San Juan 5:17 - Xochapa Mixteco

¹⁷ Ta ndi̱kaꞌan Jesús xiꞌin nda, káchi ra saa: ―Iva i ta ndiꞌi saa kivi xáa chiñu ra, ta saa tu yeꞌe va, ndiꞌi saa kivi xáa chiñu i ―káchi ra xiꞌin nda.

San Juan 5:17 Iomraidhean Croise

San Mateo 10:29

Ta xa kúndaa va ini ndo, kiti sàà vali ta núu ni va yaꞌvi ri, uvi vi ri ndáa iin xuꞌun loꞌo. Ni saa va, sundi ndáa yaꞌvi ni va ri nuu Ndioxi, nda iin ri köo kóyo nuu ñuꞌú ya xíꞌi mií ri, sundi Iva yo Ndioxi ku ra kíꞌin ni kuenta xiꞌin ri.

San Juan 10:36

Ta mií ra ku ra nda̱sa i̱í yeꞌe ta ti̱ꞌvi ra yeꞌe vaxi i ñuu ivi yóꞌó. Ta ¿ndachu káꞌan ndo xaꞌa i ya kánaꞌa i xaꞌa Ndioxi chi ndi̱kaꞌan i kúu i Seꞌe Ndioxi?

San Juan 14:10

¿Án köo kándixa un yeꞌe ya íyo i xiꞌin Iva i, ta Iva i íyo ra xiꞌin i? Ndiꞌi ya káꞌan i xiꞌin ndo ta süvi xiní mií i kána ya káꞌan i xiꞌin ndo. Tuꞌun mií ra kua káꞌan i xiꞌin ndo, ta íkan ra chiñu kúni mií ra tixin yeꞌe.

San Juan 5:16

Xaꞌa ya ikán kua xa̱á nda judío ndíkun nda sata Jesús kúni nda kaꞌni ñaꞌa nda, xaꞌa ya síndaꞌa ra naꞌa kivi ndíkundee na.

San Juan 5:18

Xaꞌa ya ikán kua kúni ni nda naꞌnu nuu na judío kaꞌni ñaꞌa nda, chi xáa soꞌo ra yáꞌa ra ley na xaꞌa ya síndaꞌa ra naꞌa kivi ndíkundee na, ta saa káꞌan ra Iva ra kúu Ndioxi, ta iin ndása ra mií ra xiꞌin Ndioxi.

San Juan 9:4

Ta xíniñuꞌu i xaa súvi i chiñu ra ti̱ꞌvi yeꞌe vaxi i, chi vitin ta tá káa nduvi saa káa ya, ta vaxi kivi ta tá káa ñuu saa nduu ya, ta nda iin naꞌa küchiño xaa chiñu.

Los Hechos 14:17

Vani ndiꞌi saa ichí si̱naꞌa ra mií ra nuu naꞌa xaꞌa ya vaꞌa i̱kan ra. Chi suvi ra síkuun savi yakan vaꞌa kána ñaꞌa chíꞌi yo, saa táxi ra xíxi yo xiꞌin ya kúsini yo ―káchi ra Pablo xiꞌin na.

Los Hechos 17:28

Chi suvi ra táxi ndee ndaꞌa yo ya táku yo, xiꞌin ndee ra kánda yo xíka yo, ta xiꞌin ndee ra táku yo íyo yo. Saa káꞌan tu sava na taꞌan mií va ndo, na íyo yuꞌu xiꞌin tuꞌun yóꞌó, káchi na saa: “Seꞌe Ndioxi ku ndiꞌi va yo”, káchi na.

1 Corintios 12:6

Saa íyo kuaꞌa ni kuꞌva ya xáa chiñu yo nuu Ndioxi, ta suvi xiꞌin ndee iindaa mií ra kua táxi ra íkan iin iin yo saa.

Colosenses 1:16

Xiꞌin ndee mií ra kua ndi̱kuaꞌa ndiꞌi ni kúu ñaꞌa ya íyo nuu ndivi xiꞌin ya íyo ñuu ivi yóꞌó. Ndiꞌi ñaꞌa ya xíto yo íyo xiꞌin ya täꞌan ka kuni yo, ta mií ra ku ra si̱kuaꞌa ya. Saa si̱kuaꞌa tu ra ndiꞌi nuu tatun ya íyo nuu ndivi, xiꞌin ndiꞌi ndee naꞌnu ya xáꞌnda chiñu ndiꞌi ñaꞌñu xiꞌin ka inka nuu ndiꞌi ndee ya íyo. Ndiꞌi ya ndi̱kuaꞌa ta mií ra ku ra si̱kuaꞌa ndiꞌi ya, xaꞌa mií ra kua ndi̱kuaꞌa ndiꞌi ya.

1 Tesalonicenses 2:13

Yakan ndiꞌi saa ichí táxi ni nde tixaꞌvi ndaꞌa Ndioxi xaꞌa ndo, saa chi kivi tá ndi̱kiꞌin ndo tuꞌun ra ya xi̱ni soꞌo ndo ndi̱kaꞌan nde xiꞌin ndo, ta ndi̱kuni ndo ya kúu ya tuꞌun Ndioxi chi süvi tuꞌun na ñuu ivi yóꞌó kua. Ta ya ndixa kua kúu ya tuꞌun Ndioxi, chi kúu mií ya ndee ndínama ya ndóꞌo̱ xaꞌa ya kándixa ndo ya.

HEBREOS 1:3

Ta ya luvi ni yéꞌe̱ kúu mií Seꞌe Ndioxi kua yéꞌe̱ mií Ndioxi. Tá káa níi mií Ndioxi saa káa níi mií Jesucristo, saa ta̱xi Ndioxi ichí ndaꞌa ra ya ndíso chiñu ra xiꞌin ndiꞌi ñaꞌa ya íyo ñuu ivi yóꞌó. Ta xiꞌin tuꞌun ra ya ndee ni ndee kua xáa chiñu ndiꞌi ya nda vitin. Saa ndi̱kata ra kuachi yo xiꞌin ndee mií ra, ta sindiꞌi nda̱a ra nuu ndivi ndi̱kunduꞌu ra ñaꞌñu kuáꞌá Ndioxi nuu tai toꞌo, xáꞌnda chiñu ra xiꞌin ra.