1 Juan 5:4 - Xochapa Mixteco

⁴ Saa chi ndiꞌi yo kúu seꞌe Ndioxi, ta kúchiñu yo nuu ya väꞌa íyo ñuu ivi yóꞌó. Xaꞌa ya ndáa ni ini yo Ndioxi xiꞌin Tata yo Jesucristo yakan vaꞌa kúchiñu yo nuu ya väꞌa.

1 Juan 5:4 Iomraidhean Croise

San Juan 1:13

Ta mií ya ndaa seꞌe Ndioxi ndúu na, chi köo ndi̱kaku na tá kuꞌva káku seꞌe iin taa xiꞌin iin ñaꞌa. Sundi ka̱ku na tá kuꞌva kúni mií Ndioxi.

San Juan 16:33

Soꞌva káꞌan i xiꞌin ndo ya ná kündiꞌi ini ndo, ta tuun ni kundikun ndo yeꞌe saa koo vaꞌa ni ini ndo. Saa chi kixi ni tindoꞌo nuu ndo ñuu ivi yóꞌó, sundi kundaa ni ini ndo kuni ndo yeꞌe, saa chi yeꞌe ta xa ku̱chiñu i xa̱a kanaa i ñuu ivi yóꞌó ―káchi Jesús.

San Juan 3:3

Saa ndi̱kuiin Jesús káꞌan ra: ―Ya ndaa ni káꞌan i xiꞌin un, ndiꞌi na täꞌan kaku uvi, ta küchiñu na kiꞌvi na nuu xáꞌnda chiñu Ndioxi ―káchi Jesús xiꞌin ra.

1 Corintios 15:57

¡Sundi ndixaꞌvi ni Ndioxi chi ku̱chiñu yo nuu kuachi ya xáꞌni yoo xaꞌa ya i̱kan Tata yo Jesucristo!

1 Juan 2:29

Xa xíni yo Tata yo Jesucristo ku ra vaꞌa ni, ra ndaa ni ini, yakan ndiꞌi naꞌa, na íkan ya ndaa, ta na ñaa ku na kúu seꞌe Ndioxi.

1 Juan 3:9

Ndiꞌi na kúu seꞌe Ndioxi ta köo íkan ka na ya väꞌa, chi Ndioxi ta xa íyo ra nima na, yakan küvi ka ikan na ya väꞌa, chi na xa ndi̱kaku uvi ku na i̱kan ra, ndu̱u na seꞌe ra.

1 Juan 4:4

Ñani yo, kuenta Ndioxi ku yo ta xa ku̱chiñu yo nuu na sáa ini xíni Tata yo, saa chi ndee ni ka Ndioxi ra íyo xiꞌin yo nuu tachi nduvaꞌa ya xáꞌnda chiñu nuu na ñuu ivi yóꞌó.

1 Juan 5:1

Ndiꞌi na kándixa ya ti̱ꞌvi Ndioxi Jesús ki̱xi ra sikaku ra yoo, ta na ikán ta seꞌe Ndioxi ndu̱u na. Ndiꞌi na kúꞌvi ini xíni Iva yo, ta kúꞌvi tu ini na xíni na ndiꞌi seꞌe va ra.

1 Juan 5:18

Ta yoo ndixa ndíkun Iva yo Ndioxi ta küvi ikan yo ya väꞌa tutuku tutuku. Saa chi ndáa Jesucristo Seꞌe Ndioxi mií yo ndíkun ñaꞌa. Ta täxi ra ndikava ndikuu yo ndaꞌa kiti nǎꞌa.

1 Juan 5:5

Ndiꞌi na kándixa Jesús ya kúu ra Seꞌe Ndioxi, na ikán ku na kúchiñu nuu ya väꞌa íyo ñuu ivi yóꞌó.

El Apocalipsis 12:11

Sundi vitin ta xa ku̱chiñu na nuu ri. Saa chi kiti Levo loꞌo ikán ndi̱taxi ri mií ri xaꞌa na ta nií ri ikán ku rá ta̱xi ndee ndaꞌa na. Ta saa tu tuꞌun ya ndaa, ya ndíkuiin na xaꞌa Tata yo Jesucristo, ta̱xi ya ndee ndaꞌa na. Xaꞌa uvi ndee yóꞌó kua ku̱chiñu na ku̱ndee na nuu kiti nǎꞌa. Ta nda loꞌo köo ndi̱ndiꞌvi na kuvi na, ta̱xi ndiꞌi na mií na ya kuvi na xaꞌa ya kándixa na Ndioxi.

El Apocalipsis 15:2

Saa xi̱ni i inka ñaꞌa tá káa yuyu yéꞌe̱ ni saa káa nduta ñûꞌu xi̱ni i, ta sáka ñu̱ꞌu̱ xiꞌin rá. Ta yuꞌu nduta ñûꞌu ikán ndíta kuaꞌa ni naꞌa na xa ku̱chiñu nuu kiti ìyo ni káa ikán, ta ni köo ndi̱xaa kaꞌnu na naꞌna ri ya ndíchi, saa ni köo ndi̱taxi na ndikunuu sello ri taan na án ndaꞌa na ya kúu mií número ya ndítuꞌun xaꞌa unkua náni ri. Saa ndíta na nuu nduta ñûꞌu yéꞌe̱ ni tá káa yuyu ya yeꞌe ni ikán, ñaa ta̱xi Ndioxi itun arpa ndaꞌa iin iin na.

