1 Juan 3:3 - Xochapa Mixteco

³ Ta ndiꞌi na ndinuu ni ndátun ya ndiko koo ra ndisama ra na, ta ndíkundee ni na xinu koo na nduu na tá kuꞌva íyo mií ra, saa chi ra i̱í ku ra.

1 Juan 3:3 Iomraidhean Croise

San Mateo 5:48

Xaꞌa ya ñaa kua ná koo ndo naꞌa, na ndaa ini, tá kuꞌva íyo Iva yo Ndioxi ra i̱í, ra ndaa ini ―káchi Jesús xiꞌin na.

San Lucas 6:36

Kundaꞌvi ini ndo kuni ndo ndiꞌi naꞌa, saa chi Iva yo Ndioxi ta kúndaꞌvi ni ini ra xíni ra ndóꞌo̱.

San Juan 17:19

Xa ndi̱taxi ndiꞌi i mií i ndaꞌa un ya xaa súvi i ya kúni un, ta saa na ndíkun yeꞌe ná nditaxi ndiꞌi na mií na ya xaa súvi na ya kúni un tixin ya ndaa ni kúu mií un.

Los Hechos 15:9

Chi nuu Ndioxi ta iin ndáa yaꞌvi ndiꞌi va yo. Tá kúꞌva nda̱sa yaa ra nima yoo saa nda̱sa yaa tu ra nima na ikán va, xaꞌa ya ndáa ini na xíni na ra.

ROMANOS 15:12

Saa ndi̱kaꞌan tu ra Isaías va xaꞌa ya yóꞌó, káchi ra saa: Tixin iin na veꞌe ra kúu seꞌe ñani sikua ra Isaí kua keta iin taa ra kaꞌnda chiñu nuu ndiꞌi ni kúu na ñuu ivi. Ta ndiꞌi ni kúu na ñuu ivi kundaa ni ini na kuni na ra ikán.

2 Corintios 7:1

Ta saa ñani mani yo, xa ndi̱kaꞌan Ndioxi xiꞌin yo ya ki̱ndoo ra xiꞌin yo, yakan ná kundaa ni yo mií yo, ná kuxika yo nuu ndá ka ñaꞌa väꞌa, ya xáa yakua ikin kuñu yo xiꞌin ya vaꞌa yo. Ná nditaxi ndiꞌi yo mií yo ndaꞌa Ndioxi, ya xaa toꞌo yo ra, saa kua nduu yo na i̱í nuu ra.

Colosenses 1:5

Íkan ndo saa ndáa ni ini ndo Ndioxi, saa kúꞌvi ni ini ndo xíni ndo ra chi ku̱ndaa teꞌe ini ndo ya niꞌi ndo ñaꞌa nuu ra, ya chi̱vaꞌa ra xaꞌa ndo nuu ndivi. Chi xa ku̱ndaa teꞌe ni ini ndo tá xi̱ni soꞌo ndo tuꞌun vaꞌa ya ndaa ni xaꞌa Tata yo Jesucristo.

2 Tesalonicenses 2:16

Ta mií Tata yo Jesucristo xiꞌin mií Iva yo Ndioxi ku ra kúꞌvi ni ini xíni yoo, saa si̱ndiko ra ini yo ndiꞌi saa kúu ichí, ta ndixaꞌa ni ra ndee xiꞌin yo ya ndee ni tuun kundikun yo ra, xaꞌa ya vaꞌa ni ini ra xiꞌin yo.

Tito 3:7

Saa nda̱sa vaꞌa ra yoo, ndu̱u yo tá íin naꞌa, na köo ka kuachi kúu mií nuu ra, xaꞌa ya vaꞌa ni ra xiꞌin yo kua i̱kan ra saa xiꞌin yo. Ta saa kúsini ni yo chi kúndaa teꞌe ini yo ya niꞌi yo nuu taxi Ndioxi ndaꞌa yo koo yo xiꞌin ra ndiꞌi saa kivi ya vaxi.

