San Juan 14:6 - Xochapa Mixteco

⁶ Saa ndi̱kuiin Jesús ndi̱kaꞌan ra xiꞌin ra, káchi ra saa: ―Yeꞌe ku ra ku ichí, ta yeꞌe ku mií ya ndaa, yeꞌe ku ra táxi kutaku na. Nda iin na küvi kuꞌun nuu Iva i, tá tu süvi xiꞌna nuu yeꞌe vaxi na.

San Juan 14:6 Iomraidhean Croise

San Mateo 11:27

Saa ndi̱kaꞌan ka Jesús xiꞌin na, káchi ra saa: ―Iva i Ndioxi ta̱xi ndiꞌi ra ya vaꞌa ndaꞌa i. Ta nda iin naꞌa köo xíni yeꞌe, ra kúu seꞌe Ndioxi, iindaa mií Ndioxi ku ra xíni vaꞌa yeꞌe. Ta nda iin naꞌa köo xíni Iva i tá kuꞌva xíni yeꞌe ra, saa tu na ndi̱kaxin i taxi i kuni vaꞌa na ini ra.

San Juan 1:14

Ta Tuꞌun Ndioxi ikán, ndu̱u ya iin taa, tá íin mií yo saa ndu̱u ra, ta ndi̱xika ra xiꞌin nde ñuu ivi yóꞌó. Ta xi̱ni nde ya vaꞌa luvi ni kúu mií ra. Ta mií ya luvi ni kúu mií Ndioxi kua kúu mií ra, chi iindaa mií ra ku Seꞌe Ndioxi. Iin chútu ndaa ya vaꞌa, ya ndaa ini ra.

San Juan 1:17

Ta ley Ndioxi ta ndaꞌa xii sikua yo ra Moisés ta̱xi Ndioxi ya xa̱ꞌnda chiñu ya nuu yo. Sundi ya ndaa xiꞌin ya kúꞌvi ni ini Ndioxi xíni ra yoo ta tixin Jesucristo kua xa̱a ya nuu yo.

San Juan 1:4

Ta mií ra ikán ku ra kúu mií ndee ya taxi ra kutaku na ñuu ivi xiꞌin ra tá kuꞌva táku mií ra. Chi ya táku ra kua vaꞌa síndiyeꞌe ra nuu na ñuu ivi.

San Juan 10:28

Ta yeꞌe taxi i kutaku ri ndiꞌi saa tiempo, nda iin ichí ndïꞌi xaꞌa ri, ta ni naꞌa ta nda iin na küchiñu kindaa ri ndaꞌa i.

San Juan 10:7

Saa ndi̱kaꞌan tuku Jesús xiꞌin na, káchi ra saa: ―Ya ndaa káꞌan i xiꞌin ndo: Yeꞌe ku yéꞌé nuu kuakee kiti levo.

San Juan 10:9

Táꞌan yéꞌé ikán ku yeꞌe, ta ndiꞌi na vaxi nuu i ta sikaku i na. Koo na tá kuꞌva íyo levo, kuakiꞌvi ri tin kána koo ri ini corra ikán, ta níꞌi ri ita xíxi ri.

San Juan 14:19

Tixin soo uvi ndaa kivi ta küni ka na ñuu ivi yóꞌó yeꞌe, sundi ndóꞌo̱ ta kuni ndo yeꞌe, saa chi yeꞌe ta táku i, yakan vaꞌa kutaku ndo xiꞌin i.

San Juan 15:1

Saa ndi̱kaꞌan Jesús káchi ra saa: ―Yeꞌe ku itun yoꞌó uva ya vaꞌa ni. Ta Iva i ku ra ndáa nu ikán.

San Juan 18:37

Saa ndi̱kuiin ra Pilato káchi ra saa: ―¿Án saa va, án rey ku ndixa un? ―káchi ra xiꞌin ra. Saa ndi̱kuiin Jesús káꞌan ra, káchi ra saa: ―Ya ndixa kua, saa ndixa íyo va ya. Xaꞌa ya ñaa kua ka̱ku i xa̱a i ñuu ivi yóꞌó ya ndikuiin i kaꞌan i nina ya ndaa. Ta ndiꞌi na ndíkun ya ndaa, na ñaa ku na kándixa ya káꞌan i ―káchi Jesús.