El Apocalipsis 2:11

Ndiꞌi ndóꞌo̱ kándixa yeꞌe, ta kuni soꞌo ni ndo ya káꞌan Tachi I̱í Ndioxi xiꞌin ndo. Ndiꞌi ndóꞌo̱, na kúchiñu nuu ya väꞌa, xaꞌa ya köo síndikoo ndo ichí i. Ndóꞌo̱ ta küvi ndo nuu Ndioxi, vani kuvi ndo ñuu ivi yóꞌó ndiꞌi xaꞌa ikin kuñu ndo, sundi küvi ndo ichí uvi, kutaku ya vaꞌa ndo koo ya xiꞌin Ndioxi ―káchi Tata yo Jesucristo.

El Apocalipsis 2:17

Ndiꞌi ndóꞌo̱ íyo soꞌo ta kuni soꞌo ni ndo ya káꞌan Tachi I̱í Ndioxi xiꞌin ndo. Ndiꞌi ndóꞌo̱, na kúchiñu nuu ñaꞌa ya väꞌa, xaꞌa ya köo síndikoo na ichí i, ta taxi i xita vaꞌa ya íyo sêꞌe kuxi na, xita vaꞌa yóꞌó náni ya maná ya ke̱e nuu ndivi. Saa taxi i iin yu̱ú yaa ndaꞌa iin iin na ikán, ta nuu yu̱ú ikán kunuu kivi na ya xa̱á. Ta nda iin naꞌa kündaa ini unkua ku kivi xa̱á iin iin na, iindaa mií na kundaa ini unkua ku kivi na ya xa̱á ―káchi Tata yo Jesucristo.

El Apocalipsis 2:26

Ndiꞌi naꞌa, na kúndee nuu ya väꞌa, xaꞌa ya ndíkun na yeꞌe, ta xáa súvi na ya kúni i ndiꞌi saa kivi. Na ñaa ku na taxi i ichí ndaꞌa ya kaꞌnda chiñu na nuu ndiꞌi naꞌa, na ndóo ndiꞌi ni kúu xaꞌa ñuu ivi yóꞌó.

El Apocalipsis 2:7

Ndiꞌi ndóꞌo̱ kándixa yeꞌe, ta kuni soꞌo ni ndo tuꞌun ya káꞌan Tachi I̱í Ndioxi xiꞌin ndo. Ndiꞌi ndóꞌo̱ na kúchiñu nuu ndee ya väꞌa, ndóꞌo̱ köo síndikoo ichí i, ta ndaꞌa ndóꞌo̱ kua taxi i kuiꞌi kaxi ndo, kiti kúun ndaꞌa itun ndíchi maꞌñu corra Ndioxi nuu luvi ni káa. Ta kuiꞌi ikán ku ri táxi ichí ndaꞌa ndo ya koo ndo ndiꞌi saa kivi ya vaxi xiꞌin Ndioxi ―káchi Jesucristo xiꞌin i.

El Apocalipsis 3:12

Ndiꞌi naꞌa, na kúchiñu nuu ya väꞌa, xaꞌa ya köo síndoo na ichí i, ta taxi i ichí ndaꞌa na, nduu na naꞌa, na ndee ni, na xíniñuꞌu ni ini veꞌe ñuꞌu Ndioxi nuu ndivi. Tá kuꞌva ndíso ni itun ndíso xiní veꞌe, kuꞌva saa koo na ikán. Ta veꞌe ñuꞌu Ndioxi ikán koo na ndiꞌi saa kúu kivi. Ta chinuu i kivi Ndioxi, ra xáa kaꞌnu i sata iin iin na. Saa chinuu i kivi ñuu Ndioxi, ñuu Jerusalen ya xa̱á, sata iin iin na. Ta chinuu tu i kivi mií va i ya xa̱á, chinuu i ya sata iin iin na.

El Apocalipsis 3:21

Ndiꞌi naꞌa, na kúchiñu nuu ya väꞌa, xaꞌa ya köo síndoo na ichí i, ta yeꞌe taxi i koo na xiꞌin i nuu ndivi ya kaꞌnda chiñu na xiꞌin i. Saa chi yeꞌe ta xa ku̱chiñu i nuu ya väꞌa, yakan ta̱xi Iva i Ndioxi ichí ndaꞌa i ndi̱kunduꞌu i xiꞌin ra ñaꞌñu kuáꞌá ra, íyo i xáꞌnda chiñu i xiꞌin ra.

El Apocalipsis 3:5

Ndiꞌi naꞌa, na kúndee nuu ya väꞌa, ta ndinuꞌu ni ini na ndíkun na yeꞌe, ta taxi i toto yaa kundixi na, ta ndïkata i kivi na nuu tutu i, nuu xa ndi̱kaꞌi kivi na ya koo na xiꞌin Ndioxi ndiꞌi saa kivi. Ta kaꞌan ndoso i nuu Ndioxi tin nuu na tatun ra xaꞌa na yóꞌó, kachi i saa: “Na yóꞌó ku na kutaku xiꞌin i”, kachi i xaꞌa na.