San Juan 17:3 - Xochapa Mixteco

³ Ta ya kutaku na ndiꞌi saa ichí kua kúni kachi ya ná kuni vaꞌa na ini un, chi iin yóꞌo̱ ku Ndioxi ra ndaa ni xiꞌin Jesucristo, ra ti̱ꞌvi un vaxi ñuu ivi yóꞌó.

San Juan 17:3 Iomraidhean Croise

San Marcos 9:37

―Naꞌa, na ndíkiꞌin vií na vali taꞌan ra loꞌo yóꞌó xaꞌa ya kándixa na yeꞌe, ta yeꞌe kúu i ndíkiꞌin na, ta na ndíkiꞌin yeꞌe, ta süvi iindaa yeꞌe ku i ndíkiꞌin na, ndíkiꞌin tu na Ndioxi ra ti̱ꞌvi yeꞌe vaxi i ñuu ivi yóꞌó va ―káchi ra xiꞌin nda.

San Lucas 9:48

Ta saa ndi̱kaꞌan ra xiꞌin nda, káchi ra saa: ―Tá ndá naꞌa ndíkiꞌin vií na vali taꞌan ra loꞌo yóꞌó, ta yeꞌe ku i ndíkiꞌin na, ta na ndíkiꞌin yeꞌe, ndíkiꞌin na Iva i Ndioxi, ra ti̱ꞌvi yeꞌe vaxi i ñuu ivi yóꞌó. Saa ndiꞌi na ni̱nu̱ ni íin, na íin tá íin na vali, na yóꞌó ku na kúu mií chiñu ndee ni ka nuu ndiꞌi ndóꞌo̱ ―káchi Jesús xiꞌin nda.

San Juan 10:36

Ta mií ra ku ra nda̱sa i̱í yeꞌe ta ti̱ꞌvi ra yeꞌe vaxi i ñuu ivi yóꞌó. Ta ¿ndachu káꞌan ndo xaꞌa i ya kánaꞌa i xaꞌa Ndioxi chi ndi̱kaꞌan i kúu i Seꞌe Ndioxi?

San Juan 11:42

Xíni i ndiꞌi saa ichí xíni soꞌo un káꞌan i xiꞌin un. Sundi ndi̱kaꞌan i saa xiꞌin un xaꞌa ndiꞌi naꞌa chútu ni yóꞌó ya ná kuni soꞌo ndiꞌi na, ta saa kundaa ini na ya ti̱ꞌvi un yeꞌe vaxi i ―káchi Jesús.

San Juan 14:26

Sundi Tachi I̱í ya tiꞌvi Iva i kixi Sindiko ya ini ndo, ta tixin kivi yeꞌe kua kixi ya chindee ya ndóꞌo. Saa sinaꞌa ndiꞌi ya ndóꞌo̱, ta sindikaꞌán ya ini ndo xaꞌa ndiꞌi tuꞌun ya ndi̱kaꞌan i xiꞌin ndo.

San Juan 17:18

Tá kuꞌva íyo chiñu ya ti̱ꞌvi un yeꞌe vaxi i xaa súvi i ñuu ivi yóꞌó, kuꞌva saa íyo chiñu tíꞌvi i na yóꞌó kuꞌun na xaa súvi na ñuu ivi.

San Juan 17:21

ya ná kutaꞌan vaꞌa na xiꞌin taꞌan na, tá kuꞌva íyo mií yo xiꞌin taꞌan yo Iva mani. Ta saa iin yuꞌu ná koo na xiꞌin yo, saa kundaa ini na ñuu ivi ya ti̱ꞌvi un yeꞌe vaxi i.