San Juan 5:21

Tá kuꞌva sítaku Iva ra Ndioxi na ndíi ta táxi ra kutaku na, ta saa íkan tu Seꞌe va ra, táxi ra kutaku na kúni mií ra.

San Juan 6:33

Saa chi xita vaꞌa ya táxi Ndioxi kutaku ndo ku Taa ra xa̱a ra nuu ndo, ta táxi ra kutaku ndiꞌi na ñuu ivi ―káchi Jesús xiꞌin na.

San Juan 6:51

Mií yeꞌe ku xita vaꞌa ya táku ya nùù nuu ndivi, ndiꞌi na xíxi xita vaꞌa yóꞌó ta nda iin ichí ndïꞌi xaꞌa na. Ta xita vaꞌa ya táxi i ndaꞌa na ku ikin kuñu i, ya soko i xaꞌa ndiꞌi na ñuu ivi yóꞌó ya kutaku na ―káchi Jesús xiꞌin na.

San Juan 6:57

Iva i Ndioxi ra ti̱ꞌvi yeꞌe vaxi i, ta táku ra. Xaꞌa ya táku ra ikán kua táku tu yeꞌe va. Ta saa tu ndiꞌi na xíxi kuñu i kutaku na, chi táku yeꞌe ini na.

San Juan 6:68

Saa ndi̱kuiin ra Simón Pedro, káchi ra saa: ―Tata, ¿unku ka na kuꞌun nde nuu? Ta iindaa yóꞌo̱ ku un ndítuꞌun tuꞌun ya táxi kutaku nde ndiꞌi saa kivi.

San Juan 8:32

Ta saa kundaa vaꞌa ini ndo xaꞌa ya ndaa, ta ya ndaa yóꞌó kua taxi ichí ndaꞌa ndo saña ndíka ndo ―káchi ra xiꞌin na.

San Juan 8:51

Ta ya ndaa ku tuꞌun káꞌan i xiꞌin ndo, ndiꞌi na xáa súvi tuꞌun ya káꞌan i, ta küvi na ―káchi Jesús.

Los Hechos 3:15

Ta xa̱ꞌni ndo taa ra vaꞌa ni, chi iin mituꞌun ra ikán ku ra táxi ichí ya kutaku yo. Sundi Ndioxi ta si̱taku ñaꞌa ra. Ndeꞌe ku testigo xaꞌa ra, xi̱ni nde ndi̱taku ra.

Los Hechos 4:12

Iindaa mituꞌun Jesús ku ra kúu mií ndee ya sikaku ra yoo. Nda iin na ñuu ivi yóꞌó ta köo na kuchiñu sikaku yoo, nda iin ñaꞌñu nïꞌi yo na sikaku mií yo, iindaa Jesús ku ra kúu mií ndee ya ta̱xi Ndioxi ndaꞌa ra sikaku ra yoo ―káchi ra Pedro xiꞌin ndiꞌi na xikuaꞌa ikán tin na chiñu.

Los Hechos 9:2

Ndi̱xaꞌan ra ndúku ra tutu ya ndikuiin xaꞌa ra kuꞌun ra veꞌe ñuꞌu sinagoga ya ñúꞌu ñuu Damasco, ya ná taxi nda ichí ndaꞌa ra kiꞌvi ra ini ndiꞌi veꞌe ñuꞌu sinagoga tiin ra na ndíkun ichí Jesús, taa ku nda, ñaꞌa ku ná ta iin tiin yaa ra na taan ra veꞌe kàà ñuu Jerusalén, káchi ra.

ROMANOS 15:16

Chiñu kúu mií i kua xáa chiñu i nuu Jesucristo. Tá káa iin sutu káa i káꞌan ndoso i tuꞌun vaꞌa xaꞌa ra xiꞌin naꞌa, na köo kúu judío, ya kuchiñu na kuyati na nuu ra. Ta saa nduu na tá íin ñaꞌa ya sóko i nuu Ndioxi, ta vaꞌa ni ndikuiso ra na, saa chi xa ndi̱kaxin mií Tachi I̱í Ndioxi na, ta xaꞌa mií ra kua ndi̱kaxin ya na.

