Efesios 2:3 - Xochapa Mixteco

³ Saa ndi̱xiyo ndiꞌi va yo yachi: I̱kan ni yo ndiꞌi nuu ñaꞌa ya väꞌa, ya ku̱too ni mií ikin kuñu yo ikan ya. I̱kan yo tá kuꞌva íkan ndiꞌi naꞌa, xa̱a súvi ni yo ndiꞌi ñaꞌa ya ndi̱kani ini yo vaꞌa ni nuu yo, túvi yo. Ta xaꞌa ya ikán kua xíniñuꞌu yo sitixuꞌvi ni Ndioxi yoo, chi sáa ni ini ra xíni ra ya väꞌa íkan yo.

Efesios 2:3 Iomraidhean Croise

San Marcos 4:19

sundi ndíꞌi ni ini na xaꞌa chiñu íyo ñuu ivi yóꞌó saa xáa na xáa chiñu ni na ya kúni na kuu mií na kuaꞌa ni ya kuika ñuu ivi yóꞌó, ñaa síndiꞌi xaꞌa ya tuꞌun Ndioxi íyo nima na.

San Juan 1:13

Ta mií ya ndaa seꞌe Ndioxi ndúu na, chi köo ndi̱kaku na tá kuꞌva káku seꞌe iin taa xiꞌin iin ñaꞌa. Sundi ka̱ku na tá kuꞌva kúni mií Ndioxi.

San Juan 8:44

Kiti nǎꞌa va ku iva ndo: Seꞌe ri ikán va ku ndóꞌo̱ yakan kúni ndo ikan ndo ya íkan ri ikán. Saa chi ri ikán ta nda tá xaꞌa vi xa̱á ri xáꞌni ri ndìì. Ta nda iin ichí köo íkan ri ya ndaa, ta ni köo káꞌan ri ya ndaa. Tá káꞌan ri ya siki ta ndínaꞌa ri mií ri ya saa íyo ri, ta ri ikán ku iva siꞌí ndiꞌi ya vata.

Los Hechos 14:16

Xinaꞌa ta̱xi Ndioxi ndi̱xika ndiꞌi naꞌa ichí kúni mií na.

ROMANOS 1:24

Xaꞌa ya íkan na saa kua si̱ndoo ndaꞌa Ndioxi na íkan na ya kúni mií na. Saa sa̱ña ndaꞌa ra na, ta xa̱á na íkan na ñaꞌa xiꞌin taꞌan mií na, ya kini ni káa, ya ka̱ꞌan ni nuu. Xaꞌa ya íkan na saa ta köo xáa toꞌo na ikin kuñu na.

ROMANOS 11:30

Saa ndóꞌo̱, yachi ta köo ndi̱xiin ndo kandixa ndo Ndioxi. Ta vitin ndi̱niꞌi ndo ya vaꞌa nuu ra, ku̱ndaꞌvi ini ra xi̱ni ra ndóꞌo̱, xaꞌa ya köo ndi̱xiin na judío kandixa na ra.

ROMANOS 13:14

Vaꞌa ni ka kua ná ndikundixi ni yo ndee Tata yo Jesucristo. Ta ná ndïkani kíꞌvi ini yo tá kuꞌva ndíkani ini na ñuu ivi yóꞌó, chi na ikán ta ndisaa xaꞌa chiñu kíꞌvi ya kútoo ni mií ikin kuñu na kua íkan na.

ROMANOS 2:14

Naꞌa na köo kúu judío, vani köo xíni na ley Ndioxi, ta saa ni xáa súvi na ley ra tá íkan na ya vaꞌa nuu Ndioxi. Na íkan saa ta sínaꞌa na mií na ya xíni na unkua vaꞌa ta unkua väꞌa.

ROMANOS 5:10

Chi yachi tá íin yo ka̱nitaꞌan xiꞌin Ndioxi saa ndi̱xiyo yo, xaꞌa ya köo ndi̱xaa súvi yo ya káꞌan ra xiꞌin yo. Vani saa i̱kan yo, ta saa ni si̱kitaꞌan mani ra yoo xiꞌin mií ra, xaꞌa ya ti̱ꞌvi ra Seꞌe ra Jesucristo ki̱xi ra ndi̱xiꞌi ra xaꞌa yo. Ta ndisaa ka ví vitin sikaku ra yoo, chi xa ndi̱kitaꞌan mani yo xiꞌin ra.

