Efesios 2:2 - Xochapa Mixteco

² Saa ndi̱xiyo ndo yachi, i̱kan ni ndo ya väꞌa xaꞌa ya xi̱ndikun ndo ichí taꞌan ya ndíkun na ñuu ivi yóꞌó, ta xa̱a súvi ndo ya ndi̱kaꞌan kiti nǎꞌa, kiti xáꞌnda chiñu nuu ndiꞌi tachi nduvaꞌa xiꞌin ndo, ta nda vitin ta xáꞌnda chiñu yaa va ri nuu naꞌa, na köo xíin kuni soꞌo ya káꞌan Ndioxi.

Efesios 2:2 Iomraidhean Croise

San Mateo 11:19

Ta yeꞌe Taa ra xa̱a ñuu ivi yóꞌo, xíxi vaꞌa i ta xíꞌi i vinu. Ta káꞌan ndo xaꞌa i kini ni xíxi i tin xíꞌi i, saa kútoo ni i koo migo i naꞌa, na ndíkaya xuꞌun nuu gobierno, xiꞌin na köo káñuꞌu Ndioxi, káchi ndo xaꞌa i. Ta ndiꞌi na kúu mií ya ndíchi vaxi nuu Ndioxi, na yóꞌó ku na íkan ya vaꞌa ―káchi Jesús xiꞌin na.

San Mateo 13:22

Ta ndikin ya ndi̱koyo tañu iñu ku ya káꞌan xaꞌa na xíni soꞌo tuꞌun Ndioxi, saa ndíꞌi ni ini na xaꞌa chiñu íyo ñuu ivi yóꞌó, án kúni na ndukuika ni na, ta ndiꞌi ya yóꞌó ta síndiꞌi xaꞌa ya tuꞌun Ndioxi ya xi̱ni soꞌo na, ta köo táxi ya kuaꞌnu tuꞌun ra nima na.

San Mateo 13:38

Ta ñuꞌú nuu chi̱ꞌi ra trigo kúu ñuu ivi yóꞌó. Ta ndikin trigo ku ya káꞌan xaꞌa naꞌa, na xíka ichí nuu xáꞌnda chiñu Ndioxi. Iku ya väꞌa ku ya káꞌan xaꞌa naꞌa, na ndíkun ichí kiti nǎꞌa.

San Marcos 4:19

sundi ndíꞌi ni ini na xaꞌa chiñu íyo ñuu ivi yóꞌó saa xáa na xáa chiñu ni na ya kúni na kuu mií na kuaꞌa ni ya kuika ñuu ivi yóꞌó, ñaa síndiꞌi xaꞌa ya tuꞌun Ndioxi íyo nima na.

San Lucas 16:8

Saa tá ku̱ndaa ini ra kuika ikán ta ndi̱kaꞌan vaꞌa ra, xaꞌa ya i̱kan moso ra. Yakan káꞌan i xiꞌin ndo na kuäꞌan ichí Ndioxi ta xíni ni na ndá kuꞌva ikan na ya ndikitaꞌan vií na xiꞌin naꞌa, listo ni ka na ikán nuu na xíni Ndioxi ―káchi Jesús.

San Lucas 22:31

Saa ndi̱kaꞌan Jesús xiꞌin ra Pedro, káchi ra saa: ―Yóꞌo̱, Simón Pedro, kuni soꞌo vaꞌa un ya káꞌan i xiꞌin un, chi kiti nǎꞌa, kiti Satanás ta xa ndu̱ku ri ichí nuu Ndioxi ya koto ndoso ri ndiꞌi ndo. Tá íkan naꞌa xiꞌin trigo na kísi niꞌnu na ya, saa ikan ri xiꞌin ndo.

San Juan 12:31

Vitin kua ti̱ndaa kivi ya taxi Ndioxi kuachi xaꞌa na ñuu ivi. Ta kindaa ra ichí ndaꞌa kiti nǎꞌa, ri xáꞌnda chiñu ñuu ivi yóꞌó, keta ri kuꞌun ri.

