San Lucas 15:6 - Xochapa Mixteco

⁶ Tá ndi̱xaa ndo veꞌe, ta sikitaꞌan ndiꞌi ndo na xíni taꞌan xiꞌin ndo tin na ndóo yati xiꞌin ndo. Ta saa kaꞌan ndo xiꞌin na, kachi ndo: “Ná kusini yo saa chi xa nda̱niꞌi i levo loꞌo sana i kiti nda̱ñuꞌu”, kachi ndo xiꞌin na.

San Lucas 15:6 Iomraidhean Croise

San Lucas 1:58

Saa ku̱ndaa ini na veꞌe yá xiꞌin na xíni taꞌan xiꞌin yá, ku̱ndaa ini na xaꞌa ya i̱kan Ndioxi xiꞌin yá ka̱ku seꞌe yá. Ta kúsini ka vi na tá ku̱ndaa ini na ka̱ku seꞌe yá, saa tu mií va yá, ku chi kúsini yá.

San Lucas 15:10

Ya ndaa kua kúsini ni ná yóꞌó chi saa kúsini ni na tatun Ndioxi nuu ndivi xiꞌin iin naꞌa na ndíko koo ini xaꞌa ya väꞌa íkan na ―káchi Jesús xiꞌin na.

San Lucas 15:24

Chi ndi̱ko koo ra loꞌo seꞌe i yóꞌó. Tá káa ra ndi̱xiꞌi saa ndi̱xiyo ra sundi vitin ta ndi̱taku ra. Nda̱ñuꞌu ra ndi̱xaꞌan ra ta vitin nde̱ta ra”, káchi iva ra. Ñaa xa̱á kúsini ni na.

San Lucas 15:5

Ya ndaa kua saa ikan ndo. Tá nda̱niꞌi ndo ri ta kusini ni ndo xiꞌin ri, kiꞌin ndo ri chinuu ndo nuu soko ndo ndiko koo ndo.

San Lucas 15:7

Ya ndaa kua kúsini ni ndo tá nde̱ta iin kiti sana ndo ti nda̱ñuꞌu. Tá kuꞌva kúsini ndo xiꞌin sana ndo, saa kúsini Ndioxi xiꞌin iin naꞌa na i̱kan ya väꞌa kivi ndíko koo na nuu ra. Kúsini ni ka va ra xiꞌin na yóꞌó nuu na vaꞌa, na xa íyo xiꞌin Ndioxi, na köo xíniñuꞌu ndiko koo ini ―káchi Jesús xiꞌin na.

San Juan 15:14

Ta ndóꞌo̱ ku ndo ítaꞌan vaꞌa ni xiꞌin i tá tu xáa súvi ndo ya káꞌan i xiꞌin ndo.

San Juan 3:29

Ta vitin ná kundaa ini ndo chi tá kúu nuu íyo viko tíndaꞌa, ta ra íin xiꞌin ñaꞌa yá tíndaꞌa ikán kuu ií yá, sundi ra íyo yati xiín ií yá, tá xíni soꞌo ra ya káꞌan ra ta kúsini ni ra tá xíni soꞌo ra tachi ra. Ta saa ndóꞌo yeꞌe, kúsini ni i chi xa xa̱a ra vitin.

Los Hechos 11:23

Tá ndi̱xaa ra Bernabé ikán ta xi̱ni ra ya kuaꞌa ni ya vaꞌa íkan Ndioxi xiꞌin na, ñaa kúsini ni ra. Ta saa ndi̱xaꞌa ra ndee xiꞌin na ya ndinuꞌu ni ini na ná kundikun na ichí Tata yo, ta vitin taan ná kandixa ka ñaꞌa na, káchi ra xiꞌin na.

Los Hechos 15:3

Saa ti̱ꞌvi na veꞌe ñuꞌu Antioquía nda kuaꞌan nda ñuu Jerusalén. Tá kuaꞌan nda ta ndi̱yaꞌa nda estado Fenicia xiꞌin estado Samaria. Iin iin ñuu ikán ndi̱yaꞌa nda ndítuꞌun nda xiꞌin na ndíkun Jesús ya xa kuaꞌa ni na köo kúu judío ndíkundikun ichí Ndioxi. Saa kúsini ni na ikán xaꞌa ya xíni soꞌo na káꞌan nda xiꞌin na.

Filipenses 1:4

Ta kúsini ni i tá káꞌan i xaꞌa ndo xiꞌin ra ndiꞌi saa ichí.

Filipenses 2:17

Tá tu xíniñuꞌu kuvi i xaꞌa Cristo, ta xa íyo ndúvi va i ikan i saa, ta kúsini ni i chi kuvi i nuu Ndioxi ya soko i mií i nuu ra, ta nduu i tá kuꞌva káa nduta, rá sóko na nuu ra, nuu chindee taꞌan i xiꞌin ndo sixinu i ya sóko ndo nuu ra xaꞌa ya ndee ni kándixa ndo ra. Xaꞌa ya ñaa kua kúsini ni i ikan i ndá ka ñaꞌa xaꞌa ndo.

Filipenses 4:1

Xaꞌa ya ñaa kua káꞌan ni i xiꞌin ndo ñani yo xiꞌin kuꞌva yo, tuun ni kundikun ndo Tata yo Jesucristo. Xa xíni mií ndo ndee ni kúꞌvi ini i xíni i ndóꞌo̱, ta kúni ni i kuni i ndóꞌo̱. Chi ndóꞌo̱ ku ndo xáa sií ni ini i, ta vaꞌa ni kée i xiꞌin ndo, kúsini ni i xiꞌin ndo, tá káa ñaꞌa ya níꞌi iin ra xínu, saa íyo ndo nuu i, ndáa yaꞌvi ni ndo.

1 Tesalonicenses 2:19

Ta kúni ni nde xaa nde nuu ndo chi ndóꞌo̱ ku ndo xáꞌa ni ndee xiꞌin nde xaꞌa ya ndee ni vaꞌa ndíkun ndo Tata yo Jesucristo, xaꞌa ya ñaa kua kúsini ni nde xiꞌin ndo. Tá ná ndiko koo Tata yo Jesucristo ñuu ivi yóꞌó ta vaꞌa ni kuni nde xiꞌin ndo, chi ndóꞌo̱ ta tá íin ñaꞌa ya luvi ni níꞌi iin naꞌa nuu kuaꞌan na kéꞌe taꞌan na, saa íin ndo nuu nde. Ta niꞌi ni nde ya vaꞌa nuu Ndioxi xaꞌa ndo tá ná sinaꞌa nde ndóꞌo̱ nuu ra.

1 Pedro 2:10

Chi xa xíni mií ndo tá yachi ta ndaꞌvi ni ndi̱xiyo ndo, tá íyo ndo ndi̱xika ndaꞌvi saa ndi̱xiyo ndo, ta vitin ndi̱kuiso vií Ndioxi ndóꞌo̱ ndu̱u ndo na ñuu mií ra. Chi yachi ta ni köo ndïkuvi kundaꞌvi ini ra kuni ra ndóꞌo̱, ta vitin ta ndiniꞌi taꞌvi ndo nuu ra kúndaꞌvi ni ini ra xíni ra ndóꞌo̱.

1 Pedro 2:25

Chi yoo ta tá íin kiti levo, kiti nda̱ñuꞌu saa ndi̱xiyo yo. Ta vitin ndi̱ko koo yo nuu Tata yo Jesucristo ta ndee ni vaꞌa ndáa ra yoo, tá íkan iin ra ndee ni vaꞌa ndáa kiti levo sana ra, saa íkan ra xiꞌin yo.