ROMANOS 5:2

Saa tu xaꞌa ya kándixa yo Jesucristo kua ndi̱niꞌi uun yo nuu ndi̱kiꞌvi yo ndi̱kitaꞌan vaꞌa ni yo xiꞌin Ndioxi, ta ni küxika ka yo nuu ra. Saa kúsini ni yo chi kúndaa teꞌe ini yo ya koo yo xiꞌin ra nuu kuni yo ya chee ni kúu mií Ndioxi.

ROMANOS 5:21

Tá täꞌan ka kixi Jesucristo, ta ndee ya kúu mií kuachi na ku ya xa̱ꞌnda chiñu nuu na ta xa̱á ya xáꞌni ya na. Sundi vitin ta ndee ni ka ndee ya vaꞌa ta̱xi Ndioxi xáꞌnda chiñu nuu ndiꞌi yo kándixa Jesucristo xaꞌa ya kúꞌvi ni ini ra xíni ra yoo. Nda̱sa vaꞌa Ndioxi yo nuu ra, ndu̱u yo tá íin naꞌa, na köo ka kuachi kúu mií nuu ra, ta saa ta̱xi ra ya kutaku yo xiꞌin ra ndiꞌi saa kivi ya vaxi.

1 Corintios 15:45

Tá káchi mií tuꞌun Ndioxi ya ta̱a na xinaꞌa: “Taa ra núnu̱ú xi̱nani Adán ku ra ta̱xi Ndioxi xi̱taku”, káchi ya. Sundi Cristo, ra káa tá káa ra Adán, ra ki̱xi si̱ndiꞌi, ra ke̱e nuu ndivi, ta táxi ra kutaku ya vaꞌa yo.

Efesios 2:18

Ta vitin xaꞌa ya i̱kan Jesucristo xaꞌa yo kua vaꞌa kuchiñu ndiꞌi ndaa yo kuyati yo nuu Iva yo Ndioxi tixin ndee Tachi I̱í ra.

Colosenses 2:17

Chi ndiꞌi ñaꞌa ya káꞌan saa, ta tá káa ndati ya si̱naꞌa nuu na Israel xinaꞌa saa ndi̱xiyo ya, ndi̱kaꞌan ya xaꞌa ya kuu kivi vaxi tá ná kixi Tata yo Jesucristo ra ndaa ni.

Colosenses 2:9

Ta iin tá kuꞌva íyo ini mií Iva yo Ndioxi iin kuꞌva ndaa saa íyo tu ikin kuñu mií Tata yo Jesucristo va.

Colosenses 3:4

Tá ná ndiko koo Jesucristo, ra táxi táku ndo, ta iin káchi nduu ndo xiꞌin ra, saa ndikundixi níí ndo ya vaꞌa, ya luvi ni xiꞌin ra.

HEBREOS 7:25

Xaꞌa ya ikán kua vaꞌa síkaku ra yoo, yo kúyati nuu Ndioxi xaꞌa mií ra. Ta ndiꞌi saa ichí kutaku yo xiꞌin ra, saa chi ndiꞌi saa ichí táku mií ra, yakan vaꞌa káꞌan ra xaꞌa yo xiꞌin Ndioxi.

HEBREOS 9:8

Ta xiꞌin ya yóꞌó sínaꞌa Tachi I̱í Ndioxi yoo vitin, tá kivi ndi̱xiyo Cuarto ya I̱í, ya núnu̱ú ikán, ta köo naꞌa ndi̱kuchiñu kiꞌvi ini Cuarto ya ndee ni I̱í ya xaa kaꞌnu na Ndioxi, tá káa ya xi̱ndasi saa ndi̱xiyo ya nuu na.