San Juan 13:2

Saa ku̱u ndi̱kunduꞌu Jesús kuxini ra xiꞌin nda ítaꞌan xiꞌin ra, ta xa sikaꞌán va kiti nǎꞌa ini ra Judas Iscariote seꞌe ra Simón, ya ná nditaxi ra Jesús ndaꞌa na sáa ini xíni ra.

San Juan 13:27

Ta tá ndi̱kiꞌin soꞌva ra Judas ikán xita vaꞌa xi̱xi ra, ta ndikun ndi̱kiꞌvi kiti nǎꞌa nima ra. Saa ndi̱kaꞌan Jesús xiꞌin ra, káchi ra saa: ―Chiñu ya xaa súvi un, ta vaꞌa kama xaa súvi un ya ―káchi Jesús xiꞌin ra.

San Juan 14:30

’Ta soo uvi ndaa tuꞌun káꞌan i xiꞌin ndo, chi xa vaxi kiti nǎꞌa, kiti xáꞌnda chiñu nuu na ñuu ivi yóꞌó. Ta nda loꞌo köo xáꞌnda chiñu ri nuu yeꞌe.

San Juan 15:19

Tá tu taꞌan na ñuu ivi yóꞌó ku ndo, ta kuꞌvi ini na kuni na ndóꞌo̱, ndikuu. Sundi ndóꞌo̱ ta süvi taꞌan na ku ndo. Chi yeꞌe ta ndi̱kaxin i ndóꞌo̱ ya ndu̱u ndo kuenta mií i. Ta xaꞌa ya ñaa kua kúndasi nuu na xíni na ndóꞌo̱.

San Juan 16:11

Ta suvi mií ya chindee na kundaa ini na saa chi xa ndi̱taꞌnda xaꞌa kiti nǎꞌa, kiti ínuu nuu ndiꞌi tachi nduvaꞌa, ri xáꞌnda nuu na ñuu ivi yóꞌó, ndi̱taꞌnda xaꞌa ri ya ndiꞌi xaꞌa ri.

San Juan 7:7

Chi ndóꞌo̱ ta küvi kundasi nuu na ñuu ivi yóꞌó kuni na ndóꞌo̱, ta yeꞌe kúndasi nuu va na xíni na yeꞌe, chi káꞌan teꞌe i xiꞌin na xaꞌa ya väꞌa íkan na.

San Juan 8:23

Saa ndi̱kaꞌan Jesús xiꞌin nda, káchi ra saa: ―Ndóꞌo̱ ta ndo ivi nìnù yóꞌó va ku ndo, sundi yeꞌe, ta yeꞌe ki̱xi chí ni̱nu ku i. Ndóꞌo̱ ñuu ivi yóꞌó ku ndo, sundi yeꞌe ta süvi yeꞌe ñuu ivi yóꞌó ku i.

San Juan 8:44

Kiti nǎꞌa va ku iva ndo: Seꞌe ri ikán va ku ndóꞌo̱ yakan kúni ndo ikan ndo ya íkan ri ikán. Saa chi ri ikán ta nda tá xaꞌa vi xa̱á ri xáꞌni ri ndìì. Ta nda iin ichí köo íkan ri ya ndaa, ta ni köo káꞌan ri ya ndaa. Tá káꞌan ri ya siki ta ndínaꞌa ri mií ri ya saa íyo ri, ta ri ikán ku iva siꞌí ndiꞌi ya vata.

Los Hechos 19:35

Saa ndi̱kaꞌan ra secretario xiꞌin na ya kutaxin yuꞌu na. Tá ku̱taxin yuꞌu na, saa xa̱á ra káꞌan ra xiꞌin na, káchi ra saa: ―Na taꞌan yo ñuu Éfeso yoꞌo, köo naꞌa köo xíni, chi xa ndiꞌi va na inka ñuu xíni, siꞌí yo yá Diana ku yá ndáa ñuu yo ta saa tu naꞌna va yá chi nuu ndivi ke̱ta ya ndi̱kava nuu ñuꞌú.