ROMANOS 5:9

Ta ndisaa ka vi vitin, sïndoꞌo ka Ndioxi yoo kivi tá ná taxi ra kuachi xaꞌa ndiꞌi ni kúu na ñuu ivi yóꞌó, xaꞌa ya ndi̱xiꞌi Jesucristo xaꞌa yo kua nda̱sa ra mií yo ndu̱u yo tá íin naꞌa, na köo ka kuachi kúu mií nuu Ndioxi.

ROMANOS 6:12

Täxi ndo kaꞌnda chiñu kuachi ndo nuu ikin kuñu ndo, ta ni xäa súvi ndo ya väꞌa ya kútoo ni ya ikan ya, chi ya ndíꞌi xaꞌa va ku ikin kuñu ndo.

ROMANOS 7:18

Xa kúndaa va ini i, chi köo mií ya vaꞌa íyo vi ikin kuñu i, xaꞌa ya kúu i ra ñuu ivi yóꞌó. Saa chi ya vaꞌa ku ya kúni i ikan va i, sundi köo mií ndee ikin kuñu i ya ikan ya vaꞌa.

ROMANOS 9:22

Saa i̱kan Ndioxi xiꞌin naꞌa, na chi̱tuni ra ndiꞌi xaꞌa: ndixaꞌa ndee ndiꞌi ini ra xaꞌa ya väꞌa i̱kan na nuu ra, nda kivi ti̱ndaa tiempo ya nda̱a ni ya si̱saa na ra, ta si̱ndiꞌi xaꞌa ra na xiꞌin ndee kúu mií ra, saa ku̱ndaa ini ndiꞌi ni kúu na ñuu ivi xaꞌa ya i̱kan ra.

1 Corintios 4:7

Ta ¿ndachu ndíkani ini ndo, vaꞌa ni ka mií ndo nuu inka naꞌa, túvi ndo? Ndiꞌi ñaꞌa ya kúu mií ndo ta Ndioxi ku ra ta̱xi ya ndaꞌa ndo. Süvi mií ndo ndínduku ya yakan kütai ni ini ndo xiꞌin ya.

2 Corintios 7:1

Ta saa ñani mani yo, xa ndi̱kaꞌan Ndioxi xiꞌin yo ya ki̱ndoo ra xiꞌin yo, yakan ná kundaa ni yo mií yo, ná kuxika yo nuu ndá ka ñaꞌa väꞌa, ya xáa yakua ikin kuñu yo xiꞌin ya vaꞌa yo. Ná nditaxi ndiꞌi yo mií yo ndaꞌa Ndioxi, ya xaa toꞌo yo ra, saa kua nduu yo na i̱í nuu ra.

Gálatas 3:22

Chi tuꞌun Ndioxi ta káꞌan ya xaꞌa yo ya íin yo tá íin naꞌa, na núꞌni ndaꞌa kuachi na, saa íin ndiꞌi ni kúu yo ndaꞌa kuachi ya xáꞌnda chiñu nuu yo. Ta ndisaa naꞌa, na kándixa Jesucristo ku na kúchiñu ndíkiꞌin ya vaꞌa, ya ndi̱kaꞌan Ndioxi niꞌi yo nuu ra.

Efesios 2:2

Saa ndi̱xiyo ndo yachi, i̱kan ni ndo ya väꞌa xaꞌa ya xi̱ndikun ndo ichí taꞌan ya ndíkun na ñuu ivi yóꞌó, ta xa̱a súvi ndo ya ndi̱kaꞌan kiti nǎꞌa, kiti xáꞌnda chiñu nuu ndiꞌi tachi nduvaꞌa xiꞌin ndo, ta nda vitin ta xáꞌnda chiñu yaa va ri nuu naꞌa, na köo xíin kuni soꞌo ya káꞌan Ndioxi.

Efesios 4:22

Xaꞌa ya ñaa kua köo ka ndo tá kuꞌva ndi̱xiyo ndo yachi. Vaꞌa sindoo ndaꞌa ndo kuꞌva yata ya ndi̱xiyo ndo, chi ya ikán ta kúni ya sindaꞌvi ya ndóꞌo̱ ya xaa súvi ndo ya kúni mií ya.

Colosenses 1:21

Sundi tá yachi ta ndi̱xiyo xíka ni ndo nuu Ndioxi, ndi̱saa ni ini ndo xi̱ni ndo ra xaꞌa ya köo vaꞌa ndíkani ini ndo, saa i̱kan ni ndo ya väꞌa nuu ra. Sundi vitin ta xa ndi̱kitaꞌan mani ndo xiꞌin ra

1 Tesalonicenses 4:13

Ñani yo xiꞌin kuꞌva yo, kúni nde ná kundaa ini ndo xaꞌa na taꞌan yo na xa ndi̱xiꞌi, ya ná küsuchi ni ini ndo xaꞌa na tá kuꞌva kúsuchi ini naꞌa, na köo xíni Tata yo Jesucristo, chi na ikán ta ni köo xíni na unkua kundoꞌo na.