1 Pedro 1:21

Xaꞌa ya vaꞌa i̱kan Tata yo Jesucristo kua xa̱á ndo kándixa ni ndo Iva yo Ndioxi, ra si̱taku Tata yo Jesucristo tañu na ndíi, saa ta̱xi ni Ndioxi ya toꞌo ndaꞌa ra. Yakan kua ndátun ni ndo, saa ndáa ni ini ndo ya xaa súvi ndiꞌi ra ya ndi̱kaꞌan ra xiꞌin ndo taxi ra ndaꞌa ndo.

1 Pedro 2:4

Vaꞌa kuyati ndo nuu Tata yo Jesucristo ra káa tá káa yu̱ú ya táku, ya ku̱ndasi nda síkuaꞌa veꞌe, sundi Ndioxi ta ndi̱kaxin ñaꞌa ra, chi ya ikán ka kua ndee ni ndáa yaꞌvi nuu ra, ta yáꞌa ni yaꞌvi ya.

1 Pedro 3:18

Saa chi saa kua ndo̱ꞌo tu mií va Tata yo Jesucristo xaꞌa yo, ndi̱xiꞌi ra xaꞌa kuachi yo, ta iindaa ichí ndo̱ꞌo ra ndi̱xiꞌi ra, ta küvi ka ra. Ra vaꞌa ni ndi̱xiyo ra, ta ndi̱xiꞌi ra xaꞌa ndiꞌi yo ivi kuachi ya kuchiñu kundaka ra yoo kuꞌun yo nuu Ndioxi. Tá ndi̱xiꞌi ra ta ndi̱ꞌi xaꞌa ikin kuñu ra, saa tá ndi̱taku ra xiꞌin ikin kuñu ra ya xa̱á küvi kuni yo.

1 Juan 1:8

Tá tu káꞌan yo köo kuachi yo, káchi yo, ta síndaꞌvi yo mií va yo, ta köo ya ndaa íyo ini yo.

1 Juan 2:23

Ta ndiꞌi na ndíkuaa Jesús, ra kúu Seꞌe Ndioxi, ta kúni kachi ya ndíkuaa tu na Ndioxi va. Ta ndiꞌi na ndíkuni Jesús ya kúu ra Seꞌe Ndioxi ta ndíkuni tu na Iva yo Ndioxi va.

1 Juan 5:20

Xíni tu yo ya ki̱xi Jesús Seꞌe Ndioxi ñuu ivi yóꞌó ta ta̱xi ra ya xínituni yo ya kundaa vaꞌa ini yo xaꞌa Ndioxi, ra ndaa. Ta iin yuꞌu ku yo xiꞌin Seꞌe ra, ra kúu Jesucristo, ra ndaa. Saa chi Jesucristo ku Ndioxi ra ndaa, ra táxi ichí ya kutaku yo xiꞌin Ndioxi ndiꞌi saa tiempo.

1 Juan 5:6

Ya si̱naꞌa Tata yo Jesucristo nuu yo ya ke̱e ra nuu Ndioxi kua yóꞌó: tikuii nduta chi̱chi ra tin nií ra nduta ndi̱xita nuu cruzin tá ndi̱xiꞌi ra. Nduta ikán ku rá sínaꞌa yoo ya kúu ra Seꞌe Ndioxi. Ta süvi ndisaa tikuii ndíkuiin xaꞌa ra, ndíkuiin tu nií va ra xaꞌa ra. Ta saa ndíkuiin tu Tachi Ndioxi va xaꞌa ra, saa chi ya ikán ku ya ndaa.

2 Juan 1:9

Ndiꞌi na síndoo ichí ya si̱naꞌa Jesucristo ta ndíkiꞌin na inka ichí kuaꞌan na, ta köo Ndioxi íyo xiꞌin na, sundi na tuun ni ndíkun ichí ya si̱naꞌa ra ta kúu mií na Iva yo Ndioxi xiꞌin Seꞌe ra.

