Apocalipsis 7:9 - New Testament Psalms and Proverbs in Mixtec Magdalena Peñasco

⁹ Ni jinu sukan ma, te ni yo nde'ya sa, te ni jini sa kua'a xen‑xeen ñayii ndaka ñuu na'nu ma, ndaka jichi ñayii ma, ndaka ñuu kuechi ma, ndaka sa'an ka ka'an i ma. Ûni masu kuu ka'vi o i, te ka iyo yatni i ichi nuu iyo Su'si ma nuu núkoo ya ma, te iyo Jesús iya kúu sukan kúu ndikachi jaa ma, te ka ne'nu i sa'ma kuijin kuijin, te ka yinda'a i nda'a ñuu.

Apocalipsis 7:9 Iomraidhean Croise

Salmos 2:8

Kakan‑ta'vi nuu ri, te taa ri ja nduta'vi ro ni‑ka'nu ñuu ñayivi a, te kuenda maa ro ko kuu ndaka ñuu a.

Salmos 22:27

Te chukan kúu ja ndaka ñayii ka iyo ni‑ka'nu ñuu ñayivi a chi jin ndaka'án i ja Iya Tátnuni ma kúu Su'si, te jin ndakokuiñi i nuu ya ma, te jin ndachiñu'u i ya.

Salmos 76:4

Vivii kúu ni, vi Su'si, te iyo kua'a‑ka jayiñu'u ni sana yuku na'nu ma ja vivii ka ndaa i ma.

Salmos 77:2

Te kivi ni yo ndo'o, ni yo neni sa ma, te ndaka jakuaa ma ndánduku sa Su'si iya tátnuni nuu o a, te skata nda'a skata nda'a sa nuu ya, te jikan‑ta'vi jikan‑ta'vi sa nuu ya ja na chindee ña'a ya. Kovaa ñatuu ni ndani'i sa tnu'u kanu ini, vaa kúxii xeen ini sa ma.

Salmos 98:3

Ni ndaka'án Su'si ma sukan kúnda'vi ini ya ndaka sa'ya tata tee kúu Israel ma, te ndaka ñayii ka iyo ni‑ka'nu ñuu ñayivi a, ni ka jini i sukan sa'a Su'si o ma ja jin kaku ñayii ma nuu ja u'vi ma.

Lucas 12:1

Sani te ni ka ndututu kua'a mil ñayii, vaa ûni kua'a xeen i kúu ma, te ka jexni'ni tna'a ndi‑in ndi‑in i. Jesús ma, ni keja'a ya ká'an ya nuu tee ka ndikin ya ma: ―‍Jin ko koto va'a ni maa ni nuu levadura tee ka kuu fariseo ma. Másu ko jin kuikin ni xiko de ma, chi vaa ka ka'an de ja ka jini de ja va'a ma te masu ka sa'a de ma.

Lucas 21:36

Chukan kúu ja jin koo tu'va maa ni ndi‑kivi ndi‑ñuu. Te jin kakan‑ta'vi jin kakan‑ta'vi ni nuu Su'si ma, sukan‑va'a kuu jin kaku ni nuu ndaka ja iyo ja ko kuu ma, sukan‑va'a kuu jin kenda koo ni nuu iyo sa ja kúu sa iya vee ñayivi ñuu ñayivi a te jin ndatna'a o ―‍kúu ya jiña'a ya.

Juan 12:13

Sani te ni ka ja'nde i nda'a ñuu ma, te ni ka ke koo i ka kayu'u i ka ndachiñu'u i ya: ―‍¡Hosanna! ¡Ja vava'a kúu iya vee nuu Iya Tátnuni ma! ¡Ja vava'a kúu rey Israel ya! ―‍ka kuu i ka kayu'u i.

Romanos 11:25

Ndijin ja ni ka nduu o sa'ya Su'si o a, kúni sa ja jin kuni ni tna'a ja ni ka iyo yu'u te ñatuu ni ka yo jini o ma, sukan‑va'a vitna, te máko jin kani ini ni ja maa ni ka kuu ñayii ka ndanuu‑ka. Vaa sa'a ni ka ndo'o jaku ñayii ñuu Israel ma ja ñatuu ni ka kukanu ini i Su'si ma, te ni ka sa'a ndee‑ka i ini anua i ma. Te sukan‑ni jin ko kuu i onde ndi'i ñayii ka iyo ja jin kukanu ini i Su'si ma jin kandija sukan kúni ya ma, ja ka kuu i ñayii masu ñuu Israel ma.