HEBREOS 12:14

Ta nduku ndo kuꞌva ya koo vaꞌa ni ndo xiꞌin ndiꞌi naꞌa. I̱í ni koo ndo, saa chi tá tu köo i̱í ini ndo ta küchiñu ndo kuni ndo Ndioxi. Ta ni nda iin naꞌa, ta küchiñu na kuni na ra, tá tu kéꞌe na ya väꞌa.

HEBREOS 6:18

Uvi nuu ku ñaꞌa ya ki̱ndoo Ndioxi xaa súvi ra: iin ku ya ki̱ndoo ra xiꞌin naꞌa xaa súvi ra ya ndi̱kaꞌan ra xiꞌin na, ta inka kua chi̱naꞌa ra tixin mií ra ya sixinu ra ya ki̱ndoo ra xiꞌin na. Xaꞌa ya ikán kua vaꞌa ná kandixa ni yo ra, ta ná kuyati yo nuu ra ya chindee ra yoo, saa ná kundaa teꞌe ini yo ya ndikiꞌin yo ya ndi̱kaꞌan ra xiꞌin yo taxi ra ndaꞌa yo.

HEBREOS 7:26

Jesús ku ra ku sutu chee ni ka, ra ndee ni xíniñuꞌu yo. Saa chi ra ikán ta ra i̱í ni ku ra, nda iin kuachi ni ya väꞌa köo ndi̱kan ra, ta köo íyo yuꞌu ra xiꞌin na íkan kuachi, saa nda̱a ra kuaꞌan ra nuu ndivi, ta sukun ni ka nda̱a ra kuaꞌan ra.

Santiago 4:8

Ta vaꞌa kuyati ndo nuu Ndioxi saa kuyati ra nuu ndo. Ta ndóꞌo̱ íyo kuachi, kukuiin ndo xiꞌin ya väꞌa kéꞌe ndo, ndikata ndo ndaꞌa ndo. Saa tu ndóꞌo̱ uvi ini këꞌe ka ndo saa, ndasa vaꞌa ndo nima ndo ná nduvií ndo.

1 Pedro 1:15

Ya vaꞌa ni ka kua ná nduu ndo naꞌa, na i̱í ni, ta kuꞌva saa xaa súvi ndiꞌi ndo chiñu ya íkan ndo, chi Ndioxi ra ka̱na ndóꞌo̱ kundikun ndo ra, ta i̱í ni ra.

1 Pedro 1:3

Ta ná xaa kaꞌnu yo Iva yo Ndioxi ra kúu Iva Tata yo Jesucristo, saa chi kúndaꞌvi ni ini ra xíni ra yoo, ta yakan ta̱xi ra ndi̱kaku uvi tuku yo xaꞌa ya ndi̱taku Tata yo Jesucristo tañu na ndíi, saa kua ta̱xi ra ya kúndaa teꞌe ini yo

2 Pedro 1:4

Tixin ya yóꞌó kua ndi̱niꞌi yo ya luvi ni, ya yáꞌa ni chee ndi̱kaꞌan ra taxi ra ndaꞌa yo, nuu xinu yo koo yo tá kuꞌva káa mií ra, i̱í ni ra. Saa kua kuchiñu yo kunu yo nuu kaku yo nuu ndiꞌi ya väꞌa íyo ñuu ivi yóꞌó, chi ndisaa ya väꞌa kútoo ni mií ikin kuñu na kua íkan na.

2 Pedro 3:14

Xaꞌa ya ñaa kua, nani ndátun yo kuu saa, ñani mani, ta yáꞌa ni vi kuenta koo ndo xiꞌin mií ndo, täxi ndo kuyakua ndo xiꞌin kuachi, vií ni koo ndo xiꞌin Ndioxi.

1 Juan 2:6

Ndiꞌi na káꞌan, ítaꞌan vaꞌa na xiꞌin Jesucristo káchi na, ta xíniñuꞌu na koo na tá kuꞌva ndi̱xiyo mií Jesucristo ñuu ivi yóꞌó.

1 Juan 4:17

Tá ndixinu yo ndinuu kúꞌvi ini yo xíni yo Ndioxi xiꞌin na taꞌan yo, ta ku ïꞌvi yo nuu ra kivi xaa nani ra kuachi yo. Chi tá íyo mií Jesucristo saa íyo yo kivi xíka yo ñuu ivi yóꞌó.