El Apocalipsis 1:5

Saa ná ikan tu Tata yo Jesucristo ya vaꞌa xiꞌin ndo, saa chi ndaa ni ini ra, ta ndinuꞌu ini ra ndíkuiin ra xaꞌa tuꞌun ndaa ni káꞌan ra. Ta ra ikán ku ra núnuu ndi̱taku tañu ndiꞌi na ndíi, yakan kúu mií ra ichí kaꞌnda chiñu ra nuu nda rey ñuu ivi yóꞌó. Ta kúꞌvi ni ini ra xíni ra yoo, ta köo ka kuachi ndíso yo nuu Ndioxi, saa chi ndi̱xiꞌi Jesucristo xaꞌa kuachi yo, ta xiꞌin nií ra nduta ndi̱xita ndi̱kata ra kuachi yo, nda̱sa vaꞌa ra yoo nuu Ndioxi.

El Apocalipsis 19:11

Saa xi̱ni i núna nuu ndivi, ta xi̱ni i iin kuai kiti yaa ku ri. Ta ra yóso ri náni ra Ra ndaa ni, Ra ndinuꞌu ni ndíkun ichí Ndioxi. Xáꞌnda chiñu ra xiꞌin nina ya ndaa, ta suvi xiꞌin ya ndaa káni taꞌan ra xiꞌin ya väꞌa.

El Apocalipsis 20:15

Ta ndiꞌi na köo ndóso kivi nuu tutu Ndioxi ya koo na xiꞌin ra, ta ki̱ꞌin tatun Ndioxi na ta̱an ya ini xitun nuu ndee ni xíxi ñu̱ꞌu̱.

El Apocalipsis 22:1

Saa si̱naꞌa tatun ikán iin i̱tà nuu i, ta ndee ni yaa rá, ta rá ikán ku rá táxi ichí ya kutaku naꞌa ndiꞌi saa kivi xiꞌin Ndioxi. Ta kána koo rá nuu ndíchi tai toꞌo nuu índuꞌu Ndioxi xiꞌin Levo loꞌo. Tá kuꞌva yéꞌe̱ taxan vidrio, saa yéꞌe̱ rá.

El Apocalipsis 22:17

Tachi I̱í Ndioxi xiꞌin na veꞌe ñuꞌu na íin tá káá ñaꞌa yá tindaꞌa xiꞌin Levo loꞌo ikán kána na ra, káchi na saa xiꞌin ra: “Naꞌa Tata yo Jesús”, káchi na. Ta ndóꞌo̱ xíni soꞌo tuꞌun yóꞌó, kaꞌan tu ndóꞌo̱ saa va xiꞌin naꞌa: “Naꞌa ndo”, kachi ndo. Ta ndóꞌo̱ íchi tikuii ta kúni ndo koꞌo ndo rá, ta vaꞌa kixi ndo koo ndo rá, chi táxi rá kutaku ndo ndiꞌi saa kivi. Ta síniꞌi uun Ndioxi rá koꞌo ndo.

El Apocalipsis 3:14

Saa ndi̱kaꞌan tuku ra xiꞌin i, káchi ra saa: ―Taa un tutu yóꞌó kuꞌun ya ndaꞌa tatun Ndioxi ya ndáa naꞌa, na kándixa yeꞌe nuu ndíkitaꞌan na xáa kaꞌnu na yeꞌe ñuu Laodicea: “Ya yóꞌó kua káꞌan yeꞌe, ra kúu Amén. Ndee ni ndíkuiin i xaꞌa ya i̱kan Ndioxi, ra ndaa ni. Ta yeꞌe ku ra ndi̱xiyo núnu̱ú tá sikan xa̱á xi̱koo xaꞌa ñuu ivi ya si̱kuaꞌa Ndioxi.

El Apocalipsis 3:7

Saa ndi̱kaꞌan tuku ra xiꞌin i, káchi ra saa: ―Taa un tuꞌun yóꞌó nuu tutu ya kuꞌun ndaꞌa tatun Ndioxi, ya ndáa naꞌa, na kándixa yeꞌe, ta ndíkitaꞌan na ñuu Filadelfia xáa kaꞌnu na Ndioxi. Yeꞌe káꞌan xiꞌin ndo ku ra i̱í, ra ndixa ni ndaa. Yeꞌe ku ra níꞌi llave ya ku̱u mií ra rey David. Tá xúna i yéꞌe, ta nda iin na küchiñu ndikasi ya. Tá ndíkasi i ya ta nda iin na küchiñu kuna ya.