Los Hechos 5:3

Ñaa ndi̱kaꞌan ra Pedro xiꞌin ra Ananías, káchi ra saa: ―Tata, ¿ndachu kua i̱kan un saa? Ta̱xi un ndi̱kiꞌvi kiti Satanás nima un ta ku̱ni un sindaꞌvi un Tachi I̱í Ndioxi. Ya yóꞌó ku ndiꞌi xuꞌun ki̱ꞌin un xaꞌa ñuꞌú un, káchi un, ta süvi ya ndaa kua chi ndi̱ndoo ka ya ndaꞌa un.

ROMANOS 12:2

Ta köo ndo tá kuꞌva íyo na ñuu ivi yóꞌó, vaꞌa ka nditaxi ndiꞌi ndo mií ndo ndaꞌa ra ná ndinama ra ya xínituni ndo. Ná nduxaa kuꞌva ndíkani ini ndo. Saa kuchiñu ndo kundaa ini ndo, ta xaa súvi ndo ya kúni mií ra, ta saa kua ikan ndo ya vaꞌa, ya ndaa, ya xáa sini ndo ini ra.

1 Corintios 5:10

Sundi köo ndi̱kaꞌan i xiꞌin ndo xaꞌa na ñuu ivi yóꞌó tá kúu na xíka sii xiꞌin taꞌan, xiꞌin na kútoo ni ya kuika xiꞌin na kuiꞌna xiꞌin na káñuꞌu ndioxi ya ndíi. Chi tá ndíkaꞌan i xiꞌin ndo xaꞌa ndiꞌi na yóꞌó ta xíniñuꞌu ndo kee vaꞌa vi ndo ñuu ivi yóꞌó, ndikuu.

1 Corintios 6:11

Taꞌan ya väꞌa yóꞌó ku ya i̱kan sava ndo yachi. Sundi vitin ta xa ndo̱o kuachi ndo, xa ndu̱u ndo naꞌa, na i̱í, na köo ka kuachi kúu mií nuu Ndioxi. Ta xa ndi̱kuiso vaꞌa ra ndóꞌo̱ tixin ndee Tata yo Jesucristo, saa tu xiꞌin ndee Tachi I̱í mií Iva yo Ndioxi va.

2 Corintios 4:4

Saa ndóꞌo na chi kiti nǎꞌa kúu ndioxi ñuu ivi yóꞌó ku ri ndi̱kasi ya xínituni na ya ná kändixa na tuꞌun vaꞌa xaꞌa Jesucristo ya káꞌan nde xiꞌin na, ta na ikán, tá íin na kuáa̱ saa íin na. Chi köo táxi ri kuni na ya yéꞌe̱ luvi ni kúu mií tuꞌun vaꞌa xaꞌa Jesucristo. Chi mií Jesucristo, tá káa níí mií Ndioxi saa káa ra.

Gálatas 1:4

Chi Tata yo Jesucristo ta ndi̱taxi ra mií ra ndi̱xiꞌi ra xaꞌa kuachi yo, xaꞌa ya saa chi̱tuni mií Iva yo Ndioxi, ya kuchiñu yo kaku yo nuu ya väꞌa, ya xáꞌnda chiñu ñuu ivi yóꞌó, nuu ndóo yo tiempo vitin.

Efesios 1:21

Ta̱xi Ndioxi ichí ndaꞌa Cristo ya kaꞌnda ra chiñu nuu tá kúu ndiꞌi na chiñu naꞌnu xiꞌin na chee xáꞌnda chiñu ñuu ivi yóꞌó án chiñu naꞌnu ya chee xáꞌnda chiñu nuu ndivi tiempo vitin xiꞌin tiempo ya vaxi.

Efesios 2:11

Ta xa kúndaa va ini ndo ya káꞌan na judío, “Naꞌa, na köo tuni Ndioxi kúu mií”, káchi na xaꞌa ndo. Chi káꞌan na xaꞌa mií na ya íyo tuni Ndioxi na, sundi tuni ya káꞌan na xaꞌa ikán ta mií va na chínuu ya xiꞌin ndaꞌa na.

