San Juan 1:26 - Xochapa Mixteco

²⁶ Saa ndi̱kuiin ra Juan ndi̱kaꞌan ra xiꞌin nda, káchi ra saa: ―Yeꞌe ta xiꞌin tikuii va síkuchi i naꞌa, sundi xa íyo iin taa tañu ndo, ta köo xíni ndo ra.

San Juan 1:26 Iomraidhean Croise

San Mateo 3:11

Yeꞌe, ta síkuchi i ndóꞌo̱ xiꞌin tikuii, ya sínaꞌa ndo mií ndo nuu naꞌa ya ndi̱nama ndo kuꞌva íyo ndo. Sundi íyo inka ra vaxi sindiꞌi, ta ndee ni ra ikán nuu yeꞌe. Ra ikán ku ra sikuchi ndóꞌo̱ xiꞌin Tachi I̱í Ndioxi xiꞌin ñu̱ꞌu̱ ya xíxi. Xaꞌa ya ndee ni ra ta nda nduxan ra küvi loꞌo kundiso i.

San Mateo 3:6

Saa tá xi̱ni soꞌo na, ta xa̱á na náꞌma na kuachi na nuu ra. Ta síkuchi ra na ikán ini ita Jordán.

San Marcos 1:8

Yakan yeꞌe ta xiꞌin tikuii va síkuchi i ndóꞌo̱, sundi ra ikán ku ra sikuchi ndóꞌo̱ xiꞌin Tachi I̱í Ndioxi ―káchi ra Juan xiꞌin na.

San Lucas 3:16

Ta saa ndi̱kaꞌan ra xiꞌin na, káchi ra saa: ―Süvi yeꞌe ku i. Ya ndaa kua síkuchi i ndóꞌo̱ xiꞌin tikuii, sundi süvi yeꞌe ku i sikaku ndóꞌo̱. Vaxi iin ra, ta ra ikán ku ra chee ni nuu i, ta nda sata nduxa ra küvi kuyati i ndaxin i chi yáꞌa ni chee ra nuu i. Ra ikán ku ra sikuchi ndóꞌo̱ xiꞌin Tachi I̱í Ndioxi xiꞌin ñu̱ꞌu̱ xíxi.

San Juan 16:3

Saa ikan na xiꞌin ndo, saa chi täꞌan kuni na yeꞌe, ni Iva i ta köo xíni na ra.

San Juan 17:25

Tata Iva yo, ra vaꞌa, ra ndaa ni kuu mií un. Na ndíkun ñuu ivi yóꞌó ta köo xíni na yóꞌo̱, sundi yeꞌe ta xíni i yóꞌo̱, ta na ndíkun yeꞌe xa xíni na yóꞌo̱ ku ra ti̱ꞌvi yeꞌe vaxi i.

San Juan 17:3

Ta ya kutaku na ndiꞌi saa ichí kua kúni kachi ya ná kuni vaꞌa na ini un, chi iin yóꞌo̱ ku Ndioxi ra ndaa ni xiꞌin Jesucristo, ra ti̱ꞌvi un vaxi ñuu ivi yóꞌó.

San Juan 8:19

Saa ndi̱kaꞌan nda xiꞌin ra káchi nda saa: ―¿Míí íyo Iva un? ―káchi nda. Saa ndi̱kuiin Jesús káꞌan ra xiꞌin nda: ―Ndóꞌo̱ ta köo xíni ndo yeꞌe, ta ni Iva i köo xíni ndo ra. Saa chi tá tu xíni ndo yeꞌe, ta kúni kachi ya xíni tu ndo Iva va i, ndíkuu ―káchi ra xiꞌin nda.

Los Hechos 1:5

Saa chi ya ndaa kua si̱kuchi ra Juan naꞌa xiꞌin tikuii, sundi ndóꞌo̱ ta soo uvi ndaá kivi kua kuchi ndo ikán Tachi I̱í Ndioxi ―káchi Jesús xiꞌin nda.

Los Hechos 11:16

Ta saa ndi̱kaꞌán ini i ya ndi̱kaꞌan Tata yo Jesús tá ndi̱kaꞌan ra xiꞌin yo xi̱taꞌan xiꞌin ra: “Ra Juan ta ya ndaa kua si̱kuchi ra naꞌa xiꞌin tikuii, sundi ndóꞌo̱ ta vaxi kivi kuchi ndo xiꞌin Tachi I̱í Ndioxi”, káchi ra xiꞌin yo.

Los Hechos 19:4

Saa ndi̱kaꞌan ra xiꞌin nda, káchi ra saa: ―Ya ndaa kua si̱kuchi ra Juan naꞌa, na ndi̱ko koo ini xaꞌa kuachi na. Saa ndi̱kaꞌan tu ra xiꞌin na ya xíniñuꞌu na kandixa na Jesús, ra kixi sata mií ra Juan tá sindiꞌi, ta ra ikán kúu Cristo, ra ti̱ꞌvi Ndioxi ki̱xi ―káchi ra Pablo xiꞌin nda.

1 Juan 3:1

¡Koto ndo vii! Iva yo Ndioxi ta yáꞌa ni kúꞌvi ini ra xíni ra yoo, yakan táxi ra kunani yo seꞌe ra ta ya ndaa kua kúu yo seꞌe ra. Xaꞌa ya kúu yo seꞌe ra yakan köo kúni na ñuu ivi yóꞌó kuni na mií yo. Saa chi ni mií ra ta köo ndi̱xiin na kuni ñaꞌa na.