San Juan 17:2 - Xochapa Mixteco

² Chi yóꞌo̱ ku ra ta̱xi ichí ndaꞌa i xaꞌa ndiꞌi na ñuu ivi na ta̱xi un ndaꞌa i yóꞌó, ya ná taxi i ichí ndaꞌa na kutaku na ndiꞌi saa kivi.

San Juan 17:2 Iomraidhean Croise

San Mateo 11:27

Saa ndi̱kaꞌan ka Jesús xiꞌin na, káchi ra saa: ―Iva i Ndioxi ta̱xi ndiꞌi ra ya vaꞌa ndaꞌa i. Ta nda iin naꞌa köo xíni yeꞌe, ra kúu seꞌe Ndioxi, iindaa mií Ndioxi ku ra xíni vaꞌa yeꞌe. Ta nda iin naꞌa köo xíni Iva i tá kuꞌva xíni yeꞌe ra, saa tu na ndi̱kaxin i taxi i kuni vaꞌa na ini ra.

San Mateo 25:46

Ta saa kuꞌun na nuu tixuꞌvi ni na ndiꞌi saa kivi ya vaxi, ta na vaꞌa, na xáa súvi ya kúni Ndioxi ta kuꞌun na nuu kutaku na xiꞌin Ndioxi ndiꞌi saa kivi ya vaxi ―káchi Jesús xiꞌin na.

San Mateo 28:18

Saa ku̱yati Jesús nuu nda, ta ndi̱kaꞌan ra xiꞌin nda, káchi ra saa: ―Ndaꞌa yeꞌe ta̱xi Ndioxi ichí xaꞌa ndiꞌi ni kúu ñaꞌa ya íyo nuu ndivi tin ya íyo ñuu ivi yóꞌó.

San Juan 17:24

’Tata Iva yo, na ta̱xi un ndaꞌa i ndíkun yeꞌe, ta kúni i ná koo na xiꞌin i nuu ndivi nuu koo i. Saa kuni na ndiꞌi ya vaꞌa, ya luvi ta̱xi un ndaꞌa i, saa chi yóꞌo̱ ta kúꞌvi ni ini un xíni un yeꞌe, nda tá täꞌan xikoo xaꞌa ñuu ivi yóꞌó vi kúꞌvi ni ini un xíni un yeꞌe.

San Juan 17:6

’Ivi na ndi̱kaxin un ta̱xi un ndaꞌa i ta si̱naꞌa i yóꞌo̱ nuu na. Na ndíkun yóꞌo̱ ku na, ta ta̱xi un na ndaꞌa i. Ta xáa súvi ndiꞌi na tuꞌun un ya ndi̱kaꞌan i xiꞌin na.

San Juan 17:9

’Yakan xíkan i ya mani nuu un xaꞌa na. Köo káꞌan i xiꞌin un xaꞌa na ñuu ivi. Ndisaa xaꞌa na ta̱xi un ndaꞌa i káꞌan i xaꞌa xiꞌin un, chi kuenta mií un ku na.

San Juan 3:35

Iva yo Ndioxi ta kúꞌvi ni ini ra xíni ra Seꞌe ra, yakan kua ta̱xi ndiꞌi ra ñaꞌa ndaꞌa Seꞌe ra.

San Juan 4:14

Sundi na koꞌo tikuii nduta táxi i ndaꞌa na ta nda iin kivi ïchi ka na. Saa chi tikuii rá táxi i koꞌo na ta nduu rá tá káa iin ita chee ini na, ta nda iin kivi ïchi rá ini na. Ta na koꞌo tikuii rá taxi i ta küvi na, chi kúu mií rá ndee ya taxi rá kutaku na, ta nda iin kivi ya vaxi ndïꞌi xaꞌa na ―káchi Jesús xiꞌin yá.

San Juan 6:27

Xäa chiñu ndo xaꞌa ndisaa ya kuxi ndo, chi ya ñaa ta ya ndíꞌi xaꞌa va kua, sundi xaa chiñu ndo xaꞌa ya köo ndíꞌi xaꞌa, ya chindee ndóꞌo̱ koo ndo xiꞌin Ndioxi ndiꞌi saa kivi ya vaxi. Chi yeꞌe Taa ra xa̱a ñuu ivi yóꞌó ku ra kúu mií ichí ya taxi i ya ndaꞌa ndo, chi Iva i Ndioxi ku ra ta̱xi ichí ndaꞌa i ya ikan i saa ―káchi Jesús xiꞌin na.

San Juan 6:37

Ndiꞌi na táxi Iva i Ndioxi ndaꞌa i, ta vaxi na nuu i, ta ndiꞌi na vaxi nuu i ta täva i na keꞌe.

San Juan 6:39

Ta ya yóꞌó kua chi̱tuni Iva i Ndioxi, ra ti̱ꞌvi yeꞌe vaxi i xaa súvi i: Ndiꞌi na táxi ra ndaꞌa i ta ná sändañuꞌu i nda iin na, saa tá ti̱ndaa kivi sindiꞌi, ta sitaku ndiꞌi i na ikán.

