San Juan 3:3 - Xochapa Mixteco

³ Saa ndi̱kuiin Jesús káꞌan ra: ―Ya ndaa ni káꞌan i xiꞌin un, ndiꞌi na täꞌan kaku uvi, ta küchiñu na kiꞌvi na nuu xáꞌnda chiñu Ndioxi ―káchi Jesús xiꞌin ra.

San Juan 3:3 Iomraidhean Croise

San Mateo 16:17

Saa ndi̱kaꞌan Jesús xiꞌin ra: ―Ná kusini ni un Simón, seꞌe ra Jonás, saa chi süvi naꞌa, na ñuu ivi yóꞌó ku na ndítaxi ya xínituni un. Iva i Ndioxi, ra íyo nuu ndivi ni̱nù ku ra i̱kan saa xiꞌin un ―káchi Jesús xiꞌin ra.

San Mateo 19:24

Ta ná kaꞌan ka i xiꞌin ndo: Tá ya kúvi kua ta án sana vaꞌa ka kiꞌvi iin kiti camello chee ni ta yaꞌa ri yavi loꞌo kaꞌa iin tiku, ta saa na kuika uꞌvi ni ka saa kiꞌvi na ikán ichí nuu xáꞌnda chiñu Ndioxi ―káchi Jesús xiꞌin na.

San Mateo 21:31

Ta vitin, ¿unkua túvi ndóꞌo̱? ¿Unku seꞌe ra yóꞌó xa̱a súvi ya ndi̱kaꞌan ra? ―káchi Jesús. Saa ndi̱kuiin na káꞌan na: ―Ra núnu̱ú ku ra xa̱a súvi chiñu ya kúni iva ra ―káchi na. Saa ndi̱kaꞌan Jesús xiꞌin na, káchi ra: ―Ya ndaa káꞌan i xiꞌin ndo, naꞌa na ndíkaya xuꞌun nuu gobierno ñuu Roma xiꞌin ná ñaꞌa ná xíko mií, na yóꞌó ku na xiꞌna kuakiꞌvi ichí nuu xáꞌnda chiñu Ndioxi, nuu ndóꞌo̱.

San Mateo 5:18

Ya ndaa káꞌan i xiꞌin ndo, kivi íyo ka ndivi xiꞌin ñuu ivi yóꞌó, ta nda iin letra, ni iin punto loꞌo ndündaa nuu ley Ndioxi ya ta̱a ra Moisés. Xinu ndiꞌi ni kúu tuꞌun ra, nda iin ya ndïꞌi xaꞌa.

San Marcos 10:14

Ñaa xi̱ni Jesús ya íkan nda, ta ndi̱saa ra xiꞌin nda, saa ndi̱kaꞌan ra xiꞌin nda, káchi ra saa: ―Taxi ndo na vali ná kixi na nuu i, ta käsi ndo nuu na, chi ndiꞌi na táxi xáꞌnda chiñu Ndioxi nima na, tá íin na vali yóꞌó saa íin na.

San Marcos 9:47

Tá tu nduchi nuu va tu ndo kua xáa kíꞌvi xiꞌin ndo ya íkan ndo ya väꞌa, ta vaꞌa ka tava ndo ri nuu ndo, chi vaꞌa ka koo ndo kutaku ndo xiꞌin Ndioxi nuu xáꞌnda chiñu ra. Süvi ka vi ya íyo uvi saa nduchi nuu ndo, ta kuꞌun ndo ndaya nuu köo ndáꞌva ñu̱ꞌu̱.

San Juan 1:13

Ta mií ya ndaa seꞌe Ndioxi ndúu na, chi köo ndi̱kaku na tá kuꞌva káku seꞌe iin taa xiꞌin iin ñaꞌa. Sundi ka̱ku na tá kuꞌva kúni mií Ndioxi.

San Juan 1:5

Ta ñu̱ꞌu̱ ikán kua túun nuu naá, ta ya naá köo ndi̱küchiñu ya ndaꞌva ya ñu̱ꞌu̱ ikán.

San Juan 1:51

Saa ndi̱kaꞌan ka ra xiꞌin ra, káchi ra saa: ―Ya ndaa ni ndixa káꞌan i xiꞌin un, kuni ndo núna nuu ndivi, ta saa kuni ndo na tatun Ndioxi vaxi nùù na tin kuandaa na nuu íyo yeꞌe, Ra kúu Taa ra xa̱a ñuu ivi yóꞌó ―káchi Jesús xiꞌin ra Natanael.

San Juan 12:40

Ndi̱kasi Ndioxi nuu na ndu̱u kuáa̱ na, saa nda̱sa tuun ra nima na, Ya ná küchiñu na koto na, Ta saa ná küaꞌa na kandixa na xiꞌin ndinuꞌu nima na, ya ná ndïko na nuu i ya sindaꞌa i na, káchi ya ta̱a ra Isaías.

San Juan 3:4

Ta saa ndi̱ndakan tuꞌun ñaꞌa ra, káchi ra saa: ―¿Ta unkua ikan iin na xa yata ndikaku tuku na? ¿Án kuchiñu ndiꞌvi uvi tuku na tixin siꞌí na, saa ndikaku tuku na? ―káchi ra xiꞌin Jesús.