Efesios 2:13

Ta vitin xaꞌa ya xa iin yuꞌu ndu̱u ndo xiꞌin Cristo yakan köo íyo xíka ka ndo nuu Ndioxi, chi Jesucristo ku ra ndi̱xiꞌi xaꞌa ndo yakan vaꞌa ku̱yati ndo nuu Ndioxi.

Efesios 2:3

Saa ndi̱xiyo ndiꞌi va yo yachi: I̱kan ni yo ndiꞌi nuu ñaꞌa ya väꞌa, ya ku̱too ni mií ikin kuñu yo ikan ya. I̱kan yo tá kuꞌva íkan ndiꞌi naꞌa, xa̱a súvi ni yo ndiꞌi ñaꞌa ya ndi̱kani ini yo vaꞌa ni nuu yo, túvi yo. Ta xaꞌa ya ikán kua xíniñuꞌu yo sitixuꞌvi ni Ndioxi yoo, chi sáa ni ini ra xíni ra ya väꞌa íkan yo.

Efesios 4:17

Ta ya yóꞌó kua káꞌan i xiꞌin ndo vitin xaꞌa ichí ya ta̱xi Cristo ndaꞌa i kua xáꞌnda chiñu i nuu ndo, káꞌan i xiꞌin ndo: ïkan ka ndo tá kuꞌva íyo naꞌa, na köo xíni Ndioxi. Saa chi na ikán ta íkan na ya väꞌa tá kuꞌva ndíkani ini mií na.

Efesios 4:22

Xaꞌa ya ñaa kua köo ka ndo tá kuꞌva ndi̱xiyo ndo yachi. Vaꞌa sindoo ndaꞌa ndo kuꞌva yata ya ndi̱xiyo ndo, chi ya ikán ta kúni ya sindaꞌvi ya ndóꞌo̱ ya xaa súvi ndo ya kúni mií ya.

Efesios 5:6

Täxi ndo sindaꞌvi nda iin naꞌa ndóꞌo̱ ya sixinu na ini ndo ikan ndo ndá ka ñaꞌa ya kini ni káa, ya väꞌa ya yakua ya xáa yakua ikin kuñu ndo. Saa chi Ndioxi ta xaa nduvaꞌa ni ra xiꞌin ndiꞌi naꞌa, na köo xíni soꞌo ya káꞌan ra.

Efesios 5:8

Saa chi yachi ta nuu naá va ndi̱xiyo ndo, sundi vitin ta xaꞌa ya ndíkun ndo Tata yo Cristo kua xíka ndo nuu yéꞌe̱. Xaꞌa ya ñaa kua xíniñuꞌu ndo koo ndo tá íin naꞌa, na xíka nuu ñu̱ꞌu̱ yéꞌe̱, nuu túvi.

Efesios 6:12

Ta süvi xiꞌin na taꞌan mií yo kua kánitaꞌan yo, chi xiꞌin tachi nduvaꞌa ya ndee ni naꞌnu tin ndiꞌi ni kúu ya kúu mií chiñu xáꞌnda chiñu ndiꞌi ñaꞌñu xiꞌin ka inka nuu ndiꞌi ndee kiti nǎꞌa ya íyo nuu naá ñuu ivi yóꞌó tin xiꞌin ya íyo nìnu nuu sukun ni ñuu ivi yóꞌó kua kánitaꞌan yo.

Colosenses 1:21

Sundi tá yachi ta ndi̱xiyo xíka ni ndo nuu Ndioxi, ndi̱saa ni ini ndo xi̱ni ndo ra xaꞌa ya köo vaꞌa ndíkani ini ndo, saa i̱kan ni ndo ya väꞌa nuu ra. Sundi vitin ta xa ndi̱kitaꞌan mani ndo xiꞌin ra

2 Timoteo 4:10

Saa chi ra Demas, ta si̱ndoo ndaꞌa va ra yeꞌe, saa ke̱ta ra kuaꞌan ra chí ñuu Tesalónica, xaꞌa ya kútoo ni ra xíni ra ñaꞌa ñuu ivi yóꞌó kua i̱kan ra saa xiꞌin i. Inka ra Crescente, ke̱e kuaꞌan chí Galacia. Inka ra Tito, ke̱e kuaꞌan chí Dalmacia.

