ्‌बाङ चुप्‍पॽआ अनुग्‍रहा खेरो ए़क्‍खे़ॽमेॽटानुमे।

गलाति 6:1

के़हा वावानिसानुङ नानुसाजि इक्‍को याॽमि अपराधबेॽ सिॽहोङ हे़निङ पबित्‍रा होङ्‌निवामि अधिनबेॽ हिङ्‌घुबाजिडे़ॽ ए़डेम्‍मा लिनुङ खोमि सुधार ले़टानुमे। खो सुधार ले़ःॽमाबेॽ हे़निङ्‌टाङ्‌बासो पाप योम्‍बोक मे़लिरो लुनुङ टाङ्‌बा होसियार ले़टानुमे।

एफिसि 4:1

मोडोगे़ॽ परभुमि योम्‍बोकमि लागि तिरिङ्‌गा खिमबेॽ से़क्‍सिघे़ॽपॽआ का पावलडे़ॽ हे़निङ्‌नुङ बिन्‍ति ले़निम्‍ने़, निवाहाङ्‌डे़ॽ हे़निङ इमा योम्‍बोकमि लागि के़ए़टे़ मोमि लागिनोॽ हिक्‍सानिङे।

एफिसि 4:20

तर हे़निङे़ॽ चाहिँ खिरिस्‍टमि सिक्‍छेबाङ मोडोक्‍हा मङे़हा खागो मे़न्‍चिन्‍डिॽटानुम।

एफिसि 5:17

मोडोगे़ॽ उम्‍बरिङ ए़ॽलिसानिङे, तर परभुडे़ॽ हे़निङे़ॽ इमा ले़ःॽपॽआ नेन्‍जोन्‍डुए मो खा नुरोॽ लेसानुमे।

फिलिप्‍पि 1:27

चोप्‍पाङ बेॽए खा लुबॽआ चाहिँ हे़निङ्‌मि चाल चलन सुसमाचार परचार ले़ःॽमारोमा लिमा खे़ये। मोडोगे़ॽ का हे़निङ्‌बेॽ लेङ्‌ङासो मे़लेङ्‌ङासो हे़निङ चाहिँ इक्‍को होङ्‌निवाबेॽ बोलियो लिसानिङे। मोबा इक्‍कोनोॽ योम्‍बोक ले़ःॽमे निवा खिनुङ बेॽलो याॽमिजिडे़ॽ बिस्‍वास ले़टुमिरो मिॽनुङ सुसमाचारमि परचार ले़ःॽपॽआ के़ॽ खेम्‍मा मिॽइनुङे।

फिलिप्‍पि 1:9

हे़निङ्‌मि रुम्‍बेॽ बुद्‌धि, निवानुङ मोबाङ्‌सो बेॽलो इक्‍कोसे़ॽ हाइको नम्‍नम ले़ःॽखुसे़ॽचुसानिङे लुनुङ के़ॽ पारथना ले़नुङे।

फिलिप्‍पि 3:14

थाङ्‌सिरिबेॽ चुप्‍मिये इनाममि निसानालाम का बोल टिनुङ पोम्‍बेॽ खे़ॽमे़ॽनिङ्‌सिङे। निवाहाङ्‌डे़ॽनोॽ इगोमि लागि खिरिस्‍ट येसुराम्‍बाङ का के़ए़टिङे।

कलस्‍सि 1:10

मोडोॽ ले़ःॽमाहोङ निवाहाङ्‌डे़ॽ नेन्‍जामारोमा योम्‍बोक ले़ःॽनुङ खो साप्‍थाङ्‌मेन्‍डुङ्‌मे। चोप नुबा योम्‍बोकपेॽ हे़निङ आसिसित लिन्‍डानिङे, मोबा हे़निङ निवाहाङ्‌मि निवाबेॽ वाबोक्‍इन्‍डानिङे।

कलस्‍सि 2:6

इन्‍डोॽ हे़निङे़ॽ खिरिस्‍ट येसु परभु मिॽनुङ बिस्‍वास ले़ए़टानुमे, मोडोक्‍नोॽ हे़निङ खोबेॽ हिक्‍सानिङे।

१ थेस्‍लोनिकि 3:12

कानिङे़ॽ हे़निङ नम्‍नम ले़ःॽपॽआडोक्‍नोॽ परभुडे़ॽसो हे़निङ्‌टाङ्‌बा नम्‍नम ले़ःॽखुसे़ॽचुघुबा लिसानिङे, मोबा खोसे़ॽ याॽमिजि नम्‍नम ले़ःॽखुबा टोक्‍सुरो।

१ थेस्‍लोनिकि 4:2

इन्‍ढोङ्‌होङ कानिङे़ॽ परभु येसुबाङ चुप्‍पॽआ हाम्‍बे हाम्‍बे आग्‍या हे़निङ पिटुङ्‌मे मो खा लेन्‍डानुमे।

१ थेस्‍लोनिकि 5:12

वावानिसानुङ नानुसाजि, हे़निङ्‌मि रुम्‍बेॽ दुःख ले़ःॽसाङ परभुमि योम्‍बोक ले़ःॽनुङ हे़निङ सिक्‍छे पिघुबा मोबा मङे़हा योम्‍बोक ए़डिॽयो लुघुबा अगुवाजि हे़निङे़ॽ आदर ले़टानुमे।