2 Corintios 4:4

Saa ndóꞌo na chi kiti nǎꞌa kúu ndioxi ñuu ivi yóꞌó ku ri ndi̱kasi ya xínituni na ya ná kändixa na tuꞌun vaꞌa xaꞌa Jesucristo ya káꞌan nde xiꞌin na, ta na ikán, tá íin na kuáa̱ saa íin na. Chi köo táxi ri kuni na ya yéꞌe̱ luvi ni kúu mií tuꞌun vaꞌa xaꞌa Jesucristo. Chi mií Jesucristo, tá káa níí mií Ndioxi saa káa ra.

2 Corintios 5:17

Saa chi ndiꞌi yo xa ndi̱kitaꞌan xiꞌin Cristo, ta ndu̱u yo na xa̱á i̱kan Ndioxi. Ndiꞌi kuꞌva ya väꞌa, ya yata ndi̱xiyo ini yo, ta xa ki̱ndoo ndiꞌi ya chí sata.

Gálatas 6:15

Saa chi tá tu xaa iin ndu̱u yo xiꞌin Cristo ta ni köo ndáa yaꞌvi ka ya kúu mií yo tuni Ndioxi án köo ya kúu mií yo. Iindaa ya ndee ni ndáa yaꞌvi kua nda̱sa xa̱á Ndioxi yoo ndu̱u yo naꞌa, na xa̱á.

Efesios 2:1

Ta ndóꞌo̱, tá yachi tá täꞌan kandixa ndo Jesucristo, ta tá íin naꞌa, na xa ndíi saa ndi̱xiyo ndo nuu Ndioxi xaꞌa kuachi ya väꞌa i̱kan ndo nuu ra.

Tito 3:5

Si̱kaku ra yoo, ta süvi xaꞌa ndá ka chiñu ya vaꞌa i̱kan yo kua i̱kan ra saa xiꞌin yo. Xaꞌa ya kúndaꞌvi ni ini ra xíni ra yoo kua i̱kan ra saa xiꞌin yo. Ta ndi̱kata ra yoo, saa nda̱sa xa̱á ra yoo ndu̱u yo na xa̱á nuu Tachi I̱í ra.

Santiago 3:17

Sundi naꞌa, na kúu mií ya ndíchi vaxi nuu Ndioxi ta köo ikán na ñaꞌa ya väꞌa, nina ya vaꞌa íkan na, ni köo kuachi ini na, saa kúu na, naꞌa na vaꞌa ni ini xiꞌin na ivi, kúndaꞌvi ini na xíni ñaꞌa na, ndiꞌi saa ichí kúni na xaa súvi na ya vaꞌa. Saa íkan na ya vaꞌa xiꞌin ndiꞌi naꞌa, ta köo íyo uvi yuꞌu na, na íkan saa ku na ndixa ndíkun ichí Ndioxi.

1 Pedro 1:3

Ta ná xaa kaꞌnu yo Iva yo Ndioxi ra kúu Iva Tata yo Jesucristo, saa chi kúndaꞌvi ni ini ra xíni ra yoo, ta yakan ta̱xi ra ndi̱kaku uvi tuku yo xaꞌa ya ndi̱taku Tata yo Jesucristo tañu na ndíi, saa kua ta̱xi ra ya kúndaa teꞌe ini yo

1 Juan 2:29

Xa xíni yo Tata yo Jesucristo ku ra vaꞌa ni, ra ndaa ni ini, yakan ndiꞌi naꞌa, na íkan ya ndaa, ta na ñaa ku na kúu seꞌe Ndioxi.

1 Juan 3:9

Ndiꞌi na kúu seꞌe Ndioxi ta köo íkan ka na ya väꞌa, chi Ndioxi ta xa íyo ra nima na, yakan küvi ka ikan na ya väꞌa, chi na xa ndi̱kaku uvi ku na i̱kan ra, ndu̱u na seꞌe ra.

1 Juan 5:1

Ndiꞌi na kándixa ya ti̱ꞌvi Ndioxi Jesús ki̱xi ra sikaku ra yoo, ta na ikán ta seꞌe Ndioxi ndu̱u na. Ndiꞌi na kúꞌvi ini xíni Iva yo, ta kúꞌvi tu ini na xíni na ndiꞌi seꞌe va ra.

1 Juan 5:18

Ta yoo ndixa ndíkun Iva yo Ndioxi ta küvi ikan yo ya väꞌa tutuku tutuku. Saa chi ndáa Jesucristo Seꞌe Ndioxi mií yo ndíkun ñaꞌa. Ta täxi ra ndikava ndikuu yo ndaꞌa kiti nǎꞌa.

1 Juan 5:4

Saa chi ndiꞌi yo kúu seꞌe Ndioxi, ta kúchiñu yo nuu ya väꞌa íyo ñuu ivi yóꞌó. Xaꞌa ya ndáa ni ini yo Ndioxi xiꞌin Tata yo Jesucristo yakan vaꞌa kúchiñu yo nuu ya väꞌa.

El Apocalipsis 3:14

Saa ndi̱kaꞌan tuku ra xiꞌin i, káchi ra saa: ―Taa un tutu yóꞌó kuꞌun ya ndaꞌa tatun Ndioxi ya ndáa naꞌa, na kándixa yeꞌe nuu ndíkitaꞌan na xáa kaꞌnu na yeꞌe ñuu Laodicea: “Ya yóꞌó kua káꞌan yeꞌe, ra kúu Amén. Ndee ni ndíkuiin i xaꞌa ya i̱kan Ndioxi, ra ndaa ni. Ta yeꞌe ku ra ndi̱xiyo núnu̱ú tá sikan xa̱á xi̱koo xaꞌa ñuu ivi ya si̱kuaꞌa Ndioxi.