Santiago 1:27

Sundi ya vaꞌa ni va ku ichí Iva yo Ndioxi, ta ndiꞌi ndóꞌo̱, na ndíkun ra ta ya ndee ni xíniñuꞌu ndo ikan ndo nuu ra kua yóꞌó: Ná chindee taꞌan ndo xiꞌin na ndaꞌví vali, saa ná chindee taꞌan tu ndo xiꞌin ná síꞌi ná ndi̱ndoo ndaa, ta ná chindee ñaꞌa ndo xaꞌa tindoꞌo ya ndóꞌo ná, saa ná kundaa ni ndo mií ndo, ya ná ïkan ndo ya väꞌa taꞌan ya íkan na ñuu ivi yóꞌó.

Santiago 1:7

Ta naꞌa, na xíka uvi ini, ta vaꞌa ka ná ndüku na ya nuu ra, chi ya mani uun va kua ndúku na ya, köo ñaꞌa niꞌi vi na nuu Tata yo.

Santiago 4:4

¡Ndóꞌo̱, ta süvi ndóꞌo̱ kúꞌvi ini xíni Ndioxi ku ndo! ¿Án köo xíni ndo ndiꞌi naꞌa, na kútoo ni ikan taꞌan ñaꞌa íkan na ñuu ivi yóꞌó, na ñaa ta na káni taꞌan xiꞌin Ndioxi ku na? Saa chi ndiꞌi naꞌa, na kútoo ni ikan ya väꞌa íkan na ñuu ivi yóꞌó, ta ndúu na naꞌa, na sâa ini xíni Ndioxi.

1 Pedro 1:14

Yachi ta köo ndi̱kundaa ini ndo xaꞌa tuꞌun ra, yakan ke̱ꞌe ndo ya väꞌa nuu ra, sundi vitin ta ndu̱u ndo seꞌe ra, na xáa súvi ni ya kúni ra, yakan köo xíniñuꞌu ka ndo koo ndo tá kuꞌva ndi̱xiyo ndo yachi.

1 Pedro 4:3

Ta ndóꞌo̱ xa kuaꞌa ni tiempo ndi̱xika ndo tá kuꞌva xíka naꞌa, na köo kándixa Ndioxi ndóo ñuu ivi yóꞌó, ndi̱xika sií ndo xiꞌin ná síꞌi ta süvi ná síꞌi ndo ku ná, saa ná síꞌi ndi̱xika sií ná xiꞌin taa, ta süvi ií ná ku nda. Ndiꞌi nuu ya väꞌa kúni mií ndo i̱kan ndo. Ndee ni xi̱ꞌi ndo, ndakua ndi̱xini mií ndo ndi̱xika ndo, ta i̱kan ndo ya kaꞌa̱n ni nuu, ndi̱xika ndo nuu viko xa̱a kaꞌnu ndo ndioxi ya ndíi, ya köo kúu Ndioxi ndinuꞌu.

2 Pedro 2:14

Ni küvi kuni nda iin ná síꞌi, chi tá xíto nda nuu ná ta tá káa nda xa kuakiꞌvi xiꞌin va ná saa káa nda, túvi nda. Nina ya kútoo ni ikin kuñu nda kua íkan nda, nduvi niuun ndíkani ini nda xaꞌa ya väꞌa, ni köo xáa ini nda xiꞌin ñaꞌa kúu mií nda. Xaꞌa ya íkan nda saa ta nda xa ndi̱tavi chiꞌña ndu̱u nda.

1 Juan 3:10

Soꞌva ku nuu kúndaa ini yo xiꞌin na kúu seꞌe Ndioxi tin na kúu seꞌe kiti nǎꞌa. Ndiꞌi na köo íkan ya ndaa xiꞌin na köo kúꞌvi ini xíni taꞌan, ta süvi seꞌe Ndioxi ku na.