San Juan 17:23

Yeꞌe ku ra íyo xiꞌin na yóꞌó, ta yóꞌo̱ ku un íyo xiꞌin yeꞌe, yakan vaꞌa ni nduu na iin yuꞌu xiꞌin taꞌan na, ta saa kua kundaa ini na ñuu ivi yóꞌó, ya ti̱ꞌvi un yeꞌe vaxi i. Ta kuni na ya kúꞌvi ni ini un xíni un na ndíkun yeꞌe, tá kuꞌva kúꞌvi ini un xíni un yeꞌe, saa kúꞌvi ini un xíni un na.

San Juan 17:25

Tata Iva yo, ra vaꞌa, ra ndaa ni kuu mií un. Na ndíkun ñuu ivi yóꞌó ta köo xíni na yóꞌo̱, sundi yeꞌe ta xíni i yóꞌo̱, ta na ndíkun yeꞌe xa xíni na yóꞌo̱ ku ra ti̱ꞌvi yeꞌe vaxi i.

San Juan 17:8

Ta̱xi i tuꞌun un ndaꞌa na ya ta̱xi un ndaꞌa i, ta vaꞌa ni ndi̱kiꞌin na ya. Ta ku̱ndaa ini na ya ndixa kua ke̱e i nuu un, ta kándixa na yóꞌo̱ ku ra ti̱ꞌvi yeꞌe vaxi i.

San Juan 3:17

Chi köo ndi̱tiꞌvi Ndioxi Seꞌe ra vaxi ra ñuu ivi ya sitixuꞌvi ra na ñuu ivi, sundi ti̱ꞌvi ñaꞌa ra vaxi ra sikaku ra na.

San Juan 3:34

Saa chi ra ti̱ꞌvi Ndioxi vaxi ñuu ivi yóꞌó, ta káꞌan ra tuꞌun Ndioxi, chi Ndioxi ta köo táxi loloꞌo ra ndee Tachi I̱í ra ndaꞌa na, iin táxi ndiꞌi ra ya ndaꞌa na.

San Juan 5:44

Köo xíin ndo kandixa ndo yeꞌe, saa chi kútoo ni ndo kaꞌan vaꞌa ndo xaꞌa taꞌan ndo, ta köo ndúku ndo ya kaꞌan vaꞌa Ndioxi xaꞌa ndo ―káchi ra xiꞌin nda.

San Juan 6:57

Iva i Ndioxi ra ti̱ꞌvi yeꞌe vaxi i, ta táku ra. Xaꞌa ya táku ra ikán kua táku tu yeꞌe va. Ta saa tu ndiꞌi na xíxi kuñu i kutaku na, chi táku yeꞌe ini na.

San Juan 7:29

Ta mií i ta xíni vaꞌa i ra, chi nuu ra ikán ke̱e i vaxi i. Mií ra ti̱ꞌvi yeꞌe vaxi i ―káchi ra xiꞌin na.

San Juan 8:19

Saa ndi̱kaꞌan nda xiꞌin ra káchi nda saa: ―¿Míí íyo Iva un? ―káchi nda. Saa ndi̱kuiin Jesús káꞌan ra xiꞌin nda: ―Ndóꞌo̱ ta köo xíni ndo yeꞌe, ta ni Iva i köo xíni ndo ra. Saa chi tá tu xíni ndo yeꞌe, ta kúni kachi ya xíni tu ndo Iva va i, ndíkuu ―káchi ra xiꞌin nda.

1 Corintios 15:34

Ndikani vaꞌa ini ndo xaꞌa ñaꞌa íkan ndo, ta ndiko koo ini ndo xaꞌa ya väꞌa íkan ndo, saa ndikundikun ndo ichí vaꞌa. Saa chi sava ndo, vani xa ndíkun va ndo ichí Ndioxi, sundi täꞌan kuni taꞌan ndo xiꞌin ra. Xaꞌa ya ñaa kua káꞌan i xiꞌin ndo ya ná kukaꞌan nuu ndo. Ndá kuꞌva kua koo ikin kuñu yo tá ná nditaku yo

1 Corintios 8:4

Ta soꞌva káꞌan i xiꞌin ndo, xaꞌa ñaꞌa ya ndákan tuꞌun ndo yeꞌe án vaꞌa kuxi yo ñaꞌa ya sóko naꞌa nuu naꞌna ndioxi ya ndíi, án väꞌa kuxi yo ya. Chi ni köo táku naꞌna ndioxi na, ta ni köo ndee kúu mií ya, ta xa xíni va yo ndioxi na yóꞌó ta ni köo ndáa yaꞌvi ya, saa chi iindaa mituꞌun va ku mií Ndioxi ra ndaa ni.