1 Tesalonicenses 5:6

Yakan kua ná köo yo tá kuꞌva íin naꞌa, na kíxi. Xíniñuꞌu yo kundito yo. Küsun yo tá íkan naꞌa, na köo íyo ndúví, ná kundito yo, ta ná koo kaxin teꞌe ini yo.

1 Timoteo 6:9

Chi naꞌa, na kúni ndukuika ni ñuu ivi yóꞌó, ta ìyo ni sindaꞌvi ya väꞌa na, saa koyo na nuu kuachi, chi kuaꞌa ni ya väꞌa ndíkani ini na xaꞌa ta ni süvi ya ndáa yáꞌvi kua, takua sítivi na mií na xiꞌin ya, ta xáa na kuaꞌan na ichí nuu ndiꞌi xaꞌa na.

Tito 3:3

Chi saa ndi̱xiyo yo yachi tá täꞌan ndikundikun yo ichí Tata yo Jesucristo: kíꞌvi ni ndi̱xiyo ini yo, ikú ni ndi̱xiyo yo, tá íin yo nda̱ñuꞌu saa ndi̱xiyo yo nuu Ndioxi, ta xi̱nuꞌni yo ndaꞌa ndiꞌi kuachi ya ku̱too ni ikin kuñu yo ikan ya, kuaꞌa ni nuu ya väꞌa i̱kan yo, saa kûni ni ini yo xi̱ni yo naꞌa. Ta ndiꞌi naꞌa ndi̱saa ini xi̱ni yoo, ta saa tu yoo va, ndi̱saa ni ini yo xi̱ni yo na.

1 Pedro 1:14

Yachi ta köo ndi̱kundaa ini ndo xaꞌa tuꞌun ra, yakan ke̱ꞌe ndo ya väꞌa nuu ra, sundi vitin ta ndu̱u ndo seꞌe ra, na xáa súvi ni ya kúni ra, yakan köo xíniñuꞌu ka ndo koo ndo tá kuꞌva ndi̱xiyo ndo yachi.

2 Pedro 2:14

Ni küvi kuni nda iin ná síꞌi, chi tá xíto nda nuu ná ta tá káa nda xa kuakiꞌvi xiꞌin va ná saa káa nda, túvi nda. Nina ya kútoo ni ikin kuñu nda kua íkan nda, nduvi niuun ndíkani ini nda xaꞌa ya väꞌa, ni köo xáa ini nda xiꞌin ñaꞌa kúu mií nda. Xaꞌa ya íkan nda saa ta nda xa ndi̱tavi chiꞌña ndu̱u nda.

2 Pedro 2:18

Chi nda ikán ta ndee ni chínuu vaꞌa nda tuꞌun káꞌan nda xiꞌin naꞌa ya sáka nda xi̱ní na, síxinu nda i̱ni na xiꞌin tuꞌun ya káꞌan nda xiꞌin na ndisaa xaꞌa ya kútoo ni mií ikin kuñu nda kua káꞌan nda xaꞌa. Ta na íkan nda saa xiꞌin ku naꞌa, na xa si̱ndoo ya väꞌa i̱kan na, na xa ka̱na koo tañu na väꞌa ku na íkan nda saa xiꞌin.

1 Juan 2:16

Saa chi kuꞌva íyo na ñuu ivi yóꞌó ta süvi tá kuꞌva kúni Ndioxi kua, kuꞌva kúni mií va na kua, tá kúu xíni yo sava ná síꞌi ta ndikun ndíkani väꞌa ini yo xiꞌin ná, saa tu ya kúni yo ndiꞌi ñaꞌa ya luvi ni náꞌa íyo ñuu ivi yóꞌó, ta saa tu ya kútai ni ini yo xiꞌin ñaꞌa yo, ndiꞌi ya yóꞌó ta süvi ndaꞌa Ndioxi vaxi ya. Ñaꞌa íyo ivi yóꞌó va kua.

1 Juan 2:8

Sundi tá káa ya xa̱á káa tuꞌun yóꞌó. Ta kúndaa ini yo ya ndixa ku ya, saa chi Jesucristo ku ra xa̱a súvi ya. Ta saa tu ndóꞌo̱ ndíkun sata va ra xáa ndo lucha síxinu ndo ya. Chi ya naá, ya väꞌa ta yáꞌa ya kuaꞌan ya, ta xa vaxi ndíyeꞌe ya ndaa.