1 Juan 3:8

Na köo xíin sindoo ya väꞌa, na ikan ku seꞌe kiti nǎꞌa, chi kiti nǎꞌa nda kivi xaꞌa vi i̱kan ri ya väꞌa yakan kua ki̱xi Seꞌe Ndioxi si̱ndiꞌi xaꞌa ra ya íkan ri.

1 Juan 4:4

Ñani yo, kuenta Ndioxi ku yo ta xa ku̱chiñu yo nuu na sáa ini xíni Tata yo, saa chi ndee ni ka Ndioxi ra íyo xiꞌin yo nuu tachi nduvaꞌa ya xáꞌnda chiñu nuu na ñuu ivi yóꞌó.

1 Juan 5:19

Xíni yo seꞌe Ndioxi ku yoo ta ndáa ra yoo. Ta ndiꞌi ka naꞌa, na köo ndíkun ñaꞌa, ta kiti nǎꞌa ku ri xáꞌnda chiñu nuu na.

1 Juan 5:4

Saa chi ndiꞌi yo kúu seꞌe Ndioxi, ta kúchiñu yo nuu ya väꞌa íyo ñuu ivi yóꞌó. Xaꞌa ya ndáa ni ini yo Ndioxi xiꞌin Tata yo Jesucristo yakan vaꞌa kúchiñu yo nuu ya väꞌa.

El Apocalipsis 12:9

Ta tatun ya íyo xiꞌin Ndioxi ta̱va ya kiti koó nǎꞌa xiꞌin ndiꞌi tachi nduvaꞌa ya íyo xiꞌin ri. Ta̱va ya ri ki̱ꞌin ñaꞌa ya si̱koyo ya nda nuu ñuꞌú. Ta kiti ko̱ó nǎꞌa ikán ku ko̱ó yata ni, ta inka kivi ri kua Satanás án kiti Timiaꞌan. Ta suvi mií ri ku ri síndaꞌvi ndiꞌi ni kúu na ñuu ivi.

El Apocalipsis 13:14

Saa si̱ndaꞌvi ri uvi ikán ndiꞌi na ndóo ñuu ivi yóꞌó xiꞌin yatuꞌun íkan ri. Ta xiꞌin yuꞌu mií kiti núnu̱ú ikán kua íkan kiti uvi ikán yatuꞌun nuu naꞌa. Saa xa̱ꞌnda chiñu kiti uvi ikán chiñu nuu naꞌa ya sikuaꞌa na naꞌna kiti núnu̱ú, ri ìyo ni ndi̱taꞌnda xiní xiꞌin i̱chi ta ndi̱taku tuku ri.

El Apocalipsis 13:8

Saa xáa kaꞌnu ndiꞌi naꞌa, na ndóo ñuu ivi kiti ikán. Na ikán, ta köo kivi na ndóso nuu tutu i̱í kúu mií kiti Levo loꞌo nuu ndivi. Chi Levo loꞌo ikán ku ri ndi̱soko xiꞌin mií, ya ndi̱xiꞌi ri. Saa chi̱tuni Ndioxi ikan ra tá täꞌan sikuaꞌa ra ñuu ivi.

El Apocalipsis 16:17

Saa ndi̱so ndee tatun ya uxa copa níꞌi ya nuu ndáchi tachi kuaꞌan ya. Ta ini veꞌe ñuꞌu kaꞌnu nuu ndivi nuu ndíchi tai toꞌo chee ikán, ke̱ta tuꞌun ya ndee ni káꞌan na, káchi ya saa: ¡Xa ndi̱xinu ndiꞌi chiñu vitin! ―káchi ya.

El Apocalipsis 20:2

Saa ti̱in tatun ikán kiti ko̱ó nǎꞌa, ri kúu ko̱ó yata. Ri ikán ku kiti nǎꞌa ri ínuu nuu ndiꞌi tachi nduvaꞌa, ta Satanás ku kivi ri ikán. Saa ka̱tun tatun ri xiꞌin cadena níꞌi ya, ya kunuꞌni ri iin mil kuiya.