2 Corintios 4:6

Saa chi suvi mií Ndioxi ku ra xa̱ꞌnda chiñu ya ndi̱yeꞌe ñu̱ꞌu̱ yéꞌe̱ nuu naá. Ta suvi mií ra ku ra si̱ndiyeꞌe ya nima yo ya ku̱chiñu yo ndi̱xuna ya xínituni yo, saa kua kuni yo ya luvi ni ndi̱yeꞌe ya kúu mií Ndioxi, ya ndi̱yeꞌe ya nuu Jesucristo.

Filipenses 3:10

Saa chi ya kúni ni i kua yóꞌó: Kúni ni i kuni taꞌan vaꞌa ka i xiꞌin Cristo, saa kúni i koo ndee Ndioxi ya si̱taku Jesús xiꞌin i, ta xa íyo ndúvi i ndoꞌo i tá kuꞌva ndi̱xiyo ndúvi mií ra ndi̱xiꞌi ra.

Filipenses 3:8

Ta ndiꞌi ya vaꞌa ni ndi̱xiyo nuu i yachi, ta nda loꞌo ka köo ndáa yaꞌvi ya nuu i vitin xaꞌa ya xi̱ni taꞌan i xiꞌin Tata yo Jesucristo, ra Chee ni nuu yo. Xaꞌa ra yóꞌó kua si̱ndoo ndaꞌa ndiꞌi i ñaꞌa ya ndee ni vaꞌa xi̱ndaa yaꞌvi nuu i tá yachi, ta ni köo xaꞌa ka ya nuu i vitin, tá íyo taka va saa íyo ya nuu i chi ya ndee ni vaꞌa ka kua nduu i kuenta Jesucristo.

1 Tesalonicenses 1:9

Ndiꞌi ni kúu ñaꞌñu káꞌan vaꞌa ni na xaꞌa ndo ya ndi̱kuiso vaꞌa ni ndo ndeꞌe tá ndi̱xaa nde nuu ndo. Saa káꞌan na xaꞌa ndo ya si̱ndoo ndo ya káñuꞌu ndo ndioxi ndíi, ta chi̱kaa ini ndo kundikun ndo Ndioxi ra ndaa ni, ra táku.

2 Tesalonicenses 1:8

Ta ndiko koo ra tañu ñu̱ꞌu̱, ya ndee ni xíxi, saa xaa nduvaꞌa ni ra xiꞌin naꞌa, na köo ndi̱xiin ndikuni Ndioxi, ni köo ndi̱xíin na kuni soꞌo na tuꞌun vaꞌa xaꞌa Tata yo Jesucristo.

HEBREOS 3:1

Ñani yo xiꞌin kuꞌva yo, ndóꞌo̱ ku ndo ndi̱kaxin Ndioxi, saa ka̱na ra ndóꞌo̱ ta xa̱a i̱í ra ndóꞌo̱ koo ndo xiꞌin ra. Yakan kiꞌin ni ndo kuenta, chi suvi mií Jesús ku ra ku apóstol, ra ti̱ꞌvi Ndioxi vaxi xaa chiñu ra nuu ra, ta kúu tu ra sutu ra chee ni nuu ndiꞌi yo kándixa ñaꞌa.