२ थेस्‍लोनिकि 1:3

वावानिसाजि, हे़निङ बिस्‍वासबेॽ छना पक्‍का लिमे़ॽनिङ्‌सिन्‍डानिङे। नम्‍नम ले़ःॽखुसे़ॽचुमे खाबेॽसो हे़निङ नुबा ले़ःन्‍डानिङे। मोडोगे़ॽ हे़निङ्‌मि लागि सानिङ्‌नोॽ निवाहाङ ओहाक पिमानोॽ खे़ये।

२ थेस्‍लोनिकि 2:1

वावानिसानुङ नानुसाजि, कानिङ्‌मि परभु येसु फेरि लेङ्‌इये लुमे खामि टुम्‍बेॽनुङ खो चुप्‍सिॽ कानिङ चोप सुम्‍इन्‍डिङ्‌मा लुमे खामि टुम्‍बेॽ हे़निङ बिन्‍ति ले़निम्‍ने़।

२ थेस्‍लोनिकि 3:1

चोप्‍पाङ ए़क्‍साङ, वावानिसानुङ नानुसाजि, हे़निङे़ॽ निवाहाङ्‌मि सुसमाचार सम्‍मान ले़टिडोॽ हाइखा चोप ठाउँबेॽ निवाहाङ्‌मि बचन फोप्‍पुक्‍नुङ चोप याॽमिजिडे़ॽ सम्‍मान ले़ःॽहेसुजिरो लुनुङ कानिङ्‌मि लागि पारथना ले़ःॽपेॽमा।

२ थेस्‍लोनिकि 3:13

वावानिसानुङ नानुसाजि, भलाइमि योम्‍बोक ले़ःॽमामि हे़निङ इन्‍डोक्‍पेॽसो याःक्‍चघे़ॽमा फे़न्‍निबा।

१ तिमोथि 5:21

निवाहाङ, येसु खिरिस्‍टनुङ निवाहाङ्‌डे़ॽ से़म्‍बॽआ थाङ्‌सिरि दुतजिमि साक्‍छिबेॽ के़ॽ हे़न इगो आग्‍या पिन्‍ने़। के़ॽ लुबॽआ इघा खा हे़ने़ॽ ले़ःॽमाबेॽ असासो काखा पाखा ए़ले़ःॽमे।

२ तिमोथि 4:1

निवाहाङ्‌मि पोम्‍बेॽ मोबा सिघे़ॽपॽआजिनुङ हिङ्‌रिकजिमि न्‍याय ले़ःॽसिॽ लेङ्‌खुबा खिरिस्‍ट येसुमि पोम्‍बेॽ मोबा खिरिस्‍ट लेङ्‌इये खानुङ खोमि राज्‍य निवाबेॽ मिॽसाङ के़ॽ हे़न इडोॽ आग्‍या ले़न्‍ने़,

हिब्‍रु 11:6

बिस्‍वास मे़ले़ःॽलेॽ असे़ॽसो निवाहाङ साप्‍थाङ्‌मेॽहेसुनिबा, इन्‍ढोङ्‌होङ निवाहाङ्‌बेॽ लेङ्‌घुबाजिबेॽ बिस्‍वास टुमानोॽ खे़ये। निवाहाङ टुये, मोबा खो योक्‍खुबाजि खोसे़ॽ इनाम पिन्‍डुजे लुनुङ बिस्‍वास ले़ःॽमा खे़ये।

हिब्‍रु 13:16

इक्‍कोसे़ॽ हाइकोमि लागि भलाइमि योम्‍बोक ले़ःॽमा ए़लेडानुमे, मोबा टाङ्‌बानुङ टुहा खा हाःजासानुमे, इन्‍ढोङ्‌होङ निवाहाङ्‌डे़ॽ नेन्‍जाबॽआ बलिदान इगोनोॽ ले़ये।

हिब्‍रु 13:22

वावानिसानुङ नानुसाजि, के़ॽ हे़निङ बिन्‍ति ले़निम्‍ने़, हे़निङे़ॽ इघा अरति खेप्‍सानुमे, इन्‍ढोङ्‌होङ के़ॽ हे़निङ्‌मि लागि इगो ने़क्‍ने़क्‍मा पत्‍रा साप्‍मिटुङे।

२ पत्‍रुस 3:18

तर कानिङ्‌मि परभुनुङ मुक्‍तिदाङ्‌बा येसु खिरिस्‍टमि अनुग्‍रहानुङ निवाबेॽ छना बेॽलो लिघडानिङे। खोमि हागोनुङ सानिङ महिमा लिरो। आमेन।

१ युहन्‍ना 3:22

निवाहाङ्‌डे़ॽ पिबॽआ आग्‍याडे़ॽ लुडिडोॽ कानिङे़ॽ ले़न्‍डुङ्‌माहोङ मोबा खोसे़ॽ नेन्‍जामारोमा योम्‍बोक ले़न्‍डुङ्‌माहोङ, कानिङे़ॽ ङाःक्‍पॽआ खा खोसे़ॽ कानिङ पिये।