Efesios 6:13

Chukan kúu ja jín ko tnii vava'a o ndaka tnu'u ndee tnu'u ndatnu táa Su'si ma, sukan‑va'a kivi kenda tachi ma ja nduku i ja xnda'vi ña'a i ma, te masu jin kandija o ja ká'an i ma. Te nú ni jinu ni ka satu'va va'a o maa o, te jín konukuiñi vava'a o.

Hebreos 11:12

Vaa maa in‑ni Abraham ma, te ni kenda koo kua'a sa'ya tata de ma, sukan ka iyo tiuxini ka iyo andivi ma ja ni masu kundee o ka'vi o ma, xi sukan kaa kua'a ñuti yu'u mar ma, sukan ni ka yo kuu sa'ya tata de ma.

Hebreos 12:22

Kovaa yo'o chi ni ka jan tu'va o yuku nani Sion ma, ñuu maa Su'si iya téku ma, ñuu kúu Jerusalén ma ja iyo onde andivi ma, nuu ka iyo kua'a xen‑xeen ángel ma.

Apocalipsis 11:15

Te ni tivi ángel ku‑uja ma trompeta ma, te ni ka ka'an nini'i onde andivi ma: Ñuu ni ka yo tatnuni ñayii ka ndanuu ma, ni nduu i ñuu nuu tátnuni Su'si Iya Tátnuni ma ji'in Cristo ma, te tatnuni ya ni‑kani ni‑jika.

Apocalipsis 22:3

Te masu na ja u'vi‑ka koo ini ñuu ma, vaa yukan núkoo maa Su'si ma ja tátnuni ya ma ji'in iya kúu sukan kúu ndikachi jaa ma, te ñayii ka jinukuechi nuu ya ma, jin ndachiñu'u i ya.

Apocalipsis 3:18

Chukan kúu ja ndáka'an‑so'o ri nuu ro ja kuaan ro nuu ri oro ni nduu nanimaa ni sa'a ñu'u i'ni ma, sukan‑va'a nduxiku ndija ro, te kuaan tna ro sa'ma kuijin kuijin, te kone'nu ro, sukan‑va'a ma kukan‑nuu ro ja jin kuni ñayii ja iyo vichi ro a. Tnaa coliriu nduchinuu ro a, sukan‑va'a ndundijin nuu ro a, te kuni ro nde ichi kua'an ro a.

Apocalipsis 4:4

Te suni ni ka ndakonduu ña'a oko kuun nuu kuu kunukoo o ma, te yukan ka nukoo oko kuun tee nija'nu, te ka ne'nu de sa'ma kuijin kuijin, te ka yoxtnee corona oro xini de ma.

Apocalipsis 5:11

Te ni yo nde'ya sa, te ni jiniso'o sa ja ka ka'an kua'a ángel ni ka ndakonduu nuu núkoo ya ma, ji'in ja ka ka'an kuun kiti ka teku ka iyo ma, ji'in ja ka ka'an tee nija'nu ma, te ûni kua'a xen‑xeen i ka kuu ja ûni masu kundee o ka'vi o.

Apocalipsis 5:9

Te ka jita de in yaa jaa nuu ya, ja ká'an: Maa ni iyo ja kuu tnii ni tutu a te ndakana ni sellu ka ndenee a, vaa maa in‑ni ni ni ji'i ja kuechi ka ndiso sa ma, te ji'in niñi maa ni ma ni ndakuaan ña'a ni, ja ka iyo sa ndaka ñuu ma, ja ka ka'an sa ndaka sa'an ma, ja ka iyo sa ndaka ñuu kuechi ma ji'in ñuu na'nu ma, ja ni ka nduu sa sa'ya Su'si ma.

Apocalipsis 6:11

Te ni wa'a ya sa'ma kuijin kuijin ja jin kone'nu i, te jiña'a ya: ―‍Jin kondetu‑ka ni jaku‑ka kivi, te onde jin kûu ñayii ka jinukuechi nuu Su'si ma, sukan ni ka yo jinukuechi maa ni ma, ñayii ka iyo ja jin kûu‑ka i ma ―‍kúu ya jiña'a ya.

Apocalipsis 7:8

Te tna'a tee kúu Zabulón ma, uxi uu mil (12,000) i jin ko kuu ñayii jin kondenee sellu Su'si ma. Te tna'a tee kúu José ma, uxi uu mil (12,000) i jin ko kuu ñayii jin kondenee sellu Su'si ma. Te tna'a tee kúu Benjamín ma, uxi uu mil (12,000) i jin ko kuu ñayii jin kondenee sellu Su'si ma.