2 Pedro 1:2

Ta mií Iva yo Ndioxi, ná taxi kuaꞌa ni ya vaꞌa koo xiꞌin ndo, saa ná koo vaꞌa ni ndo xaꞌa ya xíni taꞌan vaꞌa ni ndo xiꞌin Iva yo Ndioxi tin mií Tata yo Jesucristo, ra chee ni nuu yo.

2 Pedro 1:3

Ta xiꞌin ndee Ndioxi kua xa ta̱xi ra ndiꞌi ya xíniñuꞌu ndo ndaꞌa ndo ya vaꞌa kutaku yo nuu ra tá kuꞌva kúni mií ra. Xa ndi̱kiꞌin yo ndiꞌi ya yóꞌó chi vitin ta ndinuꞌu ni ini yo xíni yo Jesucristo, ra ka̱na yoo ya ndu̱u yo naꞌa, na kúu mií ya vaꞌa, ya luvi kaꞌnu ni kúu mií ra.

2 Pedro 1:8

Tá tu íkan ndo ndiꞌi ya káꞌan i xaꞌa xiꞌin ndo yóꞌó iin iin kivi, saa kua nduu ndo naꞌa, na íkan chiñu ya ndee ni ndáa yaꞌvi, ta ya ñaa kua káꞌan vaꞌa ni xaꞌa ndo, ya xíni ni ndo Tata yo Jesucristo.

1 Juan 1:2

Ta ndu̱u ra, ra ivi tá íin mií yo ivi yóꞌó. Saa ki̱xi ra ñuu ivi yóꞌó ta xi̱ni xiꞌin nuu nde ra yakan kua ndíkuiin nde xaꞌa ra tin káꞌan nde xaꞌa ra xiꞌin ndo. Chi ra ikán ku ra táxi kutaku yo xiꞌin Ndioxi ndiꞌi saa kivi, ta xiꞌin Iva yo Ndioxi ndi̱xiyo ra, ta vitin ndi̱tuvi ra nuu yo.

1 Juan 1:3

Ya xi̱ni nde xiꞌin ya xi̱ni soꞌo nde ndi̱kaꞌan ra, ya yóꞌó kua káꞌan nde xiꞌin ndo ya ná ndikitaꞌan ndo xiꞌin nde ya koo ndiꞌi yo iin yuꞌu. Ta saa ndixa iin yuꞌu ná koo ndiꞌi yo xiꞌin taꞌan yo. Chi ndeꞌe ta ndixa iin yuꞌu íyo nde xiꞌin Iva yo Ndioxi tin Jesucristo ra kúu Seꞌe ra.

1 Juan 2:23

Ta ndiꞌi na ndíkuaa Jesús, ra kúu Seꞌe Ndioxi, ta kúni kachi ya ndíkuaa tu na Ndioxi va. Ta ndiꞌi na ndíkuni Jesús ya kúu ra Seꞌe Ndioxi ta ndíkuni tu na Iva yo Ndioxi va.

1 Juan 4:6

Ta yoo, ta kuenta Ndioxi ku yo, ta na ndíkun Ndioxi ku na xíni soꞌo ya káꞌan yo. Ta naꞌa na köo ndíkun Ndioxi ta köo xíin na kuni soꞌo na ya káꞌan yo. Tixin ya yóꞌó kua ndíkuni yo unku na kúu mií Tachi Ndioxi ya ndaa ta unku na kúu mií tachi nduvaꞌa ya vata.

1 Juan 5:20

Xíni tu yo ya ki̱xi Jesús Seꞌe Ndioxi ñuu ivi yóꞌó ta ta̱xi ra ya xínituni yo ya kundaa vaꞌa ini yo xaꞌa Ndioxi, ra ndaa. Ta iin yuꞌu ku yo xiꞌin Seꞌe ra, ra kúu Jesucristo, ra ndaa. Saa chi Jesucristo ku Ndioxi ra ndaa, ra táxi ichí ya kutaku yo xiꞌin Ndioxi ndiꞌi saa tiempo.