ROMANOS 6:23

Saa chi naꞌa, na íkan kuachi ta yaꞌvi na ya cháꞌvi kuachi na nuu na kua ndiꞌi xaꞌa na, kuvi na nuu Ndioxi. Sundi yoo ta si̱niꞌi Ndioxi ya vaꞌa nuu yo ya kutaku yo xiꞌin ra ndiꞌi saa kivi, ta nda iin ichí ndïꞌi xaꞌa yo, xaꞌa ya xa iin ndu̱u yo xiꞌin Tata yo Cristo Jesús.

1 Corintios 15:25

Saa koo chi xíniñuꞌu Jesucristo ndikunduꞌu ra kaꞌnda chiñu ra nuu naꞌa, xiꞌin ndiꞌi nuu ñaꞌa ya ndi̱kuaꞌa, ta kuchiñu ra nuu ndiꞌi ndee ya sáa ini xíni ra, ta̱an ra ya tixin xaꞌa ra.

Efesios 1:20

si̱taku ra Cristo tañu na ndíi, saa ta̱xi ra ichí ndaꞌa ra ya koo ra xiꞌin ra ñaꞌñu kuáꞌá ra nuu ndivi.

Filipenses 2:10

Yakan kua ndiꞌi ni kúu naꞌa, tá ná kuni soꞌo na kivi ra, ta sikusiti ndiꞌi na nuu ra. Ta saa sikusiti ndiꞌi ni kúu na ndóo nuu ñuꞌú xiꞌin ya íyo nuu ndivi tin ndiꞌi ya íyo tixin ñuꞌú ni̱nu̱ nuu ra.

1 Timoteo 1:16

Xaꞌa ya ikán kua ku̱ndaꞌvi ni ini Tata yo Jesucristo xi̱ni ra yeꞌe. I̱kan ra saa xiꞌin i ya kúni ra ná kuni naꞌa ya ndee ni kaꞌnu ini ra xiꞌin na ndee ni ndee kuachi kúu mií nuu ra. Ta kúni ra ná kuni na ya ndo̱ꞌo i, ta saa kuchiñu na kandixa na ra, ta saa niꞌi na kutaku na xiꞌin ra ndiꞌi saa kivi ya vaxi.

HEBREOS 1:2

Sundi tiempo ya kuaꞌan ndíꞌi ndóo yo vitin ta köo káꞌan ka ra xiꞌin yo tixin nda ikán, tixin Seꞌe ra kua káꞌan ra xiꞌin yo, chi tixin ra ikán kua si̱kuaꞌa ra ndiꞌi ni kúu ñaꞌa ya íyo nuu ndivi xiꞌin ya íyo ñuu ivi yóꞌó. Saa ta̱xi ndiꞌi ra ya ndaꞌa Seꞌe ra, ta ra ikán ku ra ndíso chiñu xiꞌin ndiꞌi ni kúu ñaꞌa ra.

1 Pedro 3:22

Ta nda̱a ra kuaꞌan ra nuu ndivi, índuꞌu ra ñaꞌñu kuáꞌá Ndioxi. Ta mií ra ku ra xáꞌnda chiñu nuu na tatun Ndioxi, saa xáꞌnda chiñu ra nuu ndiꞌi ndee ya íyo nuu ndivi tin ya íyo nuu ñuꞌú yóꞌó.

1 Juan 1:2

Ta ndu̱u ra, ra ivi tá íin mií yo ivi yóꞌó. Saa ki̱xi ra ñuu ivi yóꞌó ta xi̱ni xiꞌin nuu nde ra yakan kua ndíkuiin nde xaꞌa ra tin káꞌan nde xaꞌa ra xiꞌin ndo. Chi ra ikán ku ra táxi kutaku yo xiꞌin Ndioxi ndiꞌi saa kivi, ta xiꞌin Iva yo Ndioxi ndi̱xiyo ra, ta vitin ndi̱tuvi ra nuu yo.

1 Juan 2:25

Saa chi Tata yo Jesucristo ki̱ndoo ra taxi ra ya ndi̱kaꞌan ra taxi ra ndaꞌa yo, ta ya ikán kua yóꞌó: taxi ra koo yo xiꞌin ra ndiꞌi saa tiempo.

1 Juan 5:20

Xíni tu yo ya ki̱xi Jesús Seꞌe Ndioxi ñuu ivi yóꞌó ta ta̱xi ra ya xínituni yo ya kundaa vaꞌa ini yo xaꞌa Ndioxi, ra ndaa. Ta iin yuꞌu ku yo xiꞌin Seꞌe ra, ra kúu Jesucristo, ra ndaa. Saa chi Jesucristo ku Ndioxi ra ndaa, ra táxi ichí ya kutaku yo xiꞌin Ndioxi ndiꞌi saa tiempo.

Judas 1:21

Ta sïndoo ndo ya ndíkun ndo ichí Ndioxi, ra kúꞌvi ni ini xíni ndóꞌo̱, ta saa niꞌi ndo koo ndo xiꞌin ra ndiꞌi saa ichí xaꞌa ya kúndaꞌvi ni ini ra xíni ra ndóꞌo̱.